मन की बात
प्रधानमंत्री नरेन्द्र मोदी ह किहीस कि कोरोना महामारी ले निपटे के भारत के प्रयास अउ टीकाकरण कार्यक्रम ह दुनिया के आगू उदाहरण प्रस्तुत करे हे। आकाशवाणी ले ‘‘मन की बात‘‘ कार्यक्रम म श्री मोदी ह किहीन हे कि ए ह गर्व के बात हरय।
प्रधानमंत्री ह किहीस कि भारत म बने टीका देस के आत्मनिर्भरता अउ आत्मगौरव के चिन्हारी हरय। श्री मोदी ह किहीस कि ओमन ल कतको देस के राष्ट्रपति अउ प्रधानमंत्री मन ले अइसे संदेस मिले हे, जेमा एखर बर भारत के प्रसंसा करे जात हे। प्रधानमंत्री ह किहीस कि आत्मनिर्भर भारत अपन संग-संग दुनिया के घलो जरूरत पूरा करे म सक्षम होवत हे। श्री मोदी ह किहीस कि देस म असाधारण काम करइया आम लोगन मन ल पद्म पुरस्कार ले सम्मानित करे जात हे।
प्रधानमंत्री ह किहीस कि छब्बीस जनवरी के दिन तिरंगा के अपमान के घटना ले देसवासी मन ल बहुत दुख होय हे। प्रधानमंत्री ह किहीस कि भारत ए बछर ले अपन आजादी के 75 साल के समारोह ‘‘अमृत महोत्सव‘‘ शुरू करत हे। ओमन किहीन कि ए ह हमर ओ महानायक मन ले जुड़े सबो जगह मनके पता लगाय के बढ़िया समय हे, जेखर सेती हमन ल आजादी मिलीस।
मुख्यमंत्री-दंतेवाड़ा
मुख्यमंत्री भूपेश बघेल अपन दो दिवसीय दंतेवाड़ा प्रवास के पहली दिन गीदम विकासखंड के ग्राम हारम पहुंचीन। ए बेरा ओमन ह बिहान महिला समूह मन द्वारा संचालित ‘‘डेनेक्स‘‘ नवा दंतेवाड़ा गारमेंट फैक्ट्री के उद्घाटन करीन अउ फैक्ट्री म तैयार करे गे कपड़ा के गुणवत्ता के सराहना करीन।
दंतेवाड़ा जिला म गरीबी उन्मूलन बर जिला प्रशासन के पहल म स्थानीय माईलोगिन मन ल प्रशिक्षण देके ए गारमेंट फैक्ट्री सुरू करे गेहे। फैक्ट्री के उत्पाद मनके बिक्री बर ट्राईफेड, सीआरपीएफ अउ एन.एम.डी.सी. के संग अनुबंध करे गेहे।
उहें, मुख्यमंत्री ह दंतेवाड़ा जिला के प्रवास के बेरा गामावाड़ा गांव के देवगुड़ी पहुंचीन। इहां ओमन ह आंगा देव के पूजा करीन अउ प्रदेस के खुसहाली के कामना करीन। एखर अलावा मुख्यमंत्री ह ग्राम पातररास घलो गीन अउ सर्व छत्तीसगढ़िया समाज एकता परिसर के सिलान्यास करीन।
केन्द्रीय बजट
केन्द्रीय वित्त मंत्री निर्मला सीतारमण काली बिहनिया 11 बजे लोकसभा म बछर 2021-22 के केन्द्रीय बजट प्रस्तुत करही। प्रधानमंत्री नरेन्द्र मोदी ह बीते सुक्रवार के संसद के बजट सत्र सुरू होय ले पहली विश्वास व्यक्त करीन कि बछर 2021-22 के बजट ल कोरोना के सेती लगाय गे गाइड लाइन के असर ल खतम करे बर वित्तमंत्री द्वारा पाछु 10 महीना के घोषित पैकेज मनके हिस्सा के तौर म देखे जाही। ए बछर केन्द्रीय बजट पहिली बार केवल डिजिटल रूप म उपलब्ध होही अउ एला एंड्रायड या आई.ओ.एस. प्लेटफाॅर्म दोनों म मोबाइल ऐप ‘‘यूनियन बजट‘‘ के माध्यम ले देखे जा सकथे।
