प्रधानमंत्री-वीडियो कान्फ्रेंसिंग
प्रधानमंत्री नरेन्द्र मोदी ह काली जम्मों राज्य के मुख्यमंत्री मनके संग वीडियो कान्फ्रेंसिंग के माध्यम ले गोठबात करही। प्रधानमंत्री कार्यालय ह बतईन कि गोठबात के दउरान कोरोना के स्थिति अउ कोरोना टीकाकरण सुरू करे के बारे म विचार-विमर्स हो सकथे। छत्तीसगढ़ के मुख्यमंत्री भूपेश बघेल ह घलो ए वर्चुअल बइठका म सामिल होही।
खबर के मुताबिक देस के औषध महानियंत्रक ह भारत म बने कोविशील्ड अउ कोवैक्सीन टीका के आपातकालीन इस्तेमाल के मंजूरी दे देहे। ए टीका के सुरक्षा अउ प्रभाव के मूल्यांकन के बाद ए फइसला ले गेहे।
प्रधानमंत्री-युवा संसद/युवा महोत्सव
प्रधानमंत्री नरेन्द्र मोदी ह बारह जनवरी के वर्चुअल माध्यम ले राष्ट्रीय युवा संसद के समापन समारोह ल संबोधित करही। समारोह के तीन राष्ट्रीय विजेता ए दउरान अपन विचार राखही। राष्ट्रीय युवा संसद समारोह के उद्देश्य अट्ठारह ले पच्चीस बछर के युवा मनके आवाज ल सुनना हे।
उहें, प्रधानमंत्री ह बारह जनवरी के राष्ट्रीय युवा महोत्सव के उद्घाटन करही। युवा कारीकरम अउ खेल मंत्रालय ह बारह जनवरी ले देस म एक हफ्ता के राष्ट्रीय युवा महोत्सव के वर्चुअल आयोजन करत हे। युवा मनके आदर्स स्वामी विवेकानंद के जयंती म हर बछर ए महोत्सव के आयोजन करे जाथे।
ए महोत्सव म सांस्कृतिक प्रतियोगिता, मार्शल आर्ट्स, प्रदर्शनी, बौद्धिक विचार-विमर्श, युवा कलाकार सिविर, संगोष्ठी अउ साहसिक कारीकरम के आयोजन करे जाही। संगेसंग महोत्सव के दउरान राष्ट्रीय युवा पुरस्कार घलो दे जाही।
लोकवाणी
मुख्यमंत्री भूपेश बघेल ह आज प्रसारित मासिक रेडियोवार्ता लोकवाणी के चैदहवां कड़ी म ए बखत युवा मन ले गोठबात करीन। मुख्यमंत्री कहिन कि युवा मनके प्रतिभा ल सवारे अउ ओमन ल आजीविका के सुघ्घर मकउा दे बर राज्य सरकार ह अपन कोसिस म कमी नइ करही। मुख्यमंत्री ह युवा मन ले गोठबात करत किहीन कि राज्य सकरार ह पहली घांव प्रदेस म छत्तीसगढ़ संस्कृति परिषद के गठन के फइसला लेहे।
मुख्यमंत्री ह कहिन कि प्रदेस के जम्मों नगरीय निकाय अउ पंचायत मन म राजीव युवा मितान क्लब के गठन करे जावत हे। एखर माध्यम ले युवा मनके विकास के काम करे जाही। ओमन किहीन कि हरेक जिला म स्थानीय बिसेसता के मुताबिक प्रसिक्षण सुविधा विकसित करे जाय अउ एमा उद्योग मनके मदद ले जाय के योजना हवय। श्री बघेल ह बतईन कि कौशल विकास योजना के तहत पाछु दू बछर म छियालीस हजार ले जादा युवा मन ह प्रसिक्षण लेहे, जेमा ले करीबन तेईस हजार युवा मन ह अपन काम सुरू कर डरे हे। ओमन किहीन कि युवा मनके सुविधा बर सरकार ह रोजगार संगी ऐप चालू करे हे, जउन ह प्रसिक्षित युवा अउ रोजगार देवइया मनके बीच पुल के काम करत हे।
