देस म सोलह जनवरी ले कोविड-नाइंटीन के टीकाकरण अभियान सुरू हो जही। प्रधानमंत्री नरेन्द्र मोदी के अध्यक्षता म आज देस म कोरोना के स्थिति अउ राज्य अउ केन्द्रसासित प्रदेस म टीकाकरण के तैयारी के उच्च स्तरीय समीक्षा बइठका करे गीस। बइठका म मंत्रिमंडल सचिव, प्रधानमंत्री के प्रधान सचिव, स्वास्थ्य सचिव अउ संबंधित बड़का अधिकारी मन ह हिस्सा लीन।
प्रधानमंत्री ह आने-आने मुद्दा ले जुड़े कोविड प्रबंधन के स्थिति के जानकारी लीन। राष्ट्रीय नियामक ह कोविशील्ड अउ कोवैक्सीन ए दू ठिन टीका ल आपात स्थिति म इस्तेमाल करे के अनुमति देहे। ए टीका के सुरक्षा अउ प्रतिरोधक क्षमता ह प्रमाणित होगे हे।
ए वैक्सीन सबले पहिली करीबन तीन करोड़ स्वास्थ्य कर्मी अउ अग्रिम पंक्ति के कमरचारी मन ल उपलब्ध कराय जाही। एखर बाद पचास बछर ले जादा उमर के मनखे अउ गंभीर बीमारी ले ग्रसित लोगन मन ल टीका लगाय जाही। ए मनके संख्या लगभग सत्ताईस करोड़ हवय।
को-विन ऐप म अभी तक उनयासी लाख ले जादा लाभार्थी मन ह पंजीकृत होगे हे। उहें, कुल दू हजार तीन सौ साठ लोगन ल राष्ट्रीय स्तर के प्रसिक्षण सिविर म प्रसिक्षण दे गेहे।प्रधानमंत्री-प्रवासी भारतीय सम्मेलन
प्रधानमंत्री नरेन्द्र मोदी ह कहिन कि भारत म बने दू कोरोना टीका ले जम्मो मानवता के रक्षा करे बर तैयार हे। ओमन कहिन कि भारत म बने उत्पाद अउ उपाय ले पूरा विश्व ल फायदा होही। आज सोलहवां प्रवासी भारतीय दिवस सम्मेलन के वर्चुअल माध्यम ले उद्घाटन करत श्री मोदी ह बात किहीन।
प्रधानमंत्री ह कहिन कि प्रवासी भारतीय मन ह कोरोना महामारी ले निपटे म बड़का योगदान देहे। पीएम केयर्स कोष म उंखर योगदान ले देस म स्वास्थ्य सेवा ल मजबूत करे म मदद मिले हे। श्री मोदी ह युवा मन ले भारत के संस्कृति अउ गौरव के दुनियाभर म प्रचार-प्रसार करे खातिर टेक्नोलाॅजी के इस्तेमाल करे बर किहीन।
प्रधानमंत्री-वीडियो कान्फ्रेंसिंग
प्रधानमंत्री नरेन्द्र मोदी ह अवइया ग्यारह जनवरी के सबो राज्य के मुख्यमंत्री मन संग वीडियो कान्फ्रेंसिंग के माध्यम ले बइठका करके कोरोना संक्रमण के रोकथाम अउ टीकाकरण के तैयारी के बारे म गोठबात करही। छत्तीसगढ़ के मुख्यमंत्री भूपेश बघेल ह घलो ए वर्चुअल बइठका म सामिल होही।
उहें, मुख्यमंत्री के ग्यारह जनवरी के दंतेवाड़ा जिला म होवइया कारीकरम ह स्थगित होगे हे। मुख्यमंत्री काली दस जनवरी के बीजापुर जिला म आयोजित आने-आने कारीकरम म हिस्सा लीहीं।
सिकल सेल-पाॅयलेट प्रोजेक्ट
प्रदेस म सिकल सेल बीमारी के पहिचान अब गांव मन म हो सकही। स्वास्थ्य विभाग के जमीनी कार्यकर्ता मन गांव-गांव जाके ग्रामीण मन म सिकल सेल के जांच करही।
स्वास्थ्य मंत्री टी.एस. सिंहदेव ह ए संबंध म राज्य के पांच जिला मन म पाॅयलेट प्रोजेक्ट के शुरूवात करीन। दुरूग, सरगुजा, दंतेवाड़ा, कोरबा अउ महासमुंद जिला म ए प्रोजेक्ट बर स्वास्थ्य कार्यकर्ता मन ल आई.सी.एम.आर. के मुंबई स्थित इंस्टीट्यूट आॅफ इम्यूनो हिमेटोलाॅजी के बिसेसज्ञ मन डहार ले प्रसिक्षित करे जाही। ए नवा तकनीक के उपयोग कर के सिकल सेल बीमारी के पुष्टि ग्राम स्तर अउ प्राथमिक स्वास्थ्य केन्द्र मन म घलो करे जा सकही। एखर ले सिकल सेल बीमारी ले होवइया मृत्यु दर म कमी आही। संगेसंग गर्भवती माईलोगिन मनके जांच समय म होय ले मातृ अउ शिशु मृत्यु दर ल कम करे म घलो मदद मिलही।
