कैबिनेट निर्णय-01
प्रदेस के सबो स्कूल म नौवीं ले बारहवीं तक के कक्षा अवइया पन्द्रह फरवरी ले सुरू होही। उहें, विश्वविद्यालय अउ महाविद्यालय मन के कक्षा घलो पन्द्रह फरवरी ले सुरू होही। मुख्यमंत्री भूपेश बघेल के अध्यक्षता म आज रईपुर म आयोजित राज्य मंत्रिमंडल के बइठका म ए फइसला करे गेहे।
बइठका म ले गे निर्णय के जानकारी देवत कृषि मंत्री रविन्द्र चैबे ह बतईन कि स्कूल अउ महाविद्यालय के कक्षा मन म कोरोना संक्रमण ले बचाव बर जारी जम्मों दिसा-निरदेस के पालन अनिवार्य रूप से करे जाही। प्रदेस म कौसल विकास के सबो प्रसिक्षण कारीकरम ल सुरू करे के निर्णय घलो ले गेहे।
बइठका म सबो वर्ग के आवासहीन मन ल आवास उपलब्ध कराय बर प्रदेस के जिला मन म राजीव नगर आवास योजना के क्रियान्वयन के निर्णय ले गेहे। एखर तहत छत्तीसगढ़ गृह निर्माण मंडल ल एक रूपिया प्रति वर्गफीट के दर ले सासकीय जमीन उपलब्ध कराय जाही। ए योजना म राज्य के सहरी, अर्द्धसहरी अउ बड़े कस्बा मन म एक लाख आवासीय भवन बनाय जाही।
बस्तर संभाग के सबो जिला म बस्तर फाइटर्स नाम के बिसेस दल के गठन के निर्णय घलो करे गीस। एमा जिला के कैडर के आधार म भर्ती करे जाही। उहें, गोधन न्याय योजना के अंतर्गत गौठान समिति अउ स्व-सहायता समूह मन ल आत्मनिर्भर बनाय बर कई ठिन महत्वपूर्ण निर्णय ले गीस। प्रतिकिलो वर्मी कम्पोस्ट के विक्रय दर दस रूपिया म ले गोबर क्रय के लागत रासि पांच रूपिया संबंधित गौठान समिति ल दे जाही। एखरे संग प्रति किलो वर्मी कम्पोस्ट विक्रय दर ले अवइया लाभांस रासि के पचयासी-पन्द्रह के अनुपात म स्व-सहायता समूह अउ गौठान समिति मन ल आवंटित करे जाही।
कैबिनेट निर्णय-02
आज मंत्रिमंडल के बइठका म नवा रईपुर अटल नगर म विकास, रोजगार अउ बसाहट बढ़ाय बर सेक्टर स्तर म अधोसंरचना के विकास सुल्क के पुनर्निधारण बर प्रस्ताव के अनुमोदन करे गीस। एखर तहत प्रीमियम दर म औसत दस ले इक्कीस प्रतिसत तक के कमी करे गेहे। नवा रईपुर म आने-आने परियोजना बर रियायती प्रीमियत दर म भूखंड आवंटन के प्रस्ताव ल घलो मंजूरी दे गेहे।
कैबिनेट म तेंदूपत्ता के व्यापार ले अवइया सुद्ध आय ले पन्द्रह प्रतिसत रासि संग्राहक समिति मन ल अराष्ट्रीयकृत लघु वनोपज के व्यापार के संगेसंग लाख पालन बर घलो उपलब्ध कराय के निर्णय ले गेहे। लघु वनोपज आधारित प्रसंस्करण उद्योग मनके स्थापना बर करे जाने वाले एमओयू के प्रारूप का घलो मंजूरी दे गीस। बइठका म कैम्पा मद ले राज्य के वनक्षेत्र मनके डी.जी.पी.एस. सर्वें कराय के निर्णय ले गीस हे।
कैबिनेट म ले गे निर्णय अनुसार जल जीवन मिसन के तहत गांव के नल-जल योजना के एकल या समूह म निविदा के माध्यम ले पांच करोड़ रूपिया तक के वित्तीय अधिकार जिला, जल अउ स्वच्छता मिसन मन ल सौंपे गेहे। एखर अलावा सार्वजनिक वितरण प्रणाली बर सक्कर के खरीदी फरवरी ले एक वर्ष बर खुला निविदा ले करे जाही। अइसने, राज्य के नवा आबकारी नीति, अवइया वित्तीय वर्ष के बजट, चालू वित्तीय वर्ष के अनुपूरक बजट अउ राज्यपाल के अभिभाषण के अनुमोदन कैबिनेट म करे गीस।
कोरोना टीकाकरण
देस म स्वास्थ्य कार्यकर्ता मन बर कोविड टीकाकरण के दूसरइया चरण आज ले सुरू होगे हे। केन्द्रीय स्वास्थ्य सचिव राजेश भूषण ह बतईन कि ए दूसरा टीका ओ लाभार्थी मन ल लगाय जावत हे, जउन मन ल विश्व के सबले बड़े टीकाकरण अभियान के सुरूआती दिन सोलह जनवरी के टीका लगाय गे रिहीस। अखिल भारतीय आयुर्विज्ञान संस्थान के निदेशक डाॅक्टर रणदीप गुलेरिया ह बतईन कि दूसरइया चरण के तैयारी पूरा कर ले गेहे।
ऐति, छत्तीसगढ़ म घलो स्वास्थ्यकर्मी अउ फ्रंटलाइन वर्कर मन ल कोरोना टीका लगाय के काम चलत हे। प्रदेस म काली तक दू लाख नौ हजार पांच सौ दू स्वास्थ्य कार्यकर्ता अउ फ्रंटलाइन वर्कर मन कोविड वैक्सीन लग गेहे।
