1- प्रधानमंत्री नरेंद्र मोदी ह आज देश म दुनिया के सबले बड़े कोरोना टीकाकरण अभियान के शुरूआत करीन।
2– छत्तीसगढ़ म घलो आज ले कोरोना टीकाकरण के शुरूआत होइस- स्वास्थ्य मंत्री ह कोरोना टीका ल पूरा तरीका ले सुरक्षित बताइन।
अउ
3– राज्य सरकार ह समर्थन मूल्य म धान खरीदी खातिर खाद्य पदार्थ के पैकेजिंग म इस्तेमाल जूट बारदाना के उपयोग के अनुमति देहे।
कोरोना टीका 01
प्रधानमंत्री नरेंद्र मोदी ह कीहिन हे कि भारत के कोरोना टीकाकरण अभियान अति मानवीय सिद्धांत म आधारित हे। ओमन कीहिन कि एमा वो लोगन मन ल प्राथमिकता दे जाही जउन मन ल संक्रमण के सबले अधिक खतरा रहिथे। आज दुनिया के सबले बड़े ए कारिक्रम के वीडियो काॅन्फे्रसिंग के माध्यम ले शुभारंभ करत श्री मोदी ह कीहिन हे कि कोरोना टीका जउन मन बर सबले अधिक जरूरी हे, ओमन ल पहिली दे जाही।
श्री मोदी ह कीहिन हे कि टीकाकरण अभियान के पहिली चरण म 3 करोड़ लोगन मन ल टीका लगाये जाही। ओमन कीहिन कि दूसर चरण म 30 करोड़ लोगन मन के टीकाकरण करे जाही। प्रधानमंत्री ह वो वैज्ञानिक मनके सराहना करीन जउन मन पाछू कई महीना ले टीका बनाये म लगे रीहिस। वोमन कीहिन कि अतका कम समय म देश म दू ठिन टीका तियार करना गर्व के बात हे ।श्री मोदी ह कीहिन हे कि भारत म बने टीका विदेश के टीका मन ले सस्ता जरूर हे, फेर ओखर गुणवत्ता म कोनो कमी नइ हे।
कोरोना टीका 02
प्रधानमंत्री ह कीहिन हे कि टीका के दू खुराक देना जरूरी हे। अउ ए दूनो के बीच म कम से कम एक महीना के अंतर होना चाही। टीका के दूसर खुराक के दू सप्ताह बाद प्रतिरक्षक क्षमता विकसित हो जाही। ए अवसर म प्रधानमंत्री ह दवाई भी कड़ाई भी के मंत्र दीन हे। ओमन लोगन मनले आग्रह करे हे कि पहिली खुराक लेके बाद मास्क के इस्तेमाल करे बर अउ सुरक्षित दूरी बनाये राखे म लापरवाही झन बरतय।
प्रधानमंत्री ह कीहिन हे कि भारत देश आत्मविश्वास अउ आत्मनिर्भरता के संग कोरोना महामारी ले निपटे हे। भारत ये महामारी ले जइसन तरीका ले निपटे हे, ओखर दुनियाभर म प्रशंसा होय हे। श्री मोदी ह कीहिन हे कि भारत ह जम्मों दुनिया के सामने ये उदाहरण पेश करे हे कि केंद्र, राज्य सरकार, स्थानीय निकाय , सरकारी अउ गैर सरकारी संगठन मन कइसन मिलजुल के काम कर सकत हे।
केंद्रीय स्वास्थ्य मंत्री डॅाक्टर हर्षवर्धन दिल्ली के एम्स म टीकाकरण अभियान के शुभारंभ कारिक्रम म शामिल होइन। ए मउका म डॅाक्टर हर्षवर्धन ह कीहिन कि देश लोगन मनके भागीदारी के संग कोविड के खिलाफ लड़ाई म सफल रीहीं। स्वास्थ्य मंत्री ह कीहिन कि ए वैक्सीन कोविड महामारी के खिलाफ लड़ाई म संजीवनी के काम करही।
कोरोना टीका 03
एति छत्तीसगढ़ म घलो आज ले कोरोना टीकाकरण के शुरूआत होगे हवय। टीकाकरण खातिर प्रदेश म 97 केंद्र बनाय गेहे। कोरोना के टीका लगाये खातिर 7 हजार ले जादा लोगन मन ल प्रशिक्षित करे गेहे।
स्वास्थ्य मंत्री टी.एस. ंिसंहदेव ह रायपुर के पंडित जवाहरलाल नेहरू स्मृति चिकित्सालय महाविद्यालय पहुंचके कोरोना टीकाकरण अभियान के निरीक्षण करीन अउ कोरोना के टीका लगा चुके स्वास्थ्यकर्मी मनले उंखर स्वास्थ्य के जानकारी लीन। ए मउका म श्री सिंहदेव ह कीहिन कि अब हमन ल पूरा सावधानी ले जम्मों नियम मनके पालन करत कोरोना महामारी ल समाप्त करना हे। ओमन कीहिन कि कोरोना के टीका पूरा तरीका ले सुरक्षित हे अउ वैज्ञानिक मन डहार ले प्रमाणित करके बनाय गे हावय। टीका के कुछ साईड इफेक्ट होही त डॅाक्टर मनके निगरानी अउ सलाह ले ओला दूर कर ले जाही।
प्रदेश के प्रसिद्ध अउ पद्मश्री ले सम्मानित डॅाक्टर ए.टी. दाबके ह आज पंडित जवाहरलाल नेहरू चिकित्सा महाविद्यालय पहुंचके स्वेच्छा ले कोरोना के टीका लगवाइन। टीका लगाये के बाद 78 वर्ष के डॅाक्टर दाबके हे कीहिन हे कि ओमन ल टीका लगाये के बाद कोनो परेसानी नइ होइस। ओमन कीहिन कि ये टीका पूरा तरीका ले सुरक्षित हे।
