प्रधानमंत्री आवास योजना
केंद्र सरकार ह प्रधानमंत्री शहरी आवास योजना के तहत तीन लाख इकसठ हजार मकान बनाये बर सात सौ आठ प्रस्ताव मन ल मंजूरी दे दे गेहे। नई दिल्ली म आयोजित केंद्रीय मंजूरी अउ निगरानी समिति के बइठका म ये फैसला ले गीस। बइठका म तेरा राज्य अउ केंद्र शासित प्रदेश के प्रतिनिधि मन भाग लीन।
केंद्रीय आवास अउ शहरी मामला के मंत्रालय म सचिव दुर्गा शंकर मिरज्ञ ह अवार्ड्स-2021 – सौ डेज चैलेंज मिशन – के घलो शुरूआत करीन।
प्रधानमंत्री शहरी आवास योजना के तहत अब तक कुल एक करोड़ बारा लाख चालीस हजार मकान बनाये बर मंजूरी दे जा चुके हे। एमा ले बंयासी लाख पचास हजार मकान बनाये के काम चलत हे अउ अड़तालिस लाख इकतीस हजार मकान लाभार्थी मन ल दे गेहे।
केन्द्र टीका
केंद्र सरकार वैक्सीन बनइया मनलेे पचहत्तर प्रतिशत कोविड टीका लीही। ये टीका राज्य अउ केंद्र शासित मन ल निशुल्क दे जाही। केंद्रीय स्वास्थ्य मंत्रालय ह काली राष्ट्रीय कोविड टीकाकरण कार्यक्रम लागू करे बर संशोधित दिशा-निर्देश जारी करे हे। ये दिश निर्देश इक्कीस जून ले प्रभावी होही। संशोधित दिशा निर्देश के अनुसार राज्य अउ केंद्र शासित प्रदेश मन ल जनसंख्या, बीमारी अउ टीकाकरण के प्रगति के आधार उपर टीका के आवंटन करे जाही।
कोरोना समाचार
प्रदेस म कोरोना संक्रमण के दर सरलग कम होवत हे। राज्य म संक्रमित मनके दर ह गिरके दू दशमलव दू प्रतिशत होगे हे। काली होय अड़तालिस हजार चार सौ सैंतालिस सैंपल के जांच म एक हजार एक सौ दू लोगन मन संक्रमित पाए गीस हे। उंहें प्रदेश म रिकवरी दर घलो छियानबे प्रतिशत ले जादा हेागे हे। प्रदेश म अब तक नौ लाख अस्सी हजार ले जादा मरीज ठीक होगे हे। एमा ले करीबन अस्सी प्रतिशत मरीज मन ह होम आइसोलेशन म इलाज कराके कोरोना ल मात दे हवय।
एति, दुर्ग जिला म कोरोना संक्रमित के दर एक प्रतिशत ले घलो कम होगे हे। जिला म काली दू हजार आठ सौ दू सैंपल के जांच करे गीस, जेमा सत्ताईस झिन नवा संक्रमित मरीज मिले हे। ओमा ले एको मरीज के मउत नइ होय हे।
कोरोना टीकाकरण
इही बीच प्रदेश म लोगन मन म टीकाकरण ल लेके बड़ उत्साह देखे जात हे। अब तक प्रदेश म अठारा ले चंवालिस बछर आयु वर्ग के आठ लाख पच्यासी हजार ले जादा लोगन मन ल कोविड वैक्सिन लगाये जा चुके हे।
रायपुर कलेक्टर सौरभ कुमार ह जम्मों जनपद पंचायत के मुख्य कार्यपालन अधिकारी, मुख्य नगर पालिका अधिकारी अउ जोन कमिश्नर मन ल पैंतालिस बछर ले जादा आयु वर्ग के टीकाकरण उपर निगरानी राखे के निर्देश दे हवय। ओमन नागरिक मनके संगेसंग जिला के जम्मों सरकारी कार्यालय प्रमुख मन ल सुनिश्चित करे बर केहे हे कि उंखर कार्यालय के जम्मों स्टाफ अउ उंखर परिवार के लोगन मन टीका जरूर लगवावयं। कलेक्टर ह पैंतालिस बछर आयु वर्ग के नागरिक मनके संगेसंग फ्रंटलाइन वर्कर्स के शत प्रतिशत टीकाकरण उपर घलो जोर दीन हे।
उंहें दुर्ग जिला म टीकाकरण बर युवा मन म बड़ उत्साह देखे जावत हे। पाछू दू दिन म अठारा ले चंवालिस बछर आयु वर्ग के आठ हजार ले जादा लोगन मन ल कोरोना टीका लगवाये हे।
एति आंगनबाड़ी केंद्र मन म घलो रोज टीकाकरण सत्र के अंतर्गत टीका लगाये जावत हे। रायपुर के बीरगांव म घलो माइलोगिन मन ल टीका लगाये गीस। संगेसंग केंद्र म अवइया गर्भवती अउ धात्री माइलोगिन मन ल कोरोना संक्रमण ले बचाव अउ टीकाकरण के जरूरत अउ महत्ता के बारे म जागरूक करे गीस।
खबर के मुताबिक प्रदेश ल जनवरी ले लेके अब तक कुल बंयासी लाख उनसठ हजार अस्सी डोज मिलिस हे। एमा ले तेईस खेप म पचहत्तर लाख बयानबे हजार ले जादा डोज कोविशील्ड वैक्सीन के रीहिस हे अउ नौ खेप म छै लाख छियासठ हजार ले जादा डोज कोवैक्सिन मिले रीहिस हे।