उहें, प्रदेस म काली दू सौ उनतीस कोरोना संक्रमण के नवा मामला सामने आईस।
पीएससी-परीक्षा
छत्तीसगढ़ लोक सेवा आयोग के राज्य सेवा प्रारंभिक परीक्षा काली चैदह फरवरी के दू पाली म आयोजित करे जाही। एखर बर रईपुर म उनहत्तर परीक्षा केन्द्र बनाय गेहे। पहिली पाली म बिहनिया दस बजे ले बारह बजे तक सामान्य अध्यनन अउ दूसरी पाली म मंझनिया तीन बजे ले एप्टीट्यूड टेस्ट के पेपर होही।
लोकवाणी
मुख्यमंत्री भूपेश बघेल के मासिक रेडियो वार्ता कारीकरम ‘‘लोकवाणी‘‘ के पंद्रहवंा कड़ी के प्रसारण काली चैदह फरवरी, रविवार के दिन होही। मुख्यमंत्री ह लोकवाणी म ए दरी ‘उपयोगी निर्माण, जनहितैषी अधोसरंचना, आपकी अपेक्षाएं‘ विषय उपर प्रदेशवासी मनले गोठबात करही। लोकवाणी के प्रसारण छत्तीसगढ़ स्थित आकाशवाणी के सबो केंद्र, एफ.एम. रेडियो अउ क्षेत्रीय समाचार चैनल मन म बीहनिया साढ़े दस बजे ले ग्यारा बजे तक होही।
सांसद-संतोष पांडेय
राजनांदगांव सांसद संतोष पांडेय ह काली लोकसभा म चर्चा के बीच छत्तीसगढ़ी भासा म समाचार सुरू करे के मांग करीन। एमा केन्द्रीय सूचना अउ प्रसारण मंत्री प्रकाश जावड़ेकर ह किहीन कि जेन भी संभव होही, ओला करके जल्दी ले जल्दी समाचार के प्रसारण सुरू कराय जाही। श्री पांडेय ह अपन भासन म किहीन कि छत्तीसगढ़ म बस्तर ले लेके सरगुजा तक करीबन दू करोड़ मनखे मन छत्तीसगढ़ी भासा म गोठबात करथे।
विश्व रेडियो दिवस
आज विश्व रेडियो दिवस हवय। संयुक्त राष्ट्र शैक्षिक, वैज्ञानिक अउ सांस्कृति संगठन-यूनेस्को ह साल दू हजार ग्यारह म विश्व रेडियो दिवस मनाय के निर्णय ले रिहीस। संयुक्त राष्ट्र महासभा ह दू हजार बारह म एला अंतर्राष्ट्रीय दिवस के रूप म अपनाईस। ए साल के विश्व रेडियो दिवस के बिसय हे – ‘‘नई दुनिया, नया रेडियो‘‘।
उप राष्ट्रपति एम. वेंकैया नायडू ह विश्व रेडिया दिवस म किहीन कि रेडियो ह संचार के एक ठिन लोकप्रिय माध्यम होय के संगेसंग सूचना अउ मनोरंजन के घलो प्रमुख स्त्रोत हे।
उहें, प्रधानमंत्री नरेन्द्र मोदी ह किहीन कि रेडियो ह सकारात्मक रूप ले मनखे मन ल प्रभावित करे के एक ठिन अच्छा माध्यम हे। ओमन अपन ट्वीट संदेस म सबो श्रोता मन ल सुभकामना दीन हे।
केन्द्रीय सूचना प्रसारण मंत्री प्रकाश जावड़ेकर ह विश्व रेडियो दिवस के अवसर म सबो ल सुभकामना देवत किहीन कि रेडियो के लगातार विस्तार होवत हे।
ऐति, छत्तीसगढ़ म घलो विश्व रेडियो दिवस के मउका म आने-आने आयोजन करे जावत हे। रईपुर के सर्किट हाउस म आयोजित कारीकरम म महापौर एजाज ढेबर ह गांधी उद्यान म रेडियो पार्क बनाय के घोसना करीन।
संक्षिप्त समाचार
अउ अब थोरकुन समाचार सार म-
– छत्तीसगढ़ नीति आयोग कोति ले डिजिटल लाइवलीहुड एक्सप्रेस प्लेटफाॅर्म ‘‘उन्नति‘‘ वेबपोर्टल तैयार करे गेहे। एमा नियोक्ता मन ह पंजीकृत रोजगार के मउका के जानकारी दे सकथे। उहें, इच्छुक श्रमिक मन ह रोजगार बर आवेदन घलो कर सकथे।
– बिलासपुर के चकरभाटा एयरपोर्ट म हवाई सेवा के तैयारी सुरू होगे हे। संभागायुक्त डाॅक्टर संजय अलंग ह ए बारे म आयोजित समीक्षा बइठका म एयरपोर्ट म सुरक्षा समेत जरूरी व्यवस्था मन ले संबंधित दिसा-निरदेस अधिकारी मन ल दीन।
– सड़क सुरक्षा माह के अंतर्गत दुरूग पुलिस कोति ले काली चैदह फरवरी के बिहनिया छह बजे ले यातायात नियम के प्रति जन-जागरूकता बर सड़क सुरक्षा दौड़ के आयोजन करे जाही।
अउ
– महासमुंद जिला म राष्ट्रीय राजमार्ग म पटेवा अउ झलप के बीच टूरीडीह चैक के तीर तेज रफ्तार कार के टक्कर ले दू मोटर साइकिल म सवार तीन झिन लोगन के मउत होगे। फेर एक झन ह गंभीर रूप ले घायल हे।