विस बजट-01
मुख्यमंत्री भूपेश बघेल ह आज राज्य विधानसभा म अवइया वित्तीय बछर बर बजट पेस करीन। संतानवे हजार एक सौ छह करोड़ रूपिया के ए बजट ल ‘‘गढ़बो नवा छत्तीसगढ़‘‘ के मूलमंत्र के संग पेस करे गीस।
ए बजट म सामाजिक क्षेत्र बर अड़तीस प्रतिशत राशि के प्रावधान के संग अनुसूचित जनजाति क्षेत्र के विकास बर चैंतीस प्रतिशत अउ अनुसूचित जाति के क्षेत्र के विकास बर तेरह प्रतिशत रासि के प्रावधान करे गेहे। उहें, बजट म करीबन सोलह प्रतिशत रासि स्कूल सिक्षा अउ करीबन छह प्रतिशत स्वास्थ्य क्षेत्र बर राखे गेहे।
अपन बजट भाषण म मुख्यमंत्री ह घोषणा करीन कि बस्तर संभाग के जम्मों जिला मन म बस्तर टाइगर्स नाव ले बिसेस पुलिस बल बनाय जाही। एखर अलावा प्रदेस के कलाकृति अउ सिल्प कला के संगेसंग कृषि अउ वनोपज के उत्पाद अउ व्यंजन मन ल एके छत के नीचे देवाय बर राज्य के आने-आने सहर मनके संगेसंग दूसर प्रदेस म घलो ‘‘सी-मार्ट‘‘ स्टोर के स्थापना करे जाही।
ए बजट म मछरी पालन ल कृषि के जइसन दर्जा देके घोसना करे के संगेसंग पुराना ग्रामीण व्यावसायिक कौशल ल एक घांव फेर आगू बढ़ाय बर चार ठिन नवा विकास बोर्ड- तेलघानी, चर्म शिल्पकार, लौह शिल्पकार अउ रजक कार विकास बोर्ड के गठन करे के घोसना करे गेहे।
पौनी पसारी योजना जइसन गांव-गतौरी मन म रूरल इंडस्ट्रीयल पार्क बनाय जाही। गांव म जेखर मन तीर खेत नइ हे, अइसन मजूर मन बर नवा न्याय योजना सुरू करे जाही। तेंदूपत्ता सकलइया परिवार मन बर सामाजिक सुरक्षा योजना सुरू करे के प्रावधान बजट म राखे गेहे।
विस बजट-02
एखर अलावा राज्य म सात ठिन नवा महाविद्यालय अउ तीन ठिन नवा कन्या महाविद्यालय के स्थापना करे जाही। कांकेर, कोरबा अउ महासमुंद म नवा चिकित्सा महाविद्यालय बनाय जाही। उहें, सन्ना, जशपुर अउ शिवरीनारायण म सामुदायिक स्वास्थ्य केन्द्र अउ रिसाली भिलाई म तीस ठिन बिस्तर वाले अस्पताल बनाय जाही।
रईपुर के पंडरी म तीन सौ पचास करोड़ रूपिया के लागत ले जेम्स अउ ज्वेलरी पार्क बनाय जाही। त उहें, नारायणपुर, कांेडागांव, महासमुंद, कोरबा, दंतेवाड़ा, सुकमा अउ बीजापुर म एक-एक ठिन बालक अउ कन्या छात्रावास बनाय जाही।
बजट म स्वामी आत्मानंद योजना के तहत एक सौ उन्नीस नवा अंग्रेजी माध्यम के स्कूल खोले जाही। त कांकेर जिला म बीएड कालेज बनाय जाही। ऐति, नवा रईपुर म भोपाल के भारत भवन जइसन छत्तीसगढ़ सांस्कृतिक परिक्षेत्र बनाय जाही। तृतीय लिंग के मनखे मनके पुनर्वास बर प्रदेस म अलगे तरीका ले पहिली आश्रम सह पुनर्वास केन्द्र बनाय जाही। बजट म कौशल्या मातृत्व योजना सुरू करे के घोसना करे गेहे।
