जवान शहीद
बीजापुर जिला म आज माओवादी अउ सुरक्षा बल मनके बीच होय मुठभेड़ म पंाच झिन जवान मनके शहीद होय के खबर हे। शहीद जवान मन म कोबरा बटालियन के एक, बस्तरिया बटालियन के दू अउ डीआरजी के दू जवान सामिल हे। उंहें मुठभेड़ म बारा जवान मन घायल होय हे। घटना के जगा ले एक महिला नक्सली के शव बरामद होय के खबर घलो मिले हे। बीजापुर के पुलिस अधीक्षक कमलोचन कश्यप ह बताइन हे कि तर्रेम इलाका के सिलगेर के जंगल म सुरक्षा बल के जवान गश्त म निकले रीहिस हे इही दउरान सुरक्षा बल मनके माओवादी मन संग मुठभेड़ होइस। मुठभेड़ करीबन तीन घंटा तक चलीस। घायल जवान मन ल मउका ले निकाले बर वायुसेना के दू ठिन हेलिकाॅप्टर अउ नौ एंबुलेंस बीजापुर जिला मुख्यालय भेजे गेहे। उंहें इही जिला के भैरमगढ़ थाना क्षेत्र के सुरक्षा बल मनके टीम ह गश्त के दउरान एक झिन माओवादी ल गिरप्तार करे हे। एखर संगेसंग गंगालूर थाना क्षेत्र के चेरपाल के तीर मोदीपारा म माओवादी मन डहार ले लगाए गे आठ किलो के एक आईईडी ल सुरक्षा बल मन ह बरामद करे हे, जेला बाद म निष्क्रिय कर दे गीस। इही बीच, दंतेवाड़ा जिला म लोन वर्राटू अभियान के तहत एक इनामी माओवादी ह पुलिस अधीक्षक के आगू आत्मसमर्पण कर दीस। ए माओवादी उपर एक लाख रूपिया के इनाम घोषित रीहिस। ये माओवादी ह लंबा बेरा तक जोगातेलाम-कामलूर क्षेत्र म सक्रिय रीहिस।
कोरोना समाचार-01
प्रदेश म कोरोना संक्रमण के मामला ह सरलग बाढ़त हे। काली प्रदेश म चार हजार एक सौ चैहत्तर नवा कोरोना संक्रमित मरीज मिले हे। प्रदेश म अब तक करीबन तीन लाख संतावन हजार ले जादा मरीज मिले हे। उंहें काली प्रदेश म कोरोना संक्रमा ले तैंतीस लोगन मनके मउत घलो होय हे। इही बीच रायपुर जिला के प्रभारी मंत्री रविन्द्र चैबे अउ स्वास्थ्य मंत्री टी.एस. सिंहदेव ह आज नवा विश्राम गृह म कोरोना संक्रमण के रोकथाम बर राज्य के बड़का अधिकारी मनके बइठका लीन। ओमन ह कोरोना संक्रमण ल रोके बर टेस्टिंग अउ कांन्टेक्ट ट्रेसिंग बढ़ाय के संग अस्पताल म बिस्तर बढ़ाय म तेजी लाय के निर्देश देहे। इही बीच प्रदेश म कोरोना संक्रमण के बाढ़त मामला ल देखत शासन-प्रशासन ह सख्ती शुरू कर देहे। एला देखत काली ले रायपुर म दुकान बीहनिया छै बजे संझा छै बजे तक खुला रही । होटल अउ रेस्टारेंट बीहनिया छै बजे ले संझा आठ बजे तक खुला रही। उंहे धमतरी म घलो छै बजे तक जबकि राजनंादगंाव जिला म संझा चार बजे तक ही दुकान खोलही। एति दुर्ग जिला म छै ले चैदा अप्रैल तक संपूर्ण लाॅकडाउन लगाये जाही। ए बेरा म बजार म कालीबाजारी रोके बर कलेक्टर के निर्देश म एसडीएम ह व्यापारिक संघ के प्रतिनिधि मन संग बइठका करीन।
कोरोना समाचार -02
रायपुर के जम्मों अस्पताल मन म अब बिस्तर खाली नइ बांचे हे। एम्स अउ मेकाहारा के संगेसंग माना के कोविड अस्पताल के बिस्तर घलो भरे जा चुके हे। एला देखत जिला प्रशासन ह रायपुर के पांच ठिन काॅलेज अउ छात्रावास ल आइसोलेशन अउ कोविड सेंटर बनाये बर अपन कब्जा म कर लेहे। इही बीच राज्यसभा संासद सरोज पांडेय ह केंद्रीय स्वास्थ्य मंत्री डॅाक्टर हर्षवर्धन ले गोठबात करके ओमन ल प्रदेश म कोरोना संक्रमण के स्थिति के बारे म जानकारी दीन। एमा केंद्रीय मंत्री ह आशा जताइन कि कोरोना संक्रमण ले निपटे बर केंद्र सरकार राज्य ल हरसंभव मदद देबर तियार हे। केंद्रीय मंत्री ह जरूरत पडे़ म विशेष मेडिकल टीम ल भेजे के बात घलो कीहिन हे। उंहें नेता प्रतिपक्ष धरमलाल कौशिक ह प्रदेश म कोरोना के डरावना स्थिति बर राज्य सरकार के स्वास्थ्य विभाग के कार्यप्रणाली ल जिम्मेवार ठहराय हे। ओमन ह आरोप लगाइन कि स्वास्थ्य विभाग ह पहिली कोरोना म खर्चा ल लुकाइस अउ कोरोना ले होवइया मउत के आंकड़ा ल घलो लुकावत हे। मउत के जउन आंकड़ा ल सरकार जारी करत हे, वो आंकड़ा सही मायने म कई गुना जादा हे।
