स्वास्थ्य मंत्री-बैठक
स्वास्थ्य मंत्री टी.एस. सिंहदेव ह कोरोना टीका लगइया स्वास्थ्य कमरचारी मन संग आज गोठबात करके उंखर स्वास्थ्य के संबंध म जानकारी लीन। स्वास्थ्य मंत्री ह रईपुर ले वीडियो कान्फ्रेंसिंग ले कोरोना टीकाकरण के स्थिति के समीक्षा करीन। ए बेरा म जगदलपुर के स्वास्थ्य करमचारी मन ह श्री सिंहदेव ल बतईन कि टीका लगाय के बाद ओमन ल कोनों किसम के परेसानी नइ होईस। जगदलपुर जिला अस्पताल के अधीक्षक ह बतईन कि कोरोना टीका लगवइया कोनों भी स्वास्थ्य करमचारी मन ल साईड इफ्केट नइ होय अउ न एखर सेती कोनों अस्पताल म भर्ती होय हे।
बइठका म श्री सिंहदेव ह स्वास्थ्य विभाग के बजट, एम्बुलेंस अउ अस्पताल म बिस्तर के संख्या के संगेसंग जरूरी विकास संबंधी काम के समीक्षा करीन।
अइसने, राजनांदगांव जिला म घलो टीका लगवइया करीबन ढाई सौ स्वास्थ्य करमचारी मन ल अब तक कोनों किसम के परेसान नइ होय हे। जिला के मुख्य चिकित्सा अउ स्वास्थ्य अधिकारी डाॅक्टर मिथलेश चैधरी ह बतईन कि सहर के चार ठिन टीकाकरण केन्द्र म स्वास्थ्य करमचारी मन ल टीका लगाय के बेवस्था करे गेहे। उहें, टीका लगवइया स्टाॅफ नर्स फलेश्वरी मरावी ह लोगन ले अपील करीन हे कि कोरोना के टीका सुरक्षित हे अउ लोगन बिना डर्राये लगावय। उहें, केन्द्रीय सूचना अउ प्रसारण मंत्रालय के पत्र सूचना कार्यालय अउ प्रादेशिक लोक संपर्क कार्यालय रईपुर कोति ले काली एक वेबिनार राखे जाही। ए वेबिनार ‘‘कोविड-नाइंटीन टीकाकरण – समयोचित जन-जागरूकता अभियान के आवश्यकता‘‘ बिसय म होही। एला छत्तीसगढ़ यूनिसेफ कार्यालय के प्रमुख जाॅब जकारिया अउ छत्तीसगढ़ टीकाकरण अभियान के राज्य मीडिया समन्वयक हर्षा पौराणिक संबोधित करही।
केन्द्र-खंडन
केन्द्र सरकार ह आज सोसल मीडिया म आय ओ खबर के खंडन करे हे कि गृह मंत्रालय ह स्कूल अउ काॅलेज ल फेर से बंद करे के आदेस जारी करे हे। पत्र सूचना कार्यालय-पीआईबी ह ए खबर ल फर्जी बतावत केहे हे कि गृह मंत्रालय ह स्कूल-कालेज ल बंद करे ले जुड़े अइसन कोनों आदेस जारी नइ करे हे।
सड़क सुरक्षा-माह
केन्द्रीय सड़क परिहवन अउ राजमार्ग मंत्री नितिन गडकरी ह किहीन हे कि ए बछर मार्च के आखिरी तक हरेक दिन चालीस किलोमीटर रद्दा बनाय के लक्ष्य पा लीही। ओमन किहीन कि सरकार हरेक दिन तीस किलोमीटर रद्दा बनाय के लक्ष्य पा लेहे। नई दिल्ली म राष्ट्रीय सड़क सुरक्षा माह के उद्घाटन करे के बाद संवाददाता मन ले गोठबात करत श्री गडकरी ह किहीन कि देस म रद्दा दुर्घटना म चार सौ पन्द्रह लोगन के प्रति दिन मउत होथे। ओमन किहीन कि सरकार सड़क तकनीक अउ मानक ल लागू करके रद्दा दुर्घटना ल कमती करे बर प्रतिबद्ध हवय। ए मउका म रक्षा मंत्री राजनाथ सिंह ह किहीन कि जागरूकता ल एक महीना बर बांधे नइ जा सकय, एला हमेसा बनाय रखना चाही।
