अंतर्राष्ट्रीय महिला दिवस-01
आज अंतर्राष्ट्रीय महिला दिवस मनाय जावत हे। विश्व म स्त्री-पुरूष समानता अउ हरेक क्षेत्र म माईलोगिन मनके मौजूदगी ल बताय खातिर ए दिवस हर बछर आठ मार्च के मनाय जाथे। एसो महिला दिवस के बिसय हरय – ‘‘महिला नेतृत्व-कोविड काल में विश्व में सामान भविष्य की प्राप्ति।‘‘
राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह अंतर्राष्ट्रीय महिला दिवस के मउका म माईलोगिन मन ल सुभकामना दीन हे। राष्ट्रपति ह महिला मन बर सम्मान, सुरक्षा अउ ससक्तिकरण के आह्वान करीन। उहें, प्रधानमंत्री ह किहीन कि महिला देस ल आत्मनिर्भर बनाय के दिसा म महत्ता के भूमिका निभावत हे। ऐति, छत्तीसगढ़ म घलो अंतर्राष्ट्रीय महिला दिवस के मउका म कतकोन कारीकरम होवत हे। राजधानी रईपुर के इंडोर स्टेडियम म महिला अउ बाल विकास विभाग कोति ले राखे गे राज्य स्तरीय महिला सम्मेलन म मुख्यमंत्री भूपेश बघेल संघरीन अउ ओमन आने-आने क्षेत्र म बने काम करइया माईलोगिन मन ल सम्मानित करीन। कारीकरम म महिला अउ बाल विकास मंत्री अनिला भेंडिया, संसदीय सचिव डाॅक्टर रश्मी आशीष सिंह, राज्य महिला आयोग के अध्यक्ष डाॅक्टर किरणमयी नायक, आंगनबाड़ी कार्यकर्ता, सहायिका अउ बड़ संख्या म माईलोगिन मौजूद रिहीन।
अंतर्राष्ट्रीय महिला दिवस-02
ओति, राजनांदगांव म स्कूटर रैली निकाले गीस। ए रैली म संघरे माईलोगिन मन ह महिला ससक्तिकरण बर संदेस दीन। उहें, बलरामपुर म पुलिस विभाग के अधिकारी अउ करमचारी मन ह हेलमेट बाईक रैली निकालीन। रैली ल पुलिस अधीक्षक रामकृष्ण साहू अउ अतिरिक्त पुलिस अधीक्षक प्रशांत कतलम ह हरियर झंडी देखाके रवाना करीन। ओति, कोंडागांव म महिला पुलिस अधिकारी मनके टीम माओवाद प्रभावित गांव मटवाल-पुंगारपाल पहुंचीन अउ उहां के माईलोगिन संग गोठबात करत उंखर समस्या ल जानीन। संगेसंग कानूनी अधिकार के जानकारी दीन।
महिला दिवस-सम्मान
अंतर्राष्ट्रीय महिला दिवस म आज नई दिल्ली म वर्चुअल रूप म राखे गे राष्ट्रीय सम्मान समारोह म केन्द्रीय ग्रामीण विकास मंत्री नरेन्द्र सिंह तोमर ह राजनांदगांव जिला के खुटेरी गांव के जय मां दुर्गा महिला स्व-सहायता समूह ल सम्मानित करीन। ए समूह ह छत्तीसगढ़ म महिला मन ल आत्मनिर्भर बनाय बर मजबूती ले कदम बढ़ाय हे। ऐति, पत्र सूचना कार्यालय-पीआईबी अउ प्रादेशिक लोक संपर्क कार्यालय रईपुर म महिला ससक्तिकरण बिसय म एक वेबिनार राखे गीस। एमा सूचना अउ प्रसारण मंत्रालय के अधिकारी के संगेसंग नेहरू युवा केन्द्र अउ राष्ट्रीय सेवा योजना के स्वयंसेवक, लोक कलाकार अउ पढ़ईया लइका मन सामिल होईन।
कोरोना-टीकाकरण