लोकवाणी म मुख्यमंत्री ह किहीन कि लोगन मन ल स्व-रोजगार बर घलो आगू आना चाही। एखर बर राज्य सरकार ह विकास के नीति अपनाय हे, जेखर ले छोटे-बड़े हर स्तर म लोगन मन ल काम मिल सकय। श्री बघेल ह किहीन कि बेरोजगार युवा मन ल आत्मनिर्भर बनाय बर ई-श्रेणी पंजीयन योजना के सुरूवात करे गेहे।
रेडियोवार्ता लोकवाणी म मुख्यमंत्री ह बारह जनवरी ल स्वामी विवेकानंद के जयंती राष्ट्रीय युवा दिवस के मउका म उंखर प्रेरणा अउ सीख के बारे म चर्चा घलो युवा मन संग साझा करीन।
मुख्यमंत्री-नारायणपुर प्रवास
मुख्यमंत्री भूपेश बघेल ह अपन नारायणपुर दउरा के दूसर दिन आज फूलझाडू बनाय के जघा ल देखीन। ए दउरान श्री बघेल ह माईलोगिन मन ल फूलझाडू बर कच्चा माल अउ ओमन ल मिलइया मजदूरी के बारे म जानकारी लीन। मुख्यमंत्री ह आज मलखंभ के खिलाड़ी मनके रोमांचक प्रदर्सन ल घलो देखीन। ए मउका म ओमन किहीन कि मलखंभ खिलाड़ी बर डी.एम.एफ. मद ले सुघ्घर डाइट के बेवस्था करे जाही। ओमन कहिन कि मलखंभ के खिलाड़ी पूरा देस म छत्तीसगढ़ के नाम रोसन करत हे।
एखर पहिली, मुख्यमंत्री ह नारायणपुर अउ कांकेर जिला ल जोड़इया मुख्य सड़क के चैड़ीकरण के घोसना करे हे। अपन दू दिन के नारायणपुर दउरा के दउरान ओमन नारायणपुर म मंगल भवन बनाय बर, बंधुवा तरिया ल सुघ्घर बनाय खातिर छह करोड़ रूपिया मंजूरी देके घोसना करीन। उहें, नारायणपुर म पुलिस परिवार डहार ले बनाय गे पेट्राल पंप म मुख्यमंत्री ह पहिली ग्राहक के गाड़ी म खुदे पेट्रोल डालके बिल बुक ले पर्ची काटके ग्राहक ल सौंपीन। एखर पहिली, श्री बघेल ह ए पेट्रोल पंप के उद्घाटन घलो करीन। ए नवा बने पेट्रोल पंप म जम्मों काम करइया माईलोगिन हवय।
मुख्यमंत्री ह अपन दउरा के दउरान डीआरजी पुलिस के जवान ले घलो भेंट करीन अउ ओमन ल नवा बछर के बधाई दीन। ए मउका म ओमन किहीन कि माओवादी परेसानी ल खतम करे बर युवा मन ल मुख्यधारा म लाय के कोसिस के संगेसंग गांव म सिविर लगाके गांव वाले मन ल समझाना घलो चाही। एखर अलावा मुख्यमंत्री रामकृष्ण मिशन आश्रम डहार ले राखे गे स्वामी विवेकानंद जयंती अउ राष्ट्रीय युवा दिवस कारीकरम म सामिल होईन। ए मउका म ओमन किहीन कि नारायणपुर के ज्यादातर क्षेत्र के सर्वे नइ होय हे। फेर, राज्य सरकार सबो झिन ल पट्टा देके के दिसा म काम करत हे।
इही बीच, मुख्यमंत्री भूपेश बघेल बारह जनवरी के दुर्ग-भिलाई के दउरा म रइही। ए दउरान ओमन आने-आने कारीकरम म सामिल होही।
बर्ड फ्लू-परामर्श
