बिलासपुर हवाई सेवा
बिलासपुर म जल्दी अंतर्राज्यीय हवाई सेवा शुरू होवइया हे। केंद्रीय नगर विमानन मंत्री हरदीप सिंह पुरी अउ एयरपोर्ट अथाॅरिटी आॅफ इंडिया के चेयरमैन अनुज अग्रवाल ह एखर सहमति दे दीन हे। आज नई दिल्ली म बिलासपुर के सांसद अरूण साव ह श्री पुरी अउ श्री अग्रवाल ले भेंट मुलाकात करीन। ए मुलाकात के बाद केंद्रीय विमानन मंत्री ह कीहिन कि बिलासपुर म हवाई सेवा शुरू होतेच पहिली बिलासा एयरपोर्ट ले भोपाल, प्रयागराज, अउ जबलपुर बर उड़ान भरे जाही।
एखर बारे म केंद्रीय नगर विमानन मंत्री हरदीप सिंह पुरी ह अपन ट्वीट संदेश म कीहिन कि बिलासपुर ले घरेलु विमान सेवा शुरू करे के मंाग लंबा बेरा ले चलत रीहिस। एखर बाद एयरपोर्ट अथाॅरिटी आॅफ इंडिया ह बिलासपुर म उपलब्ध सुविधा के परीक्षण करे के बाद इंहा विमान सेवा शुरू करे के अनुमति दीन। केंद्रीय मंत्री ह ए घलो कीहिन कि पाछू सत्ताईस जनवरी के ही बिलासपुर एयरपोर्ट के लाइसेंस ल अपग्रेड करे गेहे। संगेसंग एयरपोर्ट के बुनियादी ढंाचा ल घलो अउ सुघ्घर बनाये बर उड़ान योजना के तहत करीबन इकतीस करोड़ रूपिया खर्च करे गेहे।
लोक सेवा आयोग परीक्षा
छत्तीसगढ़ लोक सेवा आयोग ह बछर दू हजार उन्नीस म आयोजित सहायक प्राध्यापक लिखित परीक्षा के संदर्भ म मिलत शिकायत ल निराधार बताइन हे। आयोग ह ये परीक्षा म अनुपस्थित छात्र मनके साक्षात्कार खातिर चिन्हाकन, एक सौ पांच ठिन प्रश्न के विलोपन अउ दुर्ग जिला के एके परीक्षा केंद्र के लगभग अठासी अभ्यर्थी मनके चिन्हांकन जइसे मिलत शिकायत ल गलत बताइन हे। आयोग ह कीहिन हे कि ये परीक्षा ले जुड़े सबो शिकायत के विस्तार ले जांच कराये जाही। जानबा के मुताबिक बछर दू हजार उन्नीस म होय ये परीक्षा के परिणाम उन्नीस जनवरी दू हजार इक्कीस के जारी करे गे रीहिस। परीक्षा परिणाम आये के बाद अभ्यर्थी वीरेंद्र कुमार पटेल ह अभ्यर्थी मनके चिन्हांकन बर जाय के संबंध म आयोग म शिकायत दर्ज कराय रीहिन हे। उक्त शिकायत के बाद पाछू एक फरवरी के अभ्यर्थी अउ संबंधित परीक्षा केंद्र के केंद्राध्यक्ष के आगू प्रकरण के जांच कराये गीस।
पल्स पोलियो अभियान
राष्ट्रीय पल्स पोलियो अभियान के तहत प्रदेश म पैंतीस लाख ले जादा लईका मन ल पोलियो के दवा पिलाये गीस। पाछू इकतीस जनवरी के स्वास्थ्य विभाग डहार ले प्रदेशभर म बनाये गे आने आने बूथ म लईका मन ल पोलियो के दवई पिलाये गे रीहिस। एखर बाद बांचे लईका मन ल एक अउ दू फरवरी के स्वास्थ्य कार्यकर्ता मन ह घर-घर म जाके पोलियो के दवाई पिलाइन।
पल्स पोलियो अभियान के दउरान इकतीस जनवरी के कुल तीस लाख बहत्तर हजार लईका मन ल दवाई पिलाये गीस। उंहें एक फरवरी के तीन लाख सैंतीस हजार अउ दू फरवरी के बंयानबे हजार लईका मन ल पोलियो के खुराक दे गीस।
स्कूल शिक्षा-पीएलसी बैठक
प्रदेश के स्कूल मन म आने आने विषय के पढ़ई के गुणवत्ता ल अउ अच्छा बनाये खातिर प्रोफेश्नल लर्निंग कम्यूनिटी – पीएलसी के गठन करे गेहे। ए समूह के माध्यम ले शिक्षक मनके अकादमीक गतिविधि के संगेसंग उंखर अध्यापन काम म बेरा के संग जरूरी सुधार के उपाय करे जाही। स्कूल शिक्षा विभाग के प्रमुख सचिव डॅाक्टर आलोक शुक्ला ह बताइन कि पीएलसी के माध्यम ले काली ले रायपुर म सक्रिय विज्ञान के पीएलसी के बइठका लीन। बइठका म ओमन ह सुझाव दीन हे कि एक ठिन अइसे प्लेटफार्म तियार करे जाय जेमा शिक्षक मन आपस म अपन अनुभव अउ ज्ञान के आधार म विचार साझा करके शिक्षा के गुणवत्ता ल अउ बेहतर बनाय।
