मन की बात-01
प्रधानमंत्री नरेंद्र मोदी ह ये बात म जोर दीन कि आत्मनिर्भर भारत सिर्फ एक आर्थिक अभियान नो हय, बल्कि ये हमर राष्ट्रीय चेतना से जुड़े हे। आकाशवाणी से मन की बात कार्यक्रम म ओमन ये बात उपर प्रसन्नता व्यक्त करीन कि आत्मनिर्भर भारत के मंत्र देश के गांव-गांव तक पहुंचत हे। प्रधानमंत्री ह कीहिन कि जब सबो देशवासी स्वदेशी वस्तु मन उपर गर्व महसूस करे लगही, तब आत्मनिर्भर भारत अभियान राष्ट्रीय चेतना बन जाही।
प्रधानमंत्री ह पानी के संरक्षण के आवश्कता उपर जोर देवत कीहिन कि जल संरक्षण हमर सामूहिक जिम्मेदारी आय। सर्दी के मौसम बीते अउ गर्मी के मौसम के दस्तक के जिकर करत ओमन कीहिन कि हमन ल अभी ले जल संरक्षण के प्रयास शुरू कर देना चाही। ओमन कीहिन कि बरसात के मौसम म अभी कुछ महीना बांचे हे, तेखर सेती बरसात शुरू होय ले पहिली ही हमन ल अपन आसपास के जल स्रोत मनके सफाई अउ वर्षा जल के संचय बर सौ दिनके अभियान शुरू कर देना चाही। प्रधानमंत्री ह कीहिन कि एखर बर जल शक्ति मंत्रालय ह एक अभियान शुरू करने वाला हे।
मन की बात-02
प्रधानमंत्री ह अपन भाषण म स्कूल काॅलेज मनके परीक्षा के जिकर करीन। ओमन कीहिन कि हर साल के जइसे यहू साल मार्च म परीक्षा पे चर्चा करहीं। ओमन सबो परीक्षा योद्धा, माता-पिता अउ शिक्षक मनले आग्रह करीन कि ओमन अपन अनुभव अउ टिप्स माई.जी.ओ.वी. प्लेटफार्म अउ नरेंद्र मोदी एप म साझा करय। श्री मोदी ह लोगन मनसे कोरोना महामारी से सतर्कता बरते बर कोई ढिलाई नइ करे के आग्रह करीन।
कोरोना टीकाकरण
केंद्रीय स्वास्थ्य मंत्रालय ह कीहिन कि काली एक मार्च ले शुरू होवइया कोविड टीकाकरण कार्यक्रम म साठ बछर से जादा उमर के लोगन अउ दूसर बीमारी से ग्रस्त पैंतालिस बछर से जादा उमर के लोगन मन ल टीकाकरण केंद्र मन म पंजीकरण सुविधा उपलब्ध होही। निजी अस्पताल टीकाकरण अभियान के दउरान वैक्सिन बर प्रति डोज ढाई सौ रूपिया ले सकही। दस हजार सरकारी अस्पताल मन म ये टीका निशुल्क लगाय जाही। जबकि लगभग बीस हजार निजी टीकाकरण केंद्र मन म वैक्सिन के शुल्क लोगन मन ल स्वयं वहन करे लागही। स्वास्थ्य मंत्रालय ह कीहिन कि राज्य सरकार मन स्वास्थ्य बीमा योजना के अंतर्गत सूचीबद्ध सबो निजी अस्पताल मन ल कोरोना टीकाकरण केंद्र के रूप म उपयोग कर सकही। राज्य सरकार सार्वजनिक क्षेत्र के अपन सबो उपक्रम मन ल स्वास्थ्य केंद्र अउ अपन सरकारी स्वास्थ्य केंद्र मनके उपयोग टीकाकरण बर कर सकही।
केंद्रीय स्वास्थ्य सचिव राजेश भूषण ह काली वीडियो काॅन्फ्रेंस मनके माध्यम ले राज्य मनके स्वास्थ्य सचिव अउ राष्ट्रीय स्वास्थ्य मिशन के निदेशक मनसे निश्चित आयु समूह के लोगन मन ल वैक्सिन दे जाय के संबंध म चर्चा करीन। बइठका के दउरान राज्य मनके पंजीकरण के तीन तरीका के बारे म घलो जानकारी दीन। इही बीच केंद्र सरकार ह वो बीस लक्षण मनके सूची घलो जारी करीस, जेखर से ग्रस्त पैंतालिस से उनसठ बछर के लोगन मन ल कोरोना वैक्सिन म प्राथमिकता दे जाही। एमा ह्दय संबंधित बीमारी, गुर्दा अउ लीवर प्रत्यारोपण, ल्यूकीमीया, लिम्कोमा, एड्स, मधुमेह, हाइपर टेंशन अउ स्वास्थ्य संबंधी बीमारी शामिल हे।
कोरोना केबिनेट मुख्य सचिव
देश के कई हिस्सा म कोविड संक्रमण के तेजी के बीच केबिनेट सचिव राजीव गौबा ह सबो राज्य अउ केंद्र शासित प्रदेश मन ल कोविड मानक मन म ढील नही देके अउ उल्लंघन करने वाला मन उपर सख्ती से निपटे बर कीहिन हे।
