आज दिनभर के खबर ल अपन गुरतुर छत्तीसगढ़ी भाखा म पढ़व

लाॅकडाउन
कोरोना संक्रमण ल बगरे ले रोके खातिर छत्तीसगढ़ के 11 ठिन जिला मन म पूरा लाॅकडाउन लगाय के आदेस जारी कर दे गे हवय। रईपुर अउ दुरूग जिला म लाॅकडाउन पहिली ले ही लगे हवय। उहें, राजनांदगांव, बेमेतरा अउ बालोद जिला म आज ले लाॅकडाउन लागू होगे हवय। फेर, जशपुर, कोरिया अउ बलौदाबाजार जिला म रविवार 11 अप्रैल ले लाॅकडाउन लगही। अइसनेच, धमतरी जिला म 12 ले 26 अप्रैल तक पूरा तरीका ले लाॅकडाउन रइही। ए दउरान किराना, जनरल स्टोर, मिल्क पार्लर, सब्जी-फल, पशुचारा अउ कृषि संबंधी दुकान मन ल बिहनिया 8 ले 10 बजे तक मात्र 2 घंटा खुले राखे के अनुमति हवय। उहें, अनाज, सब्जी अउ फल मंडी मन ल बिहनिया 6 ले 10 बजे तक खोले जाही। बैंक मन म कामकाज बिहनिया 11 ले मंझनिया दू बजे तक ही होही। कोरबा जिला म 12 ले 22 अप्रैल तक लाॅकडाउन लगाय जाही। जिला म बिहनिया एक घंटा बर दूध, फल अउ सब्जी के दुकान मन ल खोले के अनुमति दे गे हवय। अइसनेच, रायगढ़ जिला म 14 अप्रैल के बिहनिया छह बजे ले 22 अप्रैल के रतिहा 12 बजे तक संपूर्ण लाॅकडाउन रइही। जम्मों जिला मन म लाॅकडाउन के चलत पेट्रोप पंप, मेडिकल स्टोर्स अउ आपातकालीन सेवा मन ल ए प्रतिबंध ले मुक्त राखे गे हवय।
ऐति, महासमुंद जिला के नगरीय क्षेत्र मन म व्यावसायिक गतिविधि मन खातिर दिसा-निरदेस जारी कर केहे गे हवय कि काली 11 अप्रैल ले बिहनिया 6 ले मंझनिया 3 बजे तक ही दुकान मन ल खोले जाही। ओति, कोंडागांव जिला म प्रसासन ह रेस्टोरेंट अउ ढाबा म बइठ के खाना खाय म रोक लगा दे हवय। उहें, बस्तर जिला म प्रसासन डहार ले रतिहा के कफ्र्यू लगाय गे हवय, जेखर उल्लंघन करइया 17 झिन लोगन मन उपर पुलिस कार्रवाई करे गीस। ओति, कबीरधाम जिला म दुकान मन ल संझा 4 बजे तक खोले के अनुमति होही।
कोविड-क्वारेंटाइन सेंटर
कोरोना संक्रमण के रोकथाम सेती प्रदेस म ग्राम पंचायत स्तर म क्वारेंटाइन सेंटर स्थापित करे जाही। पंचायत अउ ग्रामीण विकास विभाग ह ए संबंध म जम्मों कलेक्टर अउ जिला पंचायत के सीईओ मन ल निरदेस जारी कर दे हवय। ऐति, बगरत कोरोना संक्रमण ल रोके खातिर बाहिर गांव डहार ले अवइया मनखे मन खातिर पहिली ले बनाय गे क्वारेंटाइन सेंटर जइसन ए दारी घलो क्वारेंटाइन सेंटर बनाय जाही। क्वारेंटाइन सेंटर के संचालन म स्वास्थ्य विभाग के दिसा-निरदेस के पालन करे जाही। क्वारेंटाइन सेंटर के निगरानी खातिर स्व-सहायता समूह, युवा समिति, रामायण-भजन मंडली, निगरानी समिति अउ आने-आने स्थानीय समिति मनके सहयोग ले जाही। जानबा के मुताबिक जउन भवन म बारहवीं के परीक्षा आयोजित होवइया हे, ओला क्वारेंटाइन सेंटर नइ बनाय जाही।
