राष्ट्रीय बालिका दिवस
देसभर म आज राष्ट्रीय बालिका दिवस मनाय जावत हे। ए दिवस नोनी मन ल सामान मउका देवाय बर मनाय जाथे। प्रधानमंत्री नरेन्द्र मोदी ह राष्ट्रीय बालिका दिवस के मउका म आने-आने क्षेत्र म सफलता हासिल करइया देस के नोनी मनके तारीफ करीन हे। एक ठिन ट्वीट संदेस म ओमन किहीन कि केन्द्र सरकार ह नोनी मन ल आगू बढ़ाय बर उंखर सिक्षा अउ स्वास्थ्य बर अउ उंखर मन बर होवइया भेदभाव ल खतम करे के दिसा म कतकोन कदम उठाय हे। श्री मोदी ह किहीन कि आज के दिन नोनी मनके ससक्तीकरण बर काम करइया लोगन के तारीफ के दिन घलोक हवय। इही बीच, केन्द्र सरकार ह अपन प्रमुख कारीकरम ‘‘बेटी बचाओ-बेटी पढ़ाओ‘‘ अभियान म नोनी मनके सिक्षा अउ विकास के बेवस्था बर अपन प्रतिबद्धता जाहिर करे हे। सिक्षा मंत्रालय ह स्कूल सिक्षा बर एकीकृत योजना वाले समग्र सिक्षा कारीकरम के सुरूवात करे हे। एमा नोनी मनके सिक्षा बर सरकार डहार ले कतकोन प्रयास करे गे हवय। ऐति, छत्तीसगढ़ म घलो राष्ट्रीय बालिका दिवस के मउका म कतकोन कारीकरम कराय जावत हे, जेमा नोनी मनके स्वास्थ्य बर अउ उंखर बर सुरक्षित वातावरण बनाय जइसन जागरूकता कारीकरम सामिल हे।
ए मउका म मुख्यमंत्री भूपेश बघेल ह अपन संदेस म सबो बेटी मन ल उंखर उज्जवल भविष्य बर सुभकामना दीन हे। ओमन ह बेटी मनके ससक्तिकरण के संगेसंग ओमन ल सुरक्षित माहौल दे जाय के जरूरत घलो बतईन हे। उहें, दुरूग जिला के आंगनबाड़ी केन्द्र मन म आज नोनी मन बर खेलकूद के प्रतियोगिता अउ पोषण आधारित कारीकरम कराय जावत हे। अइसने, मुंगेली म जिला स्तरीय जागरूकता सिविर लगाय गीस, जेखर माध्यम ले महिला अउ बाल विकास विभाग ह नोनी मन बर प्रश्नोत्तरी संघरा अउ दूसर कारीकरम कराईन।
प्रधानमंत्री-पुरस्कार
प्रधानमंत्री नरेन्द्र मोदी ह काली मंझनिया बारह बजे वीडियो कान्फ्रेंसिंग के माध्यम ले प्रधानमंत्री राष्ट्रीय बाल पुरस्कार विजेता मन संग गोठबात करही। केन्द्र सरकार ह ए पुरस्कार ल प्रधानमंत्री राष्ट्रीय बाल पुरस्कार के अंतर्गत बाल शक्ति पुरस्कार, असाधारण योग्यता और नवाचार, स्कूली उपलब्धि, खेल, कला अउ संस्कृति, सामाजिक सेवा अउ बहादुरी के क्षेत्र म बढ़िया काम करे बर देवत हे। एखर आने-आने श्रेणी म देसभर के बत्तीस झिन आवेदक मन ल प्रधानमंत्री राष्ट्रीय बाल पुरस्कार दू हजार इक्कीस बर चुने गे हवय।
राष्ट्रीय मतदाता दिवस
देसभर म काली राष्ट्रीय मतदाता दिवस मनाय जाही। ए दिवस ल मनाय के उद्देश्य मतदाता मन ल प्रोत्साहन अउ सुविधा दे जाय के संगेसंग जादा ले जादा संख्या म मतदाता सूची म ओमन ल नामांकन बर प्रेरित करना हे। भारत के निर्वाचन आयोग के स्थापना के मउका म हर बछर पच्चीस जनवरी के देसभर म राष्ट्रीय मतदाता दिवस मनाय जाथे। राष्ट्रपति रामनाथ कोविंद नई दिल्ली म होवइया ए राष्ट्रीय समारोह के मुख्य अतिथि होही। ए बछर के राष्ट्रीय मतदाता दिवस के बिसय देस के मतदाता मन ल ससक्त, सतर्क, सुरक्षित अउ जागरूक बनाना हे। उहें, ए मउका म निर्वाचन आयोग ह काली ले डिजिटल मतदाता फोटो पहचान पत्र के सुरूवात करइया हे। ओति, राष्ट्रीय मतदाता दिवस के मउका म काली मंझनिया महासमुंद जिला पंचायत कार्यालय म ई-इपिक लांच करे जाही। जिला कलेक्टर अउ पुलिस अधीक्षक के मौजूदगी म मतदाता जागरूकता कारीकरम म आधारित कारीकरम घलो होही। ऐति, बछर दू हजार बीस म निर्वाचन काम सुघ्घर तरीका ले करवाय बर दुरूग जिला के चयन राज्य स्तरीय सम्मान बर होय हे, जेला काली जिला निर्वाचन अधिकारी डाॅक्टर सर्वेश्वर नरेन्द्र भूरे ग्रहण करही।
बर्ड फ्लू
