विस समाचार-01
छत्तीसगढ़ विधानसभा म आज राष्ट्रपिता महात्मा गांधी के मूर्ति लगाय के नाव म भ्रष्टाचार के आरोप लगावत विपक्षी सदस्य मन ह स्थगन प्रस्ताव म काम रोक के जांच कराय के मांग करीन। भाजपा सदस्य बृजमोहन अग्रवाल अउ शिवरतन शर्मा ह ए मामला ल सदन म उठाईन। ए मामला म श्री अग्रवाल ह मुख्यमंत्री ले इस्तीफा के मांग घलो करीन।
उहें, भाजपा सदस्य अजय चंद्राकर ह आरोप लगावत किहीन कि मंत्रालय म गांधीजी के जुन्ना मूर्ति ल लगाय गेहे। नेता प्रतिपक्ष धरमलाल कौशिक ह किहीन कि गांधीजी के मूर्ति के नाव म भ्रष्टाचार होना बहुत बड़े मामला हरय। एमा चर्चा कराय के मांग करत विपक्षी सदस्य मन ह नाराबाजी करीन, जेमा विधानसभा अध्यक्ष डाॅक्टर चरणदास महंत ह प्रस्ताव ल नामंजूर कर दीन।
सदन म ध्यानाकर्षण सूचना के माध्यम ले बलौदाबाजार म कृषि विभाग के उप संचालक के खिलाफ गड़बड़ी करे जाय के मामला ल घलो उठाय गीस। जुवाब म मंत्री रविन्द्र चैबे ह कृषि विभाग के उप संचालक ल निलंबित करे के घोसना करीन।
विस समाचार-02
विधानसभा म आज गोबर खरीदी अउ भुगतान के मामला ल घलो जोर-सोर ले उठाय गीस। भाजपा विधायक शिवरतन शर्मा ह पूछीन कि कोन-कोन जिला म कतका-कतका कन गोबर खरीदे गेहे अउ एखर रासि के भुगतान ल कोन मद ले करे गेहे। ओमन यहू पूछीन कि गोबर ले कोन-कोन जिला म कतकाकन वर्मी कम्पोस्ट खातू बनाय गेहे अउ ए खातू ल कोन संस्थान ल बेचे गेहे।
एखर जुवाब म कृषि मंत्री रविन्द्र चैबे ह बतईन कि पन्द्रह फरवरी दू हजार एक्कईस तक जम्मों जिला मन म चालीस लाख कुुंटल ले जादा गोबर खरीदे गेहे अउ गोधन न्याय योजना कोति ले सात हजार सात सौ बावन लाख रूपिया ले जादा के रासि ल भुगतान करे गेहे। ओमन बतईन कि सत्तर हजार कुंटल ले जादा वर्मी कम्पोस्ट खातू तैयार करे गेहे, जउन ल प्रदेस के कई ठन संस्थान मन म बेचे गेहे। एखर ले राज्य सरकार ल तीन सौ संतानवे लाख रूपिया के रासि मिले हवय।
अनुदान मांग-पारित
छत्तीसगढ़ विधानसभा म अवइया वित्तीय बछर दू हजार इक्कीस-बाईस बर काली पेस करे गे दस हजार सात सौ आठ करोड़ इंक्यानवे लाख रूपिया के अनुदान मांग ल पारित कर दे गीस। ए चर्चा म ग्यारह झिन सदस्य मन ह भाग लीन।
गृहमंत्री ताम्रध्वज साहू ह किहीन कि राज्य के धार्मिक जगह मन म राज्य स्तरीय संचालनालय अउ संभाग स्तर म कार्यालय बनाय के कार्रवाई करे जात हे।
उहें, नगरीय प्रशासन, विकास अउ श्रम विभाग के तीन हजार आठ सौ सात करोड़ छियालीस लाख रूपिया के अनुमान मांग मन ल पारित कर दे गीस।
राज्यपाल-स्थानीय उत्पाद
प्रदेश के राज्यपाल अनसुईया उइके ह किहीन हे कि स्थानीय उत्पाद के उपयोग अउ खरीदे के संगेसंग उंखर प्रचार-प्रसार करके ए उत्पाद ल एक ठन ब्रांड के रूप म बनाय के परयास करे जाना चाही। राजधानी रईपुर के साईंस कालेज मैदान म राखे गे एक ठिन स्वदेशी मेला के कारीकरम म ओमन ए बात किहीन। ओमन यहू किहीन कि हमर देस म प्रतिभा के कोनों कमी नइ हे।
आवासीय भूखंड परियोजना
आवास अउ पर्यावरण मंत्री मोहम्मद अकबर ह काली नवा रईपुर के अटल नगर सेक्टर-सत्रह म आवासीय भूखंड परियोजना के सुरूवात करीन। ए मउका म ओमन किहीन कि ए परियोजना ल अटल नगर म बस्ती ल बढ़ाय खातिर करे जात हे।
ए मउका म प्राधिकरण के अधिकारी मन ह बतईन कि ए परियोजना म अट्ठारह सौ ले आठ हजार वर्गफीट के भूईंया ल लीज म बांटे खातिर निविदा जारी कर दे गेहे।
कोरोना टीकाकरण
केन्द्रीय स्वास्थ्य मंत्रालय ह आज किहीन हे कि देस म अब तक एक करोड़ अस्सी लाख पांच हजार पांच सौ लोगन मन ल कोरोना के टीका लगाय गेहे। मंत्रालय के कहना हे कि देस म कोविड ले स्वस्थ होय के दर ह संतानवे दशमलव शून्य-एक प्रतिशत होगे हे।
