केंद्रीय मंत्री मेगाफुड पार्क योजना
केंद्र सरकार ह देश म खाद्य प्रसंस्करण क्षेत्र ल बढ़ावा दे अउ खाद्य पदार्थ के बर्बादी ल रोके बर मेगाफूड पार्क योजना लागू करे हे। इही कड़ी म केंद्रीय खाद्य प्रसंस्करण उद्योग मंत्री नरेंद्र सिंह तोमर ह रायपुर जिला के तिल्दा विकासखंड के बेमता-सरोरा गांव म आज सर्वोत्तम मेगाफूड पार्क के वीडियो कॅान्फे्रसिंग ले लोकार्पण करीन।
कार्यक्रम म केंद्रीय खाद्य प्रसंस्करण राज्य मंत्री रामेश्वर तेली प्रदेश के मुख्यमंत्री भूपेश बघेल अउ उद्योग मंत्री कवासी लखमा ह घलो वीडियो कॅान्फे्रसिंग के जरिया ले सामिल होइन। ए बेरा म श्री तोमर ह कीहिन कि मेगाफूड पार्क ले किसान मन ल अपन उत्पाद के अच्छा कीमत मिलही अउ भंडारण के सुविधा घलो बाढ़ही। ओमन ह कीहिन कि ए फूडपार्क के जरिया ले पूरा क्षेत्र म किसान मन बर वैकल्पिक बाजार उपलब्ध होही। संगेसंग करीबन पच्चीस हजार किसान मन ल लाभ मि लही।
ए मउका म मुख्यमंत्री भूपेश बघ्ेाल ह कीहिन कि खाद्य प्रसंस्करण समेत किसान अउ वनवासी मनके हित म करे जात हर पहल ल राज्य सरकार ह पूरा सहायता करही। ओमन कीहिन कि राज्य सरकार ह घलो पूरा प्रदेश म सौ ले जादा फूडपार्क बनाये के निर्णय लेहे। एखर तहत हरएक विकासखंड म कम से कम एक ठिन फूडपार्क के लक्ष्य राखे गेहे।
नैना सिंह एवरेस्ट फतह
बस्तर के पर्वतारोही नैनासिंह धाकड़ ह विश्व के सबले उंचा पर्वत चोटी माउंट एवरेस्ट ल फतह करे म सफलता पाय हे। वो हा छत्तीसगढ़ के पहिली पर्वतारोही हवय जेन ह ए कामयाबी ल हासिल करे हे।
राज्यपाल अनुसूइया उइके अउ मुख्यमंत्री भूपेश बघेल ह नैनासिंह धाकड़ ल ए सफलता म बधाई अउ शुभकामना दीन। राज्यपाल ह कीहिन कि नैनासिंह ह अपन दृढ़ संकल्प, इच्छाशक्ति अउ अदम्य साहस ले दुनिया के सबले उंचा पर्वतचोटी म चढ़े म सफलता पाय हे।
उंहें मुख्यमंत्री ह अपन शुभकामना संदेश म कीहिन कि नैनासिंह ह ए उपलब्धि ले जम्मों छत्तीसगढ़ ल गौरवान्वित करे हे।
प्रधानमंत्री विद्यार्थी
प्रधानमंत्री नरेंद्र मोदी ह कीहिन हे कि विद्यार्थी मनके स्वास्थ्य अउ कल्याण उंखर सरकार के सबले पहिली प्राथमिकता हे। ट्वीटर म काली माता-पिता अउ शिक्षक मनके सवाल के जवाब देवत श्री मोदी ह कीहिन कि कोरोना संकट के बेरा म शिक्षक समुदाय मनके बड़का भूमिका रीहिस हे। ओमन ह विद्यार्थी मन ल सहयोग दे अउ बदले हुए हालात म घलो ए काम ल जारी रखे खातिर शिक्षक मनके सराहना करीन।
श्री मोदी ह बारहवीं के परीक्षा रद्द करे जाय म कीहिन कि ए बेरा म लइका मनके हित म लेगे सबसे जरूरी फैसला हवय।
कोरोना समाचार
प्रदेश म कोरोना संक्रमण ले स्वस्थ होवइया मरीज मनके दर करीबन संतानवे प्रतिशत हो गेहे। प्रदेश म काली पचपन हजार ले जादा सैंपल के जांच करे गीस। एमा ले एक हजार सात सौ ब्यानबे मनखे मन संक्रमित पाए गीस। अइसने संक्रमण के दर तीन प्रतिशत के आसपास पहुंच गेहे।
इही बीच रायपुर क अलावा दुर्ग, बेमेतरा, बालोद अउ राजनंादगंाव जिला म घलो कोरोना मरीज मनके स्वस्थ होय के दर संतानबे प्रतिशत तक पहुंच गेहे। उंहें प्रदेश म एक जून तक पहिली अउ दूसर खुराक ल मिलाके पात्र लोगन मन ल सत्तर लाख चालीस हजार ले जादा वैक्सिन लगाये जा चुके हे।
इही बीच छत्तीसगढ़ गृह निर्माण मंडल ह प्रदेश म कोरोना के रोकथाम बर मुख्यमंत्री सहायता कोष म दस लाख रूपिया के राशि दीन हे।
ब्लैक फंगस मौत