केन्द्र सरकार के पशुपालन अउ डेयरी उद्योग विभाग ह बर्ड फ्लू संभावित राज्य मन ल बीमारी के फैलाव रोके बर परामर्स जारी करे हे। सात राज्य – केरल, राजस्थान, मध्यप्रदेश, हिमाचल प्रदेश, हरियाणा, गुजरात अउ उत्तरप्रदेश म बर्ड फ्लू के पुष्टि होगे हे। मंत्रालय ह किहीन कि छत्तीसगढ़ ले घलो पक्षी के असामान्य मउत के खबर मिल हे। मंत्रालय ह किहीन कि राज्य के पशुपालन विभाग के स्वास्थ्य विभाग के संग बीमारी के स्थिति ल लेके गोठबात करना चाही। तरिया, मुर्गा मंडी, चिड़ियाघर, मुर्गी फाॅर्म म निगरानी बढ़ाय जाना चाही अउ मरे पक्षी मनके उचित निपटारा करे जाना चाही।
ऐति, छत्तीसगढ़ के बालोद जिला के गिधाली गांव स्थित एक निजी पोल्ट्री फाॅर्म म दू सौ दस मुर्गी के असामान्य तरीका ले मउत होगे। उहें, दल्लीराजहरा म आज फिर तीन कौवा मृत पाय गेहे। एला मिलाके अब तक सोलह कौवा के मउत होगे हे। उहें, राजनांदगांव जिला के छुरिया रेस्ट हाउस के आगू घलो एक कौवा मरे मिले हे।
धान-कार्रवाई
प्रदेस म चालू खरीफ विपणन बछर म समर्थन मूल्य म धान खरीदी के काम चलत हे। उहें, अवैध धान के भंडारण अउ परिवहन म रोक लगाय बर जिला प्रसासन डहार ले सरलग कार्रवाई घलो करे जावत हे।
इही कड़ी म महासमुंद म आज राजस्व अउ खाद्य विभाग के टीम ह दू आने-आने मामला म पचास बोरा धान जब्त करे हे। जिला म अब तक अवैध धान भंडारण अउ परिवहन के एक सौ अंठावन प्रकरण दर्ज करे गेहे। उहें, करीबन चार हजार कुुंटल धान जब्त करे गेहे। ऐति, राजनांदगांव जिला म डोंगरगढ़ के अछोली धान खरीदी केन्द्र म जिला प्रसासन ह मालवाहक समेत पचहत्तर कट्टा धान जब्त करे हे।
मौसम
प्रदेस म अवइया चैबीस घंटा के दउरान न्यूनतम तापमान म कमी आय के सेती जाड़ा बाड़हे के संभावना हे। रईपुर स्थित मौसम विज्ञान केन्द्र के वैज्ञानिक एच.पी. चन्द्रा ह आकाशवाणी समाचार ल बतईन कि दक्षिण ले आवत गर्म हवा के सेती अभी राजधानी रईपुर समेत प्रदेस के कई ठिन जगह म तापमान म बढ़ोतरी होय हे।
वेबीनार
स्कूल शिक्षा मंत्री डाॅक्टर प्रेमसाय सिंह टेकाम समग्र सिक्षा के माध्यम ले प्रारंभिक भाषा अउ गणितीय कौशल के विकास के संबंध म राखे गे परिचर्चा म सामिल होईन। ए दउरान स्कूल सिक्षा मंत्री ह वेबीनार के माध्यल ले बस्तर, दंतेवाड़ा, सुकमा, कांकेर अउ बीजापुर जिला म काम करत सिक्षक मन ले सीधा संवाद करत उंखर विचार ल जानीन। ए मउका म सिक्षक मन ह स्कूल ल खोले जाय के संबंध म फइसला लेके के अधिकार साला प्रबंधन समिति मन ल दे जाय के बात करीन, जेखर ले स्थानीय परिस्थिति ल ध्यान म राख के अउ पालक मन संग गोठबात करके फइसला ले जा सकय।