टीकाकरण-स्वास्थ्य मंत्रालय
देश म सोलह जनवरी ले व्यापक स्तर म कोरोना टीकाकरण अभियान चलाय जाही। ए दुनिया के सबले बड़का टीकाकरण अभ्यास होही। जेखर सुरूवात प्रधानमंत्री नरेन्द्र मोदी करइया हे। केन्द्रीय स्वास्थ्य मंत्रालय ह केहे हे कि राष्ट्रपति कार्यालय के परामर्स ले पोलियो टीकाकरण दिवस अब इकतीस जनवरी के आयोजित होही।
राष्ट्रपति रामनाथ कोविंद ह तीस जनवरी के पोलियो राष्ट्रीय टीकाकरण दिवस के सुभारंभ करही। इही बीच, राष्ट्रीय भवन म कुछु लइका मन ल पोलियो के खुराक पिलाय जाही।
स्वास्थ्य मंत्रालय-स्पष्टीकरण
केन्द्रीय स्वास्थ्य मंत्रालय ह स्पष्ट करे हे कि कोविड वैक्सीन के आवंटन म कोन्हों भी राज्य के संग भेदभाव करे के सवाल नइ हे। सबो राज्य अउ केन्द्रसासित प्रदेस ल उंखर स्वास्थ्य कर्मी मनके संख्या के आधार म कोविशिल्ड अउ कोवैक्सीन टीका आवंटित करे गेहे। वैक्सीन खुराक के ए सुरूआती आपूर्ति हरय अउ आय वाले बेरा म जरूरत के हिसाब ले टीका के अउ खुराक उपलब्ध कराय जाही। मंत्रालय ह केहे हे कि ओमन ह राज्य मन ल अभियान सुरू करे के सलाह दीन हे, जेखर चलत हर दिन लगभग सौ लोगन मनके टीकाकरण करे जाही।
कोरोना वैक्सीन-01
भारत म दुनिया के सबले बड़का कोरोना टीकाकरण कारीकरम सुरू करे के तैयारी ह जोरसोर ले चलत हे। आने-आने विमान ले कोरोना के टीका ल देसभर के हवाई अड्डा म पहुंचाय जात हे, जहां ले टीका ल सहर अउ कस्बा म भेजे जात हे। देस म कोरोना टीकाकरण कारीकरम सनिवार सोलह जनवरी ले सुरू होना हे।
ऐति, छत्तीसगढ़ म कोरोना टीका के पहिली खेप काली रईपुर पहुंचीस एखर बार राज्य वैक्सीन भंडार ले जिला ल टीका बांटे के काम सुरू कर दे गेहे। राज्य टीकाकरण अधिकारी अमर सिंह ठाकुर ह बतईन कि प्रदेस ल कोविशिल्ड वैक्सीन के तीन लाख तेईस हजार खुराक मिले हे। आज सरगुजा अउ बस्तर संभाग म टीका भेजे गीस। काली रईपुर, दुरूग, बिलासपुर संभाग बर टीका बांटे गीस। विभाग डहार ले प्रोटोकाॅल के अनुसार सबो जिला म टीका के परिवहन अउ भंडारण के व्यवस्था करे गेहे।
उहें, महासमुंद जिला म कोरोना टीका पहुंचे के बाद कलेक्टर डोमन सिंह निरीक्षण करके टीका के सबो आदर्स प्रोटोकाॅल के पालन करे के निरदेस दीन। जिला ल कोरोना के पांच हजार चार सौ नब्बे डोज मिले हे, जेला कोल्ड स्टारेज म दू ले आठ डिग्री तापमान म रखे गेहे।
इही तरह ले बालौदाबाजार जिला म पहिली चरण म पांच हजार दू सौ अस्सी डोज पहुंचीस, जेला कोल्ड स्टारेज म सुरक्षित राखे गेहे। उहें, मुंगेली जिला म घलो कोरोना टीका के दू हजार आठ सौ बीस डोज पहुंच चुके हे।
