प्रधानमंत्री नरेन्द्र मोदी ह राष्ट्र सेवा म राष्ट्रीय कैडेट कोर-एन.सी.सी. के भूमिका के सराहना करे हे। ओमन किहीन कि कैडेट मन ह बाढ़ ल लेके जम्मों प्रकार के प्राकृतिक आपदा के दउरान लोगन मनके मदद करीन हे। एन.सी.सी. रैली ल आज नई दिल्ली म संबोधित करत प्रधानमंत्री ह किहीन कि कोविड के दउरान लोगन मन अपन जिम्मेदारी निभाईस हे, जेखर सेती भारत ह ए महामारी ले सुघ्घर ढंग ले निपट सकीस।
प्रधानमंत्री ह किहीन कि सीमावर्ती अउ तटीय क्षेत्र म सुरक्षा तंत्र ल मजबूत करे बर एन.सी.सी. के भागीदारी बढ़ाय जावत हे। ओमन किहीन कि कैडेट मन म नोनी मनके संख्या म पैंतीस प्रतिसत के बढ़ोतरी होय हे अउ देस के सशस्त्र बल के हर मोर्चा माईलोगिन बर खुले हे। प्रधानमंत्री ह किहीन कि भारत के बहादुर बेटी दुश्मन मन ले लोहा ले बर तैयार हे अउ देस ल उंखर साहस के जरूरत हवय।संसद-बजट सत्र
संसद के बजट सत्र राष्ट्रपति रामनाथ कोविंद के संबोधन के संग काली ले सुरू होवत हे। बछर दू हजार इक्कीस-बाईस के केन्द्रीय बजट एक फरवरी के पेस करे जाही। देस के इतिहास म पहिली घांव कागज रहित बजट पेस करे जाही।
कोरोना महामारी ल देखत राज्यसभा के कार्यवाही बिहनिया नौ बजे ले मंझनिया दू बजे तक अउ लोकसभा के कार्यवाी संझा चार बजे ले रतिहा नौ बजे तक चलही। बजट सत्र के पहिली भाग पन्द्रह फरवरी के सिराही, जेमा बारह बइठका होही। उहें, बजट सत्र के दूसरइया भाग आठ मार्च ले आठ अप्रैल तक चलही अउ ओमा इक्कीस बइठका होही।
खबर के मुताबिक देस के इतिहास म पहिली घांव पेपरलेस यानि कागज रहित बजट पेस करे जाही। केन्द्रीय वित्त मंत्री निर्मला सीतारमण ह यूनियन बजट मोबाइल ऐप नाम ले मोबाइल ऐप जारी करे हे, जेखर ले संसद के सदस्य अउ आम लोगन मन ल बजट दस्तावेज डिजिटल रूप म आसानी ले मिल सकय।
ए मोबाइल ऐप ले बजट, अनुदान मांग अउ वित्त विधेयक समेत केन्द्रीय बजट के चैदह ठिन दस्तावेज के पूरा जानकारी मिल सकही। एक फरवरी के वित्त मंत्री के बजट भाषण पूरा होय के बाद बजट दस्तावेज मोबाइल ए ऐप म रइही।
मुख्यमंत्री भूपेश बघेल ह आज कांकेर जिला के गोविंदपुर म राखे गे आमसभा म तीन सौ बयालीस करोड़ रूपिया के आने-आने विकास काम के लोकार्पण अउ सिलान्यास करीन। अपन कांकेर दउरा के दूसर दिन मुख्यमंत्री आज सासकीय नरहरदेव इंग्लिश मीडियम स्कूल के जांच करीन। ए दउरान मुख्यमंत्री ह आने-आने कक्षा म जाके लइका अउ सिक्षक मन ले पढ़ई के बारे म गोठबात करीन। ए मउका म मुख्यमंत्री ह किहीन कि अंग्रेजी मीडियम म पढ़ना अउ पढ़ाना ल बढ़ावा दे बर इंग्लिश मीडियम स्कूल के सुरूवात करे गेहे। ओमन किहीन कि अवइया सिक्षा सत्र ले सौ अउ नवा इंग्लिस मीडियम स्कूल खोले जाही।