छत्तीसगढ़ पुलिसिंग-रैंकिंग
छत्तीसगढ़ राज्य के पुलिसिंग ल देशभर म दूसर स्थान मिले हे। प्रतिष्ठित टाटा ट्रस्ट डहार ले जारी इंडिया जस्टिस रिपोर्ट म छत्तीसगढ़ ह कतको बड़े राज्य मन ल पाछु छोड़ दीस। रिपोर्ट के अनुसार कर्नाटक के बाद छत्तीसगढ़ अइसे राज्य हरय, जउन पुलिस बल के सबो जरूरत ल पूरा करथे। पाछु साल जारी रिपोर्ट म छत्तीसगढ़ ल 10वां स्थान मिले रिहीस।
जानकारी के अनुसार टाटा ट्रस्ट डहार ले हर साल इंडिया जस्टिस रिपोर्ट जारी करे जाथे, जेमा पुलिसिंग, जेल, ज्यूडिसरी समेत कतको मानक उपर हर राज्य ल रैंकिंग दे जाथे। ए रिपोर्ट ल तैयार करे म बुनियादी ढांचा, कानूनी सहायता, मानव संसाधन अउ पांच साल के रूझान के आंकलन बर सरकारी डाटा के उपयोग करे जाथे।
प्राचार्य/सहायक प्राध्यापक-नोटिस
उच्च शिक्षा विभाग ह काॅलेज के पढ़ईया मनके आॅनलाईन कक्षा म अध्यापन कार्य म कोताही बरते के आरोप म रायपुर संभाग के लगभग दर्जनभर प्राचार्य अउ सहायक प्राध्यापक मनके वेतन वृद्धि रोके बर ओमन ल कारण बताओ नोटिस जारी करे के निर्देश देहे।
विभाग के सचिव धनंजय देवांगन ह महाविद्यालय मनके आॅनलाइन कक्षा सहित आने विषय मनके समीक्षा बर रायपुर संभाग के सबो काॅलेज मनके प्राचार्य मनके बैठक लीन। बैठक के बाद ओमन ह निर्धारित कालखंड के अनुसार आॅनलाइन कक्षा ले म चुक करइया लगभग दर्जनभर सहायक प्राध्यापक अउ आॅनलाइन गलत रिपोर्टिंग बर कतको प्राचार्य मन ल कारण बताओ नोटिस जारी करे हे।
राज्यपाल-पिंक केयर
रायपुर स्मार्ट सिटी लिमिटेड डहार ले शास्त्री बाजार अउ पंडरी कपड़ा मार्केट म आधुनिक महिला प्रसाधन सह शिशु देखभाल केन्द्र ‘‘पिंक केयर‘‘ सुरू करे गेहे। राज्यपाल अनुसुईया उइके ह काली एखर लोकार्पण करत एला महिला मन बर एक अच्छा शुरूआत बतईन अउ एखर सराहना करीन।
कार्यक्रम म महापौर एजाज ढेबर ह बतईन कि योजना के प्रथम चरण म रायपुर के सबले जुन्ना बाजार अउ थोक कपड़ा व्यवसाय के केन्द्र पंडरी म ‘‘पिंक केयर यूनिट‘‘ सुरू करे जात हे। महिला मनके सुविधा बर प्रसाधन केन्द्र म सेनेटरी नेपकिन, वेंडिंग मशीन अउ गीजर के व्यवस्था करे गेहे। इहां अवइया माईलोगिन मन बर एल.ई.डी. स्क्रीन घलो लगाय गेहे।
पल्स पोलियो अभियान
देशभर म आज ले राष्ट्रीय पल्स पोलियो अभियान शुरू होगे हे। राष्ट्रपति रामनाथ कोविंद ह काली राष्ट्रीय प्रशिक्षण दिवस के पहली संझा म राष्ट्रपति भवन म पांच साल ले कम उमर के लइका मन ल पोलियो के खुराक पिया के ए अभियान के सुरूआत करीन।
