हाईकोर्ट-विद्यार्थी फीस
छत्तीसगढ़ उच्च न्यायालय ह निजी स्कूल डहार ले फीस वसूली के खिलाफ दायर सब्बो याचिका मन ल खारिज कर देहे। मुख्य न्यायाधीश रामचंद्र मेनन अउ न्यायाधीश पी.पी. साहू के डिवीजन बेंच ह अपन फइसला म केहे हे कि सुप्रीम कोर्ट ह घलो ट्यूशन फीस लेके आदेस दीस हे, तेखरे सेती सिंगल बेंच के पहिली होय फैसला उपर हस्तक्षेप उचित नइ होही। कोरोना संक्रमण के दउरान स्कूल मनके बंद रेहे के बावजूद स्कूल प्रबंधक डहार ले फीस वसूली के आदेस के खिलाफ पालक मन ग्यारह ठन याचिका दायर करे रिहीन।
बठेना कांड-जांच दल
दुर्ग जिला के ग्राम बठेना म एके परिवार के पांच लोगन के मउत ल अनुसूचित जाति आयोग ह संज्ञान म लीन हे। आयोग के अध्यक्ष रामजी भारती, सदस्य पदमा मनहर अउ सचिव बी.एल. बंजारे ह बठेना पहुंच के परिजन मन ले भेंट करीन अउ घटना के जानकारी लीन।
इही बीच, भारतीय जनता पार्टी अनुसूचित जाति मोर्चा के बीस सदस्यीय एक दल गांव बठेना पहुंचीस अउ घटनास्थल के जायजा लीस। दल ह परिजन मन ले मुलाकात करीस अउ ओखर हरसंभव मदद के आश्वासन दीस।
एखर अलावा जनता कांग्रेस छत्तीसगढ़ – जे के प्रदेस अध्यक्ष अमित जोगी ह घलो मृतक मनके परिजन ले मुलाकात करीन अउ अपन संवेदना व्यक्त करीन।
लोकसभा-गोधन न्याय योजना
लोकसभा म कृषि मामला के स्थायी समिति ह केन्द्र सरकार ल सुझाव दीस हे कि छत्तीसगढ़ के जइसे किसान मन ले जानवर मनके गोबर खरीद के योजना पूरा देस म सुरू करे जाना चाहिए।
सदन म काली पर्वतागौड़ा चंदनगौड़ा गद्दीगौडर के अध्यक्षता वाला कृषि मामला के स्थायी समिति ह अपन रिपोर्ट सदन म प्रस्तुत करीन। समिति ह अपन रिपोर्ट म केन्द्र सरकार ल दे सुझाव म किहीन हे कि किसान ले ओखर जानवर मनके गोबर खरीदे ले ओमन के आय म बढ़ोतरी होय के संगेसंग रोजगार के नवा अवसर बाड़ही अउ जैविक खेती ल प्रोत्साहन मिलही। संगेसंग अवारा मवेसी के समस्या के घलो समाधान होही। लोकसभा म रिपोर्ट प्रस्तुत करे के पहिली ए समिति केन्द्रीय कृषि मंत्रालय के अधिकारी मन ल घलो अइसने सुझाव दे रिहीस।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के सोलहवां कड़ी के प्रसारण अवइया चैदह मार्च रविवार के होही। मुख्यमंत्री लोकवाणी म ए दारी प्रदेस के नारी शक्ति ले बातचीत करही। लोकवाणी के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल मन म बिहनिया साढ़े दस बजे ले ग्यारह बजे तक होही।
विस-सम्मान
विधानसभा अध्यक्ष डाॅक्टर चरणदास महंत ह काली बछर दू हजार उन्नीस अउ दू हजार बीस के उत्कृष्ट विधायक, उत्कृष्ट संसदीय पत्रकार अउ उत्कृष्ट इलेक्ट्राॅनिक मीडिया रिपोर्टर के चयन करत ओमन के नाम के घोसना करीन।
