संसद बजट सत्र
राष्ट्रपति रामनाथ कोविंद के अभिभाषण के संग संसद के बजट सत्र आजले शुरू होगे। राष्ट्रपति ह अपन अभिभाषण म कीहिन कि हमर संविधान ह हमन ल जिहंा अभिव्यक्ति के स्वतंत्रता के अधिकार देथे। त उंहें अपन नागरिक मनले ये उम्मीद करथे कि ओमन कायदा-कानून के बने ढंग ले पालन करय।
पाछू दिन होय तिरंगा अउ गणतंत्र दिवस जइसन पवित्र दिन के अपमान बहुते दुर्भाग्यपूर्ण हरय। जउन संविधान हमन ल अभिव्यक्ति के आजादी के अधिकार देथे, उही संविधान ह हमन ल सिखाथे कि कानून अउ नियम के घलो गंभीरता ले पालन करना चाही।
राष्ट्रपति ह कीहिन कि संसद के पाछू सत्र म पारित कृषि संबंधी तीनों कानून के उद्देश्य देश के किसान मन ल अउ जादा अधिकार देवाय म मदद करना हे। राष्ट्रपति ह यहू बात ल कीहिन कि ए कानून के माध्यम ले कृषि क्षेत्र म करे गे सुधार ले दस करोड़ ले जादा किसान मन ल फायदा मिलना शुरू होगे हे।
बजट सत्र प्रधानमंत्री
प्रधानमंत्री नरेंद्र मोदी ह कीहिन हे कि आजले शुरू होय संसद के बजट सत्र ये दशक के घलो पहिली सत्र हरय। संसद म बजट सत्र के शुरूआत के पहिली ओमन कीहिन कि ये दशक भारत के उज्जवल भविष्य के दृष्टि ले बहुते महत्वपूर्ण हे। प्रधानमंत्री ह कीहिन कि भारत के इतिहास म पहिली बार बछर दू हजार इक्कीस म वित्तमंत्री ल अलग अलग पैकेज के रूप म साल म चार पांच ठिन मिनी बजट पेश करना पड़ीस।
केंद्र आर्थिक सर्वेक्षण
बछर दू हजार बीस-इक्कीस के आर्थिक सर्वेक्षण के अवइया वित्त बछर म सकल घरेलु उत्पाद के विकास दर ह ग्यारा प्रतिशत रेहे के अनुमान लगाय गेहे। केंद्रीय वित्तमंत्री निर्मला सीतारमण ह आज लोकसभा म आर्थिक सर्वेक्षण पेश करीन। सर्वेक्षण म केहे गेहे कि निर्यात अउ सरकारी उपभोग म बढ़ोत्तरी होय ले अर्थव्यवस्था म गिरावट ल रोके म मदद मिलही।
ओमन बताइन कि चालू वित्त बछर बर सकल घरेलु उत्पाद के विकास दर सात दशमलव सात प्रतिशत रेहे के अनुमान हे। आर्थिक सर्वेक्षण म कोरोना महामारी के प्रकोप के बाद भारतीय अर्थव्यवस्था के पटरी म आय के विस्तार ले विश्लेषण करे गीस। सर्वेक्षण म यहू केहे गीस कि स्वास्थ्य क्षेत्र ह देश के अर्थव्यवस्था के केंद्र बिंदु बन गेहे।
जनरल प्रमोशन
राज्य सरकार ह कोरोना संक्रमण ल देखत कक्षा पहिली ले आठवीं के छात्र मन ल जनरल प्रमोशन देके घोषणा करे हे।
आधिकारिक जानबा के मुताबिक कोरोना संक्रमण के सेती राज्य सरकार ह पाछू साल उन्नीस मार्च ले जम्मों स्कूल मन ल बंद करे के आदेश दे रीहिन। तबले अभी तक स्कूल शुरू नइ हो पाय हे। ए सत्र म पहिली ले आठवीं के छात्र मन ल जनरल प्रमोशन देगे रीहिस।
