आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री ट्रेन रवाना
प्रधानमंत्री नरेंद्र मोदी ह आज वीडियो कॅान्फे्रसिंग के माध्यम ले देश के आने आने जगा ले केवड़िया ले जोड़ने वाला आठ ठन रेलगाड़ी मन ल झंडा दिखाके रवाना करीन। ये रेलगाड़ी मनके माध्यम ले स्टेच्यू आॅफ यूनिटी तक के यात्रा अउ सुगम हो जाही।
श्री मोदी ह कीहिन कि आज हमर मन बर एतिहासिक दिन हे जब एक भारत श्रेष्ठ भारत अपन सुंदर रूप म दिखाई देवत हे। प्रधानमंत्री ह कीहिन कि भारतीय रेल के इतिहास म पहिली घांव देशभर ले आठ ठन रेलगाड़ी मन ह एके संघरा एक जगा ले जुड़े हवय। ओमन कीहिन कि आज भारतीय रेल के मिशन अउ सरदार वल्लभ भाई पटेल के परिकल्पना एक होय हे। श्री मोदी ह कहिन कि केवड़िया जइसन कोनो दूसर जगा नइ हे अउ ये ह स्टेच्यू आॅफ यूनिटी अउ सरदार सरोवर बांध ले जाने जा सकत हे।
प्रधानमंत्री शिखर सम्मेलन
प्रधानमंत्री नरेंद्र मोदी ह कीहिन हे कि स्टार्टअप ह भारत ल आत्मनिर्भर बनाय म बड़ भूमिका निभावत हे। ओमन कीहिन कि नवा उद्योग ह कोरोना महामारी म सेनिटाइजर अउ पीपीई किट देवाय म अउ एखर आपूर्ति ल बनाय राखे म बहुत मदद करे हे। प्रधानमंत्री ह काली वीडियो काॅन्फे्रसिंग के माध्यम ले अंतर्राष्ट्रीय शिखर सम्मेलन म बोलत रीहिन। श्री मोदी ह खराब समय म घलो मउका तलाशे के अउ मुश्किल के दउरान विश्वास जुटाय के स्टार्टअप के भावना के तारीफ करीन। प्रधानमंत्री ह देश म उद्यमिता ल बढ़ावा दे जाय बर करीबन एक हजार करोड़ रूपिया के स्टार्टअप इंडिया सीड फंड के घोषणा करीन।
पीडीएस-खाद्यान्न वितरण
प्रदेश म सार्वजनिक वितरण प्रणाली म फरवरी माह के खाद्यान्न के वितरण अउ आबंटन इही महीना जनवरी म करे जाही। धान खरीदी बर उपराहा बारदाना के पूर्ति करे बर राज्य शासन ह ये अनुमति दीन हे।
आदेश के अनुसार सबो जिला के खाद्य नियंत्रक अउ खाद्य अधिकारी मन ल खाद्यान्न वितरण के बाद पीडीएस के बारदाना मन ल धान खरीदी बर दे जाय बर कीहिन हे। छत्तीसगढ़ राज्य सहकारी विपणन संघ ह ये विसय म सबो जिला विपणन अधिकारी मन ल निर्देश जारी करीन हे। प्रदेश म बारदाना के संभावित कमी ल देखत किसान मनके जुन्ना जूट बारदाना मन म घलो धान खरीदी के मंजूरी देगे हवय। मिलर मनले मिलने वाला जुन्ना बारदाना के पूर्ति घलो लक्ष्य के अनुसार कराय के निर्देश देगे हवय। मिलर मनले करीबन दू लाख उनहत्तर हजार गठान बारदाना ले जाय के लक्ष्य हवय। उंहें किसान मन ल उंखर डहार ले देगे बारदाना के भुगतान निर्धारित दर म करे जाही । खबर के मुताबिक प्रदेश म अभी तक करीबन छिहत्तर लाख मीट्रिक टन धान के खरीदी करे गे हावय। उंहें मिलर मन डहार ले इक्कीस लाख तिरसठ हजार मीट्रिक टन धान के उठाव करे गे हावय।
कोरोना टीकाकरण
भारत म काली दुनिया के सबले बड़े कोविड टीकाकरण अभियान शुरू होगीस। प्रधानमंत्री नरेंद्र मोदी ह काली वीडियो कॅान्फे्रसिंग के माध्यम ले एखर शुरूआत करीन। अभियान के पहिली दिन एक लाख इंक्यानवे हजार ले जादा लोगन ल टीका लगाये गीस।
केंद्रीय स्वास्थ्य मंत्रालय ह केहे हे कि कोनो भी मनखे म टीका के दुष्प्रभाव के सेती अस्पताल म भर्ती होय के खबर नइ हे। भारतीय सीरम संस्थान डहार ले तियार करे गे टीका कोविशील्ड सबो राज्य मन म भेजे गे रीहिस। भारत बायोटेक के कोवैक्सिन बारह राज्य म पहुंचाय गीस। केंद्र सरकार के अनुसार टीकाकरण अभियान के शुरू होय ले देश म कोरोना महामारी सिराय के संभावना हे।