रायपुर म ब्लैक फंगस बीमारी ले एक झिन डॅाक्टर के मउत होगे। राज्य के पुलिस परिवार कल्याण अस्पताल के चिकित्सा अधिकारी डॅाक्टर बी.पी. सोनकर ह पहिली कोरोना ले संक्रमित होय रीहिन। एखर बाद ओमन ह ब्लैक फंगस के शिकार हो गीन। रायपुर के मेकाहारा अस्पताल म उंखर इलाज चलत रीहिस।
नीति आयोग रिपोर्ट
प्रदेस के आने आने कल्याणकारी योजना म लैंगिक समानता ल बढ़ावा देके संगेसंग माइलोगिन अउ नोनी मनके सशक्तिकरण के नीति ल लागू करे के मामला म नीति आयोग ह छत्तीसगढ़ ल देश म पहिली स्थान देहे। नीति आयोग ह आने आने क्षेत्र म विकास अउ कल्याणकारी योजना के मूल्यांकन म आधारित जारी करे गे वार्षिक रिपोर्ट म ए जानकारी ल दीस हे।
नीति आयोग ह केहे हे कि ये रिपोर्ट म सामाजिक, आर्थिक अउ पर्यावरण के क्षेत्र म राज्य के प्रगति के आधार म ओखर प्रदर्शन के मूल्यांकन करे गेहे। अउ इही आधार म ओखर रैंकिग करे गेहे। ये रिपोर्ट म आने आने क्षेत्र म करे गे प्रदर्शन के आधार म छत्तीसगढ़ ल पाछू दरी ले थोरकिन जादा अंक मिले हे। उंहें सोला ठिन लक्ष्य मे ले एक ‘‘ लैंगिक समानता ‘‘ म आने सबो राज्य ल पाछू छोड़त छत्तीसगढ़ ह बाजी मारे हे।
लैंगिक समानता के क्षेत्र म अच्छा प्रदर्शन करे के संगेसंग लिंगानुपात म घलो छत्तीसगढ़ देश के शीर्ष राज्य म शामिल हवय। राज्य सरकार डहार ले प्रदेश म माइलोगिन मन ल सामाजिक, आर्थिक अउ राजनैतिक, नेतृत्व के समान अवसर अउ सहभागिता प्रदान करे के सरलग प्रयास करे जात हे।
सुप्रीम कोर्ट टीका निर्देश
उच्चतम न्यायालय ह केंद्र सरकार ले कोवैक्सिन, कोविशील्ड अउ स्पूतनिक -वी समेत सबो कोविड टीका के खरीदी संबंधित विस्तृत आंकड़ा ल पेश करे बर कीहिन हे। अदालत ह केंद्र ले टीकाकरण नीति ले जुड़े सबो दस्तावेज अउ फाइल नोटिंग ल घलो प्रस्तुत करे बर कीहिन हे । न्यायालय ह सरकार ल ये बताए बर घलो कीहिन हे कि बाकी बचे लोगन मनके टीकाकरण कब अउ कैसे करना हे।
सिलगेर घटना जांच
बीजापुर जिला के सिलगेर गांव म पाछू दिन होय गोलीबारी के घटना म तीन झिन ग्रामीण मनके कथित मौत के मामला म राज्य सरकार के नौ सदस्यीय टीम ह सिलगेर गांव पहुंच के ग्रामीण मनले गोठबात करीन अउ घटना के जानकारी लीन। ए बेरा म ए दल के अध्यक्ष अउ बस्तर सांसद दीपक बैज के अलावा बस्तर संभाग के आने आने क्षेत्र के विधायक अउ स्थानीय प्रतिनिधि मन घलो शामिल रीहिन।
केन्द्र राशनकार्ड
केंद्र सरकार ह सबो राज्य अउ केंद्रशासित प्रदेश ल वंचित अउ आर्थिक रूप ले कमजोर लोगन मन ल राशनकार्ड देके एक ठिन विशेष अभियान के शुरूआत करे बर परामर्श जारी करे हे। ए पहल कोरोना महामारी के सेती देश म कठिनाई के सामना करत लोगन मन खातिर राशन उपलब्ध कराय बर करे गेहे।
केंद्रीय खाद्य मंत्रालय ह राज्य अउ केंद्रशासित प्रदेश ले ये अभियान ल राष्ट्रीय खाद्य सुरक्षा अधिनियम के अंतर्गत शामिल करे के अनुरोध करीन हे।
टीईटी वैधता
केंद्र सरकार ह शिक्षक पात्रता परीक्षा – टीईटी क्वालिफाइंग सर्टिफिकेट के वैधता के अवधि सात बछर ले बढ़ाके आजीवन करे के फैसला लीन हे। केंद्रीय शिक्षा मंत्री रमेश पोखरियाल निशंक ह कीहिन हे कि ए फैसला पाछू अवधि यानि कि बछर दू हजार ग्यारा ले लागू होही, जउन अभ्यर्थी मनके टीईटी प्रमाण पत्र के सात बछर के अवधि पहिली ही खतम होगे हे, उंखर मन बर राज्य अउ केंद्रशासित प्रदेश ह नवा टीईटी प्रमाणपत्र जारी करे या फिर पुराना प्रमाण पत्र ल नवा सिरा ले वैध करे बर जरूरी कार्रवाई करही।