परीक्षा स्थगित
राज्य म बाढ़त कोरोना संक्रमण अउ लाॅकडाउन ल देखत छत्तीसगढ़ माध्यमिक शिक्षा मंडल डहार ले पंद्रह अप्रैल ले शुरू होवइया दसवीं कक्षा के बोर्ड परीक्षा ल स्थगित कर दे गेहे। मुख्यमंत्री भूपेश बघेल के निर्देश म स्कूल शिक्षा मंत्री डॅाक्टर पे्रमसाय सिंह टेकाम ह ए संबंध म दिशा निर्देश जारी करीन। खबर के मुताबिक स्थिति सामान्य होय के बाद ए परीक्षा के तारीख ल फेर ले घोषित करे जाही। राजधानी रायपुर म मुख्यमंत्री भूपेश बघेल ह पत्रकार मनले कीहिन कि बोर्ड के परीक्षा ह बहुते जादा महत्वपूर्ण होथे, फेर कोरोना काल के सेती परीक्षा ल स्थगित करे बर पड़त हे।
लॅाकडाउन 01
राजधानी रायपुर म आज संझा छै बजे ले उन्नीस तारीख तक संपूर्ण लाॅकडाउन लगाये गेहे। राज्य म दिनोदिन कोरोना मरीज के संख्या बाढ़त जात हे। काली दस हजार ले जादा नवा मरीज पाय गेहे। एखर संगेसंग छत्तीसगढ़ म संक्रमित मरीज मनके संख्या चार लाख ले जादा होगे हे। मिले खबर के मुताबिक रायपुर जिला कलेक्टर डॅाक्टर एस. भारतीदासन ह रायपुर जिला ल कंटेनमेंट जोन घोषित करे गे आदेश म संशोधन करे हे। एमा बिहाव, मरिया, अउ दशगात्र के कार्यक्रम म जादा ले जादा दस झन लोगन मन ल सामिल होय के मंजूरी देहे। आदेश म केहे गेहे कि लाॅकडाउन के दउरान रेल, बस, अउ हवई यात्रा खातिर रेलवे स्टेशन, अउ एयरपोर्ट तक अवइया जवइया यात्री मन ल ई-पास रखना जरूरी हे। ओति बालोद जिला म काली ले उन्नीस अप्रैल के बीहनिया छै बजे तक संपूर्ण लाॅकडाउन लगाये जाही। ए दउरान जिला के जम्मों सीमा मन ल सील कर दे जाही। मेडिकल दुकान ल निर्धारित समय म खोले के छूट दे गेहे। एखर अलावा पेट्रोल पंप, अउ सरकारी वाहन मन ल छूट दे गेहे।
लाॅकडाउन 02
उंहें राजनांदगंाव जिला म काली ले उन्नीस अप्रैल तक संपूर्ण लाॅकडाउन लगाये जाही। ए दउरान पुलिस प्रशासन डहार ले शहर म फ्लैग मार्च निकालके लाॅकडाउन के नियम के पालन करे के अपील करीन।
ओति महासमुंद जिला के उप तहसील मुख्यालय पटेवा म जम्मों व्यापारी मन ह आपसी सहमति ले संपूर्ण लाॅकडाउन लगाये के फैसला लीन। आज रतिहा नौ बजे ले सोला अप्रैल के रतिहा बारा बजे तक व्यावसायिक प्रतिष्ठान मन ल बंद राखे के फैसला लेहे। जिला प्रशासन ल ओखर जानकारी दे दे गेहे।
रायगढ़ जिला के जम्मों नगरीय निकाय अउ नगर निगम सीमा क्षेत्र म आज ले दुकान के संचालन म बदलाव करे गेहे। अब दुकान मन ल बीहनिया छै बजे ले संझा छै बजे तक खोले जाही। उंहें रेस्टोरेंट, होटल ढाबा मन ल बीहनिया आठ बजे रतिहा दस बजे तक खोले जाही। कबीरधाम जिला के जम्मों सरकारी, अर्धसरकारी कार्यालय मन म पंद्रह दिन बर आम मनखे मन ल भीतर जाय म प्रतिबंध लगा दे गेहे।
मुख्यमंत्री संपादक चर्चा
मुख्यमंत्री भूपेश बघेल ह कीहिन हे कि प्रदेश के प्रायवेट अस्पताल मन म कोरोना बीमारी के जांच अउ इलाज के दर ल तय करे जाही। उंहें रेमडेसि-वियर इंजेक्शन के दर ल घलो तय करे जाही। राजधानी रायपुर म आज मुख्यमंत्री ह मीडिया संस्थान के संपादक मन संग आॅनलाइन बइठका ए बात ल कीहीन । श्री बघेल ह मीडिया संगठन मन ले राज्य म बाढ़त संक्रमण के रोकथाम अउ बचाव खातिर घलो विचार विमर्श करीन।
श्री बघेल ह राज्य म बाढ़त संक्रमण के सेती एयरपोर्ट अउ रेलवे स्टेशन मन म कोरोना संक्रमित मरीज मनके पहिचान करे खातिर आरटीपीसीआर टेस्ट करे के निर्देश दीन। ओमन यहू कीहिन कि ए महामारी ले निपटे खातिर नर्सिंग के परीक्षा पास करे विद्यार्थी मन ल प्रशिक्षण देके उंखर मन ले सेवा ले जाही।
प्रधानमंत्री कोविड समीक्षा
प्रधानमंत्री नरेन्द्र मोदी ह ए महीना के ग्यारा ले चैदा तारीख तक व्यापक जन टीकाकरण कार्यक्रम संचालित करे अउ उत्सव के रूप म मनाये के आह्वान करीन।