एखर पहिली, मुख्यमंत्री ह काली कोंडागांव जिला कोंगेरा गांव म राखे गे कारीकरम म दू सौ अटहत्तर करोड़ रूपिया के लागत के विकास काम के भूमिपूजन अउ लोकार्पण करीन। मुख्यमंत्री ह ए मउका म आमसभा ल संबोधित करत किहीन कि बस्तर के विकास बर धन के कमी नइ होही। ओमन किहीन कि बस्तर म वनवासी समेत आम आदमी के विकास खातिर राज्य सरकार स्वास्थ्य, सिक्षा, सड़क, रोजगार अउ सिंचाई सुविधा उपर बिसेस ध्यान देवत हे। मुख्यमंत्री ह ए मउका म कोंडागांव जिला के विश्रामपुरी म महाविद्यालय के स्थापना के संगेसंग धनोरा अउ मर्दापाल ल तहसील बनाय के संगेसंग बांसकोट, बड़ेडांेगर अउ बीजापुर म उप तहसील खोले के घोसना करीन।धान खरीदी
प्रदेस म अब तक नवासी लाख तिरसठ हजार मीटरिक टन ले जादा के धान खरीदी होगे हे। धान खरीदी बर अभी तीन दिन अउ बांचे हे। अब तक राज्य के बीस लाख पच्चीस हजार ले जादा किसान मन ह समर्थन मूल्य म धान बेचे हे। उहें, कस्टम मिलिंग बर इकतीस लाख बारह हजार मीटरिक टन धान के डीओ जारी करे गेहे, जेखर एवज म मिलर्स मन डहार ले अब तक अट्ठाईस लाख छैसठ हजार मीटरिक टन धान के उठाव कर ले गेहे।
इही बीच, जांजगीर-चांपा जिला के विधायक अउ भाजपा के प्रदेस महामंत्री नारायण चंदेल ह राज्य सरकार ले धान खरीदी के तारीख बढ़ाय के मांग करीन हे। ओमन आरोप लगाईन हे कि किसान मन ल धान बेचे ले रोके खातिर राज्य सरकार ह गिरदावरी के काम म खेत के रकबा मन ल काटे हे। ओमन किहीन कि जउन किसान मनके खेत के रकबा कटे गेहे, ओला दुरूस्त करे ओ किसान मन ल फेर ले धान बेचे के मउका देना चाही।मुख्यमंत्री-कोदो/कुटकी
मुख्यमंत्री भूपेश बघेल ह किहीन हे कि राज्य सरकार जल्दीच कोदो अउ कुटकी के घलो समर्थन मूल्य घोसित करही। मुख्यमंत्री ह काली कांकेर कृषि विज्ञान केन्द्र परिसर म स्व-सहायता समूह के माईलोगिन अउ किसान मन ल संबोधित करत लघु धान्य फसल अउ आने-आने वनोपज के प्रसंस्करण अउ उंखर बेचई म जोर दीन। ओमन किहीन कि ए उत्पाद मनके बने पैकेजिंग, मार्केटिंग अउ प्रचार-प्रसार करे जाना चाही, जेखर ले किसान अउ वनवासी मन ल जादा फायदा मिलय।
ए मउका म मुख्यमंत्री ह कृषि विज्ञान परिसर म लघु धान्य प्रसंस्करण इकाई अउ लाख प्रसंस्करण इकाई ल घलो देखीन।
बर्ड फ्लू-रोकथाम
