प्रधानमंत्री-जनऔषधि केन्द्र
प्रधानमंत्री नरेन्द्र मोदी ह लोगन मन ले जनऔषधि केन्द्र मनके दवा के उपयोग करे के आग्रह करे हे। जन औषधि दिवस समारोह ल वीडियो कान्फ्रेंस के माध्यम से संबोधित करत हुए प्रधानमंत्री ह किहीन कि भारतीय जन औषधि योजना ले गरीब मन ल दवा के बढ़े हुए कीमत से बहुत राहत मिले हे। श्री मोदी ह किहीन कि ये केन्द्र के जरिया लोगन मनके अब तक नौ हजार करोड़ रूपिया के बचत होय हे। प्रधानमंत्री ह ए बात बर प्रसन्नता व्यक्त करीन कि जन औषधि योजना से लोगन मन ल न सिर्फ इलाज कराय म मदद मिलही, बल्कि एखर ले नौजवान मन बर रोजगार के अवसर घलो पैदा होही। ओमन किहीन कि स्वतंत्रता दिवस के पचहत्तरवीं वर्षगांठ के अवसर म पचहत्तर जिला म जन औषधि केन्द्र खोले जाही। इही बीच, छत्तीसगढ़ के दुर्ग जिला म राज्यसभा सांसद सरोज पांडेय ह आज प्रधानमंत्री भारतीय जन औषधि केन्द्र के सुभारंभ करीन। ए मउका म डाॅक्टर पांडेय ह किहीन कि सबो झन ल सस्ता मूल्य म गुणवत्ता युक्त जेनेरिक दवाई उपलब्ध कराना केन्द्र सरकार के मंसा आय। ओमन बतईन कि महिला मनके स्वास्थ्य ल ध्यान म रखत हुए जन औषधि सुविधा केन्द्र मन से सैनेटरी पैड के बिक्री घलो सुरू कर दे गेहे।
परीक्षा पे चर्चा
प्रधानमंत्री नरेन्द्र मोदी के परीक्षा पे चर्चा कार्यक्रम इही महीना वर्चुअल से आयोजित होही। ये कार्यक्रम के चैथा कड़़ी होही। कार्यक्रम म प्रधानमंत्री ह विद्यार्थी, सिक्षक अउ अभिभावक मन से आगामी परीक्षा मनके बारे म व्यापक बातचीत करही।
परीक्षा पे चर्चा कार्यक्रम बर पंजीकरण प्रक्रिया माई.जी.ओ.वी. प्लेटफार्म म जारी हे। पंजीकरण चैदह मार्च तक करे जा सकत हे। कार्यक्रम म भाग लेवइया मनके चयन माई.जी.ओ.वी. प्लेटफार्म म आॅनलाइन प्रतियोगिता से करे जाही। कक्षा नौवीं से बारहवीं तक के विद्यार्थी मनके परीक्षा के तनाव से निपटे से संबंधी सवाल माई.जी.ओ.वी. आमंत्रित म करे जाही अउ चुने हुए प्रश्न मन ल कार्यक्रम म सामिल करे जाही। कार्यक्रम बर लगभग दो हजार विद्यार्थी, सिक्षक अउ अभिभावक मनके चयन होही।
मुख्यमंत्री-लोकार्पण
मुख्यमंत्री भूपेश बघेल ह आज राजधानी रायपुर के बीरगांव म आयोजित कार्यक्रम म एक सौ इक्कीस करोड़ रूपिया के लागत के अलग-अलग विकास कार्य के लोकार्पण अउ भूमिपूजन करीन। मुख्यमंत्री ह बीरगांव कालेज के नाम नंदकुमार पटेल के नाम म रखे जाय के घोसना करीन। एखरे संगेसंग स्वामी आत्मानंद इंग्लिश मीडियम स्कूल अउ जिला सहकारी बैंक के साखा खोले के घोसना घलो करीन। ए मउका म मुख्यमंत्री ह किहीन कि राज्य सरकार लगातार गांव, गरीब, किसान अउ जरूरमंद मनके हित के रक्षा बर प्रयास करत रहिथे।
अंतर्राष्ट्रीय महिला दिवस
काली अंतर्राष्ट्रीय महिला दिवस आय। हर साल आठ मार्च के मनाय जाने वाला ये दिवस के उद्देश्य स्त्री-पुरूष समानता स्थापित करना, महिला मनके विशिष्ट उपलब्धि के प्रति सम्मान व्यक्त करना अउ जीवन के हर क्षेत्र में उंखर महत्व स्थापित करना आय। मुख्यमंत्री भूपेश बघेल ह अंतर्राष्ट्रीय महिला दिवस के पूर्व संध्या म सब्बो महिला मन ल बधाई अउ सुभकामना दीन। श्री बघेल ह महिला दिवस अवसर म महिला मन ल आठ मार्च के रोड शेफ्टी क्रिकेट वल्र्ड सीरीज के आयोजित मैच के पास निःशुल्क देके के घोसना करीन। उहें, कोरिया जिला के पुलिस द्वारा अभिव्यक्ति महिला जागरूकता कार्यक्रम सप्ताह के आयोजन करे जाही। ये दौरान आने-आने क्षेत्र म उत्कृष्ट काम करइया महिला मनके सम्मान करे जाही। ये कार्यक्रम चैदह मार्च तक चलही। ऐति, छत्तीसगढ़ फुटबाॅल संघ द्वारा राज्य महिला लीग चैंपियनशिप के आयोजन पंत स्टेडियम म करे जाही। राजधानी रायपुर सहित प्रदेश के दूसर जिला म घलो अंतर्राष्ट्रीय महिला दिवस के अवसर म अलग-अलग कार्यक्रम के आयोजन करे जाही।
विशेष कार्यक्रम
