आज दिनभर के खबर ल छत्तीसगढ़ी म पढ़व

प्रधानमंत्री-लेह दौरा
प्रधानमंत्री नरेन्द्र मोदी ह आज लेह म सेना, वायुसेना अउ आईटीबीपी के जवान मन ल संबोधित करीन। ओमन किहीन कि सैनिक मनके बलिदान अउ साहस अतुल्य हे अउ देस ल ससक्त बनाय बर महत्वपूर्ण हे। प्रधानमंत्री ह गलवान घाटी के सहीद जवान मन ल श्रद्धांजलि दीन। ओमन किहीन कि सैनिक मनके साहस ओ चोटी ले ऊंचा हे, जेखर ओमन प्रहरी हे। प्रधानमंत्री ह किहीन कि सैनिक मन जउन बहादुरी दिखाय हे उंखर संदेस पूरा दुनिया म गेहे हे अउ सबला भारत के ताकत के पता चल गेहे।
रमन सिंह-प्रेसवार्ता
प्रदेस के पूर्व मुख्यमंत्री अउ भाजपा के राष्ट्रीय उपाध्यक्ष डाॅक्टर रमन सिंह ह किहीन कि प्रधानमंत्री नरेन्द्र मोदी ह विपरीत परिस्थिति म घलो चुनौती ल अवसर के रूप म बदले के हौसला राखथे।
राजधानी रईपुर म डाॅक्टर सिंह ह आज प्रेसवार्ता ल संबोधित करत किहीन कि कोरोना संकट काल म मेडिकल उपकरण के आपूर्ति के दृष्टि ले भारत ल आत्मनिर्भर बनाय के बात राहय या प्रधानमंत्री गरीब कल्याण अन्न योजना के माध्यम ले गरीब मन ल मुफत म अनाज देके फइलसा राहय, हर स्थिति म प्रधानमंत्री ह ए साबित कर देहे कि भारत बर कोनों भी लक्ष्य असंभव नइ हे। डाॅक्टर सिंह ह प्रधानमंत्री के देस के अस्सी करोड़ जरूरतमंद लोगन ल पांच महीना तक मुफत म अनाज दे जाय के निर्णय के सुवागत करीन। ओमन देस म कोरोना संक्रमण के खिलाफ निर्णायक लड़ई म प्रधानमंत्री के कार्यसैली के सराहना करीन।
वेतन वृद्धि
राज्य सरकार ह अधिकारी अउ करमचारी मनके विलंबित करे गे वार्षिक वेतन वृद्धि ल फेर ले बहाल करे के निरदेस देहे। एखर पहिली, कोरोना संकट के सेती प्रदेस के आर्थिक स्थिति ल देखत वित्त विभाग ह अधिकारी अउ करमचारी मनके वेतन वृद्धि ल आगामी आदेस तक विलंबित करे के निर्णय ले रिहीन।
ए सिलसिला म छत्तीसगढ़ कर्मचारी-अधिकारी फेडरेशन के एक            प्रतिनिधिमंडल ह काली मुख्यमंत्री ले उंखर रईपुर स्थित निवास म भेंट करीन अउ वित्त विभाग के फइसला ल वापिस लेके आग्रह करीन, जेखर बाद मुख्यमंत्री ह वेतन वृद्धि के लाभ निर्धारित तिथि म ही करे के अनुमति दीन। फेर, इंखर एरियर्स रासि के भुगतान छह महीना बाद एकमुश्त करे जाही। एखर अनुसार जुलाई ले दिसंबर महीना तक वेतन वृद्धि के एरियर्स रासि अवइया बछर जनवरी महीना म मिलही। उहें, जउन अधिकारी-करमचारी मनके वेतन वृद्धि एक जनवरी के होथे, ओमन ल छह महीना बाद अवइया बछर जुलाई महीना म एरियर्स रासि के भुगतान करे जाही।
कोरोना-मरीज
प्रदेस म आज आठ नवा कोरोना संक्रमित मरीज मिले हे। एमा ले सात मरीज मनके रिपोर्ट रईपुर एम्स ले आय हे। उहें, एक मरीज के रिपोर्ट एसएलआर लैब ले मिले हे।
राज्य म आज जउन नवा मरीज मनके पुष्टि होय हे ओमा ले पांच मरीज राजधानी रईपुर ले हे। रईपुर सांसद सुनील सोनी के निजी सुरक्षा कर्मी-पीएसओ के कोरोना रिपोर्ट पाॅजिटिव आय हे। सांसद श्री सोनी ह बतईन कि ए सुरक्षाकर्मी ह तीन दिन पहिली कोरोना जांच बर अपन नमूना एम्स म दे रिहीन। फेर, ओमन ह ए बात के जानकारी सांसद ल नइ दीन अउ लगातार ड्यूटी म आवत रिहीन। सांसद श्री सोनी के संग उंखर कार्यालय के आने करमचारी मन के घलो कोरोना टेस्ट करे जाही।