खबर के मुताबिक प्रदेस म स्वास्थ्य विभाग डहार ले पाछु दू बछर म सिकल सेल के प्रकरण मनके पहिचान बर बड़का स्तर म स्क्रीनिंग करे गेहे। एमा एक लाख तीन हजार लोगन मन ल चिन्हांकित करके उंखर इलाज करे जावत हे।
कोरोना-समाचार
देस म अब तक कोविड नमूना के जांच अट्ठारह करोड़ ले जादा होगे हे। कोरोना ले स्वस्थ होय के दर बाढ़के छियानवे दशमलव चार एक प्रतिसत होगे हे। केन्द्रीय स्वास्थ्य मंत्रालय ह बतईन कि स्वस्थ होवइया मनके कुल संख्या बाढ़के एक करोड़ चैव्वन हजार ले जादा होगे हे। संक्रमित मामला के पूरा संख्या म केवल दो दशमलव एक-पांच प्रतिसत ही सक्रिय मामला बांचे हे।
ऐति, छत्तीसगढ़ म कोरोना संक्रमित मरीज मनके संख्या बाढ़के दो लाख सत्यासी हजार ले जादा होगे हे। अभी नौ हजार ले अधिक कोरोना संक्रमित मरीज मनके इलाज आने-आने अस्पताल अउ होम आइसोलेशन म चलत हे। उहें, प्रदेस म अब तक कोरोना ले तीन हजार चार सौ उनहत्तर लोगन मनके मउत होगे हे।
इही बीच, कोरोना संक्रमण ले बचाव बर जारूकता लाय खातिर राजनांदगांव सहर म हस्ताक्षर अभियान चलाय गीस। ए दउरान मास्क नइ पहिने लोगन मन ल कोरोना ले बचाव के दिसा-निरदेस के पालन करे के सपथ दिलाय गीस अउ ओमन ल मास्क घलो बांटे गीस।
मुख्यमंत्री-नारायणपुर
मुख्यमंत्री भूपेश बघेल ह आज नारायणपुर जिला म करीबन छियासी करोड़ रूपिया के आने-आने विकास कार्य के लोकार्पण अउ भूमिपूजन करीन। ए अवसर म मुख्यमंत्री ह नारायणपुर जिला म ए बछर सौ घोटुल के निर्माण करे के घोषणा करीन। संगेसंग ओमन जिला के एक सौ चार ग्राम पंचायत मन म नौ-नौ लाख रूपिया के लागत ले देवगुड़ी के विकास करे के घलो ऐलान करीन।
कारीकरम ल संबोधित करत मुख्यमंत्री ह किहीन कि बस्तर के घोटुल परंपरा ल देखे-समझे बर देस-बिदेस ले लोगन आथे। घोटुल हमर युवा के सामाजिक गतिविधि के केन्द्र रेहे हे अउ उहां बइठ के ओमन अपन गांव अउ क्षेत्र के विकास के गोठबात करथे।
मुख्यमंत्री ह ए प्रवास के दउरान केरलापाल म बने गौठान के निरीक्षण घलो करीन। ए मउका म मुख्यमंत्री ह राष्ट्रीय आजीविका मिशन अउ कृषि विज्ञान केन्द्र कोति ले महिला स्वास्थ्य समूह अउ पशुपालक मन बर करे जावत कतकोन काम के सराहना करीन।
लोकवाणी
मुख्यमंत्री भूपेश बघेल के मासिक रेडियावार्ता कारीकरम ‘‘लोकवाणी‘‘ के चैदहवां कड़ी के प्रसारण काली दस जनवरी के होही। मुख्यमंत्री लोकवाणी म ए बखत युवा मन ले गोठबात करही। ए कारीकरम के प्रसारण छत्तीसगढ़ स्थित आकाशवाणी के सबो केन्द्र अउ एफ.एम. रेडियो के अलावा क्षेत्रीय समाचार चैनल मन म बिहनिया साढ़े दस बजे ले ग्यारह बजे तक करे जाही।
धान खरीदी
प्रदेस म चालू खरीफ विपणन बछर म समर्थन मूल्य म धान खरीदी के काम चलत हे। अब तक चैंसठ लाख मीटरिक टन ले जादा धान के खरीदी होगे हे। ए दउरान प्रदेस के करीबन सोलह लाख किसान मन ह धान बेचे हे। धान खरीदी के ए काम इकतीस जनवरी तक चलही।