अंतर्राष्ट्रीय महिला दिवस के मउका म आकासवाणी नई दिल्ली के समाचार सेवा प्रभार डहार ले काली बिहनिया ग्यारा बजके दस मिनट म बिसेस कारीकरम ‘‘नारी शक्ति-देश की शक्ति’’ के परसारण करे जाही। ए कारीकरम ल छत्तीसगढ़ स्थित आकासवाणी के जम्मों केन्द्र परसारित करही। उहें, रईपुर के सरदार बलवीर सिंह जुनेजा स्टेडियम में काली राज्य स्तरीय महिला सम्मेलन के घलो आयोजन करे जाही।
गृहमंत्री जांच-निर्देश
दुर्ग जिला के पाटन थाना क्षेत्र म पांच लोगन के मउत के मामला म गृहमंत्री ताम्रध्वज साहू ह इंटेलीजेंस जांच के निर्देश देहे। ओमन ये संबंध म दुर्ग रेंज के पुलिस महानिरीक्षक अउ पुलिस अधीक्षक ल जांच बर विशेष टीम गठित कर आवश्यक कार्रवाई के निर्देश देहे। गौरतलब हे कि बठेनाखार सीरसाबाड़ी गांव म एके परिवार के पांच लोगन के सव पुलिस ह संदिग्ध अवस्था म बरामद करे हे। एमा ले तीन महिला मनके सव जले हुए अवस्था में अउ पिता-पुत्र के सव फंदा म लटके मिले रिहीस।
इही बीच, पुलिस ह ए मामला म घटनास्थल ले एक पत्र बरामद करे हे, जेला जांच बर हस्ताक्षर विशेषज्ञ करा भेजे गेहे। उहें, आज पांचो मृतक मनके अंतिम संस्कार कर दे गीस।
कोरोना टीकाकरण
भारत ह दू करोड़ से ज्यादा कोविड टीका लगाके टीकाकरण अभियान म महत्वपूर्ण कीर्तिमान स्थापित करे हे। छत्तीसगढ़ म अब तक दू लाख छियालीस हजार से ज्यादा स्वास्थ्य कर्मी अउ एक लाख सत्तर हजार से ज्यादा फ्रंटलाइन वर्कर्स मन ल कोविड टीकाकरण के पहला डोज लगाय जा चुके हे। उहें, एक लाख अट्ठारह हजार चार सौ से ज्यादा स्वास्थ्यकर्मी मन ल कोरोना के दूसरइया टीका घलो लगाय जा चुके हे। अइसने, साठ साल ले ज्यादा उमर के अउ गंभीर बीमारी ले पीड़ित पैंतालीस बछर ले ज्यादा उमर के अंठानवे हजार पांच सौ से ज्यादा लोगन ल कोरोना के पहली टीका लगाय गेहे। इही, बीच प्रदेस म काली कोरोना संक्रमण के दू सौ नब्बे नवा मामला सामने आय हे। प्रदेस म अब तक तीन लाख चैदह हजार से ज्यादा कोरोना संक्रमित मनके पहचान हो चुके हे, जेमा ले तीन लाख सात हजार से ज्यादा मरीज मन स्वस्थ हो चुके हे। उहें, प्रदेश म दू हजार सात सौ इक्कीस मरीज मनके इलाज अलग-अलग अस्पताल अउ होम आइसोलेशन म चलत हे।
संत समागम
राज्यपाल अनुसुईया उइके ह राजिम माघी पुन्नी मेला म काली संत समागम के शुभारंभ करीन। ये अवसर म राज्यपाल ह किहीन कि माघी पुन्नी मेला जइसे आयोजन पर्यटक मन ल अद्भूत अनुभव दे बर अउ आकर्षित करे म सक्षम हे। ओमन किहीन कि पर्यटन के दृष्टि से राजिम के पुन्नी मेला ह एक अच्छा केन्द्र के रूप म उभर सकथे। राज्यपाल ह किहीन कि छत्तीसगढ़ ल पर्यटन मानचित्र म अउ अधिक प्रभावी स्थान दिलाय बर सब्बो झन ल अउ ज्यादा प्रयास करे के जरूरत हे।
जल जीवन मिशन
छत्तीसगढ़ विधानसभा के अध्यक्ष डाॅक्टर चरणदास महंत ह आज जांजगीर-चांपा जिला म जल जीवन मिशन के तीन ठन प्रचार रथ ल हरी झंडी देखाके रवाना करीन। लोक स्वास्थ्य यांत्रिकी विभाग के कार्यपालन अभियंता सुरेन्द्र चंद्रा ह बतईन कि ए मिशन के तहत जिला के आठ सौ बयासी गांव म एक सौ पच्चीस करोड़ रूपिया ले जादा के कार्ययोजना तैयार करे गेहे। एखर माध्यम ले पचपन लीटर प्रति व्यक्ति गुणवत्तायुक्त पेयजल हर घर म टेप नल के माध्यम ले उपलब्ध कराय जाही।
बौद्ध महोत्सव
महासमुंद जिला के सिरपुर म बारह मार्च ले अंतर्राष्ट्रीय बौद्ध महोत्सव शोध संगोष्ठी के आयोजन करे जाही। ये महोत्सव म देस-विदेस के लोगन मनके आय के संभावना हे। महोत्सव के दउरान कोरोना संक्रमण से बचाव संबंधी दिशा-निर्देश मनके पालन करे जाही। जिला प्रशासन द्वारा पैंसठ बछर से ज्यादा उमर के लोगन, गर्भवती महिला अउ दस बछर से कम उमर के लइका मनके अलावा बीमार व्यक्ति मन ल महोत्सव म सामिल नइ होय के निर्देश देहे। गौरतलब हे कि तीन दिवसीय ये महोत्सव चैदह मार्च तक चलही।