विधानसभा-बजट सत्र
छत्तीसगढ़ विधानसभा के बजट सत्र काली बाईस फरवरी ले सुरू होही। छब्बीस मार्च तक चलइया ए सत्र बेरा कुल चैबीस ठिन बइठका होही। सत्र के सुरूवात काली राज्यपाल अनुुसुईया उइके के अभिभाषण ले होही। सदन म आगू दिन दिवंगत होय नेता मन ल श्रद्धांजलि दे जाही।
उहें, विधानसभा अध्यक्ष डाॅक्टर चरणदास महंत ह आज रईपुर म राखे गे एक ठिन पत्रकारवार्ता म बतईन कि बजट सत्र बेरा तृतीय अनुपूरक अनुमान के उपस्थापन तेईस फरवरी के होही अउ एखर उपर चर्चा चैबीस फरवरी के करे जाही। फेर, मुख्यमंत्री भूपेश बघेल ह वित्त विभाग के भारसाधक मंत्री होय के सेती एक मार्च के मंझनिया अवइया वित्तीय बछर बर बजट पेस करही। सत्र बेरा विभागवार अनुदान मांग उपर चर्चा चार ले तेईस मार्च तक करे जाही। संगे बजट मांग ले जुड़े विनियोग विधेयक उपर चर्चा अउ पारण बर चैबीस मार्च के तिथि तय करे गेहे।
डाॅक्टर महंत ह बतईन कि बजट सत्र बर कुल दू हजार तीन सौ पचास सूचना प्रश्न बर मिले हवय, जेमा एक हजार दू सौ बैसठ तारांकित अउ एक हजार अट्ठायासी अतारांकित प्रश्न हवय। ए सत्र म चैबीस ठिन स्थगन प्रस्ताव के सूचना, एक सौ सत्रह ठिन ध्यानाकर्षण प्रस्ताव के सूचना, नियम एक सौ उनतालीस के अधीन लोक महत्व बिसय उपर चर्चा बर एक ठिन अउ अशासकीय संकल्प बर नौ ठिया सूचना मिले हवय।
कोरोना समाचार
भारत म स्वास्थ्यकर्मी अउ फ्रंटलाइन कमरचारी मन ल कोविड के टीका लगाय के मामला नवा कीर्तिमान स्थापित होवत हे। पाछु चैबीस घंटा म चार लाख बत्तीस हजार ले जादा मनखे मन ल टीका लगाय गीस। अब तक ले एक करोड़ दस लाख पच्यासी हजार ले जादा मनखे मनके टीकाकरण होगे हवय।
ऐति, छत्तीसगढ़ म घलो स्वास्थ्य कार्यकर्ता अउ फ्रंटलाइन करमचारी मन ल कोरोना टीका लगाय जात हे। अब तक ले दू लाख इक्कीस हजार ले जादा स्वास्थ्य कर्मी अउ फ्रंटलाइन करमचारी मन ल पहलइया अउ बीस हजार छह सौ अड़सठ मन ल कोरोना वैक्सीन के दूसरइया डोज लगाय जा चुके हे।
इही बीच, प्रदेश म काली कोरोना संक्रमण के दू सौ तिरसठ नवा मामला आगू आय हे। ए बेरा प्रदेस म तीन हजार एक सौ दू मरीज मनके इलाज अस्पताल या फेर होम आइसोलशन म चलत हे।
ऐति, राजनांदगांव जिला कलेक्टर टोपेश्वर वर्मा ह सिक्षक अउ पढ़ईया लइका मन ल कोरोना गाइड लाइन के पालन करे के निरदेस दीन हे। ओमन किहीन कि कहूं अगर कोनों पढ़ईया लइका, स्टाफ या सिक्षक म सर्दी, खांसी अउ बुखार के लक्षण दिखथे, त तुरते ओमन अपन जांच करवावय।
कोविड-राज्य सलाह
केन्द्र सरकार ह कोविड मामला म दिनों-दिन बढ़ोतरी के सामना करत राज्य मन ल सलाह देहे कि ओहर संबंधित जिला म कड़ई अउ पूरा निगरानी के संगेसंग जरूरी नियंत्रण बर फेर ले धियान करय।
इही बीच, भारतीय प्रौद्योगिकी संस्थान-आईआईटी मुंबई के वैज्ञानिक मन अनुसंधान ले ए साबित करीन हे कि कहूं अगर सुरक्षित दूरी के उचित ध्यान नइ राखे जाही त कोविड महामारी के संक्रमण ह दुगुना तक बाढ़ सकत हे।
मुख्यमंत्री-केन्द्रीय मंत्री पत्र
मुख्यमंत्री भूपेश बघेल ह केन्द्रीय जनजातीय कार्यमंत्री अर्जुन मुंडा ल पाती पठो के छत्तीसगढ़ म लघु वनोपज वाले विकास बर दू सौ चैंतीस करोड़ रूपिया के प्रस्ताव ल जल्दीच मंजूरी दे बर अनुरोध करे हे। श्री बघेल ह किहीन हे कि न्यूनतम समर्थन मूल्य म लघु वनोपज संग्रहण के मामला म छत्तीसगढ़ ह देसभर म पहलइया स्थान म हे। इहां करीबन बहत्तर प्रतिशत लघु वनोपज सकेले गेहे।
आर्टिफिशियल इंटेलिजेंस-प्रतियोगिता