उहें, धान खरीदी अउ चावल उपार्जन के मामला अब हाईकोर्ट पहुंच गेहे। हाईकोर्ट म एक ठिन जनहित याचिका दायर करके ए मांग करे गेहे कि केन्द्र सरकार ल निरदेसित करे जाय कि ओ ह एफ.सी.आई. ल छत्तीसगढ़ ले साठ लाख मीटरिक टन चावल उपार्जन के अनुमति प्रदान करय।
इही बीच, महासमुंद जिला म धान भंडारण के आने-आने चार ठिन मामला म एक सौ छियालीस कुंटल धान जब्त करे गेहे।
गढ़बो नवा छत्तीसगढ़
स्वामी विवेकानंद के जयंती राष्ट्रीय युवा दिवस के मउका म जनसंपर्क विभाग डहार ले ‘‘गड़बो नवा छत्तीसगढ़‘ अउ छत्तीसगढ़ युवा‘ बिसय म स्लोगन प्रतियोगिता के आयोजन करे जाही। अब तक साढ़े दस हजार लोगन मन आॅनलाईन पंजीयन करा डरे हे। ए स्लोगन ल खुदे लिखके ओखर भाषा छत्तीसगढ़ी, हिंदी अउ अंग्रेजी म होना चाही। सबो प्रतिभागी मन ल डिजिटल प्रमाण पत्र अउ सौ सबले बढ़िया स्लोगन ल जनसंपर्क विभाग कोति ले एक-एक हजार रूपिया के नगद पुरस्कार दे जाही।
ए प्रतियोगिता म भाग लेवइया इच्छुक प्रतिभागी मन अवइया काली दस जनवरी तक जनसंपर्क विभाग के वेबसाइट म आॅनलाइन पंजीयन करा सकत हे।
सुभाष चन्द्र बोस जयंती-समिति
नेताजी सुभाष चन्द्र बोस के एक सौ पच्चीसवां जयंती मनाय बर प्रधानमंत्री नरेन्द्र मोदी के अध्यक्षता म एक ठिन उच्च स्तरीय समिति के गठन करे गेहे। ए संबंध म आज अधिसूचना जारी कर दे गेहे। केन्द्रीय संस्कृति मंत्रालय ह कहिन कि ए उच्च स्तरीय समिति ह तेईस जनवरी ले एक बछर तक चलइया आने-आने कारीकरम के रूपरेखा तैयार करही।
आयुष्मान भारत-ई कार्ड
आयुष्मान भारत प्रधानमंत्री जन-आरोग्य योजना अउ डाॅक्टर खूबचंद बघेल स्वास्थ्य सहायता योजना के अंतर्गत पात्र परिवार मन ल मुफ्त ई-कार्ड बांटे जावत हे। ई-कार्ड बने ले हितग्राही मन ल ए दूनों योजना के तहत उंखर पात्रता के जानकारी अउ इलाज के सुविधा मिल सकही।
महासमुंद जिला के मुख्य चिकित्सा अउ स्वास्थ्य अधिकारी एन.के. मंडपे ह बतईन कि राज्य सासन डहार ले संचालित डाॅक्टर खूबचंद बघेल स्वास्थ्य सहायता योजना के तहत अंत्योदय अउ प्राथमिकता रासन कार्डधारी परिवार मन ल पांच लाख रूपिया तक अउ एपीएल परिवार मन ल पचास हजार रूपिया तक के स्वास्थ्य सहायता देके प्रावधान हे। ई-कार्ड बनवाय खातिर हितग्राही मन ल अपन रासन कार्ड अउ फोटो पहिचान पत्र लेके लकठा के स्वास्थ्य केन्द्र म जाय बर पड़ही।
संक्षिप्त समाचार
– बीजापुर जिला म सुरक्षा बल मन ह बासागुड़ा थाना क्षेत्र ले एक महिला माओवादी ल गिरफ्तार करे हे।
– राजनांदगांव जिला म आंगनबाड़ी कार्यकर्ता अउ सहायिका यूनियन ह अपन अउ किसान मनके दस सूत्रीय मांग ल लेके प्रधानमंत्री के नाव जिला प्रसासन ल ज्ञापन सौंपीन।
– राजनांदगांव अउ मुंगेली जिला म छत्तीसगढ़ ग्राम रोजगार सहायक अपन आने-आने मांग ल लेके पाछु पन्द्रह दिन ले प्रदर्सन करत हे।
अउ
– कोंडागांव जिला म पोस्ट मैट्रिक छात्रवृत्ति बर आॅनलाइन आवेदन करे के आखिरी तारीख काली दस जनवरी हवय।