विस-आर्थिक सर्वेक्षण
छत्तीसगढ़ विधानसभा के बजट सत्र के पांचवां दिन आज सदन म आर्थिक सर्वेक्षण रिपोर्ट पेस करे गीस। खाद्य मंत्री अमरजीत भगत ह आर्थिक सर्वेक्षण सदन के पटल म राखीन। आर्थिक सर्वेक्षण म सकल घरेलू उत्पाद-जीडीपी म बछर दू हजार उन्नीस-बीस के तुलना म एक दशमलव सात-सात प्रतिशत के गिरावट अनुमानित हे। उहें, कृषि अउ संबंद्ध क्षेत्र म चार दशमलव छह एक प्रतिशत वृद्धि के अनुमान लगाय गे हवय। उद्योग क्षेत्र म पांच दशमलव दू आठ प्रतिशत के कमी, फेर सेवा क्षेत्र यानि सर्विस सेक्टर म शून्य दशमलव सात-पांच प्रतिशत वृद्धि के अनुमान हे।
आर्थिक सर्वेक्षण म यहू बात आगू आईस कि कोरोना संक्रमण के सेती राज्य के प्रति व्यक्ति आय म पाछु बछर के तुलना म शून्य दशमलव एक-चार प्रतिशत के कमी आय हे। फेर, प्रतिव्यक्ति आय एक लाख पांच हजार नवासी रूपिया घटाके एक लाख चार हजार नौ सौ तैंतालीस रूपिया होय हे।
खाद्य मंत्री अमरजीत भगत ह विधानसभा म आर्थिक सर्वेक्षण पेस करे के बाद सदन के बाहर पत्रकार मन ले गोठबात करत किहीन कि राज्य म सरकार के कुशल नीति के कारण विपरीत परिस्थिति म घलो राज्य के प्रदर्सन देस के दूसर राज्य मनके तुलना म बने हे।
उहें, नेता प्रतिपक्ष धरमलाल कौशिक ह किहीन कि सकल घरेलू उत्पाद के दर म कमी होना चिंता के बात हे। एखर असर छत्तीसगढ़ के विकास म पड़ही।
विस-धन्यवाद प्रस्ताव पारित
छत्तीसगढ़ विधानसभा म आज राज्यपाल के अभिभाषण म धन्यवाद प्रस्ताव पारित करे गीस। एखर पहिली, सदन म होय चर्चा के जुवाब देवत मुख्यमंत्री भूपेश बघेल ह किहीन कि ए देस अउ प्रदेस ह अन्नदाता मनके हवय। कोन्हों भी हाल म किसान मन ल उंखर अधिकार ले वंचित नइ करे जाही। मुख्यमंत्री ह किहीन कि राज्य सरकार ह नगरनार स्टील प्लांट के विनिवेश नइ होवन दे। ए संबंध म विधानसभा म संकल्प घलो पारित करे गेहे। ए संयंत्र ल सार्वजनिक क्षेत्र के कंपनी मन संचालित करही।
कोरोना टीका
केन्द्र सरकार एक मार्च ले साठ बछर ले जादा उमर के लोगन ल कोविड के टीका लगाना सुरू करही। पैंतालीस बछर ले जादा आयु के लोगन ल जउन मन ल पहिली ले कोनों गंभीर बीमारी हवय, ओमन ल घलो ए चरण म कोविड के टीका लगाय जाही। ए चरण बर तैयारी चलत हे। दस हजार सरकारी अस्पताल मन म वैक्सीन मुफ्त म दे जाही अउ बीस हजार निजी टीकाकरण केन्द्र म वैक्सीन के लागत खुद वहन करना होही।
कोरोना समाचार
देस म अभी तक एक करोड़ चैंतीस लाख ले जादा लोगन ल कोरोना के टीका लगाय गे हवय।
ऐति, छत्तीसगढ़ म घलो स्वास्थ्य कार्यकर्ता अउ फ्रंटलाइन वर्कर्स ल कोरोना टीका लगाय जावत हे। अभी तक दू लाख अट्ठाईस हजार तीन सौ सत्रह स्वास्थ्य कर्मी मन ल पहिली अउ अड़तालीस हजार ले जादा लोगन ल कोरोना के दूसरा डोज लगाय गे हवय।
इही बीच, प्रदेस म काली कोरोना संक्रमण के दू सौ बीस नवा मामला आगू आईस। वर्तमान म करीब दू हजार आठ सौ पैंसठ मरीज मनके इलाज आने-आने अस्पताल या होम आइसोलेशन म चलत हे।
ओति, रायगढ़ म कोरोना के नवा स्ट्रेन अउ संक्रमण के बाढ़त दर ल देखत जिला प्रसासन डहार ले रेलवे स्टेशन अउ दूसर राज्य के सीमा म कोविड स्क्रीनिंग अउ कांट्रेक्ट ट्रेसिंग बर सेंटर खोले गे हवय।
ऐति, दुरूग जिला के सासकीय हायर सेकेंडरी स्कूल पाटन म एक झिन सिक्षक के कोरोना पाॅजिटिव मिले के बाद स्कूल ल दू दिन बर बंद कर दे गे हवय।
उहें, राजनांदगांव जिला के अंबागढ़ चैकी म स्कूली लइका मन ल कोरोना संक्रमण ले बचाय बर निःशुल्क मास्क बांटे गीस।
राष्ट्रीय खिलौना मेला