धरसा विकास योजना
मुख्यमंत्री भूपेश बघेल ह कीहिन हे कि किसान मन ल उंखर खेत तक पहुंचे बर प्रदेश म जल्दीच धरसा विकास योजना चालू करे जाही। ओमन कीहिन हे कि मुख्यमंत्री वृक्षारोपणयोजना ल राजीव गांधी किसान न्याय योजना ले जोड़त हुए किसान मन बर आय के नवा रद्दा खोले जाही। मुख्यमंत्री ह आज ये घोषणा अपन निवास कार्यालय म राखे गे एक ठिन वर्चुअल कार्यक्रम के दउरान करीन।
एखरे संग मुख्यमंत्री ह वीडियो कान्फ्रेसिंग के माध्यम ले बलौदाबाजार-भाटापारा अउ महासमुंद जिला म करीबन पांच सौ पैंसठ करोड़ रूपिया के लागत ले एक हजार चार सौ तीस काम के लोकार्पण अउ भूमिपूजन करीन।
कोरोना कर्मचारी पेंशन
केंद्रीय राज्य मंत्री डॅाक्टर जितेंद्र सिंह ह जउन सरकारी कर्मचारी मनके कोविड संक्रमण ले मउत होय हे, उंखर परिवार मन ल एक महीना के भीतर पेेंशन देके निर्देश दीन हे। पेंशन अउ पेंशनभोगी कल्याण विभाग ह जम्मों मंत्रालय, विभाग अउ लेखा महानियंत्रक के संगेसंग पेंशन वितरण बैंक के मुख्य कार्यकारी अधिकारी मन ल ए बारे म निर्देश जारी कर देहे।
बिरसा मुंडा पुण्यतिथि
आदिवासी मनके उत्थान बर आजीवन संघर्ष करइया महान क्रांतिकारी जनननायक बिरसा मुंडा के आज पुण्यतिथि आय। ए मउका म मुख्यमंत्री भूपेश बघेल ह ओमन ल श्रद्धंाजलि देवत कहिन कि बिरसा मुंडा आदिवासी चेतना के प्रणेता मनले एक रीहिन। ओमन आदिवासी ल इकट्ठा करके जल, जंगल अउ जमीन बर आंदोलन करीन। उंखर शौर्य अउ बलिदान के गाथा आज घलो लोगन मन ल सीख देथे। मुख्यमंत्री ह कीहिन कि आदिवासी के स्वाभिमान अउ अधिकारी के रक्षा करना ही बिरसा मुंडा बर सच्चा श्रद्धंाजलि होही।
मौसम
प्रदेश म अवइया एक दू दिन म मानसून सक्रिय होय के संभावना हे। राज्य के कतकोन जगा म बादल छाये हे। प्रदेश म ग्यारा अउ बारा जून के कुछएक जगा म भारी बरसा के चेतावनी दे गेहे।
दक्षिण पश्चिम मानसून मुंबई अउ कोंकण समेत महाराष्ट्र के कतकोन जगा म पहुंच गेहे। अवइया एक दू दिन म मानसून के आंध्रपदेश, मध्यप्रदेश के कुछएक जगा म आगू बढ़े के संभावना हे। बंगाल के खाड़ी के उपर चक्रवाती घेरा बने हे एखर प्रभाव ले छत्तीसगढ़ म काली कतकोन जगा म हल्का ले मध्यम बरसा हो सकत हे। कुछएक जगा म गरज चमक के संग भारी बरसा अउ गाज गिरे के चेतावनी घलो दे गेहे।
मनरेगा रोजगार
महात्मा गांधी राष्ट्रीय ग्रामीण रोजगारगारंटी अधिनियम मनरेगा म वन अधिकार पट्टाधारी परिवार मन ल सौ दिन के रोजगार दे म छत्तीसगढ़ ह देश म पहिला स्थान म हे। राष्ट्रीय स्तर म सौ दिन म रोजगार दे म वन अधिकार पट्टाधारी कुल परिवार म अकेला छत्तीसगढ़ के भागीदारी चंवालिस प्रतिशत ले जादा हे। ये योजना के भीतर चालू वित्तीय बछर के शुरूआती महीना अप्रैल अउ मई म सोला सौ इक्यासी वन अधिकार पट्टाधारी परिवार मन ल सौ दिन के रोजगार दे गेहे।
उंहें ए योजना म दिव्यांग मन ल सबले जादा रोजगार दे म छत्तीसगढ़ ह चैथा स्थान क हे। प्रदेश म ए बछर के अप्रैल अउ मई महीना म मनरेगा श्रमिक मन ल कुल तीन सौ पचपन करोड़ छब्बीस लाख रूपिया के मजदूरी के भुगतान करे गेहे।
अउ अब थोरकुन समाचार सार म-
– दंतेवाड़ा जिला के किरंदुल म सुरक्षा बल मन ह एक झिन माओवादी ल गिरप्तार करे हे। गिरप्तार माओवादी कोरोना संक्रमित पाये गीस। जेला कोविड केयर सेंटर म भर्ती कराये गेहे। ये मामला अरनपुर थाना क्षेत्र के हे।
– राजनांदगंाव जिला के गंडई-संबलपुर क्ष्ज्ञेत्र म एक ट्रैक्टर के अंते तंते होके पलटे ले ट्रेक्टर चालक के उही म चपका मउत होगे।
अउ
– इही जिला के मोहना थाना क्षेत्र के धोबेदंड गांव अउ खैरागढ़ रोड म सिंगारपुर के पास दू ठिन आने आने सड़क दुर्घटना म दू झिन लोगन के मउत होगे।