राष्ट्रीय पल्स पोलियो अभियान के अंतर्गत छत्तीसगढ़ म ए दरी पांच साल तक के 35 लाख ले जादा लइका मन ल दवा पियाय के लक्ष्य राखे गेहे। पहली दिन आज पोलियो बूथ म लइका मन ल पोलियो के खुराक दे गीस। उहें, बांचे लइका मन ल काली अउ परसो स्वास्थ्य कार्यकर्ता मन ल घर-घर जाके पोलियो के दवा पियाही। ए अभियान के अंतर्गत लगभग 14 हजार पोलियो बूथ बनाय गेहे।
शिक्षित-बेरोजगार ई-पंजीयन
राज्य मन शिक्षित बेरोजगार मन ल रोजगार देवाय बर ई-पंजीयन कराय जात हे। पंजीकृत बेरोजगार युवक मन ल 20 लाख रूपिया ले 50 लाख रूपिया तक के काम दे जाही। एखर बर राज्य सरकार बेरोजगार मन ले ई-पंजीयन कराय के सुरूवात करे हे, जेखर तहत अनुसूचित जाति क्षेत्र मन बर बारहवीं पास बेरोजगार अउ सामान्य क्षेत्र मन बर स्नातक पास बेरोजगार लोगन मन ल ए सुविधा मिलही।
अधिकारी मन बतईन कि कवर्धा जिला प्रसासन ह घलो बेरोजगार मन ल रोजगार दे बर निःशुल्क पंजीयन के सुविधा उपलब्ध कराय हे। पंजीकृत बेरोजगार अपन विकासखंड म स्वीकृत काम मन बर आमंत्रित निविदा म भाग ले सकथे।
शिक्षा-आंकलन
संचालक लोक शिक्षण जितेन्द्र शुक्ला ह सबो संभागीय संयुक्त संचालक अउ जिला शिक्षा अधिकारी मन ल कक्षा पहली ले आठवीं तक के लइका मन ल आने-आने तरीका ले करे गे आंकलन के आधार म प्रगति पत्र देके निरदेस देहे। ओमन ह अपन पत्र म ए बात के उल्लेख करे हे कि प्रदेस म पढ़ई तुहंर दुआर के अंतर्गत आॅनलाइन अउ आॅफलाइन कक्षा राज्य म संचालित करे गेहे। लइका मनके आंकलन करके ओखर रिपोर्ट वेबापोर्टल म घलो अपलोड करे गेहे।
भाजपा महिला-कार्यकारिणी
भारतीय जनता पार्टी महिला मोर्चा के प्रदेश कार्यकारिणी घोषित कर दे गीस। कार्यकारिणी म पांच झिन उपाध्यक्ष, दो महामंत्री अउ छह प्रदेश मंत्री बनाय गेहे। एखर अलावा भाजपा ह महिला जिला अध्यक्ष मनके सूची घलो जारी करे हे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह आज संझा साढ़े सात बजे आकाशवाणी रायपुर ले प्रसारित विशेष कार्यक्रम ‘‘हमर ग्राम सभा‘‘ राज्य शासन के नीति, योजना अउ कार्यक्रम मनके बारे म जानकारी दीही। ए कार्यक्रम ल मीडियम वेब 981 किलोहर्टज म सुने जा सकथे। ए कार्यक्रम ल प्रदेस के सबो आकाशवाणी केन्द्र ले एके संघरा रिले करे जाही।
पक्षी महोत्सव
देश-विदेश के अलग-अलग प्रजाति के पक्षी मन ल पोसइया बेमेतरा जिला के गिधवा अउ परसदा गांव म आज ले तीन दिवसीय ‘‘पक्षी महोत्सव‘‘ सुरू होईस। ए मध्य भारत के पहली पक्षी महोत्सव हरय। छत्तीसगढ़ म लगभग डेढ़ सौ प्राजति के पक्षी पाय जाथे, जेमा पानी अउ जमीन म रहवइया दूनों प्रकार के पक्षी सामिल हे।