मुनगा पौधरोपण अभियान
राज्य म आज वन विभाग डहार ले मुनगा पौधारोपण अभियान चलाय गीस। ए दउरान जम्मों जिला के सरकारी स्कूल, आंगनबाड़ी केन्द्र अउ छात्रावास आश्रम म मुनगा के पौधा लगाय गीस।
बस्तर जिला के बकावंड कन्या स्कूल म बस्तर विकास प्राधिकरण के अध्यक्ष लखेश्वर बघेल अउ विधायक रेखचंद जैन ह कालीपुर के आंगनबाड़ी केन्द्र म मुनगा के पौधा लगाईन। ए मउका म गांव वाले मन ल फलदार पौधा घलो बांटे गीस। उहें, सांसद दीपक बैज डहार ले लामड़ागुड़ा के स्कूल अउ कस्तूरबा आश्रम म मुनगा के पौधा लगाय गीस। प्रदेस के आने-आने जिला ले घलो मुनगा पौधा लगाय जाय के खबर मिले हे। खबर के मुताबिक आयुर्वेद म मुनगा ल पौष्टिकता अउ विटामिन ले भरपूर बताय गेहे। एमा आयरन, मैग्नीशियम, पोटेशियम अउ जिंक जइसन पोषक तत्व घलो पाय जाथे।
वनोपज संग्रहण
छत्तीसगढ़ ह लघु वनोपज संग्रहण के वार्षिक संग्रहण लक्ष्य ल छह महीना पहिली हासिल कर लेहे, जेखर मुताबिक चालू सीजन के दउरान देस के आने-आने राज्य के तुलना म छत्तीसगढ़ पहिली स्थान म हवय।
द ट्राईबल को-आॅपरेटिव मार्केटिंग डेव्हल्पमेंट फेडरेशन आॅफ इंडिया-ट्राईफेड डहार ले जारी करे गे आंकड़ा के मुताबिक छत्तीसगढ़ म चार जुलाई तक के स्थिति म करीबन एक सौ पांच करोड़ रूपिया के रासि के छियालीस हजार मीटरिक टन ले जादा लघु वनोपज के संग्रहण होगे हे। खबर के मुताबिक प्रदेस म चालू वित्तीय बछर म न्यूनतम समर्थन मूल्य म योजना के तहत लघु वनोपज के संग्रहण करे जात हे।
सीएम/पीएम पत्र
मुख्यमंत्री भूपेश बघेल ह प्रधानमंत्री नरेन्द्र मोदी ल चिट्ठी लिखके जिम संचालन बर सर्त के मुताबिक मंजूरी देके बात किहीन हे। अपन चिट्ठी म श्री बघेल ह किहीन हे कि लाॅकडाउन के बाद आर्थिक गतिविधि म छूट दे जावत हे। इही कड़ी म रेस्टोरेंट, होटल समेत आने-आने गतिविधि बर मंजूरी एसओपी के पालन के सर्त म केन्द्रीय गृह मंत्रालय डहार ले दे गेहे। फेर, जिम संचालन बर अनुमति नइ मिले ले एखर संचालक मन ल आर्थिक कठिनाई के सामना करे बर पड़त हे। मुख्यमंत्री ह प्रधानमंत्री ले अनुरोध करे हे कि जिम संचालन बर सर्त के मुताबिक मंजूरी दे जाय।
माओवादी गिरफ्तार/जवान घायल
बीजापुर जिला म सुरक्षा बल मन ह तीन झिन माओवादी ल गिरफ्तार करे म सफलता पाय हे। मिले खबर के मुताबिक केन्द्रीय रिजर्व पुलिस बल-सीआरपीएफ अउ जिला पुलिस बल के सामलात दल तलाशी अभियान म निकले रिहीन। इही दउरान सुरक्षा बल ह बासागुड़ा थाना क्षेत्र के कोरसागुड़ा के जंगल म घेराबंदी करके तीन झिन माओवादी ल गिरफ्तार करीन। बताय जात हे कि ए माओवादी सलवा जुडूम के दउरान गांव वाले मनके हत्या म सामिल रिहीन।
