आज दिनभर के खबर ल छत्तीसगढ़ी म पढ़व

प्रदेश म कोरोना संक्रमित मरीज मनके बाढ़त संख्या के बीच स्वास्थ्य विभाग ह रेड आरेंज अउ ग्रीन जोन वाले विकासखंड के नवा सूची जारी करे हे। ए सूची के मुताबिक रायपुर शहर समेत एक सौ पांच विकासखंड ल रेड जोन म राखे गेहे। उहें, तीस विकासखंड ल आरेंज जोन घोषित करे गेहे। एक लाख जनसंख्या म नमूना के जांच दर कमती होय के सेती कुछएक विकासखंड मन म कोरोना मामला  नइ होय के बाद घलो आरेंज जोन म शामिल करे गेहे।

कोरोना संक्रमण के सक्रिय मामला के संख्या एखर दुगुना होय के दर अउ एक लाख जनसंख्या म नमूना के जांच के ताजा स्थिति के आधार म ये वर्गीकरण करे गेहे। स्वास्थ्य विभाग के मुताबिक ये वर्गीकरण पाछू पांच जुलाई तक के स्थिति के आधार म करे गेहे।

खबर के मुताबिक ए सूची ल हर हप्ता के सोमवार के नवा सिरा ले वर्गीकृत करे जाही।

राजधानी रायपुर म आज चालीस झिन नवा कोरोना संक्रमित मरीज मिले हे। सबले जादा बीरगांव क्षेत्र म कोरोना संक्रमित मरीज मनके चिनहारी करे गेहे।

उंहें दुर्ग जिला म पाछू रतिहा तक तीन नवा कोरोना संक्रमित मरीज के पुष्टि होय हे। एमा भिलाई इस्पात संयंत्र के एक अधिकारी अउ एक कर्मचारी सामिल हे। एखर बाद संयंत्र के पर्चेस मैनेजर के कमरा ल सील कर  दे गेहे अउ एखर संपर्क म आए ग्यारा झिन लोगन मन ल होम क्वारंटाइन करे गेहे।

एति बीजापुर जिला म सुरक्षा बल मनके बाद आज एक ग्रामीण ल कोरोना संक्रमित पाय गेहे। बताय जात हे कि ये मजदूर आंध्रप्रदेश ले लहुटे रीहिस हे।

ओति बलौदाबाजार जिला म पाछू रतिहा नौ झिन नवा कोरोना संक्रमि के पहिचान करे गेहे। एमा तीन मरीज कसडोल नगर के हे अउ तीन मरीज बिलाईगढ़, भटगांव, भाटापारा अउ पलारी ले एक एक झिन मरीज संक्रमित मिले हे।

प्रदेश के पुलिस महानिदेशक डी.एम. अवस्थी ह आज जम्मों जिला के पुलिस अधीक्षक मनके संग वीडियो कान्फ्रेसिंग के माध्यम ले कानून व्यवस्था के समीक्षा करीन। ए दउरान ओमन कीहिन कि जम्मांे पुलिस अधीक्षक गुण्डा अउ हिस्ट्रीशीटर मन उपर कड़ा कार्रवाई करंय। डीजीपी ह कीहिन हे कि कानपुर जइसन घटना छत्तीसगढ़ म नइ होना चाही। श्री अवस्थी ह चिटफंड कंपनी संचालक मन ल जेल भेजे अउ उंखर संपत्ति ल कुर्की करे के कार्रवाई करे के संगेसंग ए मामला म निर्दोष एजेंट मनके खिलाफ दरज केस ल वापिस लेबर कीहिन।