ऐति, बीजापुर जिला म कोरोना टीका के दू हजार दू सौ बीस डोज पहुंचीस, जेला आने-आने उनतीस ठिन केन्द्र म राखे गेहे।
कोरोना वैक्सीन-02
इही बीच, प्रदेस के आने-आने जिला म घलो कोरोना टीकाकरण के तैयारी अंतिम चरण म पहुंच चुके हे। धमतरी जिला के मुख्य चिकित्सा अउ स्वास्थ्य अधिकारी डाॅक्टर डी.के. तुर्रे ह बतईन कि कोरोना के ए टीका पूरा तरीका ले सुरक्षित हे अउ लोगन मन ल कोनों भी प्रकार के अफवाह ले बचना चाही।
उहंें, कोरिया जिला के मुख्य चिकित्सा अउ स्वास्थ्य अधिकारी डाॅक्टर रामेश्वर शर्मा ह बतईन कि जिला म कोरोना टीका ल सुरक्षित राखे बर चैबीस ठिन कोल्ड स्टारेज चेन बनाय गेहे।
ऐति, राजनांदगांव जिला म कोरोना टीकाकरण बर एक ठिन हेल्पलान नंबर एक शून्य सात पांच जारी करे गेहे। ए नंबर म फोन करके कोन्हों भी मनखे टीकाकरण के संबंधित जानकारी ले सकत हे।
ओति, जांजगीर-चांपा जिला म कलेक्टर यशवंत कुमार ह कोरोना टीका के रखरखाव केन्द्र के जायजा लीन। एखर बाद ओमन ह स्वास्थ्य विभाग के अधिकारी मनके संग एक ठिन बइठका करीन अउ बतईन कि पहिली चरण म साढ़े दस हजार ले जादा लोगन मन ल कोरोना के टीका लगाय जाही।
प्रधानमंत्री कौशल विकास
प्रधानमंत्री कौशल विकास योजना के तीसर चरण काली देसभर के छह सौ जिला म सुरू करे जाही। कौशल विकास अउ उद्यमिता मंत्रालय के नेतृत्व म चलाय जात ए योजना म नवा जमाना के कौशल के संगेसंग कोरोना महामारी ले संबंधित कौशल उपर ध्यान केन्द्रित करे गेहे। योजना के तीसर चरण म दू हजार बीस-इक्कीस के बेरा आठ लाख लोगन मन ल प्रसिक्षण दे जाही, जिखर मन उपर नौ अरब अड़तालीस करोड़ रूपिया ले जादा के रासि खरचा होही। देस म कुसल लोगन मनके बड़का समूह तैयार करे बर दू सौ ले जादा औद्योगिक प्रसिक्षण संस्थान अउ सूचीबद्ध प्रसिक्षण केन्द्र, सात सौ उनतीस प्रधानमंत्री कौशल केन्द्र म ए योजना के चलत प्रसिक्षण पाठ्यक्रम सुरू करे जाही।
मुख्यमंत्री-महाराष्ट्र
मुख्यमंत्री भूपेश बघेल ह दू दिन के महाराष्ट्र दउरा म हवय। ए बेरा मुख्यमंत्री ह संगमनेर म आयोजित एक इिन समारोह म सामिल होईन अउ लोगन मन ल संबोधित करीन। ओमन कहिन कि देस के किसनहा अउ मजदूर मजबूत होही, त देस ह घलो मजबूत होही। उंखर सरकार ह गरीब अउ किसान मन ल राहत पहुंचाय के काम करे हे। संगेसंग छत्तीसगढ़ म व्यापार-उद्योग ल लेके घलो ओमन ह अपन बात राखीन। मुख्यमंत्री ह कहिन कि प्रदेस म व्यापार अउ उद्योग म कमी नइ आय हे। सितंबर-अक्टूबर महीना म चैबीस प्रतिसत अउ नवंबर महीना म छब्बीस प्रतिसत जीएसटी कलेक्शन के संग छत्तीसगढ़ ह पूरा देस म अव्वल रिहीस। उहें, स्वच्छता के मामला म घलो राज्य ह देसभर म पहिली स्थान हासिल करे हे।