महासमुंद कलेक्टर डोमन सिंह ह जिला म बर्ड फ्लू के रोकथाम बर बिसेस दिसा-निरदेस जारी करे हे। कलेक्टर ह जिला के जम्मों एसडीएम मन ल चिट्ठी जारी करके सीमावर्ती प्रदेस ले पक्षी मनके परिवहन उपर नजर राखे बर केहे हे। ओमन पक्षी मनके आकस्मिक मउत होय म पशुपालन विभाग मन ल तुरते सूचना दे बर केहे गेहे।
उहें, जिला के पशु चिकित्सक डाॅक्टर डी.डी. झारिया ह बतईन हे कि जिला म अब तक आठ पक्षी मनके स्वाब के जांच बर भोपाल भेजे गे रिहीस, जिहां जांच म सबो के रिपोर्ट निगेटिव आय हे। ओमन बतईन कि बर्ड फ्लू के रोकथाम बर जिला अउ ब्लाॅक स्तर म रैपिड रिस्पाॅन्स टीम के गठन करे गेहे।
कोरोना समाचार
प्रदेस म काली चार सौ उनचालीस कोरोना पाॅजिटिव मरीज पाय गीस। एला मिलाके प्रदेस म अब तक दू लाख संतानवे हजार ले जादा कोेरोना संक्रमित मरीज मिल गेहे। उहें दू लाख नवासी हजार ले जादा मरीज कोरोना संक्रमण ले स्वस्थ होय हे। अभी साढ़े चार हजार ले जादा मरीज मनके इलाज चलत हे।
इही बीच, देस म अब तक तेईस लाख पचपन हजार ले जादा लोगन मन ल कोरोना ले बचाव के टीका लगाय गेहे। काली करीबन तीन लाख पच्चीस हजार लोगन मन ल ए टीका लगाय गीस।
ऐति, छत्तीसगढ़ के महासमुंद जिला म छह आने-आने स्वास्थ्य केन्द्र मन मन काली सरकारी अउ निजी संस्थान के स्वास्थ्यकर्मी मन ल टीका लगाय गीस। जिला म अब तक सोलह सौ पच्यासी स्वास्थ्यकर्मी मन ल टीका लगाय गेहे।
टिफिन बम-बरामद
सुकमा जिला म सुरक्षा बल मन ह दस किलो के टिफिन बम बरामद करे हे। मिले खबर के मुताबिक केन्द्रीय रिजर्व पुलिस बल-सीआरपीएफ के दल तलासी अभियान म निकले रिहीस। इही दउरान चिंतलनार के बंगाली पारा के तीर माओवादी मन डहार ले लगाय गे दस किलो के टिफिन बम ल सुरक्षा बल मन ह बरामद करीन, जेला बाद म निष्क्रिय कर दे गीस।
प्रदेसभर म आज अन्नदान के परब छेरछेरा खुसी के संग मनाय जावत हे। धान के नवा फसल आय के मउका म पुस महीना के पूर्णिमा के ए परब मनाय जाथे। एमा मुख्य रूप ले धान के दान करे जाथे। बिहनिया ले लइका, सियान अउ माईलोगिन मन ह झुंड म निकल के घरो-घरो म जा के छेरछेरा मांगीन। उहें, किसान अउ गांव वाले मन ह घर के आगू टुकनी म धान राखके लोगन मन ल बांटीन।
ऐति, मुख्यमंत्री भूपेश बघेल ह प्रदेस के लोकपर्व छेरछेरा ल कांकेर म मनाईस। ए मउका म ओमन सहर के दुकान अउ घर मन म छेरछेरा के दान मांगीन। ए दउरान लोगन मन ह मुख्यमंत्री ल तराजू म तउल के उंखर वजन के बराबर अन्नदान करीन। ए मउका म मुख्यमंत्री ह किहीन कि छेरछेरा तिहार ले लोगन मनके मन म समानता के भाव आथे।
खबर के मुताबिक मुख्यमंत्री ल छेरछेरा म मिले अन्न के उपयोग सुपोषण योजना म अउ पइसा के उपयोग अस्पताल म करे जाही।