ए मउका म प्रधानमंत्री नरेंद्र मोदी ह कीहिन कि ये अभियान मानवीय सिद्धंात उपर आधारित हे अउ टीकाकरण बर प्राथमिकता अइसन मन ल दे जावत हे जउन मनके संक्रमित होय के खतरा सबले जादा हे। ओमन ह कोरोना बर वैक्सिन बनाय म जुटे वैज्ञानिक मनके तारीफ करीन। ओमन कीहिन कि ये गर्व के बात हे कि हमर देश के पास कमती समय म कोरोना के दू ठन मेड इन इंडिया टीका मौजूद हे। प्रधानमंत्री ह दवाई भी कड़ाई भी के मंत्र ल दोहरावत लोगन ले अनुरोध करीन कि ओमन ह पहिली टीका लगाय जाय के बाद मास्क उतारे अउ सुरक्षित दूरी के नियम के अनदेखी करे के गलती झन करय।
कोरोना टीकाकरण प्रदेश
इही बीच छत्तीसगढ़ के सबो जिला म घलो कोरोना टीकाकरण अभियान काली ले शुरू होगीस। स्वास्थ्य विभाग के अनुसार प्रदेश म पहिली दिन नौ हजार एक सौ पैंतीस शेड्यूल स्वास्थ्यकर्मी मनके विरूद्ध पांच हजार पांच सौ बयानबे झन स्वास्थ्यकर्मी मन ल टीका लगाय गे हावय। छत्तीसगढ़ ल केंद्र सरकार ह पहिली खेप म भारतीय सीरम संस्थान डहार ले बने कोविशील्ड के तीन लाख तेइस हजार टीका देगे हवय, जउन ह आईसीएमआर डहार ले प्रमाणित हे। विशेषज्ञ मनके अनुसार वैक्सिीन के पहिली खुराके अठाईस दिन के भीतर दूसर खुराक लेना होही। उंहें राजनंादगंाव जिल म कोरोना टीकाकरण बर जागरूकता हस्ताक्षर अभियान चलाये गीस ।
बर्ड फ्लू
प्रदेश म बर्ड फ्लू के पुष्टि होय के बाद सावधानी बढ़ा देगे हावय। राजनंादगंाव जिला म कलेक्टर टोपेश्वर वर्मा ह बर्ड फ्लू के संक्रमण के सुरक्षा केसंबंध म पशुधन विकास विभाग के अधिकारी अउ पोल्ट्री फार्म व्यवसायी मनके बइठका लीन। ओमन कीहिन कि मुर्गी मन म बर्ड फ्लू के लक्षण दिखे म पशुधन विकास विभाग ल तुरते सूचित करे जाय, जेखर ले सही बेरा म एखर उपाय करे जा सकय। राजनांदगंाव जिला महाराष्ट्र अउ मध्यप्रदेश ले जुड़े हे, जिहंा बर्ड फ्लू के पुष्टि होय हे। जेला देखत पशुधन विकास विभाग के अधिकारी मन ल सरलग निगरानी राखे के अउ बर्ड फ्लू के रोकथाम बर विशेष सावधानी बरते जाय के निर्देश देगे हावय। उंहे बालोद जिला म बर्ड फ्लू के पुष्टि होय के बाद पोल्ट्री फार्म के करीबन साढ़े दस हजार मुर्गी संगरा एक सौ पचहत्तर देशी मुर्गी अउ बत्तीस कबूतर मन ल दफनाय गे हावय। संगेसंग संक्रमित जगा के दस किलोमीटर के दायरा म चिकन के बिक्री म रोक लगा देगे हवय।
भाजपा बयान
भारतीय जनता पार्टी ह राज्य सरकार उपर किसान मनले वादाखिलाफी करे के आरोप लगाय हे। राज्य सभा सांसद रामविचार नेताम अउ विधायक नारायण चंदेल ह बलरामपुर म एक ठन पत्रकार वार्ता म कीहिन कि प्रदेश म समर्थन मूल्य म धान खरीदी म घलो अव्यवस्था हे, जेखर ले किसान मन परेशान हे। ओमन ह केंद्र सरकार डहार ले देगे नौ हजार करोड़ रूपिया के हिसाब घलो राज्य सरकार ले मंागीन हे ।
माओवादी वारदात
बीजापुर जिला म माओवादी मन डहार ले सुरक्षा बल ल निशाना बनाय बर लगाय गे बम के पे्रशर स्वीच म सुअर के पैर पड़े ले विस्फोट होगे। फेर ए घटना म कोनो प्रकार के जनहानि होय के खबर नइ हेै। मिले जानकारी के अनुसार गंगालूर थाना क्षेत्र म जिला पुलिस बल डिस्ट्रिक्ट रिजर्व गार्ड – डीआरजी अउ छत्तीसगढ़ सशस्त्र बल सीएएफ के संयुक्त टीम ह सर्चिंग म निकले रीहिस, इही दउरान पुसनार बेचापाल के बीच रद्दा ले करीबन सौ मीटर दूरिहा ये विस्फोट होइस। मउका ले दू ठिन टिफिन बम अउ पचास किलो के स्पाइक घलो बरामद करे गेहे। उंहें सुकमा जिला के एर्राबोर थाना क्षेत्र के एटेगट्टा ले केंद्रीय रिजर्व पुलिस बल सीआरपीएफ के जवान मन ह एक झन वारंटी माओवादी ल गिरप्तार करीन हे। इही जिला म कुकानार के कुन्ना इलाका ले घलो सुरक्षा बल ह एक झन माओवादी ल गिरप्तार करे म सफलता हासिल करे हे। ए दूनो माओवादी मन उपर कतकोन हिंसक वारदात म सामिल रेहे के आरोप हे।