निशंक सीबीएसई
केंद्रीय शिक्षा मंत्री रमेश पोखरियाल निशंक ह कीहिन हे कि केंद्रीय माध्यमिक शिक्षा बोर्ड – सीबीएसई के दसवीं अउ बारहवंीं परीक्षा मनके डेटशाीट दू फरवरी के घोषित करे जाही। सीबीएसई सहोदय स्कूल काॅम्पलेक्स के स्कूल अध्यक्ष अउ सचिव मनके संग वीडियो काॅन्फे्रंस के माध्यम ले गोठबात म शिक्षामंत्री ह कीहिन कि डेटा एनालिटिक्स अउ स्कूल मनके स्व-घोषणा के आधार उपर कम्पयूटरीकृत संबद्धता प्रणाली कायम करे जाही। ओमन कीहिन कि सीबीएसई ह अवइया साल दस लाख शिक्षक मन ल प्रशिक्षित करहीं, जेखर ले राष्ट्रीय शिक्षा नीति के लक्ष्य ल हासिल करे जा सकही।
उंहें केंद्रीय शिक्षामंत्री ह कीहिन कि सरकार ह देश म वर्चुअल विश्वविद्यालय खोले उपर जरूरी कदम उठाही।
मुख्यमंत्री केंद्रीय मंत्री पत्र
मुख्यमंत्री ह केंद्रीय उपभोक्ता मामला खाद्य अउ सार्वजनिक वितरण मंत्री पीयूष गोयल ल चिट्ठी लिखके भारतीय खाद्य निगम म चैबीस लाख मीटरिक टन चांउर के अनुमति के मात्रा ल बढ़ाके चालीस लाख मीटरिक टन करे जाय के विनती करे हे। मुख्यमंत्री ह चिट्ठी म लिखे हे कि प्रदेश म खरीफ के सीजन म किसान मनले समर्थन मूल्य म धान बिसा के केंद्र सरकार के संग होय एमओयू के तहत करे जात हे ।
एसो अठाईस जनवरी तक बीस लाख ले जादा किसान मनले नब्बे लाख मीटरिक टन धान ले जा चुके हे । त उंहें एक ठिन अउ चिठ्ठी म मुख्यमंत्री ह केंद्रीय विमानन मंत्री हरदीप सिंह पुरी ल केहे हे कि रिजनल कनेक्टिवीटी स्कीम के तहत बिलासपुर ल दिल्ली, मुंबई अउ कोलकाता जइसे महानगर ले एयर कनेक्टिवीटी के मंजूरी दे जाय।
यूनिफाईड कमांड बैठक
मुख्यमंत्री भूपेश बघेल के अध्यक्षता म पाछू रतिहा होय यूनिफाइड कमांड के बइठका म माओवाद विरोधी अभियान अउ विकास काम के समीक्षा करे गीस। बइठका म मुख्यमंत्री ह बड़का अधिकारी मन ल माओवादी मनके खिलाफ चलाये जात आपरेशन म अउ तेजी लाय के निर्देश दीन। मुख्यमंत्री ह पत्रकार मनले गोठबात म बताइन कि माओवादी मनके खिलाफ संयुक्त आपरेशन चलाये जात हे। राज्य पुलिस अउ केंद्रीय बलके संयुक्त टीम ह संगरा मिलके का करत हे।
उंहें गृहमंत्री ताम्रध्वज साहू ह बइठका म जवान मनके मनोबल ल बढ़ावत कीहिन कि माओवादी मनके खिलाफ आपरेशन के गति ल बनाये रखना जरूरी हे।
मुख्यमंत्री जयंती समारोह
मुख्यमंत्री ह काली दुर्ग जिला के पाटन म राखे गे तहसील स्तरीय गुरू घासीदास जयंती समारोह म सामिल होइन। समारोह के दउरान ओमन पाटन म सतनाम भवन के लोकार्पण के संगेसंग डोम शेड बनाय के घोषणा करीन। मुख्यमंत्री ह कीहिन कि पाटन ब्लाक म एक करोड़ इंक्यानबे लाख रूपिया के लागत ले अनुसूचित जाति बालिका छात्रावास बनाय जाही।