बछर दू हजार उन्नीस बर सत्तापक्ष डहार ले उत्कृष्ट विधायक अरूण वोरा अउ विपक्ष डहार ले सौरभ सिंह के चयन करे गीस। उहें, दू हजार बीस बर उत्कृष्ट विधायक सत्तापक्ष डहार ले कुलदीप जुनेजा अउ विपक्ष डहार ले नारायण चंदेल ल चुने गीस।
एखर अलावा उत्कृष्ट संसदीय पत्रकार के रूप म सुरेन्द्र शुक्ला, राजादास, मोहन तिवारी अउ आर.के. गांधी के चयन करे गीस। कैमरामैन के रूप म दीपक साहू अउ दिलीप कुमार ल चुने गीस। विधानसभा अध्यक्ष ह सब्बो उत्कृष्ट विधायक अउ पत्रकार मन ल बधाई अउ सुभकामना दीन हे।
परीक्षा-स्थगित
कुशाभाऊ ठाकरे पत्रकारिता विश्वविद्यालय के जम्मों परीक्षा स्थगित कर दे गेहे। विश्वविद्यालय ह प्रदेस म कोरोना संक्रमण के बाढ़त मामला ल देखत ए निर्णय लेहे।
इही बीच, पंडित रविशंकर शुक्ल विश्वविद्यालय ह घलो प्रथम सेमेस्टर के परीक्षा स्थगित कर देहे।
कोरोना टीकाकरण
छत्तीसगढ़ म कोरोना टीकाकरण जोरसोर ले चलत हे। राज्यपाल अनुसुईया उइके ह आज रईपुर स्थित अखिल भारतीय आयुर्विज्ञान संस्थान-एम्स पहुंचीन अउ कोरोना के टीका लगावाईन। उहें, दुर्ग लोकसभा क्षेत्र के सांसद विजय बघेल ह लोकसभा भवन नई दिल्ली म को-वैक्सीन के टीका लगवाईन।
माउंट-फतह
छत्तीसगढ़ के जांजगीर-चांपा जिला के आंगनबाड़ी कार्यकर्ता अमिता श्रीवास ह अफ्रीका महाद्वीप के सबले ऊंचा चोटी किलिमंजारो म झंडा फहराय हे। तंजानिया स्थित किलिमंजारो के ऊंचाई पांच हजार आठ सौ पंचानवे मीटर हवय। सुश्री श्रीवास के किलिमंजारो के पर्वतारोहण अभियान चार मार्च के बिहनिया दस बजे सुरू होईस अउ ओमन पांच दिन के चढ़ाई के बाद आठ मार्च के बिहनिया पौने आठ बजे पर्वत के सिखर म पहुंचीन। सिखर म पहुंचे के बाद ओमन चोटी म भारत के झंडा लहराईन अउ अपन ए उपलब्धि बर सहयोगी मन ल याद करीन।
अमिता श्रीवास के ए उपलब्धि म खुसी जतावत मुख्यमंत्री भूपेश बघेल अउ महिला बाल विकास मंत्री अनिला भेंडिया ह ओमन ल बधाई अउ सुभकामना दीन हे।
चित्रकोट-महोत्सव
बस्तर जिला म काली ले तीन दिन के चित्रकोट महोत्सव चालू होगे हे। एखर सुभारंभ उद्योग मंत्री कवासी लखमा ह करीन। ए मउका म ओमन किहीन कि बस्तर के संस्कृति के संगेसंग सभ्यता के प्रचार-प्रसार म ए कदम सहायक साबित होही।
महोत्सव के पहला दिन लोक नर्तक मन दल डहार ले आकर्षक प्रस्तुति दे गीस। संगेसंग दंतेवाड़ा के कोयानाच दल, कोंडागांव के माटी चो माया समूह, सुकमा के धुरवा मड़ई नाचा दल के अलावा लोहंडीगुड़ा के घोड़ान्दी नाच, बस्तानार के धुरवा नाच, जगदलपुर के परब अउ दंडारी नाच दल मन डहार ले प्रस्तुति दे गीस। एखर अलावा बस्तर परिधान म आधारित फैशन शो के आयोजन घलो करे गीस।