ऐति, छत्तीसगढ़ म घलो सड़क सुरक्षा माह म आज ले जन-जागरूकता बर कतकोन कारीकरम करे जात हे। सड़क सुरक्षा माह अवइया महीना के सत्रह तारीख तक चलही। गृह मंत्री ताम्रध्वज साहू ह अब ले थोरिक देर बाद राजधानी रईपुर म राखे गे एक ठिन कारीकरम म सड़क सुरक्षा माह के सुभारंभ करही। यातायात पुलिस कोति ले राखे गे ए कारीकरम रईपुर नगर निगम के महापौर एजाज ढेबर अउ विधायक सत्यनारायण शर्मा के संगेसंग कतकोन बड़का नेता मौजूद रइही।
उहें, मुंगेली जिला के पुलिस अधीक्षक बी.पी. राजभानू ह पुलिस करमचारी मन के मोटर साइकिल रैली ल हरियर झंडी देखाके रवाना करीन। पुलिस अधीक्षक ह बतईन कि यातायात नियम के जानकारी, जागरूक करे अउ हेलमेट बउरे बर लोगन ल बताय खातिर ए रैली निकाले गेहे। बिलासपुर म घलो राष्ट्रीय सड़क सुरक्षा माह के सुरूवात यातायात पुलिस कोति ले जागरूकता रैली निकाल के करे गीस।
कृषि कानून-तोमर
केन्द्रीय कृषि मंत्री नरेन्द्र सिंह तोमर ह किहीन कि किसान सरकार ले कृषि कानून ल वापिस लेबर झन काहय, ओखर जगह म जउन चाहे मांग सकत हे। एक समाचार एजेंसी ले गोठबात करत श्री तोमर ह विरोध प्रदर्सन करत किसान मन ले अपील करीन कि ओमन काली अगला दउर के बइठका म कृषि कानून के संबंध म बिस्तार ले गोठबात कर सकत हे।
किसान रेल
छत्तीसगढ़ म किसान मन ल उंखर फसल के सही दाम अउ देसभर म बाजार देवाय खातिर रेल मंत्रालय कोति ले किसान रेल के सुभीत दे जावत हे। एमा नागपुर रेलमंडल कोति ले दू घांव चलाय जात किसान रेल ले छत्तीसगढ़ के किसान फल अउ साग-भाजी दिगर राज्य म भेज सकथे। छिंदवाड़ा ले असम के तीनसुकिया तक करीबन पौने तीन हजार किलोमीटर के दूरी तय करइया किसान रेल पाछु दिन चलाय गीस। ए ट्रेन रईपुर, दुरूग अउ बिलासपुर ले होके गीस, जिहां ले राज्य के किसान मन ह करीबन एक सौ नब्बे टन पार्सल बुक कराईन।
माओवादी आत्मसमर्पण
दंतेवाड़ा जिला म लोन वर्राटू अभियान म एक महिला समेत आठ झिन माओवादी मन ह आत्मसमर्पण करीन हे। आत्मसमर्पण करइया माओवादी मन उपर कतकोन गंभीर वारदात म सामिल रेहे के आरोप हवय। जिला के पुलिस अधीक्षक डाॅक्टर अभिषेक पल्लव ह बतईन कि आत्मसमर्पित चार झिन माओवादी मन उपर राज्य सरकार ह एक-एक लाख रूपिया के इनाम राखे रिहीस। आत्मसमर्पण करइया माओवादी मन ल राज्य सरकार के पुनर्वास नीति म प्रोत्साहन रासि दे गीस।
बर्ड फ्लू