प्रधानमंत्री नरेन्द्र मोदी ह काली वीडियो कान्फ्रेंसिंग के माध्यम ले भारतीय खिलौना मेला के सुरूवात करही। खिलौना, लइका मनके दिमाग ल बढ़ाय म बहुत मदद करथे। चार दिन के ए आयोजन के उद्देश्य सबो खरीददार, खिलौना बेचइया, विद्यार्थी अउ सिक्षक मन संघरा सबो सेयरधारक मन ल एके ठन मंच देना हे।
मुख्यमंत्री कन्या विवाह योजना
मुख्यमंत्री कन्या विवाह योजना म काली राज्य के बाईस जिला म एके संघरा सामूहिक विवाह के आयोजन करे जाही। कोरोना संक्रमण के सेती ए बछर सामूहिक विवाह आने-आने जगह म करे जावत हे, जेमा एके संघरा तीन हजार तीन सौ जोड़ी मनके बिहाव होही। ए मउका म मुख्यमंत्री भूपेश बघेल संघरा मंत्रिमंडल के सदस्य, सांसद, विधायक अउ जनप्रतिनिधि मन रईपुर के इंडोर स्टेडियम म राखे गे मुख्यमंत्री कन्या विवाह आयोजन म सामिल होही अउ राज्य म पहिली घांव डिजिटल माध्यम ले दूसर जिला म दाम्पत्य जीवन म बंधने वाला वर-वधु मन ल आसीर्वाद दीहीं।
राजिम पुन्नी मेला
छत्तीसगढ़ के प्रयाग के नाव ले प्रसिद्ध राजिम म काली ले माघी पुन्नी मेला सुरू होही। ए मेला अवइया ग्यारह मार्च महाशिवरात्रि तक चलही। मेला के सुरूआत विधानसभा अध्यक्ष डाॅक्टर चरणदास महंत करही अउ कारीकरम के अध्यक्षता धार्मिक न्यास अउ धर्मस्व मंत्री ताम्रध्वज साहू ह करही। मेला के दउरान केन्द्र सरकार डहार ले जारी कोरोना ले जुड़े निरदेस के पालन करे जाही। ए बखत मेला स्थल म सांस्कृतिक कारीकरम नइ कराय जाही।
अबूझमाड़ पीस हाफ मैराथन
नारायणपुर जिला म काली सत्ताईस फरवरी के अबूझमाड़ पीस हाफ मैराथन के आयोजन करे जाही। एखर तियारी लगभग पूरा होगे हवय। ए मैराथन म देस-बिदेस के धावक मन सामिल होही। एमा करीबन ग्यारह हजार धावक मन सामिल होवइया हे। मैराथन म भाग लेवइया पहिली दूसर राज्य संघरा प्रदेस के आने-आने जिला ले आय धावक मनके कोरोना जांच करे जाही।
मैराथन म प्रथम पुरस्कार एक लाख इक्कीस हजार रूपिया, द्वितीय पुरस्कार इकसठ हजार अउ तृतीय पुरस्कार इकतीस हजार रूपिया राखे गे हवय। अइसने, नारायणपुर जिला के दस-दस महिला अउ पुरूष धावक मन ल पांच-पांच हजार रूपिया के रासि, प्रसस्ति पत्र अउ मैडल दे जाही।
थल सेना भर्ती रैली
भारतीय थल सेना डहार ले दुरूग के पंडित रविशंकर शुक्ल स्टेडियम म तीन ले बारह मार्च तक भर्ती रैली के आयोजन करे जाही। ए भर्ती रैली म छत्तीसगढ़ के अट्ठाईस जिला के करीब चालीस हजार उम्मीदवार मन सामिल होही।
आयोजक मन ह कोरोना संक्रमण ले बांचे बर भर्ती म सामिल होवइया उम्मीदवार मन ले चिकित्सा अधिकारी मन डहार ले जारी प्रमाण पत्र लाय बर किहीन हे। उम्मीदवार मन बर आवास अउ भोजन के बेवस्था दुरूग जिला प्रसासन डहार ले करे जाही।
माओवादी आत्मसमर्पण
बलरामपुर जिला म आज एक झिन इनामी माओवादी ह पुलिस अधीक्षक के आगू आत्मसमर्पण कर दीस। माओवादी संगठन म एरिया कमांडर के रूप म सक्रिय ए माओवादी के खिलाफ सात ठन मामला म स्थायी वारंट जारी करे गे रिहीस। एखर उपर पैंतालीस हजार रूपिया के इनाम घलो घोषित रिहीस।
ओति, कांकेर जिला के आमाबेड़ा म जवान मन ल निसाना बनाय बर बम लगावत तीन झिन माओवादी मन ह एखर चपेट म आ गीन। ए हादसा म एक झिन माओवादी के मउकाच म मउत होगे अउ दू झिन घायल होगे हे। ए जानकारी माओवादी मन ह पर्चा जारी करके दीन हे।
हाथी-हमला
रायगढ़ जिला म आज हाथी के हमला ले एक झिन सियान माईलोगिन के मउत होगे। मिले जानकारी के अनुसार कोसीर थाना क्षेत्र के मलदा गांव के एक झिन दाई ह चारा काटे बर जंगल कोति गे रिहीस, जिहां हाथी ह ओखर उपर हमला कर दीस।
ओति, जांजगीर-चांपा जिला के ग्राम मरघट्टी-मिरौनी म दू झन हाथी मनके घुसरे ले लोगन मन म दहसत हवय। मउका म वन, राजस्व अउ पुलिस के टीम ह पहुंच गे हवय, मुनादी करके लोगन ल हाथी मन ले दुरिहा रेहे के समझाइस दे जावत हे।