प्रधानमंत्री -विश्व पर्यावरण दिवस
प्रधानमंत्री नरेंद्र मोदी ह कहिन हे कि स्वच्छ उर्जा के कतकोन प्रकार के फायदा देश के कृषि क्षेत्र तक पहुंचे हे। विश्व पर्यावरण दिवस के मउका म एक ठन वर्चुअल कार्यक्रम म प्रधानमंत्री ह कीहिन कि एथेनाॅल पर्यावरण ल स्वस्थ राखे म प्राथमिकता म आगे हवय। ओमन कीहिन कि सरकार ह खेती बर एथेनाॅल के उत्पादन अउ उपयोग बर धियान देवत हे। देशभर म फसल अवशेष आधारित फैक्ट्री लगाये जावत हे।
श्री मोदी ह कीहिन कि सौर उर्जा के उत्पादन म पंद्रह प्रतिशत के बढ़ोत्तरी होय हे। ओमन कीहिन कि लोगन प्लास्टिक के उपयोग ल खतम करे बर नवा-नवा तरीका अपनावत हे अउ हरएक परिवार म एलईडी बल्ब के उपयोग ल बढ़ावा दे जावत हे। ओमन कीहिन कि किसान मन बर कचरा अउ कृषि अवशेष ले उर्जा पैदा करे के उपाय अपनाय जावत हे।
पर्यावरण दिवस-छत्तीसगढ़
एति छत्तीसगढ़ म घलो विश्व पर्यावरण दिवस के मउका म कतकोन कार्यक्रम कराये जावत हे। कोरोना गाइडलाईन के पालन करत सामाजिक अउ राजनीतिक संगठन मन डहार ले वृक्षारोपण करे गीस। राज्यपाल अनुसूइया उइके ह आज राजभवन के उद्यान म पौधा लगाइन। ए मउका म ओमन ह प्रदेशवासी मनले कीहिन कि पर्यावरण संरक्षण बर जादा ले जादा पौधा लगावयं।
पूर्व राष्ट्रपति निधन-राजकीय शोक
केंद्र सरकार ह माॅरिशस के पूर्व राष्ट्रपति अनिरूद्व जगन्नाथ के निधन म आज एक दिन के राजकीय शोक घोषित करे हे। एखर सेती आज छत्तीसगढ़ म घलो कोनो सरकारी कार्यक्रम नइ करे जावत हे। मुख्यमंत्री निवास म राखे गे वृक्षारोपण कार्यक्रम ल घलो स्थगित कर दे गेहे। जेला काली आयोजित करे जाही।
ओपन स्कूल-परीक्षा
छत्तीसगढ़ राज्य ओपन स्कूल डहार ले हाईस्कूल अउ हायर सेकण्डरी के मुख्य परीक्षा अउ अवसर परीक्षा के संबंध म निर्देश जारी करे गे हावय। हायर सेकण्डरी परीक्षा के विद्यार्थी मन ल उंखर अध्ययन केंद्र ले अवइया इक्कीस ले पच्चीस जून तक प्रश्न पत्र अउ उत्तर पुस्तिका के वितरण करे जाही। एखरे संग छब्बीस ले तीस जून तक उत्तर पुस्तिका अध्ययन केंद्र म जमा होही। अइसने हाइस्कूल के विद्यार्थी मन ल अवइया महीना एक जुलाई ले पांच जुलाई तक प्रश्न पत्र अउ उत्तर पुस्तिका दे जाही। जेला छै ले दस जुलाई तक संबंधित केंद्र म जमा करना होही।
खबर के मुताबिक ये परीक्षा चोबीस मई ले पंद्रा जून तक आयोजित होना रीहिस । फेर कोरोना संक्रमण के सेती स्थगित कर दे गे रीहिस।
शिक्षा विभाग-अनुकंपा नियुक्ति
स्कूल शिक्षा विभाग म पाछू एक हप्ता म सात सौ लोगन ल अनुकंपा नियुक्ति मिले हे। उंहें अवइया एक हप्ता म उन्यासी झन बंचे आवेदक मन ल घलो अनुकंपा नियुक्ति दे जाय के तियारी हे।
स्कूल शिक्षा विभाग के प्रमुख सचिव डॅाक्टर आलोक शुक्ला अउ संचालक जितेन्द्र शुक्ला ह बताइन कि कोरोना काल म दिवंगत शिक्षक अउ दूसर कर्मचारी मनके परिवार वाला मन ल जल्दी ले जल्दी अनुकंपा नियुक्ति देवाय बर ए काम ल अभियान जइसे चलाये जाही अउ सिरिफ सात दिन के भीतर राज्य के सबो इकतीस शिक्षा जिला के सात सौ पात्र युवा मन ल नियुक्ति आदेश दे जाही।
धरना प्रदर्शन
बाढ़त महंगाई के विरोध म आज प्रदेशभर म कंाग्रेस के पदाधिकारी अउ कार्यकर्ता मन ह धरना प्रदर्शन करीन। ए दउरान कोविड गाइड लाईन के पालन करत कंाग्रेसी नेता मन ह अपन अपन घर के बाहर बीहनिया दस ले बारह बजे तक धरना दीन। ये मउका म प्रदेश कंाग्रेस अध्यक्ष मोहन मरकाम अपन निवास के आगू धरना म बइठिन। उंहें राजनंादगंाव, दुर्ग संगरा प्रदेश के दूसर जिला मन म घलो कंाग्रेस पदाधिकारी अउ कार्यकर्ता मन डहार ले संाकेतिक धरना प्रदर्शन करे के खबर हे।
माओवादी आत्मसमर्पण