दंतेवाड़ा जिला के बचेली म बर्ड फ्लू ले कौवा के मउत के पुष्टि होय हे। एखर बाद जिला म अलर्ट जारी करे गेहे। पशु चिकित्सा विभाग के मुताबिक कौवा के मउत के बाद नमूना के जांच रिपोर्ट पाॅजिटिव आय हे। उहें, बर्ड फ्लू के सेती मुंगेली जिला म जिला प्रसासन ह बिसेस सावधानी राखत हे। पशु चिकित्सा विभाग के अधिकारी मन ह लोगन ले अपील करीन हे कि चिरई मनके मउत के जानकारी तुरते देवय, जेखर ले मउत के कारण के जांच करे जा सकही।
मुख्यमंत्री-तेलघानी बोर्ड
मुख्यमंत्री भूपेश बघेल ह राज्य म तेलघानी बोर्ड के गठन करे के घोसना करे हे, जेखर ले गांव-गंवई म रोजगार ल बढ़ावा मिलही अउ पंरपरागत बेवसाय ल सुरक्षित राखे जा सकही। ए बात मुख्यमंत्री ह पाछु रतिहा महासमुंद म राखे गे साहू समाज के एक ठिन कारीकरम म किहीन। ओमन समाज के मांग म रईपुर संभाग के पांच ठिन जिला रईपुर, महासमुंद, धमतरी, गरियाबंद अउ बलौदाबाजार म सामाजिक भवन बनाय खातिर बीस-बीस लाख रूपिया देके मंजूरी दीन। कारीकरम के अगुवई गृहमंत्री ताम्रध्वज साहू ह करीन।
मन की बात
प्रधानमंत्री नरेन्द्र मोदी इकतीस जनवरी के आकाशवाणी ले ‘‘मन की बात‘‘ कारीकरम म देस-बिदेस के लोगन संग अपन विचार साझा करही। ए मासिक रेडियो कारीकरम के तिहत्त्तरवां कड़ी हे। एक ट्वीट म श्री मोदी ह लोगन ले अपन सुझाव साझा करे के आग्रह करीन हे। ओमन किहीन कि कारीकरम म दे गे कुछेक बिचार उपर गोठबात घलो करही। लोगन नमो ऐप या फेर माई जीओवी ओपन फोरम म अपन बिचार साझा कर सकत हे।
साय-बयान
भारतीय जनता पार्टी के प्रदेश अध्यक्ष विष्णुदेव साय ह राज्य के कांग्रेस सरकार उपर हर मोर्चा म विफल रेहे आरोप लगाय हे। धमतरी दउरा के बेरा पत्रकार मन ले गोठबात करत श्री साय ह किहीन कि राज्य सरकार ह किसान अउ युवा मन संग वादाखिलाफी करे हे। ओमन आरोप लगाईन कि राज्य म कानून बेवस्था खराब होगे हे। श्री साय ह गौठान म पशु मन म चारा के बेवस्था अउ मवेशी मनके मउत समेत आने कतकोन मामला ल लेके राज्य सरकार के प्रणाली उपर सवाल उठाईन।
आदर्श थाना
पुलिस विभाग कोति ले राज्य के जम्मों पुलिस थाना ल आदर्श थाना बनाय के प्रयास चलत हे। एमा कोरिया जिला के झगराखांड थाना ल आदर्श थाना के रूप म चुने गेहे। आने थाना मन ल घलो आदर्श थाना बनाय बर जिला के पुलिस अधीक्षक चन्द्रमोहन सिंह ह एक बइठका करीन, जेमा जिला के जम्मों थाना प्रभारी मन ल महानगर मन म यूनिसेफ ले जुड़े प्रसिक्षक मन कानून व्यवस्था के संबंध म जानकारी दीन। पुलिस अधीक्षक ह बतईन कि झगराखांड थाना म अइसन बेवस्था करे जात हे कि लइका मन अपन घर ले ही वीडियो कान्फ्रेंसिंग ले सिकईत दरज करा सकही।