ऐति, दंतेवाड़ा जिला म सुरक्षा बल मन ह छह ठिन बम बरामद करे हे। उहें, विस्फोटक के चपेट म आय ले डिस्ट्रिक्ट रिजर्व गार्ड-डीआरजी के दू झिन जवान घायल होगे। घायल जवान मन ल जिला अस्पताल म भर्ती कराय गेहे। मिले खबर के मुताबिक डीआरजी के जवान तलासी अभियान म निकले रिहीन। इही दउरान मारजूम थाना के कलेपाल गांव के तीर सुरक्षा बल मन ह माओवादी सिविर म धावा बोलीन। सुरक्षा बल मन ल आवत देख के माओवादी मन ह सिविर छोड़के भगा गीन, जेखर बाद जवान मन ह मउका ले पांच किलो वजन के तीन नग बम अउ पिट्ठू बरामद करीन। एखर संगेसंग कलेपाल के जंगल ले घलो सुरक्षा बल मन ह तीन नग टिफिन बम बरामद करीन। इही बीच, माओवादी डहार ले लगाय गे प्रेसर बम के चपेट म आय ले दू झिन जवान घायल होगे।
कोरोना-बिलासपुर
बिलासपुर के केन्द्रीय जेल म बंद दुष्कर्म के आरोपी कोरोना संक्रमित पाय गेहे, जेखर बाद सिविल लाइन थाना ल सील कर दे गेहे। हमर संवाददाता ह बतईन कि सिविल लाइन थाना के पुलिस ह दुष्कर्म के फरार आरोपी ल कर्नाटक के मैसूर ले गिरफ्तार करे रिहीस, जेखर बाद ओला बिलासपुर लाय गीस। बाद म न्यायालय के आदेस म आरोपी ल केन्द्रीय कारागार बिलासपुर भेज दे गे रिहीस, जिहां आरोपी के कोरोना जांच रिपोर्ट पाॅजिटिव पाय गेहे, जेखर बाद सुरक्षा ल धियान म राखत थाना ल सील कर दे गेहे। उहें, आरोपी के संपर्क म आय जम्मों कैदी के सैंपल घलो ले जावत हे।
इही बीच, लोक निर्माण विभाग के एक ठेकेदार घलो कोरोना संक्रमित पाय गेहे, जेखर बाद विभाग के एक कार्यालय ल सील कर देहे। उहें, ठेकादार के संपर्क म आय लोगन ल क्वारेंटाइन करे गेहे।
आंदोलन-चेतावनी
अंबिकापुर जिला अस्पताल म डाॅक्टर मनके संग होय गलत व्यवहार के मामला म आरोपी मनके गिरफ्तारी नइ होय ले डाॅक्टर मन ह आंदोलन करे अउ काली ले ओपीडी के संगेसंग आपातकालीन सेवा ल बंद करे के चेतावनी देहे। ए संबंध म जिला अस्पताल के डाॅक्टर मन ह कलेक्टर अउ पुलिस अधीक्षक ल चिट्ठी देके कार्रवाई करे के मांग करे हे। कार्रवाई नइ होय म ओमन अनिश्चितकालीन हड़ताल म जाय के बात किहीन हे। इही बीच, स्वास्थ्य मंत्री टी.एस. सिंहदेव ह जिला के बड़का पुलिस अधिकारी मन ल दोसी आरोपी मन ल जल्दीच गिरफ्तार करे के निरदेस देहे।
महिलाएं-डूबी
