लाॅकडाउन
राज्य सरकार ह कोरोना संक्रमण के रोकथाम बर स्थानीय परिस्थिति के मुताबिक लाॅकडाउन के संबंध म फइसला ले बर जम्मों जिला कलेक्टर मन ल अधिकृत करे हे। एखर बाद दुरूग कलेक्टर डाॅक्टर सर्वेश्वर नरेन्द्र भूरे ह पूरा जिला म छह ले चैदह अप्रैल तक लाॅकडाउन करे जाय के फइलसा लेहे। कलेक्टर ह लोगन मन ले घर म रेहे के अपील करीन हे। ओमन किहीन कि लाॅकडाउन के माध्यम ले जिला म कोरोना संक्रमण ल रोके जा सकही। एखर बर नागरिक मनके मदद घलो जरूरी हवय। अधिकारी मन बतईन कि दुरूग जिला पूरा लाॅकडाउन रइही। ए दउरान जरूरी सेवा मन ल छोड़के जम्मों व्यावसायिक प्रतिष्ठान बंद रइही। यात्री बस के चलई घलो बंद रइही। आय-जाय बर मंजूरी ले बर पड़ही। उहें, सराब दुकान मन ल घलो बंद राखे के आदेश जारी करे गेहे। ऐति, बेमेतरा जिला के नवागढ़ ल जिला प्रसाासन ह कंटेनमेंट जोन घोसित कर दे हे। ए दउरान बिहनिया छह बजे ले मंझनिया दू बजे तक दुकान मन ल खोले के मंजूरी दे गेहे। उहें, मंझनिया दू बजे के बाद संपूर्ण लाॅकडाउन होही। ए दउरान लोगन मनके अवई-जवई घलो बंद रइही। जरूरत होय म सक्षम प्राधिकारी के मंजूरी जरूरी होही।
कोरोना टीकाकरण-01
देस म पैंतालीस बछर ले जादा उमर के लोगन मन ल कोविड टीका लगाय के काम म तेजी आ गेहे। सोलह जनवरी के सुरू करे गे ए अभियान विश्व के सबले बड़का अभियान बन गेहे। पहिली स्वास्थ्यकर्मी अउ फ्रंटलाइन वर्कर्स के कार्यकर्ता मन ल ए टीका लगाय गीस। बाद म साठ बछर ले जादा उमर के लोगन मन ल एखर सुविधा देवाय गीस। एक अप्रैल ले पैंतालीस बछर ले जादा उमर के लोगन मन ल ए टीका लगाय जावत हे।
ऐति, छत्तीसगढ़ म काली दू हजार तीन सौ अटहत्तर केन्द्र मन म दू लाख चैंतीस हजार ले जादा पात्र लोगन मन ल कोरोना टीका लगाय गीस। एमा पैंतालीस बछर ले जादा उमर वाले करीब दू लाख बाईस हजार छह सौ लोगन मन ल कोरोना के पहिली डोज लगाय गीस। उहें, पैंतालीस बछर ले जादा उमर के तीन हजार नौ सौ ले जादा लोगन मन ल कोरोना टीका के दूसरडोज लगाय गीस।
उहें, कोरोना टीकाकरण के तीसर चरण म टीका लगवइया पात्र लोगन मन म उत्साह देखे जावत हे। इही कड़ी म महासमुंद जिला टीकाकरण के मामला प्रदेसभर म पहिली स्थान म आ गेहे। पाछु एक मार्च ले एक अप्रैल के बेरा तक जिला के स्वास्थ्य विभाग ह टीकाकरण के संतावन फीसदी लक्ष्य हासिल करके ए रिकार्ड बनाय हे। जिला म अब तक एक लाख सोलह हजार ले जादा पात्र लोगन मन ल वैक्सीन के पहिली डोज लगाय गेहे।
कोरोना टीकाकरण-02
ऐति, बलरामपुर-रामानुजगंज जिला म टीकाकरण बर जिला चिकित्सालय, सामुदायिक अउ प्राथमिक स्वास्थ्य केन्द्र के संगेसंग हेल्थ एंड वेलनेस सेंटर मन ल टीकाकरण केन्द्र बनाय गेहे। ए केन्द्र मन म निर्धारित बेरा म पात्र लोगन मन ल टीका लगाय जावत हे। ओति, राजनांदगांव जिला के डोंगरगढ़ म घलो टीकाकरण केन्द्र मन म टीका लगवाय बर लोगन मन उत्साह देखे जावत हे। काली संझा मिले आंकड़ा के मुताबिक पन्द्रह केन्द्र मन म करीबन इक्कीस सौ लोगन मन टीका लगवाईन।
इही बीच, राज्य के मुख्य सचिव अमिताभ जैन ह जम्मों कलेक्टर अउ पुलिस अधीक्षक मन ल कोविड टीकाकरण के काम म तेजी लाने के निरदेस दीन। ओमन काली वीडियो कान्फ्रेंसिंग के माध्यम ले समीक्षा बइठका म किहीन कि कोरोना संक्रमण ल रोके बर जम्मों उपाय करे के संगेसंग टीकाकरण ल जनआंदोलन के रूप दे जाय। मुख्य सचिव ह किहीन कि बिना मास्क लगाय सार्वजनिक जगह मन म अवई-जवई करइया लोगन मन उपर पांच सौ रूपिया के जुर्माना लागय जाय।