हवाई यात्रा-आरटीपीसीआर जांच
कोरोना संक्रमण के बाढ़त मामला ल देखत हवाई यात्रा ले छत्तीसगढ़ अवइया यात्री मन ल अब ले अपन साथ आरटी-पीसीआर टेस्ट के निगेटिव रिपोर्ट लाना जरूरी होही। ए टेस्ट एयरपोर्ट म पहुंचे के 72 घंटा ले पहिली के होना चाही, जउन यात्री मन करा निर्धारित समय अवधि के आरटीपीसीआर टेस्ट रिपोर्ट नइ होही, उंखर मनके कोविड जांच छत्तीसगढ़ के एयरपोर्ट म ही करे जाही। छत्तीसगढ़ सरकार ह राज्य के जम्मों एयरपोर्ट अउ रेलवे स्टेशन मन म आरटीपीसीआर जांच के सुविधा सुरू करत हवय। कोरोना टेस्ट रिपोर्ट पाॅजीटिव होय म ओमन ल स्वास्थ्य विभाग डहार ले जारी एसओपी के अनुसार क्वारेंटाइन, कोविड केयर सेंटर अउ अस्पताल मन म राखे जाही। कोन्हों यात्री द्वारा अगर कोविड टेस्ट के सहमति नइ दे जाथे, त अइसन स्थिति म ओला स्वयं के खर्चा म सात दिन बर क्वारेंटाइन होय ल पड़ही। छोट-छोट लइका मनके कोविड टेस्टिंग के बारे म उंखर माता-पिता के सहमति ले टेस्टिंग के निरदेस दे गे हवय। हवाई यात्रा ले अवइया अइसन यात्री जउन मनके रिपोर्ट निगेटिव आय हवय, ओमन ल घलो होम आइसोलेशन म रहय अउ क्वारेंटाइन नियम के पालन करे के सलाह दे जाही। उहें, रईपुर रेलमंडल ले जवइया गाड़ी मन जउन ओड़िसा डहार जाथे, अइसन गाड़ी म जवइया यात्री मन ल अपन यात्रा चालू करे के पहिली 72 घंटा के भीतर कराय गे आरटीपीसीआर निगेटिव जांच रिपोर्ट दिखाना जरूरी होही या कोरोना वैक्सीन के दूसर डोज लगे के टीकाकरण प्रमाण पत्र दे ल पड़ही।
कोविड टीका उत्सव/टीकाकरण-01
कोविड मरीज मनके तेजी ले बाढ़त संख्या ले निपटे खातिर देसभर म काली ले टीका उत्सव के आयोजन करे जाही। एमा 14 अप्रैल तक लोगन मन ल टीका लगाय के एक ठिन बड़का कारीकरम चलाय जाही। इही बीच, हमर देस कोविड टीकाकरण अभियान म 10 करोड़ टीका लगाय के एक बहुत बड़ अउ जरूरी उपलब्धि पाय के बहुतेच करीब हवय। केन्द्रीय स्वास्थ्य मंत्रालय ह बतईन हे कि अब तक लोगन मन ल 9 करोड़ 80 लाख ले जादा टीका लगाय जा चुके हे। ऐति, छत्तीसगढ़ म घलो टीकाकरण अभियान तेली ले चलाय जावत हे। राज्य म अब तक 38 लाख ले जादा लोगन मन ल कोरोना के टीका लगाय जा चुके हवय।

कोविड टीका उत्सव/टीकाकरण-02