केन्द्र सरकार ह केहे हे कि देस के नौ ठिन राज्य के मुर्गी मन म बर्ड फ्लू के पुष्टि होय हे। मत्स्य पालन, पशुपालन अउ डेयरी मंत्रालय ह बताय हे कि बारह ठिन राज्य म कौवा, प्रवासी अउ जंगली पक्षी मन म घलो एवियन इन्फ्लुएंजा के पुष्टि होय हे। छत्तीसगढ़ संघरा आठ राज्य के बर्ड फ्लू प्रभावित इलाका म नियंत्रण अभियान चलत हे। मंत्रालय ह केहे हे कि मुआवजा के भुगतान सिरिफ ओ मुर्गी पालक मन ल करे जाथे, जिखर मुर्गी, अंडा अउ मुर्गी चारा राज्य डहार ले एक्सन प्लान के अनुसार खतम करे जाथे।
केन्द्रीय बल-आयुष्मान योजना
केन्द्रीय गृह मंत्री अमित शाह ह काली गुवाहाटी म करीबन अट्ठाईस लाख केन्द्रीय ससस्त्र बल के जवान अउ उंखर परिवार वाला मन बर आयुष्मान सी.ए.पी.एफ. योजना के सुरूआत करीन। ए योजना ल ओ राज्य मन म सुरू करे गेहे, जिहां आयुष्मान भारत प्रधानमंत्री जन आरोग्य योजना लागू हे। केन्द्रीय गृहमंत्री ह किहीन कि अइसन प्रयास करे जावत हे, जेखर ले सुरक्षा कर्मी मन अपन परिवार के संग एक बछर म कमती ले कमती एक सौ दिन गुजार सकय। ओमन किहीन कि गृह मंत्रालय सुरक्षा बल के कार्यस्थिति ल बने बनाय के उपाय करत हे।
मुख्यमंत्री-रायगढ़
रायगढ़ जिला के सारंगढ़ म पचास बिस्तर वाले अस्पताल बनाय जाही। उहें, कोसीर ल उप तहसील अउ भड़िसार म जलासय बनाय जाही। ए घोसना मुख्यमंत्री भूपेश बघेल ह आज रायगढ़ जिला के सारंगढ़ विकासखंड के नंदेली गांव म एक ठिन कारीकरम म करीन। ओमन यहू घलो किहीन कि रायगढ़ के बंद जूट मिल ल फेर सुरू करे पहल होही, जेखर ले लोगन ल रोजगार मिलय अउ धान खरीदी बर बारदाना के कमी ल घलो दूर करे जा सकय।
पेसा कानून-पदयात्रा
राजनांदगांव जिला के माओवाद प्रभावित मानपुर क्षेत्र म रहइया आदिवासी समुदाय के लोगन मन पांचवां अनुसूची क्षेत्र म पेसा कानून लागू कराय संघरा अपन आने-आने मांग ल लेके एक ठिन पदयात्रा निकालीन हे। ए पदयात्रा आज राजधानी रईपुर पहुंचीस, जिहां आदिवासी समुदाय के लोगन काली राज्यपाल अनुसुईया उइके ले भेंट करहीं अउ ओमन ल ज्ञापन सौंपही। माओवाद प्रभावित खड़गांव ले पाछु बीस जनवरी के ए पदयात्रा निकले हे, जेमा बड़े संख्या म माईलोगिन मन अउ लइका मन सामिल हे। हाथ म तिरंगा अउ तीर-कमान लेके आदिवासी मन राजनांदगांव अउ दुरूग होवत रईपुर पहुंचीन हे। ए यात्रा म ओमन ह करीबन एक सौ पचहत्तर किलोमीटर के दूरी तय करीन हे। आदिवासी नेता मन ह आरोप लगाईन हे कि पांचवां अनुसूची क्षेत्र म पेसा कानून लागू नइ होय ले आदिवासी समुदाय के लोगन अपन मूलभूत सुविधा ले वंचित हे।
सड़क सुरक्षा माह
राष्ट्रीय सड़क सुरक्षा माह के दउरान राजधानी रईपुर म यातायात पुलिस डहार ले यातायात नियम के पालन के जागरूकता बर बिसेस अभियान चलाय जावत हे। उहें, महासमुंद जिला के तुमगांव म यातायात जागरूकता रैली निकाले गीस, जेमा हेलमेट पहिर के गाड़ी चलइया लोगन ल फूल देके सम्मानित करे गीस। अइसने, दुरूग जिला विधिक सेवा प्राधिकरण डहार ले घलो आज हेलमेट जागरूकता रैली निकाले गीस।
पेंगोलिन-तस्करी
वन मंत्री मोहम्मद अकबर के निरदेस म राज्य म वन अपराध के रोकथाम बर आजकल एक ठिन अभियान चलाय जावत हे, जेमा गरियाबंद वनमंडल म एक ठिन जिंदा पेंगोलिन बरामद करे गेहे। एखर तस्करी के मामला म दू झिन आरोपी मन ल गिरफ्तार करे गेहे।
धोखाधड़ी-मामला
राजधानी रईपुर म एक झिन माईलोगिन के संग करोड़ों रूपिया के धोखाधड़ी करइया आरोपी ल पुलिस ह गिरफ्तार कर लेहे। पुलिस के अनुसार टीबी कंपनी के डायरेक्टर बनके आरोपी ह एक झिन माईलोगिन ल डीलरसिप देके झांसा दीस अउ बछर दू हजार उन्नीस म अपन आने-आने खाता म करीबन सोलह करोड़ रूपिया जमा करा लीस। माईलोगिन के सिकायत म पुलिस ह कंपनी के डायरेक्टर अउ दूसर लोगन के खिलाफ मामला दर्ज कर लेहे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह आज रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेव नौ सौ इक्यासी किलोहटर््ज म सुने जा सकत हे। ए कारीकरम ल प्रदेस स्थित आकाशवाणी के जम्मों केन्द्र एके संघरा रिले करही।