खबर के मुताबिक ग्यारा अप्रैल के ज्योतिबा फुले के जयंती अउ चैदा अप्रैल के बाबा साहेब अंबेडकर जी के जयंती हरय। ओमन कीहिन कि हमन जम्मों झन मिलके ग्यारा अप्रैल ले चैदा अप्रैल तक जम्मों राज्य म टीका उत्सव मना सकत हन। श्री मोदी ह युवा मन ल आगू आय अउ वरिष्ठ नागरिक के संगेसंग जम्मों लोगन मनले मदद करे के अपील करीन।
प्रधानमंत्री ह काली संझा मुख्यमंत्री मन संग कोरोना के स्थिति उपर वीडियो काॅन्फ्रेसिंग के माध्यम ले बाढ़त संक्रमण के बारे म गोठबात करत संक्रमण ल रोके खातिर जरूरी दिशा निर्देश घलो दीन। श्री मोदी ह कीहिन कि महाराष्ट्र, छत्तीसगढ़, पंजाब, मध्यप्रदेश, गुजरात, अउ दीगर राज्य मन म बहुते जादा कोरोना बीमारी फैलत हे, जउन ह एक ठन संसो के बात हरय। ओमन कीहिन कि डॅाक्टर अउ जनसहयोग ले एखर रोकथाम करना बहुत जरूरी हे। ए आॅनलाईन बइठका म राज्य के मुख्यमंत्री भूपेश बघेल ह घलो सामिल होइन। श्री बघेल ह केंद्र सरकार ले राज्य के स्थिति ल देखत कोविड वैक्सिन ल एडवंास के रूप म देके आग्रह करीन। जेखर ले गंवई क्षेत्र मन म टीकाकरण अभियान ल अउ जादा सरल बनाये जा सकय। श्री बघेल ह कोरोना के इलाज म इस्तेमाल करइया दवई अउ मशीन मन उपर जीएसटी के दर ल कम करे के अनुरोध घलो करीन। ए बइठका म राज्य के स्वास्थ्य मंत्री टी.एस. सिंहदेव अउ गृहमंत्री ताम्रध्वज साहू के अलावा बड़का अधिकारी मन ह घलो मौजूद रीहिन।
हर्षवर्धन कोविड टीका
केंद्रीय स्वास्थ्य मंत्री डॅाक्टर हर्षवर्धन ह कीहिन कि देश म कोविड टीका के कोनो कमी नइ हे। ओमन कीहिन कि केंद्र सरकार ह स्थिति उपर धियान देवत हे अउ राज्य के संगेसंग केंद्र शासित प्रदेश मन म कोविड टीका मन ल पहुंचाय के काम करत हे। श्री हर्षवर्धन ह अपन ट्वीट संदेस म राज्य के स्वास्थ्य मंत्री मन ल कीहिन कि अब तक देशभर म कोविड महामारी ल रोके खातिर नौ करोड़ ले जादा के खुराक दे गेहे। एति छत्तीसगढ़ म आठ अप्रैल तक सैंतीस लाख सत्ताईस हजार लोगन मन ल कोरोना के टीका लगाये गेहे। काली राज्य म दू लाख इंक्यानबे हजार ले जादा लोगन मन ल टीका लगाये गीस। खबर के मुताबिक स्वास्थ्य विभाग ह ए महीना के आखरी तक राज्य म पैंतालिस बछर ले जादा उमर के अंठावन लाख छैंसठ हजार ले जादा लोगन मन ल कोरोना के टीका लगाये के लक्ष्य राखे हे। अभी तक पैंतालिस बछर ले जादा उमर के मनखे मन ल पच्चीस लाख पच्चीस हजार ले जादा लोगन मन टीका लगाये गेहे।
कोविड टीका 02
राज्य के मुख्यमंत्री भूपेश बघेल ह आज राजधानी रायपुर के पंडित जवाहरलाल नेहरू स्मृति चिकित्सालय म कोरोना के पहिली टीका लगवाइन। उंहें गृहमंत्री ताम्रध्वज साहू ह घलो अपन गोसइन के संग रायपुर के मेडिकल काॅलेज म कोरोना के पहिली टीका लगवाइन। श्री बघेल ह लोगन मन ल अपील करीन कि पात्रता के मुताबिक कोरोना के टीका जरूर लगवावंय। उंहें गृहमंत्री श्री साहू ह कीहिन कि जम्मों लोगन मनके सहयोग ले ए महामारी ल हराय जा सकत हे। विश्व स्वास्थ्य संगठन-यूनिसेफ अउ विशेषज्ञ डॅाक्टर मन ह लोगन मन ले अपील करे हे कि ए वैक्सिन ह बहुते जादा सुरक्षित हे अउ जरूरी मापदंड ल लेके तियार करे गेहे। ओमन कहिन कि लोगन मन टीकाकरण ल लेके कोनो प्रकार के भरम झन पालय। ए टीका के लगाये ले कोरोना ले बांचे जा सकत हे।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी कार्यक्रम के प्रसारण ल ग्यारा अप्रैल इतवार के दिन करे जाही। मुख्यमंत्री ह लोकवाणी म ए दारी नया बजट नया लक्ष्य विसय उपर राज्य के जनता मनले गोठबात करही ।ए कार्यक्रम के प्रसारण ल छत्तीसगढ़ के जम्मों आकाशवाणी केंद्र, एफ.एम. चैनल, अउ क्षेत्रीय समाचार चैनल मन डहार ले बीहनिया साढ़े दस बजे ले ग्यारा बजे तक करे जाही।