कोरोना टीकाकरण
छत्तीसगढ़ म अब तक के एक लाख ले जादा स्वास्थ्यकर्मी मन ल कोरोना के टीका लगाये जा चुके हे। पहिली चरण म दू लाख सड़सठ हजार स्वास्थ्यकर्मी मन ल टीका लगाये के योजना हे। काली प्रदेश के जम्मों जिला के तीन सौ अंठावन केंद्र म बाईस हजार ले जादा स्वाथ्यकर्मी मन ल टीका लगाये गीस। एखरे संगेसंग राज्य म काली साढ़े तीन सौ ले जादा कोरोना के नवा मरीज घलो मिलिन हे। एला मिलाके राज्य म अब कोरोना के चार हजार तीन सौ मरीज मनके इलाज अस्पताल अउ होम आइसोलेशन म चलत हे।
संस्कृत विद्यामंडलम परीक्षा
छत्तीसगढ़ संस्कृत विद्या मंडलम के मुख्य परीक्षा पंद्रह अप्रैल ले शुरू होवइया हे। नवमीं अउ दसवीं कक्षा के परीक्षा पंद्रह अप्रैल ले शुरू होके अठाईस अप्रैल तक चलही। उंहें ग्यारहवीं अउ बारहवीं के परीक्षा तीस अप्रैल ले शुरू होही, जउन कि पंद्रह मई के खतम होही। छत्तीसगढ़ संस्कृत विद्या मंडलम के सचिव राजेश कुमार ह बताइन कि मुख्य परीक्षा पहिली के जइसे पारंपरिक तरीका ले ले जाही। परीक्षा केंद्र म राज्य सरकार डहार ले जारी करे गे कोरोना ले बचाव संबंधित सबो नियम के पालन कराय जाही। संगेसंग बीस फरवरी ले प्रायोगिक परीक्षा होवइया हे। ए परीक्षा अलग-अलग पाली म ले जाही। ए बेरा आपसी दूरी, बनाये रखना जरूरी होही। जानबा के मुताबिक प्रायोगिक परीक्षा म कोरोना संक्रमण ल देखत ए दारी बाहिर ले कोनो भी परीक्षक ल नइ बुलाय जाही।
जवाहर नवोदय विद्यालय
केंद्रीय शिक्षा मंत्रालय ह गृह मंत्रालय अउ स्वास्थ्य तथा परिवार कल्याण मंत्रालय के दिशा निर्देश के आधार म जवाहर नवोदय विद्यालय एक घांव फेर ले खोले बर मानक संचालन प्रक्रिया तियार करे हे। जवाहर नवोदय विद्यालय ल सेनिटाइज करे, कक्षा के प्रबंधन अउ छात्रावास म पढ़इया लईका मन ल सुरक्षित दूरी म रेहे के संगेसंग आपात स्थ्तिि ले निपटे खातिर कोविड प्रबंधन मानक जइसे सबो उपाय पहिली ले कर ले गेहे।
हाथी उत्पात
धमतरी जिला के तुमाबुजुर्ग गांव म ए दिन हाथी के दल ह विचरण करत हे। वन विभाग के अनुसार बालोद अउ कंाकेर के बाद एक घांव फेर हाथी के दल ए इलाका म दिखत हे। पाछू रतिहा हाथी मन ह कुछ कच्चा मकान ल नुकसान पहुंचाय रीहिन। उंहे गौशाला म घुसके हाथी मन ह गाय उपर घलो हमला कर दे रीहिन। जेखर ले एक झिन गाय के मउत होगे, जबकि चार आने मवेशी ह घायल होगे। ए घटना ले गांव वाले मन ह डर्रा गेहे। घटना के सूचना मिले के बाद वन विभाग के टीम ह गांव वाले मन ल हाथी ले सतर्क रेहे बर कीहिन हे। उंहें वन विभाग डहार ले हाथी मनके गतिविधि उपर सरलग नजर राखे जात हे। उंहें महासमुंद जिला के सिरपुर क्षेत्र म घलो हाथी मनके उत्पात जारी हे। पाछू रतिहा तीन दंतैल हाथी मन ह तुमगांव करा अछरीडीह गांव म एक झिन किसान के खलिहान म पहुंचके करीबन दू सौ कट्टा धान ल नुकसान पहुंचाय हे।