कोरोना टीका-04
पंडित जवाहरलाल नेहरू स्मृति चिकित्सा महाविद्यालय रायपुर म स्वास्थ्यकर्मी तुलसा तांडील कोरोना के पहला टीका लगाये गीस। उंहें एम्स रायपुर म आज बीहनिया सबले पहिली इंहा के डायरेक्टर डॅाक्टर नीतिन नागरकर अउ सफाईकर्मी मलखान जांगड़े ल कोरोना के टीका लगाये गीस। रायपुर जिला चिकित्सालय पंडरी म वार्ड ब्वाॅय हेमंत दुबे अउ सफाईकर्मी चितरू थापर ल कोरोना के टीका लगाये गीस।
इही बीच रायपुर जिला के मुख्य चिकित्सा अउ स्वास्थ्य अधिकारी डॅाक्टर मीरा बघेल ह बताइन कि कोरोना के टीका लगाये खातिर टीकाकरण केंद्र मन म जम्मों तियारी कर लेगे हावय। मेडिकल प्रोटोकाल के अनुसार सुरक्षित टीकाकरण करे जावत हे।
प्रदेश के आने जिला मन म बनाए गे टीकाकरण केंद्र म आज कोरोना के टीका लगाये के शुरूआत घलो होइस। जांजगीर-चंापा जिला अस्पताल म डॅाक्टर अनिल जगत, राजनांदगंाव म पद्मश्री डॅाक्टर पुखराज बाफना, धमतरी म सी एम एच ओ डॅाक्टर डी.के. तुर्रे ल पहिला टीका लगाये गीस। एखरे संग बेमेतरा, सरगुजा, महासमुंद, बिलासपुर, कोरिया, मुंगेली, बालोद, दुर्ग, कोरबा ,बस्तर संभाग के आने आने जिला मन म भी कोरोना के टीका लगाये के शुरूआत करे गीस।
कोरोना टीकाकरण-सावधानियंा/नियम
प्रदेश म कोरोना टीकाकरण बर स्वास्थ्य विभाग ह कुछु सावधानी अउ नियम जारी करे हे। एखर मुताबिक गर्भवती अउ शिशुवती महिला मन ल अउ अठारा वर्ष ले कम उम्र के बच्चा मन ल कोरोना वैक्सीन नइ लगाय जाही। एखर अलावा कोविड नाइंटिन वैक्सीन के पहिली खुराक लेके बाद एनाफिलेक्टिक रिएक्शन या एलर्जी के शिकायत होय के स्थिति म दूसर खुराक नइ दे जाही। अइसन मनखे जेमन म कोरोना वायरस के सक्रिय लक्षण पाय गेहे या जेमन म कोरोना पाॅजीटिव पाय गेहे, अउ जउन मन ल कान्वलेसेंट प्लाज्मा देगे हवय, अइसन मनखे मन ल चार ले आठ हप्ता के बाद टीका लगाये जाही।
अभी के स्थिति म बीमार मनखे मन ल अउ अस्पताल म भर्ती मनखे मन ल स्वस्थ होय के बाद टीका लगाये जा सकथे। अइसन व्यक्ति जेखर शरीर म कभू रक्त स्राव या खून जमे जइसे परेसानी आय हे, ओमन ल विशेष सावधानी के साथ कोरोना के टीका लगाये जाही।
धान खरीदी
प्रदेश म समर्थन मूल्य म धान खरीदी करे जावत हे। उपार्जन केंद्र मन म बारदाना के कमी ल देखत राज्य सरकार ह धान खरीदी खातिर खाद्य पदार्थ के पैकेजिंग म जूट बारदाना के उपयोग के अनुमति देहे। खाद्य विभाग के आदेश के अनुसार जम्मों जिला कलेक्टर मन ल स्थानीय स्तर म बारदाना देवइया समिति अउ किसान मन ल उपयुक्त दर म बारदाना के पूर्ति करे बर केहे गेहे।
इही बीच महासमुंद जिला म राजस्व अउ खाद्य विभाग के टीम ह धान के अवैध भंडारण के सात ठिन आने आने मामला म 78 कुंटल धान जब्त करे हे।
हमर ग्राम सभा
पंचायत और ग्रामीण विकास मंत्री टी.एस. सिंहदेव ह काली रतिहा साढ़े सात बजे आकाशवाणी रायपुर ले प्रसारित होवइया विशेष कार्यक्रम ‘हमर ग्राम सभा‘ म राज्य शासन के नीती, योजना अउ कार्यक्रम के बारे म जानकारी दीहीं। ए कार्यक्रम ल मीडियम वेव 981 किलोहर्ट्ज म सुने जा सकत हे। ए कार्यक्रम ल प्रदेश के जम्मों आकाशवाणी केंद्र एके संगरा रिले करहीं।
अउ अब थोरकुन समाचार सार म-
– दिव्यांगजन सशक्तिकरण विभाग ह केंद्र सरकार के कार्यालय मन म दिव्यांगजन बर 3566 पद मन खातिर अधिसूचना जारी करे हे।
– छत्तीसगढ़ माध्यमिक शिक्षा मंडल रायपुर डहार ले चलाये जात डीएलएड परीक्षा सत्र दू हजार बीस के अवसर परीक्षा बर आॅनलाइन आवेदन सामान्य शुल्क के संग इकतीस जनवरी तक भरे जा सकही।
–
अउ
– पद्मश्री फूलबासन यादव ह टीवी शो कौन बनेगा करोड़पति म जीते पचास लाख रूपिया ल महिला उत्थान अउ ओखर संरक्षण म खर्चा करे के फैसला लीन हे।