कोरोना टीकाकरण-
देश म अब तक सात करोड़ तीस लाख चैव्वन हजार कोविड टीका लगाये जा चुके हे। केंद्रीय स्वास्थ्य मंत्रालय ह कीहिन हे कि पाछू चैबीस घंटा म तीस लाख तिरानवे हजार लोगन मनल टीकाकरण करे गीस।एति छत्तीसगढ़ म घलो टीकाकरण अभियान जोरशोर ले जारी हे। काली तीन लाख छब्बीस हजार ले जादा लोगन मन ल कोरोना के टीका लगाये गेहे। अब तक प्रदेश म पच्चीस लाख ले जादा लेागन मन ल कोविड वैक्सीन के डोज दे गेहे। केंद्र सरकार डहार ले टीकाकरण बर पैंतालीस ले जादा उमर के जम्मों मनखे मन ल पात्र करे के बाद प्रदेश म टीका लगवइया मनके संख्या तेजी ले बाढ़त हे। सरकारी केंद्र मन म टीकाकरण के सुविधा के मामला म छत्तीसगढ़ ह पूरा देश म चैथा स्थान म हे। स्वास्थ्य विभाग ह लोगन मनले अपील करे हे कि पैंतालिस बछर ले जादा जम्मों मनखे मन कोरोना के टीका जरूर लगवायें, जेखर ले ये वैश्विक महामारी ले निपट सकय। नवा आंकड़ा के मुताबिक जउन देश म टीकाकरण बड़ संख्या म होय हे, उंहा कोरोना के फैले के मामला कम आय हे। इही बीच कोरोना संक्रमण के नियंत्रण अउ संक्रमित मनके पहिचान बर हर दिन बड़ संख्या म सैंपल के जांच करे जावत हे। छत्तीसगढ़ हरएक दस लाख के आबादी म रोजाना कोरोना जांच म देश म तीसर स्थान म हे। ए मामला म सिरिफ महाराष्ट्र अउ गुजरात ह छत्तीसगढ़ ले आगू हे। प्रदेश म अब तक कुल अंठावन लाख बत्तीस हजार ले जादा सैंपल के जांच करे गेहे।
कोविड केन्द्र
केंद्र सरकार ह राज्य मन म कोविड संक्रमण के कड़ी ल तोड़े बर जांच ल बढ़ाय अउ कंटेनमेंट जोन के संग माइक्रो कंटेनमेंट जोन बनाये बर केहे हे। कोविड अउ एखर ले होवइया मउत के मामला म बढ़ोत्तरी वाले ग्यारा राज्य अउ केंद्रशासित प्रदेश मनले तुरते अउ प्रभावी उपाय करे के संग मानक दिशा निर्देश के कड़ई ले पालन करे बर केहे गेहे। एमा छत्तीसगढ़, महाराष्ट्र, पंजाब, कर्नाटक, दिल्ली अउ हरियाणा सामिल हे। केबिनेट सचिव राजीव गौबा ह काली जम्मों राज्य अउ केंद्रशासित प्रदेश के मुख्य सचिव, पुलिस महानिदेशक अउ स्वास्थ्य सचिव मनके संग एक उच्च स्त्रीय समीक्षा बइठका के अध्यक्षता करीन। बइठका म बताय गेहे कि टीयर’-टू अउ टीयर-थ्री शहर मनके संगेसंग अर्धशहरी क्षेत्र मन म हालेच म कोविड मामला म बढ़ोत्तरी दरज करे गेहे। श्री गौबा ह राज्य के मुख्य सचिव मनल ये कीहिन हे कि कोविड के मामला म बढ़ोत्तरी ले निपटे बर पूरा कोसिस करंय। ए काम म केंद्र सरकार डहार ले पूरा संसाधन अउ मदद देवाय जाही।
पंचायत पुरस्कार
छत्तीसगढ़ के ग्राम पंचायत, जनपद पंचायत अउ जिला पंचायत मन ल सरलग तीसर साल घलो आने आने काम बर ग्यारा राष्ट्रीय पुरस्कार मिले हे। केंद्रीय पंचायती राज मंत्रालय डहार ले हालेच म घोषित राष्ट्रीय पंचायत पुरस्कार के विजेता मनके सूची म आठ ग्राम पंचायत, दू जनपद पंचायत अउ एक जिला पंचायत सामिल हे। केंद्रीय पंचायती राज मंत्रालय ह कोंडागांव जिला पंचायत, गरियाबंद अउ तिल्दा जनपद पंचायत समेत सरगुजा जिला के सरगंवा, रीरी ग्राम पंचायत, बालोद जिला के माहुद-अ, कबीरधाम जिला के महराटोला अउ रायपुर जिला के बैहार ग्राम पंचायत के चयन दीनदयाल उपाध्याय पंचायत सशक्तिकरण पुरस्कार बर करे गेहे।
राष्ट्रीय पंचायत पुरस्कार दू हजार इक्कीस के अंतर्गत बीजापुर जिला के गोटईगुड़ा ग्राम पंचायत ल नानाजी देशमुख राष्ट्रीय गौरव ग्राम सभा पुरस्कार, रायपुर जिला के लखना-नवागांव ल बाल मित्र ग्राम पंचायत पुरस्कार अउ बैहार ल ग्राम पंचायत विकास योजना पुरस्कार दे जाही। मुख्यमंत्री भूपेश बघेल ह ए उपलब्धि बर संबंधित पंचायत मनके जनप्रतिनिधि, विभागीय अधिकारी अउ कर्मचारी मन ल बधाई दीन हे।