कोरोना-मरीज
प्रदेस म आज घलो आने-आने जिला ले कतकोन झन कोरोना के मरीज मिले हे। जानकारी के अनुसार रईपुर जिला म आज करीबन सत्ताईस झिन कोरोना पाॅजिटिव के पता चले हे। नवा मरीज म क्वारेंटाइन सेंटर बनाय गे होटल के पांच करमचारी संघरा, गृहणी, बैंक मैनेजर, निजी बीमा कंपनी अउ कोचिंग सेंटर के करमचारी, वाहन चालक, दर्जी, बावर्ची अउ स्वास्थ्य कार्यकर्ता सामिल हे।
पीडीएस दुकान-कैमरा
प्रदेस के जम्मों सरकारी उचित मूल्य के दुकान मन म जल्दीच सीसीटीवी कैमरा लगाय जाही। ए कैमरा के लगे के बाद साॅफ्टवेयर के माध्यम ले उपभोक्ता मन ह मोबाइल म अपन रासन दुकान ल देख सकही अउ दुकान खुला या बंद होय के जानकारी घलो घर बइठे ले सकही।
खाद्य मंत्री अमरजीत भगत ह काली वीडियो कान्फ्रेंसिंग के माध्यम ले जिला खाद्य अधिकारी मनके बइठका म ए बारे म निरदेस दीन। बइठका म खाद्य सचिव डाॅक्टर कमलप्रीत सिंह ह बतईन कि प्रदेस के सहरी क्षेत्र के पचास प्रतिसत ले जादा रासन दुकान म सीसीटीवी कैमरा लग गे हवय। सबो दुकान मन म एक हफ्ता के अंदर कैमरा लगाय गे निरदेस दे गे हवय। एखर ले रासन दुकान के माॅनिटरिंग घलो आसानी ले हो सकही। खाद्य मंत्री ह सबो रासनकार्डधारी परिवार के सदस्य मनके आधार सीडिंग जल्दी कराय बर किहीन, जेखर ले अगस्त महीना म एक राष्ट्र-एक रासन कार्ड योजना सुरू करे जाय सकय।
माओवादी-आत्मसमर्पण
दंतेवाड़ा अउ बीजापुर जिला म आज तीन इनामी संघरा नौ माओवादी मन ह आत्मसमर्पण करीन हे।
दंतेवाड़ा जिला म पुलिस डहार ले चलाय जावत ‘‘घर वापस आइये‘‘ अभियान म दू झिन इनामी संघरा सात माओवादी मन ह बड़ेगुडरा सीआरपीएफ कैम्प पहुंच के पुलिस अधीक्षक डाॅक्टर अभिषेक पल्लव के आगू आत्मसमर्पण करीन। एमा ले एक झिन माओवादी उपर एक लाख अउ दूसर उपर दू लाख रूपिया के इनाम रिहीस। ए सबो माओवादी मन ह कटेकल्याण एरिया कमेटी के सदस्य हे।
उहें, बीजापुर जिला म घलो आज एक झिन माईलोगिन संघरा दू झिन माओवादी मन ह बस्तर रेंज के आईजी, सीआरपीएफ के डीआईजी, पुलिस अधीक्षक अउ कलेक्टर के आगू आत्मसमर्पण करीन। एमा एक झिन महिला माओवादी अउ जगरगुंडा-बासागुड़ा एरिया कमेटी के सदस्य घलो सामिल हे। एला माओवादी मन ह कोरोना संक्रमण ल देखत कुछेक दिन बर संगठन ले अलग कर दे रिहीन।
ओति, राजनांदगांव जिला के सीमा ले लगे महाराष्ट्र के गढ़चिरौली के गट्टा इलाका म पाछु रतिहा पुलिस संग होय मुठभेड़ म एक झिन माओवादी ह मारे गेहे। मउका ले भारी मात्रा म माओवादी जिनीस बरामद करे गेहे।
स्पंदन अभियान-डीजीपी