राजनांदगांव जिला के लखौली ले एक घांव फेर कोरोना संक्रमित दू नवा मरीज मिले हे। उहें, आज पेण्ड्री स्थित कोविड अस्पताल ले अट्ठारह मरीज ल स्वस्थ होय के बाद छुट्टी दे दे गेहे।
स्वास्थ्य मंत्रालय परामर्श
केन्द्रीय स्वास्थ्य अउ परिवार कल्याण मंत्रालय ह कोरोना वायरस संक्रमित मरीज मन ल घर म ही अलग रेहे बर नवा दिसा-निरदेस जारी करे हे। देसभर म अइसन मरीज मनके बड़का संख्या के पता चले के बाद जेमन म संक्रमण के लक्षण बहुते कम हे या लक्षण नइ दिखाई देत हे, ओ मरीज मन ल घर म ही आइसोलेट रेहे के अनुमति दे जाही। उहें, नवा दिसा-निरदेस के अनुसार साठ बछर ले जादा उमर के सियान मरीज अउ गंभीर बीमारी ले ग्रस्ति मरीज मन ल उचित जांच के बाद ही घर म अलग रेहे के अनुमति दे जाही। अइसन मरीज मनके देखभाल करइया अउ जादा तीर ले संपर्क म अवइया मन ल डाॅक्टर के सलाह म हाइड्राॅक्सी क्लोरीक्विन दवई दे जाना चाही।
आईसीएमआर-कोविड वैक्सीन
भारतीय आयुर्विज्ञान संस्थान परिषद-आईसीएमआर ह जम्मों क्लीनिकल जांच पूरा होय के बाद पन्द्रह अगस्त ले स्वदेशी कोरोना वायरस वैक्सीन जारी करे के योजना बनावत हे। आईसीएमआर ह ए महत्वपूर्ण कोरोना वायरस वैक्सीन बिकसित करे बर भारत बायोटेक इंटरनेशनल लिमिटेड के संग भागीदारी करे हे। आईसीएमआर ह भारत बायोटेक ले क्लीनिकल परीक्षण म तेजी लाय बर केहे हे। भारत बायोटेक ल यहू केहे गेहे कि परीक्षण बर मरीज मनके नाव दरज करे के काम ल सात जुलाई ले सुरू कर दे जाय।
एकलव्य आवासीय विद्यालय
एकलव्य आदर्श आवासीय विद्यालय मनके संचालन बर चालू सिक्षण सत्र म खाली पद मन बर अतिथि सिक्षक के भर्ती करे जाही। अभी राज्य म बयालीस अइसन स्कूल संचालित हे, जेमा ले पच्चीस स्कूल बर पद संरचना के मंजूरी प्रशासकीय विभाग डहार ले जारी करे जा चुके हे। अनुसूचित जाति अउ जनजाति विकास विभाग के सचिव डी.डी. सिंह ह ए जानकारी संबंधित सैक्षणिक संस्थान के राज्य स्तरीय समिति के बइठका म दीन।
भाजयुमो-आंदोलन
भारतीय जनता युवा मोर्चा ह आज प्रदेस सरकार के कथित वादाखिलाफी के विरोध म आंदोलन करीन। सोशल डिस्टेसिंग के पालन करत तीन-तीन के संख्या म कार्यकर्ता अउ युवा प्रतिनिधि मन अपन-अपन घर के सामने सरकार के पुतला जलाय के कोसिस करीन। फेर, पुलिस कर्मी मन ह ए कार्यकर्ता मन रोकीन अउ कतकोन जघा पुतला दहन नइ करन दीन।
कैश वैन-लूट
रायगढ़ जिला म आज मंझनिया अज्ञात अरोपी मन ह कैश वैन के ड्राईवर ल गोली मार के लाखों रूपिया लूट लीन। ए दउरान आरोपी मन ह सुरक्षा गार्ड उपर घलो गोली चलाईन। गोली लगे ले सुरक्षा गार्ड गंभीर रूप ले घायल होगे। ए घटना किरोड़ीमल नगर के आजाद चैक तीर के हरय।
खबर के मुताबिक आज मंझनिया एक कैश वैन कोतरा रोड स्थित स्टेट बैंक के एटीएम म पइसा डाले बर पहंुचीन। इही दउरान एक मोटर साइकिल म सवार दू झिन लोगन कैश वैन के तीर पहुंचीन अउ एमा ले एक झिन आरोपी ह वैन चालक ल गोली मार दीस, जेखर ले ओखर मउका म ही मउत होगे। गोली लगे ले सुरक्षा गार्ड घलो घायल होगे।
जिला के पुलिस अधीक्षक संतोष सिंह समेत आने वरिष्ठ अधिकारी मउका म पहुंच के घटना के जांच करत हे। ओमन बतईन कि कैश वैन ले आरोपी मन ह करीबन तेरह लाख रूपिया लूट के फरार होय हे। पुलिस ह नाकाबंदी करके आरोपी मनके तलास करत हे।