स्कूल शिक्षा मंत्री डाॅक्टर प्रेमसाय सिंह टेकाम ह महासमुंद जिला म राखे गे आर्टिफिशियल इंटेलिजेंस के राष्ट्रीय प्रतियोगिता के दूसर चरण बर चुनई होय राज्य के नौ झिन पढ़ईया लइका अउ सिक्षक मन ल सम्मानित करीन। ओमन ए पढ़ईया लइका मन ल लैपटाप अउ सर्टिफिकेट दीन। देस के आकांक्षी जिला म कुल चैदह झिन पढ़ईया लइका के चुनई ए प्रतियोगिता बर करे गेहे। एमा ले सात झिन पढ़ईया लइका महासमुंद जिला के सासकीय कुलदीप निगम हायर सेकेंडरी स्कूल नर्रा के हरय।
सिंहदेव-लोकार्पण
प्रदेस के स्वास्थ्य मंत्री टी.एस. सिंहदेव ह वीडियो कान्फ्रेंसिंग के माध्यम ले बिलासपुर के सिम्स म सीटी स्कैन अउ एम.आर.आई. मसीन के लोकार्पण करीन। ए मउका म ओमन किहीन कि ए मसीन ले मरीज मन ल नवा किसम वाले जांच के सहुलियत मिलही।
इहां ए बतादन कि सरकारी मेडिकल कालेज बिलासपुर ले जुड़े अस्पताल सिम्स म एसईसीएल डहार ले दे गे चैबीस करोड़ रूपिया ले ए सहुलियत दे गीस।
अंतर्राष्ट्रीय मातृभाषा दिवस
आज अंतर्राष्ट्रीय मातृभाषा दिवस हरय। बछर उन्नीस सौ निन्यानवे म आजे के दिन संयुक्त राष्ट्र सैक्षणिक वैज्ञानिक अउ सांस्कृतिक संगठन यूनिस्को ह इक्कीस फरवरी ल अंतर्राष्ट्रीय मातृभाषा दिवस घोषित करे रिहीस। भारत म केन्द्रीय सिक्षा मंत्रालय बछर दू हजार पन्द्रह ले आज के दिन ल मातृभाषा दिवस के रूप म मनावत आत हे। एखर बर ‘‘शिक्षा और समाज में समावेशन के लिए बहुभाषिता को बढ़ावा देना‘‘ ए बछर के थीम राखे गेहे।
बैगा बाल महोत्सव
कबीरधाम जिला के पंडरिया विकासखंड के गांव छिन्दीडीह म बैगा बाल महोत्सव राखे गेहे। आदिम जाति अउ अनुसूचित जाति विकास मंत्री डाॅक्टर प्रेमसाय सिंह टेकाम ह तीन दिवसीय बैगा महोत्सव के सुभारंभ करीन। ए मउका म ओमन किहीन कि प्रदेस म पांच ठिन बिसेस पिछड़ी जनजाति – बैगा, अबूझमड़िया, कमार, पहाड़ी कोरवा अउ बिरहोर मन रहिथे। ए सबो जनजाति मनके विकास बर बिसेस एजेंसी के गठन करे गेहे।
ए महोत्सव बेरा डाॅक्टर टेकाम ह इहां लगे प्रदर्सनी ल देखे के संगे बैगा नर्तक दल ल पैंतालीस हजार रूपिया के चेक घलो दीन हे।
खेल मड़ई
दुर्ग जिला के पाटन म ए बेरा राज्य स्तरीय खेल मड़ई होवत हे। दू दिन वाले ए आयोजन म प्रदेसभर के करीबन आठ सौ खिलाड़ी भाग लेवत हे।
नंदावत पारंपरिक खेल ल फेर ले जियाय यानि पुनर्जीवित करे के संगे लोकप्रिय बनाय खातिर छत्तीसगढ़ लोकम्पिक संघ डहार ले ए खेल मड़ई के आयोजन करे गेहे, जेखर बर लोगन म भारी उत्साह देखे बर मिलत हे। खेल मड़ई म नौ ठिन पारंपरिक खेल – कबड्डी, खो-खो, फुगड़ी, गिल्ली डंडा, भौंरा, पिट्ठूल अउ संखली समेत कई ठिन आने खेल राखे गेहे।
बालक-अपहरण
रायगढ़ जिला के खरसिया म काली एक झिन व्यापारी के छै बछर नान्हें बाबू ल अनजान मनखे डहार ले अपहरण कर ले गे रिहीस, जेला आज पुलिस ह झारखंड के खूंटी जिला ले सकुसल बरामद करे हे। ए मामला म पुलिस ह घर के रसोईया समेत दू झिन आने मनखे ल गिरफ्तार करे हे।
संक्षिप्त समाचार
अउ अब थोरकुन समाचार सार म-
– छत्तीसगढ़ के स्वप्न दृष्टया अउ स्वतंत्रता संग्राम सेनानी स्वर्गीय डाॅक्टर खूबचंद बघेल के काली पुण्यतिथि हरय। मुख्यमंत्री भूपेश बघेल ह ओमन ल सुरता करत नमन करीन।
– गरियाबंद जिला म पुलिस ह मैनपुर अउ देवभोग बीच एक झिन हीरा तस्कर ल गिरफ्तार करे के संगे ओखर तीर ले छियासी नग हीरा बरामद करे हे।
अउ
– जांजगीर-चांपा जिला के हसौद म पुलिस ह एक झिन जवान लइका के लास नंदियां ले बरामद करे हे।