देस म अब तक दू करोड़ नौ लाख लोगन के टीकाकरण करे गेहे। केन्द्रीय स्वास्थ्य मंत्रालय ह बतईन कि अभी देस म स्वस्थ होके दर छियानवे दशमलव नौ एक प्रतिसत हवय। ऐति, छत्तीसगढ़ म कोरोना टीकाकरण के बेरा केन्द्र सरकार कोति ले जारी दिसा-निरदेस के पालन करे जात हे। राज्य सासन कोति ले अलग ले कोनों किसम के दिसा-निरदेस जारी नइ करे गेहे। राज्य टीकाकरण अधिकारी डाॅक्टर अमर सिंह ठाकुर ह बतईन कि केन्द्र सरकार के दिसा-निरदेस के मुताबिक स्वास्थ्य कार्यकर्ता अउ आने कोरोना वारियर्स मन ल कोरोना के निःशुल्क टीका लगाय जात हे। ऐति, प्रदेस के स्वास्थ्य मंत्री टी.एस. सिंहदेव अउ राजस्व मंत्री जयसिंह अग्रवाल के कोरोना जांच रिपोर्ट पाॅजिटिव आय हे। ओमन अपन संपर्क म अवइया लोगन ले आग्रह करीन हे कि कोनों भी किसम के लक्षण दिखे म तुरते जांच करावय।
परीक्षा पे चर्चा
प्रधानमंत्री नरेन्द्र मोदी के संवाद कारीकरम ‘‘परीक्षा पे चर्चा‘‘ के चैथइया कड़ी ए महीना म राखे जाही। कारीकरम के आयोजन वर्चुअल होही। एखर माध्यम ले प्रधानमंत्री ह स्कूल पढ़ईया लइका, उंखर माता-पिता अउ सिक्षक संग परीक्षा के संबंध म गोठबात करही। कारीकरम बर पंजीकरण प्रक्रिया माई.जी.ओ.वी. प्लेटफाॅर्म म जारी हवय। इतवार तक पंजीकरण कराय जा सकत हे।
विस-बारदाना खरीदी
छत्तीसगढ़ विधानसभा म आज विपक्षी सदस्य मन ह बारदाना बिसाय के मामला ल जोर-सोर ले उठाईन। नेता प्रतिपक्ष धरमलाल कौशिक अउ भाजपा विधायक रजनीश सिंह ह पूछीन कि का केन्द्र सरकार धान बिसाय बर बारदाना देवाथे। जुवाब म सहकारिता मंत्री प्रेमसाय सिंह टेकाम ह किहीन कि केन्द्र सरकार बारदाना नइ देवावय। ए बात म श्री कौशिक ह किहीन कि राज्य सरकार ह केन्द्र ल बदनाम करे बर प्रदेस म ए काहत हे कि केन्द्र सरकार बारदाना नइ देवत हे। सही बात ए हरय कि बारदाना देवाय के काम केन्द्र के नो हे।
विस-कानून व्यवस्था
छत्तीसगढ़ विधानसभा म आज दुरूग जिला के गांव बठेना म पाछु दिन होय एके परिवार के पांच झिन सदस्य के मउत के मामला गूंजीस। सून्यकाल म भाजपा विधायक बृजमोहन अग्रवाल ह ए मामला ल बतावत सरकार उपर आरोप लगाईन कि ओ ह हत्या ल आत्महत्या बतावत हे। ए मुद्दा म सदन म सत्तापक्ष अउ विपक्ष के बीच नोंकझोंक घलो होईस। पाछु गृह मंत्री ताम्रध्वज साहू ह सदन म घटना के जानकारी दीन। ओमन बतईन कि मउत होय पिता-पुत्र के संक्षिप्त पोस्टमार्टम रिपोर्ट के आधार म ए घटना आत्महत्या के मालूम होवत हे। ओमन बतईन कि घटना के जगह ले साक्ष्य बरामद करे गेहे। एक ठिन कापी म सुसाइट नोट घलो मिले हे। उहें, गृह मंत्री ह अमलेश्वर थाना क्षेत्र के खुड़मुड़ा म एके परिवार के चार झिन के हत्या के मामला म घलो जुवाब दीन। ओमन बतईन कि अज्ञात आरोपी मन ल खोजे बर दुरूग पुलिस अधीक्षक प्रशांत ठाकुर ह बारह सदस्य मनके टीम बनाय हे। संगेसंग आरोपी मनके जानकारी देवइया मन बर इनाम के घोसना करे गेहे।