विश्वविद्यालय अनुदान आयोग-यूजीसी ह परीक्षा ले जुड़े अपन पहिली के दिशा निर्देश म संशोधन करे हे। सुरक्षा, विद्यार्थी मनके प्रगति अउ व्यापक हित ल धियान म राखत यूजीसी ह तय करे हे कि इंटरमीडिएट सेमेस्टर के छात्र-छात्रा मनके मूल्यांकन पहिली के दिशा निर्देश के मुताबिक आंतरिक मूल्यांकन के आधार म होही। यूजीसी ह यहू तय करे हे कि आखरी सेमेस्टर के छात्र-छात्रा मनके परीक्षा सितंबर म होही जउन ह जुलाई महीना म होवइया रीहिस हे।

इही बीच गृह मंत्रालय ह विश्वविद्यालय अउ शिक्षण संस्था मन ल परीक्षा  ले के मंजूरी दे देहे। उच्च शिक्षा सचिव ल लिखे एक चिट्ठी म केहे गेहे कि आखरी सत्र के परीक्षा, विश्वविद्यालय अनुदान आयोग के दिशा-निर्देश के मुताबिक संचालित करे जाना चाही। ये परीक्षा केंद्रीय स्वास्थ्य अउ परिवार कल्याण मंत्रालय के मानक संचालन प्रक्रिया अउ विश्वविद्यालय के शैक्षिक वर्ष के मुताबिक होही।

दंतेवाड़ा जिला म माओवादी डहार ले आरक्षक के माता-पिता के अगवा करे के मामला आगू आय हे।

मिले खबर के मुताबिक जिला के गुमियापाल गांव म पाछू रतिहा माओवादी मन ह आरक्षक के घर म पहुंचके उंखर माता-पिता ल अगवा करके अपन संग म लेगे।

इही बीच माओवादी मनके कब्जा ले ए मन ल छुड़ाए बर पुलिस के संग गांव वाले मन घलो कोसिस करत हे।

एंटी करप्शन ब्यूरो-एसीबी के टीम ह आज तीन आने-आने जिला म दबिश देके पटवारी समेत दू झिन अधिकारी मन ल रिश्वत लेके आरोप म गिरप्तार करे हे। संगेसंग ए तीनों आरोपी मनले रिश्वत के रकम घलो बरामद करे गेहे। ये कार्रवाई एसीबी रायपुर, अंबिकापुर अउ बिलासपुर टीम डहार ले करे गेहे।

मिले खबर के मुताबिक जिला पंचायत बिलासपुर म रूर्बन मिशन के समन्वयक ल पैंतीस हजार रूपिया, सूरजपुर जिला के विकासखंड शिक्षा अधिकारी मन ल पच्चीस हजार रूपिया अउ बेेमेतरा जिला के नवागढ़ थाना अंतर्गत गोपालपुर गांव के महिला पटवारी ल अट्ठाईस सौ रूपिया के रिश्वत लेत रंगे हाथों पकड़े गेहे।

किसान मन ल आधुनिक खेती ले जोड़े बर महासमुंद जिला म उन्नत कृषि कार्यक्रम के शुरूआत करे गेहे। ए परियोजना म कृषि विज्ञान केंद्र डहार ले जिला के पांच गांव  साराडीह, बिरकोनी, बरबसपुर, परसवानी अउ अछोला ल चुने गेहे। ए पांच गांव के पचास झिन किसान मनके चुनई करके ए मन ल उन्नत खेती बर प्रशिक्षण अउ तकनीकी जानकारी दे जावत हे। अधिकारी मन ह बताइन कि ए परियोजना म धान के जिंको राइस किसम किसान मनल देवाये जात हे। संगेसंग किसान मन ल धान फसल के मेंढ़ म लगाये बर राहेर बीजा अउ खरपतवार नाशक घलो देवाय जात हे।

अधिकारी मन ह बताइन कि जिंको किसम के धान ल लगाये बर किसान मन ल हरएक एकड़ म पचास ले साठ हजार रूपिया के फायदा होही। परियोजना के तहत किसान मन ल फसल उत्पादन के संगेसंग बागवानी अउ मशरूम उत्पादन बर घलो प्रशिक्षण दे जाही। जेखर ले किसान मनके आमदनी म बढ़ोत्तरी हो सकय।