नक्सल प्रभावित गांव-गतौरी वाले जघा मन म एक सौ चार ठिन सड़क अउ एक सौ सोलह ठिन पुलिया बनाय जाही। कोनो पत्रकार के दुर्घटना या आकस्मिक मउत होय म उंखर परिवार मन ल दू लाख के बजाय पांच लाख रूपिया के सहायता दे जाही।
ए बजट म स्वच्छता दीदी मनके मानदेय ल पांच हजार रूपिया ले बढ़ाके छह हजार रूपिया करे जाही।
बजट प्रतिक्रिया
बजट पेस करे के बाद पत्रकार मन ले गोठबात करत मुख्यमंत्री ह किहीन कि ए बजट ल प्रदेस के हर क्षेत्र म नवा उंचाई म ले जाय के उद्देश्य ले लाय गेहे। ओमन किहीन कि जम्मों लोगन मन ल ध्यान म राख के ए बजट बनाय गेहे।
दूसर कोति, भारतीय जनता पार्टी के प्रदेश अध्यक्ष विष्णुदेव साय ह बजट ल निरासाजनक बताय हे। ओमन किहीन कि पाछु दू बजट के दउरान राज्य सरकार के नीति ले प्रदेस के अर्थव्यवस्था उपर बुरा असर पड़े हे।
त उहें, भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह किहीन हे कि छत्तीसगढ़ ल नवा दिशा देवइया कोनों परकार के प्रावधान ए बजट म नइ दिखत हे।
नेता प्रतिपक्ष धरमलाल कौशिक ह किहीन कि राज्य बने के बाद पहिली घांव बजट के आकार ल छोटे कर दे गेहे।
कोरोना टीका-प्रधानमंत्री
प्रधानमंत्री नरेन्द्र मोदी ह कोविड टीकाकरण के दूसर चरण के सुरूवात करत आज बिहनिया नई दिल्ली के अखिल भारतीय आयुर्विज्ञान संस्थान एम्स जाके कोरोना के टीका लगाईन। ओमन राष्ट्र ल कोविड मुक्त बनाय बर लोगन मन ले अपील करीन कि ए टीका ल जरूर लगवाय।
कोरोना टीकाकरण
छत्तीसगढ़ के संगेसंग देस म कोविड टीकाकरण के दूसर चरण म आज ले वरिष्ठ नागरिक अउ पैंतालीस साल ले जादा उमर के बीमार लोगन मन ल टीका लगाय के काम सुरू होगे हे। देस के दस हजार सरकारी अस्पताल मन म ए वैक्सीन ल मुफम ल लगाय जाही।
ऐति, छत्तीसगढ़ के स्वास्थ्य मंत्री टी.एस. सिंहदेव ह आज आॅनलाइन पत्रकारवार्ता ल संबोधित करत बतईन कि प्रदेस म साठ साल ले जादा उमर के मनखे अउ पैंतालीस ले उनसठ साल के बीच के को-मोरबीडिटी पीड़ित मन ल आज ले टीका लगाय जात हे। सरकारी अस्पताल मनके संगेसंग प्राईवेट अस्पताल मन म घलो कोरोना के टीका लगाय जाही।
राज्य टीकाकरण अधिकारी डाॅक्टर अमर सिंह ठाकुर ह बतईन कि प्राईवेट अस्पताल मन म लोगन मन ल टीका लगाय बर दू सौ पचास रूपिया दे बर पड़ही।
ऐति, आज बिहनिया दस बजे ले रईपुर के आयुर्वेदिक कालेज परिसर अउ मेकाहारा अस्पताल म टीकाकरण अभियान सुरू होगे।
ओति, राजनांदगांव म छात्र मन ह कोरोना संक्रमण ले बचाव के संदेस ल लोगन मन तक पहुंचाय बर एक ठिन जागरूकता रैली निकालीन।
