पुरी-उड़ान योजना
बिलासपुर सहर ले अवइया एक मार्च ले हवाई सेवा सुरू हो जही। ए घोसना केन्द्रीय नागरिक उड्डयन सहरी आवास, वाणिज्य अउ उद्योग मंत्री हरदीप सिंह पुरी ह आज रईपुर म संवाददता मन ले गोठबात बेरा किहीन। ओमन बतईन बिलासपुर ले हवाई सेवा बर जे रूट के योजना बनाय गेहे ओखर मुताबिक इहां एलायन्स एयर ह नई दिल्ली, प्रयागराज, जबलपुर, भोपाल अउ बिलासपुर बर अपन हवाई सेवा संचालित करही। केन्द्रीय मंत्री ह किहीन कि अवइया बेरा म केन्द्र सरकार के कोसिस होही कि बिलासपुर ले नई दिल्ली असन महानगर बर सोझे उड़ान सेवा सुरू होवय।
केन्द्रीय मंत्री ह बतईन कि केन्द्र सरकार के उड़ान योजना के चलत फिलहाल देस के छप्पन ठिन सहर ल जोड़े गेहे। जेला बढ़ाके अब सौ ठिन सहर ल ए योजना के दायरा म लाय जाही।
बीते एक फरवरी के केन्द्रीय वित्त मंत्री डहार ले पेस करे गे आम बजट ल देस के आर्थिक विकास बर सुघ्घर बतावत श्री पुरी ह किहीन कि कोरोना संकट ल देखत ए बजट ह देस ल तेज आर्थिक विकास डहार ले जाने वाला हवय। ओमन यहू बतईन कि कई ठिन रेल परियोजना बर तीन हजार छह सौ पचास करोड़ रूपिया दे गेहे।
कोरोना-टीकाकरण
केन्द्र सरकार ह राज्य अउ केन्द्रसासित प्रदेस मन ले कोरोना टीकाकरण के काम म तेजी लाय बर किहीन हे। राज्य मनके सबो स्वास्थ्य मंत्री अउ राष्ट्रीय स्वास्थ्य मिशन के प्रबंध निदेशक मन संग चर्चा बेरा केन्द्रीय स्वास्थ्य सचिव राजेश भूषण ह किहीन हे कि टीका लगाय वाले अभियान के दायरा बढ़ाना जरूरी हे। ओमन किहीन कि हरेक सत्र म टीका लगवइया के औसत संख्या बढ़ाय जाना चाही। राज्य मन ल सलाह दे गीस कि ओमन कोविन प्लेटफाॅर्म म पंजीकृत जम्मों झिन के टीकाकरण होय ए तय करय। संगे एखर बर लक्ष्य अमरे खातिर कार्य नीति तैयार करे बर घलो केहे गीस।
ऐति, छत्तीसगढ़ म फ्रंटलाइन वर्कर्स मनके टीकाकरण सुरू होगे हे, जेमा पुलिस प्रशासन अउ निगमकर्मी सामिल हे। प्रदेस म काली कई ठिन जिला के कलेक्टर अउ पुलिस अधिकारी मन कोरोना टीका लगवईन, जेमा बीजापुर कलेक्टर रितेश अग्रवाल, कोंडागांव कलेक्टर पुष्पेन्द्र मीणा, कोरिया कलेक्टर एस.एन. राठौर, बेमेतरा कलेक्टर शिव अनंत तायल, गरियाबंद कलेक्टर निलेश क्षीरसागर, राजनांदगांव कलेक्टर टोपेश्वर वर्मा, जशपुर कलेक्टर महादेव कावरे, रायगढ़ कलेक्टर भीमसिंह समेत पुलिस अधीक्षक डी. श्रवण ह कोरोना टीका लगवईन। ए दउरान सबो कलेक्टर मन ह किहीन हे कि कोरोना टीका ह सुरक्षित हे अउ निडर होके एला अपन अउ परिवार के सुरक्षा खातिर अपन पारी आते लगवावय।
कोरोना योद्धा सम्मान
राजधानी रईपुर म आज कोरोना योद्धा मन के सम्मान करे गीस। स्वास्थ्य मंत्री टी.एस. सिंहदेव ह कोरोना योद्धा मन ल प्रतीक चिन्हारी देके ओमन ल सम्मानित करीन। ए मउका म कारीकरम म बोलत स्वास्थ्य मंत्री ह किहीन कि प्रदेस म कोरोना योद्धा मनके सेवा अउ समर्पण ले कोरोना वायरस ल रोके म बहुत मदद मिले हे। ओमन किहीन कि कोरोना टीकाकरण चालू होगे हे। फेर अभी भी लोगन मन ल एखर संक्रमण ले बांचे खातिर केन्द्र अउ राज्य सरकार डहार ले जादा दिसा-निरदेस के पालन करना जरूरी हे।
जावड़ेकर टीकाकरण-जागरूकता
