आज दिनभर के खबर ल अपन गुरतुर छत्तीसगढ़ी भाखा म पढ़व

टोल प्लाजा-फास्टैग
केंद्र सरकार ह राष्ट्रीय राजमार्ग उपर फास्टैग अनिवार्य कर देहे। राजमार्ग मनके टोल प्लाजा उपर सबो लेन काली अधरतिहा ले फास्टैग लैन घोषित होगे हे।
राष्ट्रीय राजमार्ग शुल्क अधिनियम दू हजार अठारा के अनुसार बिना  फास्टैग वाले गाड़ी जउन टोल प्लाजा के फास्टैग लैन म प्रवेश करही वो गाड़ी ल दुगुना शुल्क के भुगतान करना होही।
आकाशवाणी ले बातचीत म केंद्रीय सड़क परिवहन अउ राजमार्ग सचिव गिरिधर अरमाने ह बताइन कि फास्टैग यात्री मनके संगेसंग टोल प्रबंधन अधिकारी मन बर घलो फायदामंद होही।

दुर्ग अंतर्राज्यीय न्यायालयीन
छत्तीसगढ़ के दुर्ग जिला अउ सत्र न्यायालय ह वीडियो काॅन्फे्रसिंग ले अंतर्राज्यीय न्यायालयीन कथन दर्ज करइया प्रदेश म पहला न्यायालय बन गेहे।
खबर के मुताबिक अहमदाबाद के रहइया पीड़िता के कथन डॅाक्टर ममता भोजवानी अतिरिक्त सत्र न्यायाधीश फास्ट ट्रैक कोर्ट म लंबित प्रकरण म लेना जरूरी रीहिस हे। जेखर बाद अहमदाबाद के घोड़ासार के जिला विधिक सेवा  प्राधिकरण ले संपर्क करके पीड़िता के कथन वीडियो कॅान्फ्रेसिंग के माध्यम ले दर्ज करे गीस।
खबर के मुताबिक छत्तीसगढ़ के दुर्ग सिविल न्यायालय म बालक मनके संरक्षण अधिनियम के प्रकरण मनके तुरते निराकरण बर चार विशेष न्यायालय के गठन घलो करे गेहे।

इंदिरा गांधी कृषि वि.वि.
रायपुर के इंदिरा गांधी कृषि विश्वविद्यालय ल अखिल भारतीय कटाई उपरांत तकनीकी अभियांत्रिकी समन्वित अनुसंधान परियोजना खातिर सर्वश्रेष्ठ केंद्र के रूप म पुरस्कृत करे गेहे।
ए परियोजना देश के आने आने राज्य मनके इकतीस केंद्र म चलाये जात हे। इंदिरा गांधी कृषि विश्वविद्यालय के कुलपति डॅाक्टर एस.के. पाटिल ह रायपुर केंद्र ल सम्मानित करे जाय बर परियोजना के वैज्ञानिक मन ल बधाई अउ शुभकामना दीन हे।