पुलिस महानिदेशक डी.एम. अवस्थी ह आज स्पंदन कारीकरम म दुरूग जिला के बघेरा के एसटीएफ बटालियन के जवान मन ल दे जावत ट्रेनिंग अउ फायरिंग रेंज के निरीक्षण करीन। ए दउरान पुलिस महानिदेसक ह जवान मनके हौसला बढ़ाईन अउ ओमन ल तनावमुक्त रेहे के समझाइस दीन। ओमन ह जवान मन संग उंखर परिवार वाला मन ले घलो गोठबात करीन अउ उंखर समस्या के निपटारा के भरोसा देवाईन।
नीट/जेईई-परीक्षा
केन्द्र सरकार ह कोरोना वायरस संक्रमण के सेती मेडिकल अउ इंजीनियरिंग के राष्ट्रीय पात्रता प्रवेस परीक्षा-नीट अउ संयुक्त प्रवेश परीक्षा-जेईई के तारीख ल आगू बढ़ा देहे। केन्द्रीय मनाव संसाधन विकास मंत्री रमेश पोखरियाल निशंक ह बतईन कि विद्यार्थी मनके सुरक्षा अउ सिक्षा के गुणवत्ता ल देखत ए फइसला करे गे हवय।
जेईई मेन परीक्षा एक सितंबर ले छह सितंबर के बीच होही अउ नीट के परीक्षा तेरह सितंबर के राखे गे हवय। सत्ताईस सितंबर के जेईई एडवांस के परीक्षा के तारीख ल घलो निश्चित करे गेहे।
आॅनलाइन पोर्टल-शिक्षक
स्कूल शिक्षा विभाग डहार ले चलत आॅनलाईन पोर्टल ‘‘पढ़ई तुहंर दुआर‘‘ म बने काम करइया सिक्षक अउ विद्यार्थी मन ल प्रोत्साहित करे जाही। एखर बर बिसेस रणनीति तैयार करे जाही। ए कारीकरम ल आखिरी छोर तक पहुंचाय बर आॅनलाईन कक्षा के अलावा दूसर तरीका मन ल घलो अपनाय के उद्देश्य ले सबो जिला के मीडिया प्रकोष्ठ के प्रभारी अधिकारी मन बर आॅनलाईन उन्मुखीकरण कारीकरम कराय गीस। ए मउका म एससीईआरटी के संयुक्त संचालक डाॅक्टर योगेश शिवहरे ह किहीन कि कोरोना संकट काल म आॅनलाईन सिक्षा विद्यार्थी मन बर वरदान साबित होवत हे।
लूट आरोपी-गिरफ्तार
रायगढ़ जिला म एसबीआई बैंक के एटीएम म पइसा डाले बर आय कैश वैन के ड्राईवर के हत्या करके करीबन साढ़े चैदह लाख रूपिया के लूट के फरार दू झिन आरोपी मन ल पुलिस ह गिरफ्तार कर ले हावय। आरोपी मनके तीर ले लूट के रकम अउ हथियार घलो बरामद करे गे हवय।
खबर के मुताबिक काली मंझनिया कुन कोतरा रोड थाना क्षेत्र के किरोड़ीमल एसबीआई बैंक के एटीएम म पइसा डाले बर पहुंचे कैश वैन के ड्राईवर अउ सुरक्षा गार्ड उपर दू झिन नकाबपोस आरोपी मन ह गोली चला दीन। एखर बाद साढ़े चैदह लाख रूपिया लूट के फरार होगीन।
आईसीएमआर-निजी प्रयोगशाला
भारतीय आयुर्विज्ञान अनुसंधान परिषद-आईसीएमआर ह सबो राज्य अउ केन्द्रसासित प्रदेस मन ल चिट्ठी लिखके निजी प्रयोगसाला मन ल कोरोना संक्रमण के जांच बर एन.ए.बी.एल. ले मान्यता प्राप्त करे बर समझाय बर किहीन हे। एन.ए.बी.एल. ह चिकित्सा ले जुड़े परीक्षण प्रयोगसाला ल मान्यता देवइया संगठन हे।
आईसीएमआर के अपर महानिदेशक जी.एस. टुटेजा ह अपन चिट्ठी म किहीन हे कि कतकोन प्रयोगसाल मन ह पहिली घांव कोरोना संक्रमण के जांच करत हे। तेखर बर जरूरी हे कि ओमन ह एन.ए.बी.एल. के नियम के पालन करय अउ निजी प्रयोगसाला मन बर निर्धारित मान्यता लेवय, जउन ह जरूरी हे।