केन्द्रीय सूचना अउ प्रसारण मंत्री प्रकाश जावड़ेकर ह आज सूचना अउ प्रसारण मंत्रालय के पुणे स्थित क्षेत्रीय लोक संपर्क अउ संचार ब्यूरो डहार ले राखे गे कोरोना टीकाकरण जागरूकता अभियान के सुभारंभ करीन। ए मउका म ओमन किहीन कि भारत ह दुनिया के पहला देस हे, जिहां अब तक ले करीबन पचास लाख मनखे मन ल कोविड टीका लग गे हवय अउ सबो देसवासी मन बर टीकाकरण के योजना घलो बनाय जात हे।
फसल-नवीन किस्म
रईपुर के इंदिरा गांधी कृषि विश्वविद्यालय डहार ले विकसित अब्बड़ अकन फसल मनके बारह ठिन नवा किसम ल केन्द्रीय बीज उप समिति ह व्यावसायिक खेती अउ गुणवत्ता बीज उत्पादन बर मंजूरी दे देहे। एमा चाउर के तीन ठिक, गहूं के दू, चना के एक, सोयाबीन के तीन, कुसुम के एक ठिक अउ अलसी के दू ठिया नवा किसम ल मंजूरी मिले हे।
महिला आयोग-सुनवाई
राज्य महिला आयोग ह आज रईपुर म कई ठिन जिला के माईलोगिन डहार ले दे गे आवेदन उपर सुनवाई करीन। ए दउरान सारीरिक सोसन, मानसिक अउ दहेज प्रताड़ना के संगे जमीन-जायजाद विवाद ले जुड़े मामला उपर सुनवाई करे गीस।
आयोग के अध्यक्ष डाॅक्टर किरणमयी नायक ह भिलाई महिला महाविद्यालय के सात झिन सहायक प्राध्यापक मन ल बेरा ले आगू रिटायर करे के मामला म दुरूग कलेक्टर ल जांच करे के संगे कालेज के संचालन ल अपन क्षेत्राधिकार म लेके कार्रवाई बर निरदेस दीन।
वरिष्ठ नागरिक-सम्मान अभियान
वरिष्ठ नागरिक मन ल सासन के योजना अउ सुघ्घर स्वास्थ्य सेवा दे खातिर दुर्ग जिला विधिक सेवा प्राधिकरण डहार ले सम्मान अभियान के सुभारंभ करे गीस। ए मउका म जिला विधिक सेवा प्राधिकरण के सचिव राहुल शर्मा ह बतईन कि ए अभियान के जरिया ले सियनहा मनके पारिवारिक विवाद ल घलो सुलझाय के प्रयास करे जाही।
माओवादी-स्पाइक होल
सुकमा जिला म सुरक्षा बल मन माओवादी डहार ले लगाए गे उनचालीस ठिन स्पाइक होल बरामद करे हे। मिले जानकारी मुताबिक केन्द्रीय रिजर्व पुलिस बल-सीआरपीएफ के दल पोलमपल्ली थाना क्षेत्र म सर्चिंग बर निकले रिहीन। तभे पालामड़गू तीर सुरक्षा बल मन ह एला बरामद करीन।
हाथी-उत्पात
महासमुंद जिला के सिरपुर क्षेत्र म दंतैल हाथी मनके अतलंग चालू हवय। आज बिहनिया पीढ़ी गांव म हाथी मन एक झिन किसनहा घर राखे साठ बोरा धान ल रउंद दीन। दू दिन आगूच तीन ठिन हाथी के दल ह एक ठिन बेयारा म जाके धान के फसल ल नकसान पहुंचाय रिहीन।
हादसा
राजधानी रईपुर म केमिकल टैंकर के सफई दउरान गैस के चपेट म आय ले दू झिन ग्रामीण के मउत होगे अउ एक झिन के हालत गंभीर हे। उहें, ड्राईवर अउ कंडेक्टर के हालत सामान्य बताय जात हे।
मिले जानकारी मुताबिक धरसीवां थाना क्षेत्र के छोकरा नाला तीर एक ठिन केमिकल टैंकर ल गंवई के तीन झिन मनखे सफई करत रिहीन। तभे केमिकल ले निकले ले गैस के चपेट म आय ले ए तीनों जवान लइका बेहोस होगीन। जेमा ले दू झिन के उपचार बेरा मउत होगे। उहें, तीसर जवान लइका के हालत गंभीर हवय।
चर्मरोग निदान शिविर
दुरूग जिला म राष्ट्रीय कुष्ठ उन्मूलन कारीकरम के चलत ए बेरा घना बस्ती मन म चर्मरोग निदान सिविर लगाय जात हे। जिला कुष्ठ अधिकारी डाॅक्टर अनिल कुमार शुक्ला ह लोगन मन ले अपील करे हे कि सरीर म कहू कोनों किसम के धाग, धब्बा, खजरी अउ सून्न असन लक्षण लागत हे त तुरतहे नजदीकी स्वास्थ्य केन्द्र म जाके जांच अउ इलाज करवाय।
मौसम
प्रदेस म आज ले फेर थोर-थोर जाड़ बाढ़ सकत हे। मौसम विभाग ले मिले जानकारी मुताबिक उत्तर भारत ले आवत ठंडा हवा पाय के राजधानी रईपुर समेत प्रदेस के कई ठिन जिला के तापमान ह एक ले दू डिग्री सेल्सियस खाल्हे घुच सकत हे।