सिरपुर महोत्सव
महासमुंद जिला के सिरपुर म ‘‘पुरखा के सुरता‘‘ के तहत अंतर्राष्ट्रीय सिरपुर बौद्ध महोत्सव अउ शोध संगोष्ठी के आयोजन अवइया बारह मार्च ले करे जाही। तीन दिन के ए महोत्सव के सुभारंभ बिहनिया ग्यारह बजे ले होही। एमा धम्म, कला स्थापित, सिक्षा, संस्कृति, साहित्य अउ इतिहास उपर केन्द्रित कारीकरम राखे जाही।
महाशिवरात्रि/माघी पुन्नी मेला
काली महाशिवरात्रि हे। ए मउका म देसभर के महादेव मंदिर अउ शिवालय मन म रूद्राभिषेक समेत बिसेस पूजा-अर्चना करे जाही। राजधानी रईपुर समेत प्रदेस के शिवमंदिर मन ल आकर्षक ढंग ले सजाय जात हे।
उहें, माघी पुन्नी ले सुरू होय राजिम माघी पुन्नी मेला के घलो काली समापन होही।
राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डाॅक्टर चरणदास महंत ह महाशिवरात्रि म प्रदेसवासी मन ल सुभकामना दीन हे।
ओति, कोरिया जिला म महाशिवरात्रि के मउका म अमृतधारा महोत्सव राखे जाही, जेमा पांरपरिक खेल, छत्तीसगढ़ी व्यंजन प्रतियोगिता, लोक अउ स्थानीय कलाकार मनके प्रस्तुति होही।
उहें, महाशिवरात्रि म कबीरधाम जिला के भोरमदेव मंदिर परिसर म प्रवेस करइया श्रद्धालु मन बर मास्क अनिवार्य कर दे गेहे।
सिविज जज/कनिष्ठ अभियंता-परीक्षा
छत्तीसगढ़ लोक सेवा आयोग डहार ले सिविल जज मुख्य परीक्षा – दू हजार बीस अवइया बाईस मार्च के रईपुर म बिहनिया दस बजे ले मंझनिया एक बजे तक राखे जाही।
उहें, कर्मचारी चयन आयोग डहार ले कनिष्ठ अभियंता सिविल, विद्युत, यांत्रिक, मात्रा सर्वेक्षण अउ संविदा परीक्षा अवइया इक्कीस मार्च के बिहनिया दस ले मंझनिया बारह बजे तक राखे जाही।
कौशल मेला
रायपुर जिला के युवा मन ल निजी क्षेत्र म रोजगार के ज्यादा ले ज्यादा अवसर उपलब्ध कराय बर रोजगार सह कौशल मेला के आयोजन करे जाही। एखर आयोजन बारह मार्च के औद्योगिक प्रशिक्षण संस्थान-सडडू, पन्द्रह के धरसीवां, अट्ठारह के आरंग, बाईस के अभनपुर अउ पच्चीस मार्च के औद्योगिक प्रशिक्षण संस्थान तिल्दा म होही।
थल सेना-भर्ती रैली
दुरूग जिला म होवत थल सेना भर्ती रैली म काली दू हजार नौ सौ अभ्यर्थी मन हिस्सा लीन। ए मउका म प्री-हाइट बर दू हजार छह सौ नब्बे लोगन मन क्वालीफाई करीन। संगेसंग लगभग तीन सौ अभ्यर्थी म दउड़ म क्वालीफाई करीन। जानकारी के मुताबिक रोजेरोज लगभग चार हजार प्रतिभाग भर्ती रैली म हिस्सा ले बर आवत हे।
अंतर्राष्ट्रीय महिला दिवस