शिक्षा का अधिकार
शिक्षा के अधिकार अधिनियम के तहत निजी स्कूल मन ल आॅनलाइन रासि प्रदान करे के मामला म छत्तीसगढ़ ह देस के पहिली राज्य बन गेहे। स्कूल सिक्षा मंत्री डाॅक्टर प्रेमसाय सिंह टेकाम ह करीब साढ़े चार हजार निजी स्कूल मन म एक सौ एक करोड़ रूपिया के प्रतिपूर्ति रासि आॅनलाइन ट्रांसफर करीन। डाॅक्टर टेकाम ह बतईन हे कि निजी स्कूल म वंचित वर्ग के लइका मनके फीस बेरा म नइ मिल पात रिहीस, जेखर सेती उंखर मनके खाता म सीधा भुगतान करे के बेवस्था करे गीस।
गणतंत्र दिवस
प्रदेस म गणतंत्र दिवस के परब मनाय खातिर राज्य सरकार ह कोरोना संक्रमण ले बचाव संबंधित दिसा-निरदेस जारी करे हे।
सामान्य प्रसासन विभाग डहार ले जारी करे गे आदेस के अनुसार मुख्य कार्यक्रम राजधानी रईपुर के पुलिस परेड मैदान म आयोजित करे जाही, जिहां राज्यपाल अनुसुईया उइके ध्वजारोहण करही अउ जनता के नाव अपन संदेस दीहीं। उहें, ए कारीकरम म कोरोना के खिलाफ लड़ाई लड़े वाले चिकित्सक, पुलिस कर्मी, स्वास्थ्य कर्मी अउ स्वच्छता कर्मी मन ल सम्मानित करे जाही। जानबा के अनुसार ए दरी के समारोह म स्कूली लइका मन सामिल नइ हो पाही। संगेसंग सांस्कृतिक कारीकरम घलो आयोजित नइ करे जाही। जनपद पंचायत कार्यालय म जनपद अध्यक्ष, नगरीय निकाय म महापौर या फेर अध्यक्ष अउ पंचायत मुख्यालय म सरपंच-मुखिया डहार ले झंडा फहराय जाही।
मकर संक्रांति
देसभर के आने-आने हिस्सा म मकर संक्रांति के परब आज हंसी-खुसी मनाय जात हे। ए तिहार अच्छा फसल, खुसहाली अउ सौभाग्य बर प्रकृति के प्रति आभार के प्रतीक हे। राष्ट्रपति रामनाथ कोविंद अउ उप राष्ट्रपति एम. वेकैंया नायडू ह देसवासी मन ल मकर संक्राति, पोंगल, बिहू, उत्तरायण अउ पौष पर्व के बधाई दीन हे। छत्तीसगढ़ के मुख्यमंत्री भूपेश बघेल ह घलो जम्मों प्रदेसवासी मन ल मकर संक्रांति, पोंगल अउ लोहड़ी के बधाई दीन हे।
उहें, प्रदेस म ए मउका म आने-आने कारीकरम के आयोजन करे जात हे। महासमुंद जिला म महासमुंद, गरियाबंद अउ रईपुर जिला के सीमा म स्थित त्रिवेणी संगम म आज घोंडुल मेला लगाय गीस। उहें, राजधानी रईपुर सहित कई ठिन आने-आने जगह म पतंग उत्सव के घलो आयोजन करे गीस।
कोरिया-खेल प्रतियोगिता
कोरिया जिला म ग्यारहवां राज्य स्तरीय सब जूनियर अउ सीनियर वुशु मार्शल आर्ट प्रतियोगिता के आयोजन करे गीस, जेमा प्रदेस के आने-आने जिला के टीम ह भाग लीन। ए प्रतियोगिता म डोंगरगढ़ के टीम ह अच्छा प्रदर्सन करत हुए एक ठिन रजत अउ एक ठिन कांस्य पदक हासिल करीन।