परीक्षा पे चर्चा
प्रधानमंत्री नरेन्द्र मोदी ह काली संझा सात बजे ‘‘परीक्षा पे चर्चा‘‘ के दउरान विद्यार्थी, सिक्षक अउ माता-पिता मनके संग संवाद करही। येहा ए कारीकरम के पहली संस्करण हरय। कोविड महामारी के पाबंदी के सेती एला आॅनलाइन आयोजित करे जाही। ‘‘परीक्षा पे चर्चा‘‘ कारीकरम के दउरान श्री मोदी ह परीक्षा के संबंध म विद्यार्थी अउ पालक मन ल जरूरी सुझाव दीही।
ए कारीकरम के सेती काली संझा सात अप्रैल के आकाशवाणी केन्द्र रईपुर ले प्रसारित होवइया हिन्दी समाचार बुलेटिन के समय म बदलाव करे गेहे। काली हिन्दी समाचार बुलेटिन ल संझा छह बजके पैंतालीस मिनट म प्रसारित करे जाही।
कोविड-स्वास्थ्य दल
केन्द्र सरकार ह कोरोना मरीज के संख्या म बढ़ोतरी अउ ए बीमारी ले जादा ले जादा संख्या म लोगन मनके मउत होय म छत्तीसगढ़, महाराष्ट्र अउ पंजाब के पचास ठन जिला मन म पचास जन स्वास्थ्य दल भेजे हे। ए स्वास्थ्य दल ल महाराष्ट्र के तीस ठन जिला, छत्तीसगढ़ के ग्यारह ठन जिला अउ पंजाब के नौ ठन जिला मन म भेजे गेहे। ए दल मन ह बीमारी के निगरानी, जरूरी उपाय अउ एखर बचाव के सुझाव दीहीं।
कोरोना समाचार
राज्य म काली कोरोना बीमारी के सात हजार तीन सौ दू नवा मामला आगू आय हे। करीबन पांच महीना बाद कोरोना संक्रमण के मामला म सबले जादा बढ़ोतरी होय हे। राज्य म कुल कोरोना मरीज के संख्या चवालीस हजार ले जादा होगे हे। उहें, कोरोना ले काली अड़तीस झन मनखे मनके मउत घलो होय हे।
गरियाबंद जिला के महिला कांग्रेस अध्यक्ष ममता राठौर के आज बिहनिया कोरोना बीमारी ले मउत होगे। कुछ दिन पहिली सुश्री राठौर ह असम ले चुनाव प्रचार करके घर आय रिहीन।
कोरोना-हाईकोर्ट सुनवाई
कोरोना संक्रमण के बाढ़त मामला ल देखत छत्तीसगढ़ उच्च न्यायालय के संगेसंग रईपुर, दुरूग अउ बिलासपुर के जिला सत्र न्यायालय म काली ले सिरिफ जरूरी मामला मनके सुनवाई करे जाही। ए दउरान हाईकोर्ट म आॅनलाइन सुनवाई करे जाही। उहें, जिला सत्र न्यायालय मन म बिहनिया ग्यारह बजे ले मंझनिया दू बजे तक सुनवाई होही।
लाॅकडाउन-दुर्ग
प्रदेस के दुरूग जिला म आज ले चैदह अप्रैल तक संपूर्ण लाॅकडाउन लगाय गेहे। आज बिहनियाच ले एखर असर गांव अउ सहरी क्षेत्र मन म देखे गीस। ए दउरान दुरूग जिला के जम्मों बाजार, व्यावसायिक प्रतिष्ठान मन ल चैदह अप्रैल तक बंद राखे जाही। ए काम म ग्यारह सौ ले जादा पुलिस जवान मनके ड्यूटी लगाय गेहे। संगेसंग पचहत्तर ठन पेट्रोलिंग गाड़ी मन ह स्थिति के नजर राखत हे। जिला म जांच खातिर छब्बीस ठन पाइंट बनाय गेहे। उहें, उल्लंघन करइया मनखे मनके खिलाफ कार्रवाई घलो करे जात हे। जिला के अमलेश्वर, पाटन, धमधा, कुम्हारी, नंदनी अउ अंजोरा गांव ले लगे सीमा मन म ग्यारह ठन पाइंट बना के सील कर दे गेहे। लाॅकडाउन के दउरान राजनांदगांव, बालोद, बेमेतरा अउ रईपुर जिला ले अवइया-जवइया लोगन मन ल आपातकाल स्थिति म ई-पास के माध्यम ले आय-जाय के मंजूरी दे गेहे।
ओति, बिलासपुर जिला म कोरोना संक्रमण के बाढ़त मामला ल देखत जिला प्रसासन डहार ले नवा गाईड-लाइन जारी करे गेहे। बिलासपुर जिला म अब बिहनिया छह बजे ले संझा सात बजे तक दुकान मन ल खोले जाही।
केन्द्र-टीकाकरण
केन्द्र सरकार ह आज एक ठिन आदेस जारी करत पैंतालीस बछर अउ ओखर ले जादा उमर के जम्मों कमरचारी मन ल कोविड टीका लगवाय बर केहे हे, जेखर ले कोरोना के बाढ़त संक्रमण ल रोके जा सकय।
उहें, छत्तीसगढ़ के उद्योग संचालक ह कोरोना संक्रमण के रोकथाम बर जरूरी दिसा-निरदेस जारी करे हे।
टीकाकरण-दिशा/निर्देश
