राज्यपाल बस्तर प्रवास
राज्यपाल अनुसूइया उइके ह कीहिन हे कि बस्तर म बड़ मात्रा म मौजूद वनोपज के स्थानीय स्तर म प्रसंस्करण करके इंहा के लोगन मन बर समृद्धि के नवा अंजोर आही। राज्यपाल ह अपन बस्तर प्रवास के दउरान धुरागंाव म संचालित वनोपज प्रसंस्करण केंद्र के अवलोकन करीन। संगेसंग कतकोन प्रसंस्करण केंद्र मन म काम करइया माइलोगिन मनले घलो भेंट करीन।
ए मउका म राज्यपाल ह घोटिया के प्राथमिक वनोपज सहकारी समिति ल वनोपज संग्रहण के कमीशन के राशि देके संगेसंग वनोपज संग्रहण बर करे जात परयास के सराहना घलो करीन।
मैनपाट महोत्सव
सरगुजा जिला म आज ले तीन दिन के मैनपाट महोत्सव शुरू होगे हे। एखर शुभारंभ मुख्यमंत्री भूपेश बघेल ह करीन। ए मउका म मुख्यमंत्री ह मैनपाट म अनुसूचित जनजाति शोध संस्थान बनाये के घोषणा करीन।
ए तीन दिन के मैनपाट महोत्सव के बेरा राष्ट्रीय अउ स्थानीय कलाकार मन डहार ले सांस्कृतिक प्रस्तुति दे जाही।
मुख्यमंत्री वर्मी कम्पोस्ट
मुख्यमंत्री भूपेश बघेल ह कीहिन हे कि गौठान मन म बनत वर्मी कम्पोस्ट खाद के गुणवत्ता अउ एखर फायदा के बारे म बड़ प्रचार प्रसार करे के संगेसंग एखर मार्केटिंग के बेवस्था करना घलो जरूरी हवय। मुख्यमंत्री ह कीहिन कि वर्मी खाद के उपयोग बर किसान मन ल प्रेरित अउ प्रोत्साहित करे के जरूरत हे। काली अपन रायपुर स्थ्ति निवास कार्यालय म गोधन न्याय योजना के समीक्षा के दउरान ओमन प्राथमिक सहकारी समिति मनके माध्यम ले वर्मी खाद के बेचे के बेवस्था के निर्देश दीन।
ओमन वर्मी खाद के प्रचार प्रसार बर सबो जिला मन म कार्यशाला राखे के बात घलो कीहिन। मुख्यमंत्री ह ए मउका म ग्रामीण अउ पशुपालक मन डहार ले बेचे गे गोबर के बदला म तीन करोड़ छियांसी लाख रूपिया के तेरहवंा किश्त के राशि ल आॅनलाईन दीन।
अंग्रेजी स्कूल सीएम
मुख्यमंत्री भूपेश बघेल ह कीहिन हे कि छत्तीसगढ़ के हरएक लईका ल अच्छा शिक्षा उपलब्ध कराना शासन के प्राथमिकता हवय। ए दिशा म करे जात प्रयास के तहत स्वामी आत्मानंद अंग्रेजी माध्यम विद्यालय योजना चालू करे गेहे। ओमन कीहिन कि ए योजना ले छत्तीसगढ़ के छात्र मन ल भविष्य के हरएक किसम के प्रतियोगिता मन बर सक्षम प्रतिभागी के रूप म तियार करना हे ।
काली अपन निवास कार्यालय ले वीडियो कॅान्फे्रसिंग के माध्यम ले शासकीय अंग्रेजी स्कूल मनके प्राचार्य मनके प्रशिक्षण सत्र ल संबोधित करत ओमन कीहिन कि विद्यालय म अइसे वातावरण के निर्माण करना हे जेखर ले छात्र मनके संग शिक्षक अउ खुदे आप मन ल ए विद्यालय के हिस्सा होय उपर गर्व हो सके।
मोबाइल एटीएम वैन
प्रदेश के पंचायत अउ ग्रामीण विकास मंत्री टी.एस. सिंहदेव ह आज रायपुर म पांच ठिन मोबाइल एटीएम वैन ल हरा झण्डी दिखाके चालू करीन। ए मउका म श्री सिंहदेव ह कीहिन कि मोबाइल एटीएम वैन के सुविधा ले अब दूरिहा के लोगन मन ल घलो फायदा होही । ओमन बैंक सखी के बारे म कीहिन कि सरकार ह पांच ठिन पंचायत मन म एक बैंक सखी निर्धारित करे के लक्ष्य राखे हे। जेखर ले दूरिहा के जगा म राहत सियान मन ल पेंशन मिल सकही।
खबर के मुताबिक राज्य ग्रामीण बैंक डहार ले शुरू करे गे पांच ठिन मोबाइल एटीएम वैनम दू ठिन सरगुजा, दू बस्तर अउ एक गाड़ी राजनंादगंाव म अपन सेवा देही।
अल्पकालीन कृषि ऋण
राज्य सरकार ह प्रदेश म लाख उत्पादन ल कृषि के दर्जा दीस हे । एखर ले लाख उत्पादक किसान अउ किसान समूह मन ल घलो अल्पकालीन कृषि ऋण उपर नियम के अनुसार मिलइया ब्याज अनुदान के लाभ मिल सकही। कृषि विकास अउ किसान कल्याण, जैव प्रौद्योगिकी विभाग डहार ले जारी आदेश म केहे गेहे कि कुसुम, पलाश, बेर अउ सेमियालता फसल उपर लाख उत्पादन अउ प्राथमिक प्रसंस्करण बर अल्पकालीन कृषि ऋण दे जाही।