ऐति, भिलाई सहर म आज यातायात पुलिस अउ नगर निगम के टीम ह मास्क नइ लगइया लोगन मन उपर कार्रवाई करीन। नेहरू नगर, सुपेला घड़ी चैक अउ छावनी सीएसपी कार्यालय के तीर गाड़ी मन ल रोक के जांच करे गीस। ए दउरान चार सौ सत्रह लोगन मन ले करीबन अड़तीस हजार रूपिया के जुर्माना वसूले गेहे।
कोविड-टीकाकरण केन्द्र
देस म कोविड टीकाकरण के विस्तार के दिसा म एक ठिन बिसेस कदम उठावत केन्द्र सरकार ह सरकारी अउ निजी क्षेत्र के कोविड टीकाकरण केन्द्र मन ल ए महीना हफ्ता के जम्मों दिन खुल्ला राखे के फइसला करे हे। केन्द्र ह जम्मों राज्य मन ल चिट्ठी लिखके उंखर मन ले केहे हे कि ओमन ए केन्द्र मन ल पूरा महीना हफ्ता के सातों दिन खुल्ला राखय। टीकाकरण केन्द्र सरकारी छुट्टी म घलो खुले रइही, जेखर ले जादा ले जादा लोगन मन ह टीकाकरण के फायदा ले सकय।
कोरोना-मरीज
इही बीच, प्रदेस म कोरोना संक्रमण के मामला सरलग बाढ़त हे। काली प्रदेस म चार हजार छह सौ ले जादा कोरोना संक्रमित नवा मरीज मिले हे। प्रदेस म अब तक करीबन तीन लाख चैव्वन हजार कोरोना संक्रमित पाय गेहे। उहें, काली प्रदेस म पच्चीस झिन मनके कोरोना संक्रमण ले मउत होय हे। कोरोना संक्रमण के सबले जादा प्रभाव रईपुर अउ दुरूग जिला म देखे जावत हे। रईपुर म काली तेरह सौ सत्ताईस अउ दुरूग म नौ सौ छियानवे कोरोना संक्रमित नवा मरीज मिलीस। अइसने, राजनांदगांव म चार सौ सैंतीस अउ बिलासपुर म दू सौ अठासी नवा मरीज मनके पहिचान करे गीस। प्रदेस के बालोद, बेमेतरा, धमतरी, बलौदाबाजार, महासमुंद, कोरबा अउ जशपुर म घलो काली सौ ले जादा कोरोना संक्रमित मरीज मिले हे।
माओवादी-आत्मसपर्मण
नारायणपुर जिला म तीन झिन इनामी समेत चार माओवादी मन ह पुलिस के आगू आत्मसमर्पण करे हे। एमा हेमबती सलाम उर्फ मनीषा, मंगु मोडियामी उर्फ मंगेश उर्फ विश्वनाथ, मासे पोडियाम उर्फ सुमित्रा अउ मोटी उसेंडी उर्फ लक्ष्मी सामिल हवय। एमा ले तीन झिन माओवादी उपर सात लाख रूपिया के इनाम घोसित रिहीस।
किसान-आत्महत्या
बिलासपुर जिला के तखतपुर विकासखंड के राजाकापा गांव के किसान डहार ले आत्महत्या करे के मामला आगू आय हे। कलेक्टर डाॅक्टर सारांश मित्तर ह ए मामला म पटवारी उत्तम प्रधान ल निलंबित कर दे हे। उहें, पुलिस ह आपराधिक मामला दर्ज करके पटवारी ल गिरफ्तार कर लेहे।
गुड फ्राइडे
आज गुड फ्राइडे हरय। ए दिन ईसा मसीह ल सलीब म चढ़ाय गे रिहीस। ईसा मसीह ह जन-जन के परेसानी ल दूरिहा करे बर अपन जिनगी के बलिदान करे रिहीस। छत्तीसगढ़ समेत देस के आने-आने गिरिजाघर मन म कोरोना ले बचाव संबंधी दिसा-निरदेस के पालन करत बिसेस प्रार्थना सभा के आयोजन करे जावत हे।
ए मउका म प्रधानमंत्री नरेन्द्र मोदी ह अपन ट्वीट संदेस म किहीन हे कि गुड फ्राइडे ह हमन ल ईसा मसीह के संघर्ष अउ बलिदान के सुरता देवाथे। ओमन किहीन कि ईसा मसीह के जिनगी जरूरतमंद मनके सेवा अउ रोगी मन ल स्वस्थ करे बर समर्पित रिहीस।
संक्षिप्त समाचार
अउ अब थोरकुन समाचार सार म-
- सिकंदराबांद रेलमंडल म अवइया कोल्नूर अउ पोटकापल्ली रेलवे स्टेसन के बीच बिजली के काम करे के सेती अवइया ग्यारह ले चैबीस अप्रैल तक दक्षिण पूर्व मध्य रेलवे के चलइया कई ठिन ट्रेन के अवई-जवई रद्द रइही।
- महासमुंद जिला के राष्ट्रीय राजमार्ग क्रमांक-तीन सौ तिरपन ले लगे खल्लारी के तीर दू ठिन दंतैल हाथी मन ल घुमत देखे गीस। एखर बाद वन विभाग ह मुनादी करा के लोगन मन ल सतर्क रेहे के चेतावनी दे हे।
अउ - कोरबा सहर के हरदी बाजार पुलिस चैकी के मालखाना म राखे पटाखा म आगी लगे ले चैकी म राखे सामान जलके राख होगे।