बठेना कांड-गृहमंत्री
एखर पहिली, गृहमंत्री ताम्रध्वज साहू ह आज बिहनिया दुरूग जिला के गांव बठेना पहुंच के एके परिवार के पांच झिन के मउत के घटना के जायजा लीन अउ बड़का अधिकारी मन ल ए घटना के जांच करे के निरदेस दीन। ओमन घटना वाले मकान के कमरा ले लेके जले पैरावट तक के निरीक्षण करीन। ए बेरा म उंखर संग दुरूग पुलिस अधीक्षक प्रशांत ठाकुर समेत आने अधिकारी मौजूद रिहीन। श्री साहू ह पहिलीच इंटेलीजेंस टीम बनाके के घटना के जांच के आदेस दे दे हवय। इही बीच, पूर्व मुख्यमंत्री डाॅक्टर रमन सिंह अउ नेता प्रतिपक्ष धरमलाल कौशिक के अगुवई म भाजपा विधायक अउ बड़का नेता मनके एक ठिन दल घटना के जगह म पहुंचीन अउ पीड़ित परिवार के सदस्य मन संग गोठबात करत घटना के जानकारी लीन।
पीएससी साक्षात्कार/व्याख्याता नियुक्ति
छत्तीसगढ़ लोक सेवा आयोग कोति ले उच्च सिक्षा विभाग के आने-आने बिसय के दू सौ उनचास पद बर चुने गे चार सौ तिरानवे उम्मीदवार मनके साक्षात्कार अवइया इकतीस मार्च ले सत्रह अप्रैल तक ले जाही। दस्तावेज के सत्यापन साक्षात्कार के एक दिन पहिली दू पाली म बिहनिया नौ ले बारह बजे अउ मंझनिया एक ले संझा पांच बजे तक करे जाही। दस्तावेज के सत्यापन म अनुपस्थित रहवइया उम्मीदवार मन ल साक्षात्कार म संघरे के मंजूरी नइ दे जाही। ओति, स्कूल सिक्षा विभाग कोति ले आने-आने बिसय म व्याख्याता मनके नियुक्ति के आदेस जारी कर देहे। व्याख्याता मन ल पदस्थापना वाले स्कूल म इकतीस मार्च तक पदभार ले बर पड़ही।
प्रहलाद मोदी-किसान मुलाकात
विश्व हिन्दू परिषद के राष्ट्रीय अध्यक्ष प्रहलाद मोदी आज बालोद जिला के गांव सनौद अउ गुंडरदेही पहुंचीन। जिहां ओमन किसान मन ल केन्द्र सरकार कोति ले पारित नवा कृषि कानून के फायदा के जानकारी दीन। ए बेरा म ओमन किसान मनके समस्या सुनीन अउ सहकारिता के संबंध म किसान मन ल जानकारी दीन।
अबूझमाड़-रैम्प वाॅक
वनांचल क्षेत्र के युवक-युवती मन ल मंच देवाय खातिर नारायणपुर म अबूझमाड़ पारंपरिक वेश-भूषा प्रतियोगिता ‘‘रैम्प वाॅक‘‘ के आयोजन करे जात हे। एखर पहिली, आॅडिशन म उनतीस झिन प्रतिभागी मन ह भाग लीन। प्रतियोगिता के दूसर आयोजन काली नौ मार्च के अउ मुख्य आयोजन तेरह मार्च के माता मावली के मुख्य मंच म करे जाही। प्रतियोगिता म उहां के युवक-युवती मन ह पारंपरिक वेशभूषा अउ गहना-गूठा पहिर के एमा भाग लीन।