बीजापुर जिला म काली तीन झन माओवादी मन ह पुलिस अधीक्षक अउ एसडीओपी के आगू आत्मसमर्पण करीन। मिले जानकारी के अनुसार पुलिस कैंप के बाढ़त दबाव के सेती भैरमगढ़ एरिया कमेटी के तीन सदस्य सोमडू माड़वी, दशरू पोयामी अउ सन्नू वेट्टी ह समाज के मुख्यधारा म शामिल होय के फैसला लीन। ए मन तीनो झन आत्मसमर्पित माओवादी मन ल शासन के पुनर्वास नीति म दस-दस हजार रूपिया के नगद प्रोत्साहन राशि दे गीस।
प्रधानमंत्री कोविड समीक्षा
प्रधानमंत्री नरेंद्र मोदी ह काली एक ठन बइठका म देश म टीकाकरण अभियान के प्रगति के समीक्षा करीन। प्रधानमंत्री ल ए बारे म विस्तार ले जानकारी दे गीस, कोविड वैक्सिन के उपलब्ध मात्रा अउ एला बढ़ाय के बारे म घलो बताये गीस। सरकार टीका के उपलब्धता बढ़ाये बर वैक्सिन बनइया मनके संग प्रयास करत हे। ताकि जादा ले जादा मात्रा म वैक्सिन बनाये जा सके। एखर बर वैक्सिन निर्माता मन ह अपन पूरा सहयोग देवत हे।
प्रधानमंत्री ह स्वास्थ्यकर्मी अउ अग्रिम पंक्ति के कार्यकर्ता मनके अलावा पैंतालिस बछर ले उपर अउ ओखर ले नीचे उमर के लोगन के टीकाकरण के स्थिति के घलो समीक्षा करीन।
कोरोना समाचार
प्रदेश म कोरोना ठीक होय वाले मरीज मनके संख्या सरलग बाढ़त हे। राज्य म संक्रमण के दर गिरके दो दशमलव नौ प्रतिशत म आगे हावय। प्रदेशम काली एक हजार चार सौ साठ नवा कोरोना के मरीज मिलीन। ए मन ल मिलाके प्रदेश म कोरोना संक्रमित मरीज मनके संख्या नौ लाख अठहत्तर हजार ले जादा होगे हावय। अभी करीबन सत्ताईस हजार मरीज मनके इलाज आने आने अस्पताल अउ होम आइसोलेशन म चलत हे। इही बीच प्रदेश म काली कोरोना ले तेईस झनके मउत घलो होय हे।
उंहें राजनंादगंाव जिला म कोरोना संक्रमण के दर शून्य के करीब पहुंच गे हावय। काली उन्नीस झन नवा मरीज मनके पहिचान करे गीस। उंहें तीन दिन ले जिला म कोरोना ले एको ठन मउत के समाचार नइ हे।
ओति रायगढ़ जिला म लइका मन म कोरोना के लक्षण दिखे के बाद सावधानी बरते जावत हे। पाछू एक हप्ता म जिला म अठारा बछर तक के एक सौ पैंसठ झन लईका मन ल कोरोना संक्रमित पाय गे हावय।
इही बीच राज्य सरकार ल कोरोना मरीज के इलाज बर एक्सिस बैंक ह डेढ़ करोड़ रूपिया के लागत के मेडिकल उपकरण अउ सामग्री दीही। काली स्वास्थ्य मंत्री टी.एस. सिंहदेव ह एक्सिस बैंक के शीर्ष अधिकारी मनले वीडियो कॅान्फे्रसिंग के माध्यम ले चर्चा करीन।
कोरोना टीकाकरण
छत्तीसगढ़ म कोरोना टीकाकरण के काम सरलग जारी हे। प्रदेश म काली अठारा ले चैंवालिस बछर आयु वर्ग के तीन हजार ले जादा युवा मन ल कोरोना टीका के पहला डोज दे गीस। उंहंे अभी तक ए आयु बछर के साठ लाख छियानबे हजार नौ सौ बहत्तर लोगन ल टीका लगाये गे हावय। अइसने काली स्वास्थ्यकर्मी फं्रटलाईन वर्कर अउ पैंतालिस बछर ले जादा उमर के करीबन छै हजार लोगन ल वैक्सिन लगाये गीस।
तेंदूपत्ता संग्रहण
प्रदेश म ए बछर अभी तक पांच सौ बीस करोड़ रूपिया के राशि के तेरह लाख मानक बोरा तेंदूपत्ता के संग्रहण होगे हावय। जउन ह लक्ष्य के अठहत्तर प्रतिशत हवय। अभी तक पूर्व भानुप्रतापपुर वनमंडल म लक्ष्य के सबले जादा चैरानबे प्रतिशत संग्रहण ल पूरा कर लेगे हावय।
राज्य लघु वन उपज ले मिले जानकारी के अनुसार अभी तक छै ठिन वनमंडल – पूर्व भानुप्रतापपुर, बीजापुर, पश्चिम भानुप्रतापपुर, कवर्धा, बिलासपुर अउ कंाकेर म लक्ष्य के नब्बे प्रतिशत ले जादा संग्रहण करे गे हावय।
मौसम
अउ अब पेस हे मौसम के हाल –
छत्तीसगढ़ म मानसून के अपन बेरा म पहुंचे के संभावना हे। मौसम विभाग के अनुसार अवइया ग्यारा जून के आसपास बंगाल के उत्तर खाड़ी अउ आसपास के इलाका म निम्न दबाव के क्षेत्र बने के आसार हे। एखर प्रभाव ले दक्षिण पश्चिम मानसून के ओडिशा, पश्चिम बंगाल, सिक्किम, झारखंड अउ बिहार के कुछएक हिस्सा म बारह अउ तेरह जून के आगू बढ़े के संभावना हे। जेला देखत छत्तीसगढ़ म घलो मानसून के पंद्रह जून के आसपास पहुंचे के संभावना हे।