 
केंद्रीय बजट-साव
नेता प्रतिपक्ष धरमलाल कौशिक ह पत्रकार मनले चर्चा करत कीहिन कि केंद्र सरकार डहार ले प्रस्तुत आम बजट ल आत्मनिर्भर भारत के निर्माण ल धियान म राखके तियार करे गेहे। ओमन कीहिन कि ए बखत के बजट छै स्तंभ उपर आधारित हे। ओमन ह ए आम बजट ले नवा भारत के बुनियाद के अउ मजबूत होय के दावा करीन हे।
उंहें बिलासपुर सांसद अरूण साव ह कीहिन कि केंद्र सरकार के आम बजट म बुनियादी संरचना के विकास सड़क, परिवहन अउ रक्षा संग भारत के अर्थशक्ति बने के आधार हरय।
ओमन कीहिन कि ए सबो के सबो बर बजट हरय। आज मुंगेली के जिला भाजपा कार्यालय म पत्रकार मनले बजट ले संबंधित चर्चा म ओमन कीहिन कि बजट म गरीब कल्याण अउ महिला सशक्तिकरण उपर जोर दे गेहे। ए बजट म स्वास्थ्य संरचना ल महत्ता दे गेहे।
उंहें कोरोना वैक्सिन उपर बजट दू हजार इक्कीस बाईस म पैंतीस हजार रूपिया खर्च करे के प्रावधान करे गेहे। श्री साव ह कीहिन कि बजट म कृषि     सुधार अउ किसान कल्याण ल प्राथमिकता दे गेहे। संगेसंग शिक्षा अउ शोध ल बढ़ावा देके आने आने उपाय करे गेहे। सांसद ह बताइन कि जनजातिय समुदाय क्षेत्र म नवा स्कूल निर्माण बर अड़तीस हजार करोड़ रूपिया के प्रावधान करे गेहे।बर्ड फ्लू
अंबिकापुर के शासकीय कुक्कुट फार्म म बर्ड फ्लू के मामला आगू आय हे।
मिले खबर के मुताबिक पाछू एक हप्ता ले ए शासकीय फारम म मुर्गा मनके मउत होवत रीहिस, जेखर बाद बर्ड फ्लू के जांच बर सैंपल ल भोपाल के लैब म भेजे गीस। जांच के बाद रिपोर्ट पाॅजीटिव आय हे, जेखर बाद प्रशासन ह सतर्क होेगे हे।
उंहें आज फार्म म मौजूद करीबन ढाई हजार ले जादा मुर्गा अउ करीबन पांच हजार चूजा मन ल मार दे गेहे। एखरे संग फार्म के एक किलोमीटर तक जगा म जतका मुर्गा-मुर्गी होही, ओमन ल मारके दफना दे जाही।

माध्यमिक शिक्षा मंडल परीक्षा
छत्तीसगढ़ माध्यमिक शिक्षा मंडल के पंद्रह अप्रैल ले शुरू होवत मुख्य परीक्षा म ए घांव उत्तर पुस्तिका मनके पृष्ठ म बदलाव होही। आधिकारिक जानकारी के मुताबिक ए बछर परीक्षा म बीस पृष्ठ के मुख्य उत्तर पुस्तिका अउ आठ पृष्ठ के पूरक उत्तर पुस्तिका मनके प्रावधान करे गेहे। ए बदलाव कोरोना महामारी ल नजर म राखके करे गेहे।

शिक्षा मंत्री निरीक्षण
प्रदेश के स्कूल शिक्षामंत्री डॅाक्टर पे्रमसाय सिंह टेकाम ह काली कोरबा जिला के प्रवास के दउरान मदनपुर के शासकीय हाईस्कूल के निरीक्षण करीन। ए दउरान ओमन ह लईका मनले उंखर पढ़ाई अउ परीक्षा के तियारी के संबंध म गोठबात करीन। डॅाक्टर टेकाम ह स्कूल म लईका मनके बइठक बेवस्था अउ कोरोना संबंधी दिशा निर्देश के पालन के बारे म घलो शिक्षक मनले जानकारी लीन। ओमन ह शिक्षक मन ल पाठ्यक्रम ल पूरा कराय बर योजना बनाके नियमित रूप ले कक्षा लेके निर्देश दीन।
ओति राजनांदगांव म स्कूल खोले के बाद विद्यार्थी मन म बड़ उत्साह देखे गेहे। उंहें विद्यार्थी मनके चहल पहल ले स्कूल मन म रौनक घलो बढ़ गेहे।

जिला प्रभारी सूची
भारतीय जनता पार्टी के अनुसूचित जाति मोर्चा के प्रदेश अध्यक्ष नवीन मारकंडेय मोर्चा के संभाग, जिला अउ सहजिला प्रभारी के सूची जारी करे हे। संभाग प्रभारी मनके सूची म रायपुर ले दयावंत धरबांधे, बिलासपुर ले आत्माराम बंजारे, दुर्ग ले वेदराम जांगड़े सरगुजा ले दुर्गा महेश्वर अउ बस्तर ले पवन मेश्राम अउ टिमक टांडिया प्रभारी होही।
एति बिलासपुर जिला कंाग्रेस कमेटी ह घलो कार्यकारिणी के सूची जारी कर देहे। ए सूची म एक सौ उनतालिस पदाधिकारी अउ एक सौ पांच सदस्य सामिल करे गेहे।