लोक सेवा गारंटी-निर्देश
गृह मंत्री ताम्रध्वज साहू ह लोक सेवा गारंटी अधिनियम म मिले आवेदन मनके निपटारा समय-सीमा म करे के निरदेस दीन हे। श्री साहू ह काली अपन प्रभार जिला गरियाबंद म विकास काम के समीक्षा के दउरान किहीन कि समाज के गरीब, मजदूर अउ जरूरतमंद मन ल भटके बर झन पड़य, ए बात के धियान राखे जाना चाही। ओमन किहीन कि आम नागरिक कोनों समस्या के संबंध म आवेदन देवत हे त ओखर तुरते निपटारा होना चाही। ओमन किहीन कि प्रसासन ल गरीब अउ जरूरतमंद लोगन बर जादा संवेदनसील होना चाही।
गोधन न्याय योजना
प्रदेस म गोधन न्याय योजना के तहत किसान अउ पशुपालक मन ले डेढ़ रूपिया प्रति किलो के दर ले गोबर के खरीदी करे जाही। कृषि मंत्री रविन्द्र चैबे के अध्यक्षता म गठित मंत्रिमंडलीय उप समिति ह एखर अनुसंसा कर देहे। अब कैबिनेट के बइठका म गोबर के दर के आखिरी निरनय होही। समिति के आज होय बइठका म गोधन न्याय योजना ल लेके बिस्तार ले गोठबात करे गीस।
खबर के मुताबिक प्रदेस म गोधन न्याय योजना के सुरूवात हरेली तिहार ले होवइया हे।
स्वच्छ भारत मिशन-समीक्षा
पंचायत मंत्री टी.एस. सिंहदेव ह स्वच्छ भारत मिशन-ग्रामीण के कामकाज के समीक्षा के दउरान चालू वित्तीय बछर के कार्ययोजना अउ अवइया पांच बछर के काम के रूपरेखा बनाय के संबंध म जरूरी निरदेस दीन हे। ओमन बइठका म गांव म स्वच्छता बनाय के बात म जोर देवत किहीन कि लोगन ल साफ-सफई ल अपन आदत म लाना चाही। एखर बर ओमन ल सरलग प्रेरित करे के जरूरत हे। ओमन किहीन कि गांव के खुले म सौचमुक्त होय के बाद जादा साफ-सफई बर अब ठोस अउ तरल अपशिष्ट के प्रबंधन उपर धियान दे जाना चाही।
मुनगा-पौधरोपण
प्रदेस म अवइया छह जुलाई के वन विभाग डहार ले मुनगा पौधारोपण के बिसेस अभियान चलाय जाही। एमा प्रदेस के सबो सरकारी स्कूल, आंगनबाड़ी केन्द्र अउ छात्रावास आश्रम म मुनगा के पौधा लगाय जाही।
वन मंत्री मोहम्मद अकबर ह बतईन कि ए अभियान ह कुपोषण मुक्त छत्तीसगढ़ के कल्पना ल साकार करे म अपन भूमिका निभाही। एला लगाय ले मुनगा मिलही अउ हरियाली ले पर्यावरण संरक्षण ल घलो बढ़ावा मिलही। प्रधान मुख्य वन संरक्षण राकेश चतुर्वेदी ह बतईन कि मुनगा सेहत बर बहुते फायदा के चीज़ हे। एमा बहुत अकन विटामिन रहिथे।
आरटीओ-जांच चैकी
राज्य सरकार ह प्रदेस म आरटीओ के बंद जम्मों सोलह बैरियर अउ परिवहन जांच चैकी मन ल आज चार जुलाई के मध्य रात्रि ले फेर सुरू करे के आदेस जारी करे हे।
खबर के मुताबिक पहिली सरकार डहार ले दस अगस्त दू हजार सत्रह के ए परिवहन जांच चैकी मन ल बंद कर दे गे रिहीस।