जवान आपसी झड़प
बस्त्र जिला म आज जवान मनके बीच होय आपसी झड़प म एक झिन जवान के मउत होगे, त उंहें आने दू झिन जवान मन घायल होगे।
हमर संवाददाता ले मिले जानबा के मुताबिक दरभा थाना क्षेत्र के सीआरपीए। कैम्प म आज बीहनिया जवान मनके बीच कोनो बात ल लेके विवाद होगे। जेखर बाद एक झिन जवान ह अपन साथी जवान उपर गोलीबारी कर दीन। बाद म खुदे घलो अपन उपर गोली चली लीन। ए घटना म जवान प्रमोद सोढ़ी के मउत होगे, त उंहें दू झिन आने जवान मन घायल होगे।
माओवादी हत्या
बीजापुर जिला म माओवादी मन ह एक झिन कांस्टेबल के हत्या कर देहे। जिला के पुलिस अधीक्षक ह बताइन कि डीआरजी म पदस्थ जवान सोमडू ह अपन लइका मनले मिले बर गांव आय रीहिस। इही बीच ए माओवादी मन ह जांगला थाना क्षेत्र के कोतरापाल के जंगल म एखर हत्या कर दीन। जानबा के मुताबिक ए कांस्टेबल ह बछर दू हजार चैदा म माओवादी संगठन ले अलग होके आत्मसमर्पण करे रीहिन।
महात्मा गांधी पुण्यतिथि
काली राष्ट्रपिता महात्मा गांधी के पुण्यतिथि हरय। ए मउका म प्रदेश म कतकोन कार्यक्रम राखे गेहे।
केंद्र सरकार के निर्देश के मुताबिक काली बीहनिया ग्यारा बजे जम्मों सरकारी आॅफिस मन म दू मिनट के मौन धारण करके शहीद मनके शहादत ल सुरता करे जाही।
एति रायपुर कलेक्टर ह जिला के आने आने संस्था प्रमुख, नगरीय निकाय अउ जनपद मन ल चिट्ठी लिखके महात्मा गांधी के पुण्यतिथि के मउका म नशामुक्ति संकल्प अउ शपथ देवाय के आयोजन करे के निर्देश देहे। कार्यक्रम के दउरान कोरोना संक्रमण के रोकथाम बर केंद्र अउ राज्य सरकार डहार ले जारी दिशा निर्देश के पालन घलो कराय जाही।
मौसम
प्रदेश म एक घांव फेर मौसम बदल गेहे। आज राजधानी के संगेसंग प्रदेश के कतकोन जगा म हल्का ले मध्यम बरसा होय के समाचार मिले हे। मौसम विज्ञानी एच.पी. चंद्रा के मुताबिक दक्षिण ले आवत नमीयुक्त हवा अउ मराठवाड़ा के संगेसंग महाराष्ट्र म बने सिस्टम के सेती प्रदेश के कोनो कोनो जगा म हल्का ले मध्यम बरसा होवत हे।
मौसम विभाग ह अवइया चैबीस घंटा के दउरान प्रदेश के कतकोन जगा म हल्का ले मध्यम बरसा होय अउ बादल छाय के संभावना बताय गेहे। हमर संवाददाता ले मिले जानबा के मुताबिक प्रदेश के मुंगेली कोरिया सरगुजा महासमुंद अउ कवर्धा के संगेसंग कतकेान जिला म हल्का ले मध्यम बरया होय हे। कृषि विभाग के मुताबिक प्रदेश म होवत बेमौसम बरसा के सेती चना, आमा अउ मुनगा के फसल ल नकसान होय के संभावना हे।