वसंत पंचमी
ज्ञान, कला अउ संगीत के देवी मॅंा सरस्वती के आराधना के परब बसंत पंचमी आज पूरा देशभर म उछाह के संग मनाये जात हे। शैक्षणिक संस्थान के संग घर मन म घलो मंा सरस्वती के पीला फूल ले श्रृंगार करके विशेष पूजा  अर्चना करीन।
राष्ट्रपति रामनाथ कोविंद ह बसंत पंचमी अउ सरस्वती पूजा बर देशवासी मन ल बधाई दीन हे। एक ठिन ट्वीट म श्री कोविंद ह बसंत के आगमन उपर लोगन के जीवन म सुख समृद्धि अउ खुशहाली के कामना करीन हे।
उंहें सूचना अउ प्रसारण मंत्री प्रकाश जावडेकर ह बसंत पंचमी के मउका म बधाई दीन हे।

मौसम
प्रदेश के मौसम म बदलाव देखे जात हे। सरगुजा संभाग के कतकोन जिला म आज गरज चमक के संग बरसा होइस।
मौसम विभाग ले मिले खबर के मुताबिक विदर्भ के उपरी जगा म एक कम दबाव के क्षेत्र बने हे। जेखर ले अवइया अड़तालिस घंटा के दउरान उत्तरी अउ मध्य छत्तीसगढ़ म गरज चमक के संग बरसा होय के संभावना हे। उंहें कुछएक जगा म ओला घलो गिरे के आसार हे।

 केंद्रीय विद्यालय कक्षाएं
देशभर म केंद्रीय विद्यालय मनके आने आने कक्ष मन बर नियमित पढ़ाई फेर शुरू कर देहे। ए कक्षा मन ल केंद्रीय गृह मंत्रालय अउ राज्य सरकार मन डहार ले दिशा निर्देश के अनुरूप शुरू करे गेहे।
केंद्रीय विद्यालय अक्टूबर ले दुबारा चरणबद्ध रूप म खोले बर शुरू होय रीहिस। ए महीना के ग्यारा तारीख तक मिले आंकड़ा के अनुसार कक्षा नवमीं के बंयालिस प्रतिशत, कक्षा दसवीं के पैंसठ प्रतिशत, कक्षा ग्यारहवीं के अड़तालिस प्रतिशत अउ कक्षा बारहवीं के सड़सठ प्रतिशत छात्र कक्षा म पहुंचत हे। ए आंकड़ा मन म सरलग बढ़ोत्तरी होवत हे। ए दउरान कोरोना संक्रमण ले संबंधित दिशा निर्देश मनके स्कूल डहार ले अनिवार्य रूप ले पालन करे के निर्देश दे गेहे।

अउ अब थोरकुन समाचार सार म-
– राजनांदगंाव जिला के छुरिया क्षेत्र म भारतीय तिब्बत सीमा पुलिस बल डहार ले सिविक एक्शन कार्यक्रम म गरीब परिवार मन ल जरूरत के सामान बांटे गेहे।

– महासमुंद कलेक्टर ह मोबाइल एटीएम के शुरूआत करे हे। ए सुविधा के शुरू होय ले के.सी.सी अउ रूपे कार्ड धारक किसान अपन गांव म ही पइसा के भुगतान ले सकही। मोबाइल एटीएम ले एक दिन म उनचास हजार रूपिया तक निकाले जा सकही।

– बिलासपुर जिला कंाग्रेस कमेटी ह कार्यकारिणी के सूची जारी कर देहे। ए सूची म एक सौ उनतालिस पदाधिकारी अउ एक सौ पांच  सदस्य मन ल सामिल करे गेहे।

– प्रधानमंत्री सूक्ष्म खाद्य उन्नयन योजना बर आॅनलाईन आवेदन आमंत्रित करे गेहे। ए योजना म बिलासपुर जिला ल मछली आधारित उत्पाद बांटे गेहे।

– राजनंादगांव जिला के डोंगरगढ़ म वन विभाग के वनपाल के फंासी लगाके आत्महत्या करे के मामला आगू आय हे।