एति छत्तीसगढ़ के मुख्य सचिव अमिताभ जैन ह सबो कलेक्टर मन ल अपन अपन जिला मन म कोरोना संक्रमण ल रोके बर सघन अभियान चलाये के निर्देश देहे। रायपुर म काली वीडियो काॅन्फ्रेंस म मुख्य सचिव ह कीहिन कि वर्तमान म कोरोना संक्रमण म वृद्धि ल देखत एखर रोकथाम के प्रयास करना जरूरी हे। ओमन ह कोरोना जांच बर आर.टी.पी.सी.आर. अउ ट्रू-नाॅट टेस्ट ल बढ़ाय बर जोर दीन।
विस बजट
छत्तीसगढ़ विधानसभा म काली मुख्यमंत्री भूपेश बघेल जिखर करा वित्त विभाग के प्रभार घलो हे, वित्तीय बछर दू हजार इक्कीस-बाईस के बजट पेश करही। मुख्यमंत्री सदन के पटल म मंझनियंा बारा बजके तीस मिनट म ये बजट पेश करे जाही। ये बजट उपर विधानसभा म दू अउ तीन मार्च के सामान्य चर्चा होही। मुख्यमंत्री के बजट भाषण ल दूरदर्शन अउ आकाशवाणी रायपुर से सीधा प्रसारित करे जाही। उंहें चार से तेईस मार्च तक विधानसभा म विभागवार अनुदान मांग मन उपर चर्चा होही। एखर अलावा बजट के मांग मनसे संबंधित विनियोग विधेयक उपर चैबीस मार्च के चर्चा करे जाही।
कोरोना मास्क जुर्माना
प्रदेश म कोरोना संक्रमण के मद्देनजर प्रशासन डहार ले लगातार एहतियाती कदम उठाये जात हे अउ लोगन मनले अनिवार्य रूप से मास्क पहिने अउ सोशल डिस्टेसिंग के पालन करे के अपील करे जात हे। संगेसंग मास्क नइ पहिनइया मनके खिलाफ सख्ती बरते अउ जुर्माना घलो लगाये जात हे।
मुख्यमंत्री लोक मड़ई
मुख्यमंत्री भूपेश बघेल काली राजनांदगंाव जिला के डोंगरगढ़ म आयोजित लोक मड़ई अउ कृषि मेला म शामिल होइन। ये मउका म ओमन कीहिन कि लोक मड़ई छत्तीसगढ़ के परंपरा आय। ये ह हमर रहन-सहन, खान-पान अउ जीवन शैली के प्रतीक आय। ओमन ह लोक मड़ई म बनाये राम वनगमन पथ के झंाकी के सराहना करीन। ए मउका म ओमन लाल बहादुर नगर के हायर सेकण्डरी स्कूल के भवन निर्माण के घोषणा करीन। उंहें मुख्यमंत्री ह धमतरी जिला के नगरी के कर्णेश्वर धाम घलो पहुंचीन अउ माघी पुन्नी मेला म शामिल होइन। ये अवसर म ओमन देउरपारा म आठ मीटर पक्का सड़क बनाये, सिहावा क्षेत्र म राष्ट्रीयकृत बैंक जल्द शुरू करे अउ तालाब सौंदर्यीकरण बर दस लाख रूपिया देके घोषणा करीन। एखर अलावा ओमन झीरम घाटी माओवादी हमला म शहीद होय अभिषेक गोलछा के स्मृति म नगरी के शासकीय हाइस्कूल के नामकरण करे के घोषणा करीन।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव आज रतिहा साढ़े सात बजे आकाशवाणी रायपुर ले प्रसारित बिसेस कार्यक्रम ‘‘हमर ग्राम सभा‘‘ म राज्य सासन के नीति, योजना अउ कार्यक्रम मनके बारे म जानकारी दीही। ए कार्यक्रम ल मीडियम वेव 981 किलोहटर््स म सुने जा सकत हे। ए कार्यक्रम ल प्रदेस स्थित आकाशवाणी के सबो केन्द्र एक संग रिले करही।
दुर्घटना
महासमुंद जिला म राष्ट्रीय राजमार्ग क्रमांक तीन सौ तिरपन म अज्ञात वाहन के टक्कर से मोटर सायकिल सवार तीन लोगन के मउत होगे। उंहें तीन अन्य घायल होगे। ये हादसा काली संझा लभराखुर्द गांव के तीर म ओ बखत होइस जब अज्ञात वाहन ह दू ठिन मोटर सायकिल ल टक्कर मार दीस। ये हादसा म गंभीर रूप ले घायल तीन लोगन मनके बेहतर इलाज करे बर रायपुर म भर्ती कराय गेहे। ओति कोंडागंाव जिला के मर्दापाल म ट्रेक्टर ट्राली के पलटे ले बारह लोगन मन घायल होगे। ये सबो झन बीते रतिहा बस्तर जिला के कोड़ेनार क्षेत्र ले बिहाव कार्यक्रम म शामिल होय के बाद वापसी करत रीहिन, तब ये हादसा होइस।