ऐति, छत्तीसगढ़ म घलो साठ बछर ले जादा उमर के मनखे अउ पैंतालीस बछर ले जादा उमर के लोगन मन ल टीका लगाय जात हे। राज्य म काली पैंतालीस हजार तीन सौ पच्यासी झन मनखे मन ल कोरोना के टीका लगाय गीस। उहें, दू लाख छत्तीस हजार चार सौ इक्यासी झन स्वास्थ्य कार्यकर्ता अउ एक लाख चैसठ हजार आठ सौ छत्तीस झन करमचारी मन ल टीका लगाय गेहे। एखर अलावा अट्ठायासी हजार ले जादा लोगन मन ल कोरोना के दूसइया टीका घलो लगाय गेहे।
राज्य म काली कोरोना के दू सौ पैंतीस झन नवा मरीज पाय गीस। एमा रईपुर म सबले जादा सड़सठ मरीज पाय गेहे। राज्य म अब तक तीन लाख तेरह हजार पांच सौ ले जादा लोगन मन म कोरोना बीमारी पाय गेहे, जेमा तीन लाख छह हजार ले जादा मरीज मन ह स्वस्थ होगे हे। उहें, करीबन तीन हजार मरीज मनके इलाज कई ठिन अस्पताल मन म करे जात हे।
पदोन्नति
राज्य सरकार डहार ले भारतीय प्रशासनिक सेवा के दू हजार पांच बैच के छह झिन अधिकारी मनके प्रमोसन कर दे गेहे। एमा मुकेश बंसल, आर. संगीता, एस. प्रकाश, टी.पी. वर्मा अउ नीलम नामदेव एक्का सामिल हे।
खबर के मुताबिक मुकेश बंसल ह अभी केन्द्रीय प्रतिनियुक्ति म हवय। उहें, आर. संगीता ह छुट्टी म हे। ए अधिकारी मनके प्रमोसन के संगेसंग कुछ विभाग मन म फेरबदल घलो करे गेहे। आर. संगीता ल मंत्रालय म सचिव बनाय गेहे। एस. प्रकाश ल लोक स्वास्थ्य यांत्रिकी विभाग के विशेष सचिव अउ जल जीवन मिशन के संचालक के उपरहा प्रभार दे गेहे। नीलम नामदेव एक्का ल जनशिकायत निवारण विभाग के सचिव के संगेसंग विमानन विभाग के डायरेक्टर के पदभार घलो सौंपे गेहे।
रोड सेफ्टी-क्रिकेट टूर्नामेंट
सड़क सुरक्षा के महत्तम के बिसय म जन-जागरूकता बढ़ाय खातिर नवा रईपुर के सहीद वीरनारायण सिंह अंतर्राष्ट्रीय क्रिकेट स्टेडियम म थोरकुन देर बाद रोड शेफ्टी वल्र्ड सीरिज टी-ट्वेंटी क्रिकेट प्रतियोगिता के सुरूवात करे जाही। मुख्यमंत्री भूपेश बघेल ह ए प्रतियोगिता के सुभारंभ करही। पहली मैच आज रतिहा सात बजे भारत अउ बांग्लादेश लीजेंड्स के बीच खेले जाही। इक्कीस मार्च तक होवइया ए मैच म कुल पन्द्रह मैच खेले जाही। मैच के दउरान केन्द्र सरकार डहार ले जारी करे गे कोरोना संबंधी दिसा-निरदेस के पालन करे जाही।
संक्षिप्त समाचार
अउ अब थोरकुन समाचार सार म-
– मुख्यमंत्री भूपेश बघेल ह आज लोक कलाकार अउ नार्थ अमेरिका छत्तीसगढ़ एसोसिएसन के सदस्य विजय डड़सेना के निधन म दुख प्रकट करीन। श्री डड़सेना के पाछु एक मार्च के अमेरिका के शिकागो म निधन होगे गे रिहीस।
– राज्य सरकार ह रिटायर जिला न्यायाधीश प्रभात कुमार शास्त्री ल छत्तीसगढ़ माध्यस्थम अधिकरण के न्यायिक सदस्य बनाय गेहे। उंखर नियुक्ति ह पदभार ग्रहण करे के तारीख ले पांच बछर या फेर पैंसठ बछर के उमर तक रखे जाही।
– भारत-तिब्बत सीमा पुलिस डहार ले राजनांदगांव के ताडो गांव म स्वास्थ्य सिविर के कारीकरम करे गीस। ए दउरान अधिकारी मन ह गांव वाले मन ल दवई घलो बांटीन।
– दुरूग के सेंट थाॅमस महाविद्यालय म काली ले सुरू करे गे तीन दिवसीय एनसीसी कैडेट सिविर म छात्र मन ल परेड, मैप रीडिंग, ड्रिल अउ हथियार चलाय के प्रसिक्षण दे गीस।
– राजनांदगावं के पेण्ड्री के एकलव्य आदर्श आवासीय विद्यालय म घलो एनसीसी डहार ले तीन दिवसीय वार्षिक प्रशिक्षण सिविर राखे गीस।
– धमतरी नगर निगम म आज सामान्य सभा के बइठका राखे गीस। ए दउरान महापौर ह अनुमानित बजट, लाभ अउ व्यय पेस करीन। अउ
– रईपुर-पाटन रद्दा म काली संझा एक ठिन सड़क हादसा म एक झिन जवान लइका के मउत होगे। उहें, एक झिन जवान नोनी ह गंभीर रूप ले घायल होगे।