केन्द्रीय स्वास्थ्य मंत्रालय डहार ले दिसा-निरदेस जारी करके केहे गेहे कि टीका लगाय ले छूटे स्वास्थ्यकर्मी मन बर पंजीकरण सुविधा सरकारी कोविड टीकाकरण केन्द्र म दे जाही। केन्द्रीय स्वास्थ्य सचिव राजेश भूषण ह ए संबंध म जम्मों राज्य अउ केन्द्रसासित प्रदेश मनके स्वास्थ्य सचिव मन ल पत्र लिखे हे। चिट्ठी म केहे गेहे कि अट्ठारह बछर ले चवालीस बछर के स्वास्थ्यकर्मी मन ल टीकाकरण केन्द्र म पंजीकरण करवाय खातिर जरूरी कागजात जमा करना पड़ही।
ऐति, छत्तीसगढ़ म चार अप्रैल तक तीस लाख ग्यारह हजार मनखे मन ल टीका लगाय गेहे। स्वास्थ्य विभाग के मुताबिक पैंतालीस बछर ले जादा उमर के एक्कईस लाख तेईस हजार ले जादा लोगन मन ल कोरोना के पहिली टीका लगाय गेहे।
राज्य के स्वास्थ्य मंत्री टी.एस. सिंहदेव ह प्रदेस म कोरोना जांच के स्थिति के समीक्षा करीन। ओमन किहीन कि आरटी-पीसीआर जांच के संख्या ल अउ जादा बढ़ाय जाही।
जवान शहीद-आर्थिक सहायता
बीजापुर जिला के तर्रेम क्षेत्र म माओवादी घटना म सहीद होय पुलिस अधिकारी अउ जवान मनके परिवार वाले मन ल अस्सी लाख रूपिया के आर्थिक सहायता रासि दे जाही। संगेसंग परिवार के एक झिन सदस्य मन ल अनुकम्पा म नौकरी दे जाही। मुख्यमंत्री भूपेश बघेल ह आर्थिक सहायता रासि अउ अनुकम्पा भर्ती के प्रक्रिया ल जल्दी पूरा करे के निरदेस दीन।
ए मुठभेड़ म सरगुजा जिला के अमदला गांव के जवान रमाशंकर सिंह पैकरा ह सहीद होगे। सहीद जवान ल आज गार्ड आॅफ आॅनर देके बाद उंखर अंतिम संस्कार करे गीस। ए मउका म पुलिस अउ जिला प्रसासन के अधिकारी मन ह मौजूद रिहीन। केन्द्रीय राज्य जनजातीय मंत्री रेणुका सिंह ह गांव पहुंच के सहीद जवान ल श्रद्धांजलि दीन।
एखर अलावा, मुठभेड़ म सहीद जवान जगत राम के घलो राजनांदगांव जिला के आलीखूंटा गांव म अंतिम संस्कार करे गीस। ए मउका म जिला के प्रभारी मंत्री मोहम्मद अकबर, सांसद संतोष पांडेय के संगेसंग बड़ संख्या म लोगन मन मौजूद रिहीन।
भाजपा-स्थापना दिवस
भारतीय जनता पार्टी डहार ले आज एकचालीसवां स्थापना दिवस मनाय गीस। ए दउरान प्रधानमंत्री नरेन्द्र मोदी ह किहीन हे कि गलत बात मन ल प्रसारित करे जात हे, चाहे ओ कृषि कानून के बारे म होवय, चाहे नागरिकता कानून के बारे म होवय।
ऐति, छत्तीसगढ़ म घलो भाजपा के स्थापना दिवस मनाय गीस। ए दउरान पूर्व मुख्यमंत्री डाॅक्टर रमन सिंह ह राजनांदगांव म राखे गे एक ठिन कारीकरम म सामिल होईन। ए दउरान ओमन कोरोना टीकाकरण के बारे म जानकारी घलो लीन।
राज्यपाल-हेमचंद विवि
हेमचंद यादव विश्वविद्यालय दुरूग डहार ले आॅनलाइन स्वर्णपदक वितरण अउ सम्मान समारोह के कारीकरम राखे गीस। ए दउरान कारीकरम म प्रदेस के राज्यपाल अनुसुईया उइके ह किहीन कि सफलता पाय खातिर कड़ा मेहनत करना बहुते जरूरी हे। ओमन यहू किहीन कि जउन विद्यार्थी मन ह पदक नइ पाय हे, ओमन निरास झन होवय। ओमन मेहनत करही त उहू मन ल पदक मिल सकत हे।
ट्रेन परिचालन
दक्षिण पूर्व मध्य रेलवे के नागपुर रेलमंडल के तहत डोंगरगढ़-जाटकन्हार-मुसरा के बीच तकनीकी काम के सेती नौ ले बारह अप्रैल के बीच कई ठिन रेलगाड़ी मनके अवई-जवई प्रभावित रइही। ए दउरान कुछेक मेमू रेलगाड़ी अउ पार्सल गाड़ी मन ल रद्द करे जाही।
उहें, यात्री मन ल आरक्षित सीट देवाय खातिर रेलवे प्रसासन डहार ले उदयपुर-सिटी-शालीमार अउ उदयपुर-सिटी के बीच साप्ताहिक स्पेशल रेलगाड़ी के सुरूवात करे जात हे। ए रेलगाड़ी ल राज्य के पेण्ड्रारोड, बिलासपुर, चांपा अउ रायगढ़ रेलवे स्टेशन म रोके जाही। ए रेलागाड़ी म आरक्षित अउ कन्फर्म टिकिट वाले यात्री मन ल यात्रा करे के मंजूरी दे गेहे।
 | ReplyForward |