माओवादी मुठभेड़
राष्ट्रीय जांच एजेंसी एनआईए ह बाईस झिन मोस्ट वांटेड माओवादी मनके सूची जारी करे हे। ए सूची म सामिल माओवादी मन उपर पचास हजार ले दस लाख रूपिया तक के इनाम घोषित करे हे। सूची म दंतेवाड़ा, सुकमा के संग तेलंगाना के माओवादी मनके नाव घलो सामिल हे।
मिले खबर के मुताबिक माओवादी मनके पहिचान करे बर ए सूची ल एनआईए डहार ले गांव गांव म चिपकाए जाही ।
सीआरपीएफ डीजी-प्रवास
केंद्रीय रिजर्व पुलिस बल- सीआरपीएफ के महानिदेशक ए.पी. माहेश्वरी आज सुकमा जिला के मिनपा कैम्प पहुंचीन । ए दउरान ओमन मिनपा कैम्प ल प्रदेश के सबले अच्छा कैम्प बताइन । ओमन सीआरपीएफ के डीआईजी योज्ञान सिंह ल गोल्डन डिस्क, द्वितीय कमान अधिकारी सच्चिदानंद मिश्रा अउ जिला के पुलिस अधीक्षक कन्हैया लाल ध्रुव ल डीजी डिस्क अवार्ड देके घोषणा करीन। एखर अलावा सीआरपीएफ के जवान मन ल दस लाख रूपिया अउ जिला पुलिस बल ल पांच लाख रूपिया रिवार्ड देके घोषणा घलो करीन।
ए मउका म छत्तीसगढ़ पुलिस बल के स्पेशल महानिदेशक अशोक जुनेजा घलो मौजूद रीहिन।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के पंद्रहवंा कड़ी के प्रसारण चैदह फरवरी रविवार के दिन होही। मुख्यमंत्री लोकवाणी म ए दरी ‘उपयोगी निर्माण, जनहितैषी अधोसरंचना, आपकी अपेक्षाएं‘ विषय उपर प्रदेशवासी मनले गोठबात करही। लोकवाणी के प्रसारण छत्तीसगढ़ स्थित आकाशवाणी के सबो केंद्र, एफ.एम. रेडियो अउ क्षेत्रीय समाचार चैनल मन म बीहनिया साढ़े दस बजे ले ग्यारा बजे तक होही।
सड़क सुरक्षा माह
यातयात नियम बर लोगन मन ल जागरूक बनाये खातिर प्रदेश म ए दिन म सड़क सुरक्षा माह मनाये जात हे । ए सिलसिला म महासमुंद म पुलिस प्रशासन ह हेलमेट पहिनके गाड़ी चलइया लोगन मन ल चाॅकलेट अउ पौधा भेंट देके उंखर सम्मान करीन।
उंहें दुर्ग जिला म सड़क सुरक्षा बर लोगन मन ल जागरूकर करे खातिर एनसीसी के छात्र मनले रूचि निर्माण अभियान चलाये गीस। अइसने मुंगेली जिला म जन जागरूकता शिविर राखे गीस। जेमा बड़ संख्या म मनखे मन लर्निंग लाइसेंस बनवाइन।
राजिम पुन्नी मेला
राजिम म हर बछर होवइया माघाी पुन्नी मेला ए बछर सत्ताईस फरवरी ले राखे जाही, जेन ह ग्यारह मार्च तक चलही। ए दउरान सत्ताईस फरवरी, छह अउ ग्यारह मार्च के तीन ठिन स्नान पर्व होही।
प्रदेश के धार्मिक न्यास अउ धर्मस्व मंत्री ताम्रध्वज साहू ह रायपुर म विभागीय अधिकारी अउ मेला समिति के पदाधिकारी मनके बइठका के तियारी के समीक्षा करीन। ए मउका म ओमन कीहिन कि कोरोना महामारी के सेती मेला म कोनो शासकीय कार्यक्रम नइ राखे जाय। ओमन कीहिन कि लोगन मनके सुविधा बर पहिले जइसे सड़क, शौचालय, बिजली, पानी, स्वास्थ्य अउ सफाई के बेवस्था करे जाही।
मौसम
बस्तर अउ सरगुजा संभाग म शीतलहर कम होय के संगेसंग प्रदेश के ठंड म कमी होय हे। उंहेें राजधानी रायपुर म घलो न्यूनतम तापमान बाढ़े ले ठंड कम होय हे। मौसम विभाग के अनुसार हवा के दिशा दक्षिण-पूर्व होय ले दिन अउ रात के तापमान म बढ़ोत्तरी होवत हे। मौसम विभाग ह अवइया दिन म तापमान बाढ़े के संभावना जताय हे।
संक्षिप्त समाचार –
– छत्तीसगढ़ लोक सेवा आयोग के राज्य सेवा प्रारंभिक परीक्षा अवइया चैदा फरवरी के दू पाली म राखे जाही। एखर बर रायपुर म उनहत्तर परीक्षा केंद्र बनाय गेहे।
– जंाजगीर चांपा जिला म रेत के अवैध परिवहन करे के मामला म बारा ठिन गाड़ी उपर कार्रवाई करे गेहे।
– भिलाई नगर पालिक निगम के प्रारंभिक मतदाता सूची तियार करे बर राखे गे प्रशिक्षण म अनुपस्थित सोलह कर्मचारी मन ल कारण बताओ नोटिस जारी करे गेहेे।
अउ
– दुर्ग के कोतवाली पुलिस ह बारा किलो गांजा के संग दू झिन आरोपी मन ल गिरप्तार करे हे।