नारायणपुर जिला म तीन झिन माईलोगिन मन नंदियां पार करत बेरा बोहा गीस। एमा ले एक झिन माईलोगिन के सव बरामद कर ले गेहे। मिले खबर के मुताबिक धनोरा थाना क्षेत्र के झारागांव के तीन झिन माईलोगिन पाछु संझा माडिन नदियां पार करत रिहीन। ए दउरान अचानके पानी के बहाव तेज होय ले तीन झिन माईलोगिन नंदियां म बोहा गे। इही बीच, गोताखोर मन ह माईलोगिन मन ल बचाय के कोसिस करीन, फेर तेज बहाव के सेती ओमन बचा नइ पाईस। बाद म गोताखोर मन ह एक झिन माईलोगिन के सव बरामद कर लीन। उहें, दू झिन आने माईलोगिन के खोज जारी हे।
श्यामाप्रसाद मुखर्जी-जयंती
राष्ट्र आज डाॅक्टर श्यामाप्रसाद मुखर्जी के उंखर एक सौ उन्नीसवां जयंती म श्रद्धासुमन अर्पित करत हे। उपराष्ट्रपति एम. वेंकैया नायडू अउ प्रधानमंत्री नरेन्द्र मोदी ह डाॅक्टर मुखर्जी ल श्रद्धासुमन अर्पित करीन।
प्रधानमंत्री ह किहीन कि देस के प्रगति म डाॅक्टर मुखर्जी के सुघ्घर योगदान रेहे हे। ओमन किहीन कि उंखर विचार अउ आदर्स ले करोड़ों देसवासी मन ल प्रेरणा मिलीस।
ऐति, भारतीय जनता पार्टी के प्रदेस अध्यक्ष विष्णुदेव साय ह घलो डाॅक्टर मुखर्जी ल श्रद्धा सुमन अर्पित करीन हे। ए मउका म ओमन किहीन कि डाॅक्टर मुखर्जी के सपना अब धीरे-धीरे पूरा हावत हे। श्री साय ह किहीन कि डाॅक्टर मुखर्जी के बिस्वास रिहीस कि राष्ट्रीय एकता के धरातल म सुघ्घर भविष्य के नींव राखे जा सकत हे। ओमन किहीन कि डाॅक्टर मुखर्जी के विचार ल आत्मसात करना ही ओमन ल सच्चा श्रद्धांजलि देना होही।
विशेष ई-लोक अदालत
प्रदेस म अवइया ग्यारह जुलाई के राज्य स्तरीय ई-लोक अदालत के आयोजन करे जाही। एमा अधिवक्ता अउ पक्षकार आॅनलाइन, पीठासीन अधिकारी के आगू अपन पक्ष राखही। लोक अदालत के माध्यम ले लंबित सिविल वाद, मोटर दुर्घटना दावा, पारिवारिक अउ आपराधिक मामला के संगेसंग राजीनामा हो सकत हे ओ मामला के निपटारा करे जाही। ई-लोक अदालत के उद्देश्य लंबित मामला मनके निराकरण अउ पक्षकार मन ल तुरते न्याय देवाना हे।
खबर के मुताबिक कोरोना संक्रमण के चलत पाछु दू राष्ट्रीय लोक अदालत के आयोजन निरस्त करे गे रिहीस।
सावन सोमवार
आज सावन महीना के पहिली सोमवार आय। ए मउका म प्रदेस के आने-आने मंदिर मन म श्रद्धालु मन ह भगवान सिव के दर्सन करके पूजा-पाठ करीन। राजधानी रईपुर स्थित महादेवघाट स्थित हटकेश्वर महादेव मंदिर मन म श्रद्धालु मन ह निश्चित दूरी बनाके पूजा अउ जल चढ़ाईन। उहें, दुरूग जिला के देवबलौदा मंदिर अउ पावर हाउस स्थित राज राजेश्वरी मंदिर म घलो लोगन मन ह बेलपत्र चढ़ाके भगवान भोलेनाथ के पूजा-पाठ कारीन। कोरोना संक्रमण के चलत श्रद्धालु अउ मंदिर प्रबंधन डहार ले सुरक्षा के जम्मों उपाय अपनाय जावत हे।