अंतर्राष्ट्रीय महिला दिवस के मउका म रेलवे सुरक्षा बल अउ दक्षिण पूर्व मध्य रेलवे बिलासपुर डहार ले आने-आने कारीकरम राखे गीस। कारीकरम म दक्षिण पूर्व मध्य रेलवे के तीनों मंडल बिलासपुर, रईपुर अउ नागपुर ले आय रेलवे सुरक्षा बल के साठ ले जादा महिला अधिकारी अउ करमचारी मन हिस्सा लीन। ए मउका म ‘‘रेलवे सुरक्षा बल में महिला शक्ति: चुनौतियां और भविष्य के आयाम‘‘ बिसय उपर अंतर मंडलीय भासन प्रतियोगिता राखे गीस।
ओति, कोरिया जिला म महिला जागरूकता कारीकरम सप्ताह – अभिव्यक्ति के आयोजन करे जात हे। ए मउका म एसईसीएल क्लब बैकुंठपुर म आने-आने क्षेत्र म अच्छा काम करइया सौ महिला मनके सम्मान करे गीस। ए कारीकरम अवइया चैदह मार्च तक चलही।
उहें, जांजगीर-चांपा जिला म महिला सम्मेलन अउ पोषण मेला के आयोजन करे गीस। ए मउका म सांसद ज्योत्सना महंत ह किहीन कि जिहां नारी के सम्मान होथे, उहां नारायण बसथे। ओमन किहीन कि महिला मनके अधिकार के संरक्षण बर सरकार डहार ले कतकोन कानून बनाय गेहे। कारीकरम म खेल, खेती, महिला ससक्तिकरण समेत आने-आने क्षेत्र मन म अच्छा काम करइया माईलोगिन मनके सम्मान करे गीस।
ओति, राजनांदगांव म अंतर्राष्ट्रीय महिला दिवस म महापौर खेल महोत्सव के आयोजन करे गीस, जेमा सहर के महिला मन बढ-चढ़के हिस्सा लीन। ए खेल महोत्सव म छत्तीसगढ़ के पारंपरिक खेल – फुगड़ी, रस्सी खींच, कबड्डी, गेड़ी, खो-खो, कुर्सी दौड़ अउ गिल्ली डण्डा राखे गीस। प्रतियोगिता के बाद जीते महिला मनके सम्मान करे गीस।
विनियोग विधेयक-पारित
छत्तीसगढ़ विधानसभा म काली बछर दू हजार इक्कीस-बाईस बर मुख्यमंत्री भूपेश बघेल डहार ले प्रस्तुत विनियोग विधेयक ल पारित कर दे गीस। सदन म विधेयक उपर होय चर्चा के जवाब देवत मुख्यमंत्री ह किहीन कि कोरोना महामारी ह हमन ल जीये के एक नया नजरिया देहे, जेमा मानवता ग्लोबल होवय, लेकिन अपन परिवेस अउ संसाधन के विकस के नजरिया लोकल होवय। ओमन किहीन कि ग्लोबल इंसानियत अउ लोकल जरूरत के बीच जतके बने संतुलन होही, न्यायसंगत विकास के प्रयास उतके अच्छा होही।
मनरेगा-छत्तीसगढ़
प्रदेश म महात्मा गांधी राष्ट्रीय ग्रामीण रोजगार गारंटी योजना-मनरेगा के तहत ए बछर काम पाने वाला उनतीस लाख इक्यासी हजार परिवार मन ल प्रति परिवार औसत बावन दिन के रोजगार उपलब्ध कराय गेहे। एमा मामला म राष्ट्रीय औसत अड़तालीस दिन के हे। चालू वित्तीय बछर म प्रदेस म सोलह हजार नौ सौ छप्पन परिवार मन ल सौ दिन ले जादा के काम मुहैया कराय गेहे। ए मामला म छत्तीसगढ़ पूरा देस म पांचवां स्थान म हे।