इही बीच, स्वास्थ्य मंत्री टी.एस. सिंहदेव ह वीडियो कान्फ्रेंसिंग के माध्यम ले जांजगीर-चांपा जिला म कोरोना के स्थिति, टीकाकरण के प्रगति अउ टीका मनके उपलब्धता के समीक्षा करीन। ए मउका म ओमन किहीन कि संक्रमण के बाढ़त ट्रेंड म ध्यान देके जरूरत हवय। श्री सिंहदेव ह ए निरदेस घलो दीन कि बाहिर ले अवइया यात्री मनके आरटीपीसीआर के जांच करके ओमन ल आइसोलेशन म राखे जाना चाही। उहें, राजस्व मंत्री जयसिंह अग्रवाल ह लोगन मन ले अपील करे हे कि 45 बछर ले जादा उम्र के लोगन मन ल कोरोना टीकाकरण अवश्य करवाना चाही। संगेसंग ओमन ल केन्द्र अउ राज्य सासन के दिसा-निरदेस मनके पालन करत बगरत कोरोना संक्रमण ल रोके खातिर अपन सहयोग देना चाही। ओति, बिलासपुर जिला के मुख्य चिकित्सा अउ स्वास्थ्य अधिकारी डाॅक्टर प्रमोद महाजन ह लोगन मन ले अपील करत किहीन कि कोरोना ले बचाव खातिर जउन 45 बछर ले जादा उमर के लोगन मन के टीकाकरण करे जातव हे, ओमन ल खुदेच अपन, समाज अउ अपन परिवार के सुरक्षा खातिर टीकाकरण जरूर करवावयं। ओमन किहीन कि कोरोना के टीका पूरा तरह ले सुरक्षित हवय अउ एखर लगाय ले सरीर म कोन्हों प्रकार के नुकसान नइ होवय। ऐति, कोरोना के बाढ़त मामला ल देखत केन्द्रीय स्वास्थ्य मंत्रालय के एक ठिन टीम ह दुरूग जिला म कोरोना के स्थिति के जायजा लीन। सांसद विजय बघेल ह केन्द्रीय टीम के संग कोरोना संक्रमण के बारे म बिस्तार ले गोठबात करीन। ए मउका म केन्द्रीय टीम ह बतईन कि दुरूग जिला म आरटी-पीसीआर टेस्टिंग मात्र 10 प्रतिशत ही होवत हे। उहें, कोरोना के सही पुष्टि आरटी-पीसीआर टेस्ट म होथे। दुरूग म आरटी-पीसीआर टेस्टिंग बढ़ाय जाय के ज्यादा जरूरत हवय।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी कार्यक्रम के 17वां कड़ी के प्रसारण काली ग्यारह अप्रैल इतवार के दिन करे जाही। मुख्यमंत्री ह लोकवाणी म ए दारी ‘‘नया बजट-नया लक्ष्य‘‘ बिसय म प्रदेसवासी मन ले गोठबात करही ।
लोकवाणी के ए कार्यक्रम के प्रसारण ल छत्तीसगढ़ के जम्मों आकाशवाणी केंद्र, एफ.एम. चैनल अउ क्षेत्रीय समाचार चैनल मन डहार ले बीहनिया साढ़े दस बजे ले 11 बजे तक करे जाही।
माओवादी-समाचार
दंतेवाड़ा जिला म अरनपुर थाना क्षेत्र ले सुरक्षा बल मन ह एक ठिन इनामी माओवादी ल गिरफ्तार करे हवय। एखर पास ले एक टिफिन बम घलो बरामद करे गे हवय। ए माओवादी उपर एक लाख रूपिया के इनाम घोषित रिहीस। उहें, बीजापुर जिला म लोन वर्राटू अभियान ले प्रेरित होके एक झिन माओवादी ह आज पुलिस के आगू आत्मसमर्पण कर दीस। इही बीच, कांकेर जिला के कोयलीबेड़ा कैम्प म पदस्थ बीएसएफ चैथी बटालियन के एक झिन जवान ह खुदेच ल गोली मारके आत्महत्या कर लीन।