मौसम
मौसम विभाग ह अवइया चोबीस घंटा के दउरान एक-दू जघा म आकाशीय बिजली गिरे के अउ भारी बरसा होय के चेतावनी देहे।
मौसम विभाग के मुताबिक एक मानसून द्रोणिका गंगानगर, ग्वालियर,          सीधी, डाल्टनगंज अउ दीघा होवत उत्तर बंगाल के खाड़ी तक समुद्र तल म स्थित हे। उहें, एक चक्रवाती घेरा उत्तरप्रदेश अउ उंखर आसपास के इलाका म बने हुए हे। एखर असर ले अवइया चोबीस घंटा के दउरान राज्य के कई इलाका म तेज बरसा होय के संभावना हे।
राजधानी रईपुर म आज मंझनिया बाद गरज-चमक के संग बरसा होईस।
रेलवे-ट्रिपल लाॅन्ग हाॅल
दक्षिण पूर्व मध्य रेलवे के बिलासपुर रेलमंडल ह एक ठिन नवा कीर्तिमान बनाय हे। मंडल डहार ले तीन ठिन लोडेड मालगाड़ी मन ल एके संघरा जोड़के ट्रिपल लाॅन्ग हाॅल रैक-सुपर एनाकोंडा बनाके राबर्टसन स्टेसन के साइडिंग ले चक्रधपुर स्टेसन तक चलाय गीस। पन्द्रह हजार टन ले जादा क्लिंकर ले लोड एक सौ चैहत्तर डब्बा ल जोड़के ए रैक ल चलाय गीस। एखर बर एक लोको पायलट, एक झिन सहायक लोको पायलट अउ एक झिन गार्ड के जरूरत पड़ीस।
अइसने, नागपुर रेलमंडल ह घलो चार मालगाड़ी मन ल एके संघरा जोड़के सुपर पायथान के परिचालन करीन। ए ट्रेन ह राजनांदगांव जिला के परमालकसा रेलवे स्टेसन ले दुरूग तक चलाय गीस। ए सुपर पायथान ट्रेन म दू सौ छत्तीस डब्बा, चार ब्रेक वैगन अउ नौ विद्युत लोको के उपयोग करे गेहे।
वैकल्पिक शैक्षणिक कैलेंडर
केन्द्रीय मानव संसाधन विकास मंत्री रमेश पोखरियाल निशंक ह प्राइमरी के कक्षा मन बर आठ हफ्ता के वैकल्पिक सैक्षणिक कैलेंडर जारी करे हे। एमा लइका मन ल घर म ही रहि के सिक्षा दे बर टेक्नोलाॅजी अउ सोसल मीडिया के उपयोग करके पढ़ई के संबंध म दिसा-निरदेस दे गेहे। कैलेंडर के उद्देश्य विद्यार्थी, सिक्षक, लइका के माता-पिता अउ स्कूल के प्रधान अध्यापक मन ल आॅनलाइन सीखे अउ सिखाय के साधन के जरिया कोरोना संक्रमण ले निपटे बर सही तौर-तरीका के जानकारी देना अउ अच्छा नतीजा हासिल करना घलो हे।
माओवादी-टिफिन बम
कोंडागांव जिला म सुरक्षा बल ह तीन किलो के टिफिन बम बरामद करे हे। बताय जात हे कि माओवादी मन ह ए विस्फोट ल सुरक्षा बल ल निसाना बनाय के उद्देश्य ले मर्दापाल थाना क्षेत्र के मुल्लन पुजारपारा म लगाय रिहीन। भारत तिब्बत सीमा पुलिस-आईटीबीपी के इकतालीसवां बटालियन के जवान मन ह गश्त के दउरान ए विस्फोट ल बरामद करीन।
पौधारोपण
कोरिया जिला म मानसून के दउरान उनचास लाख पौधा लगाय के लक्ष्य राखे गेहे। ग्रीन कोरिया योजना के तहत लगइया ए पौधा म ले बीस लाख          पौधा महात्मा गांधी राष्ट्रीय ग्रामीण रोजगार गारंटी योजना-मनरेगा के तहत वन विभाग के नर्सरी म तैयार करे गेहे। जिला म पौधारोपण के काम अउ ओखर सुरक्षा बर साढ़े छह करोड़ रूपिया ले जादा के रासि मंजूर करे गेहे। जिला कलेक्टर ह बतईन कि पौधारोपण के दउरान राम वनगमन मार्ग के तिहत्तर किलोमीटर लंबा सड़क उपर दूनों किनारे पौधा लगाय जाही।
ऐति, हरियर छत्तीसगढ़ योजना के तहत महासमुंद जिला म घलो ए बछर विभिन्न प्रजाति के सोलह लाख ले जादा पौधा लगाय के लक्ष्य राखे गेहे।

Leave a Reply