इही बीच केंद्र सरकार ह कीहिन  हे कि खरीफ फसल के मौसम के दउरान देश म उर्वरक के कमी नइ हे। केंद्रीय रसायन अउ उर्वरक मंत्री डी वी सदानंद गौडा ह कीहिन हे कि राज्य सरकार के संग गोठबात करके उर्वरक के भंडार तियार करे गेहे।

प्रदेश के परिवहन मंत्री मोहम्मद अकबर ह काली नवा रायपुर अटल नगर म एकल क्षेत्रीय परिवहन प्राधिकार के कार्यालय के शुभारंभ करीन। ए मउका म ओमन कीहिन कि ए कार्यालय के शुरू होय ले अब गाड़ी मालिक मन ल परमिट अउ एखर ले जुड़े कामकाज बर भटकना नइ पड़ही।

ओमन बताइन हे कि ए कार्यालय म राज्य के जम्मों संभाग के गाड़ी मालिक मनके गाड़ी परमिट ले जुड़े अरजी के सुनवाई के संगेसंग निपटाय के काम म तेजी आही। ए कार्यालय म पुराना परमिट के नवीनीकरण के काम घलो करे जाही।

हावड़ा-मुंबई-हावड़ा अउ हावड़ा-अहमदाबाद-हावड़ा स्पेशल ट्रेन रोज के जगा म अब हप्ता म एके दिन चलही। हावड़ा-अहमदाबाद स्पेशल ट्रेन अवइया दस जुलाई ले हावड़ा ले चलही अउ अइसने अहमदाबाद-हावड़ा स्पेशल ट्रेन तेरा जुलाई के अहमदाबाद ले चलही। उंहें हावड़ा-मुंबई स्पेशल ट्रेन पंद्रा जुलाई के हावड़ा ले अउ सतरा जुलाई के मुंबई ले हावड़ा बर चलही। दूनों स्पेशल गाड़ी के समय अउ ठहराव म कोनो बदलाव नइ करे गेहे।

अउ अब पेस हे मौसम के हाल – प्रदेश म अवइया चौबीस घंटा के दउरान कतकोन जगा म हल्का ले मध्यम बरसा होय के संग गरज-चमक के संग सीटीर साटर पानी गिरे के संभावना हे। उंहे एक दू जगा म गाज गिरे के संग भारी बरसा होय के संभावना हे ।

मौसम विभाग ले मिले खबर के मुताबिक प्रदेश के सीमावर्ती राज्य अउ उंखर तीर तखार म बने निम्नदाब के क्षेत्र के सेती प्रदेश के कुछ एक जगा म गरज-चमक के संग हल्का बरसा होय के संभावना हे। फेर बस्तर संभाग म एक-दू जगा म भारी बरसा के चेतावनी दे गेहे।

– कोरिया जिला के परसगड़ी रद्दा म मनेन्द्रगढ़ थाना के पुलिस ह दू कुंटल गांजा जब्त करे गेहे। ए मामला म चार झिन लोगन मन ल हिरासत म ले गेहे। उंहें महासमुंद जिला के चैनडीपा गांव के तीर पुलिस ह राष्ट्रीय राजमार्ग म एक मनखे ले सात किलो गांजा के संग दुपहिया वाहन, मोबाइल अउ नगदी पइसा जब्त करे हे।

– इही जिला के कुल्लू चौकी क्षेत्र म एक मनखे डहार ले सियान माइलोगिन के हत्या करे के मामला आगू आय हे।

– कोंडागांव के केशकाल थाना अंतर्गत तोषकपाल गांव म करंट के चपेट म आय ले एक झिन मनखे के मउत होगे।

अउ-मुंगेली जिला के लालपुर थाना क्षेत्र के हरनाचाका गांव म एक मनखे के हत्या के बाद आरोपी ह थाना म आत्मसमर्पण कर दीस।