बिलासपुर विमान सेवा
बिलासपुर ले नई दिल्ली के बीच आज ले विमान सेवा सुरू होगे। मुख्यमंत्री ह वर्चुअल माध्यम ले ए हवाई सेवा के सुभारंभ करीन। कारीकरम के अध्यक्षता केन्द्रीय नागरिक उड्डयन मंत्री हरदीप सिंह पुरी ह करीन।
आज दिल्ली ले जबलपुर होवत पहिली फ्लाईट बिलासपुर पहुंचीस, जेखर बाद ए विमान ह बिलासपुर ले प्रयागराज होके दिल्ली जाही।
जानबा के मुताबिक बिलासपुर ले नई दिल्ली के बीच सुरू होय ए हवाई सेवा म बहत्तर सीटर एयर क्राफ्ट के दू ठिन विमान ह हफ्ता म चार दिन सम्मार, बुधवार, सुक्रवार अउ इतवार के चलही।
पुलिस भर्ती-परिणाम
छत्तीसगढ़ पुलिस भर्ती परीक्षा के परिणाम जारी कर दे गेहे। दू हजार दू सौ उनसठ पद के भर्ती बर तेईस जिला के उम्मीदवार मनके नाव के सूची जारी करे गेहे। विभाग के वेबसाइट म रिजल्ट ल देखे जा सकथे।
ए पुलिस भर्ती म बिसेस बात हवय कि पहिली घांव तृतीय लिंग के पन्द्रह झिन उम्मीदवार मन आरक्षक बने हे। पुलिस विभाग डहार ले भर्ती प्रक्रिया म तृतीय लिंग के काॅलम देके सेती ए वर्ग के प्रतिभागी मन घलो सामिल होय रिहीन।
परीक्षा पे चर्चा
प्रधानमंत्री नरेन्द्र मोदी ह ‘‘परीक्षा पे चर्चा‘‘ कारीकरम के चैथा संस्करण म छात्र मन ले इही महीना वीडियो कांफ्रेसिंग के माध्यम ले गोठबात करही। प्रधानमंत्री ह अवइया परीक्षा के बारे म स्कूल के छात्र, सिक्षक अउ परिवार वाले मन ले गोठबात करही।
रायगढ़-गोलीबारी
रायगढ़ जिला के धरमजयगढ़ थाना क्षेत्र म आज अज्ञात लोगन मन ह बैंक के एक झिन कैशियर ल गोलीमार के लूटपाट करीन। घायल कैशियर ल अस्पताल म भर्ती कराय गेहे।
हमर संवाददाता ले मिले जानबा के मुताबिक खम्हार ग्रामीण बैंक के कैशियर ह आज बिहनिया ट्यूटी म निकले रिहीन। इही दउरान खम्हारडीह रोड उपर मिरीगुड़ा के तीर फटफटी म अज्ञात लोगन मन ह बैंक कैशियर ल रोक के गोली चला दीन अउ ओखर हाथ ले बैग ल झटक के भाग गीन।
संक्षिप्त समाचार
अउ अब थोरकुन समाचार सार म-
– केन्द्रीय पर्यटन मंत्री प्रहलात पटेल अउ मुख्यमंत्री भूपेश बघेल ह काली राजनांदगांव जिला के डोंगरगढ़ म प्रसाद योजना के तहत तिरालीस करोड़ रूपिया ले जादा के विकास काम के भूमिपूजन करही।
– दुरूग म तीन मार्च ले थल सेना भर्ती रैली के आयोजन करे जाही।
अउ
– बीजापुर जिला के उसूर थाना क्षेत्र ले सुरक्षा बल मन ह तीन झिन माओवादी मन ल गिरफ्तार करे हे।
– इही जिला के जांगला के तीर सड़क दुर्घटना म एक झिन अतर्राज्यीय क्रिकेट खिलाड़ी के संगेसंग दू झिन मनखे के मउत होगे।