प्रधानमंत्री गैस पाइपलाईन
प्रधानमंत्री नरेंद्र मोदी ह एक राष्ट्र-एक गैस ग्रीड कार्यक्रम ले देश ल स्वच्छ उर्जा देवाय के आश्वासन दीन। ओमन यहू कीहिन कि उर्जा उत्पादन म प्राकृतिक गैस के हिस्सेदारी मौजूदा छै दशमलव दू प्रतिशत ले बढ़ाके पंद्रह प्रतिशत कर दे जाही। प्रधानमंत्री ह केरल म कोच्चि ले कर्नाटक मंगलुरू तक चार सौ पचास किलोमीटर लंबा प्राकृतिक गैस पाइपलाइन के उद्घाटन करत आज ये बात कीहिन।
श्री मोदी ह कीहिन कि केंद्र सरकार के नीतिगत पहल ले रसोई गैस ल लोगन जादा बउरत हे, जेखर ले कैरोसिन उपर राज्य के निर्भरता कम होय हे। उज्जवला योजना म आठ करोड़ गरीब मन ल रसोई गैस कनेक्शन दे गेहे। उंहें कोरोना महामारी के सेती तालाबंदी के बेरा केंद्र सरकार ह बारा करोड़ सिलेण्डर मुफत म देवाय हे। प्रधानमंत्री ह कीहिन कि ये पाईपलाइन ले देश के हजारों करेाड़ रूपिया के विदेशी मुद्रा के खरच म बचत होही।
कोरोना टीकारण माॅकड्रील
राज्य के इक्कीस ठिन जिला म कोरोना टीकाकरण बर सात अउ आठ जनवरी के माॅकड्रील करे जाही । जेखर उद्देश्य कोरोना टीकाकरण के तियारी के परीक्षण करना हे।
चुने गे जिला म ये माॅकड्रिल बीहनिया दस बजे ले मंझनियंा दू बजे तक होही। उंहें संझा पांच बजे तक जिला टाॅस्क फोर्स कोति ले एखर समीक्षा करे जाही। जेखर रिपोर्ट नौ जनवरी के राज्य सरकार तीर भेजे जाही। राष्ट्रीय स्वास्थ्य मिशन के संचालक डॅाक्टर प्रियंका शुक्ला ह बताइन कि माॅकड्रिल के बेरा कोविन एप म एंट्री ल लेके वैक्सिन लगाय तक कतका बेरा लागथे यहू देखे जाही।
डॅाक्टर शुक्ला ह बताइन कि ये माॅकड्रील एक शहर अउ एक गावं गंवई म करे जाना हे । एखर बर कोविन लिंक ल बउरे जाही। सात जनवरी के बलरामपुर, बीजापुर, दंतेवाड़ा, जशपुर, कांकेर, कोंडागांव, कोरिया, नारायणपुर, सुकमा अउ सूरजपुर जिला म माॅकड्रील होही अउ आठ तारीख के बालोद, बलौदाबाजार, बेमेतरा, धमरतरी, गरियाबंद, जांजगीर-चंापा, कवर्धा, कोरबा, महासमुंद, मुंगेली अउ रायगढ़ जिला म कोरोना टीकाकरण के तियारी के परीक्षण करे जाही।
इही बीच स्वास्थ्य विशेषज्ञ मन ह लोगन ले अपील करीन हे कि कोनो किसम के लक्षण दिखतेच कोरोना के जांच करावंय, जेखर ले दिगर मनखे तक संक्रमण झन फैले।
धान खरीदी
समर्थन मूल्य म होवत धान खरीदी म पाछू महीना भर म प्रदेश के पचास फीसदी ले जादा किसान मन अपन धान बेच डरे हे। अब तक करीबन पचपन लाख मीटरिक टन धान बिसाय गेहे। जेखर बर राज्य के बारा लाख ले जादा किसान मन ल करीबन नौ हजार करोड़ रूपिया ले जादा के भुगतान होय हे। राज्य सरकार कोति ले अब तक धान बिसाय बर तीन लाख तीन हजार गठान बारदाना के बेवस्था करे गेहे। उंहे राज्य सरकार ह केंद्र ले पैंतीस हजार गठान नवा जूट बारदाना के आपूर्ति के मांग करीन हे। अधिकारिक जानकारी के मुताबिक प्रदेश म धान बिसाय के काम बने ढंग ले चलत हे।
इही बीच राजनंादगंाव म किसान मन ह धान खरीदी केंद्र म बने ढंग ले काम करे अउ बारदाना देवाय के मांग ल लेके आज प्रदर्शन करीन।
जानकारी के मुताबिक किसान मन अपन मांग ल लेके एसडीएम कार्यालय जाय के प्रयास करत रीहिन। फेर एखर पहिली पुलिस ह ये मन ल रोक दीन। पाछू एसडीएम मुकेश रावटे ह किसान मनले गोठबात करीन अउ उंखर मंाग ल जल्दी पूरा कराय के भरोसा देवाइन। एखर संगेसंग जिला के डोंगरगांव, डोंगरगढ़, खैरागढ़ अउ मोहला एसडीएम कार्यालय म घलो किसान मन ह प्रदर्शन करीन।
उंहें महासमुंद जिला कलेक्टर डोमन सिंह ह महासमुंद अउ बागबाहरा के तीन ठिन धान खरीदी केंद्र के जांच करत मामा-भंाजा, चरौदा अउ खोपली धान खरीदी केंद्र म किसान मनले गोठबात करके भुगतान के संबंध म जानकारी लीन।
उंहें जिला म राजस्व अउ खाद्य विभाग के टीम ह अवैध रूप ले धान भंडारण के आने आने मामला म तीन झन के खिलाफ कार्रवाई करे हे अउ चिरमकेल, तिलंजनपुर, अउ परेवापली, गांव ले करीबन एक सौ बीस बोरा धान जब्त करीन हे।
मुख्यमंत्री कार्यक्रम
मुख्यमंत्री भूपेश बघेल ह जांजगीर चंापा जिला म नवा मेडिकल काॅलेज खोले के घोषणा करीन हे। श्री बघेल आज जांजगीर म राखे गे किसान सम्मेन म शामिल होइन अउ ये मउका म ओमन चंद्रपुर विधानसभा क्षेत्र के हंसदेव परियोजना म शामिल तीन ठिन नहर के रख-रखाव अउ सुधार के काम करे के संगेसंग गांव-गांव तक डेयरी विकास के क्षेत्र म काम करे के घोषणा करीन।
श्री बघेल ह यहू कीहिन कि किसान मनके बेहतरी बर चलाय जात राजीव गंाधी किसान न्याय योजना जारी रीही। ये मउका म ओमन करीबन एक हजार बंयासी करोड़ रूपिया ले जादा के आने आने निर्माण काम के लोकार्पण अउ भुंइया पूजन करीन।
एखर पहिली काली मुख्यमंत्री ह कोरबा दउरा के बेरा एक जनसभा म बोलत कोरबा मेडिकल काॅलेज के नामकरण स्वर्गीय बिसाहू दास महंत के नाव म करे के घोषणा करे के संगेसंग अजगर बहार अउ बरपाली ल तहसील बनाय के बात कीहिन।
मुख्यमंत्री ह कीहिन कि कोरबा के अशोक वाटिका उद्यान ल आक्सिजोन के रूप म विकसित करे जाही। एखर बर दस करोड़ रूपिया मंजूर करीन। उंहें भैंसमा के महाविद्यालय के नाव प्यारेलाल कंवर के नाव म अउ कोरबा के इंद्रा स्टेडियम म खेल अकादमी बनाय के घलो घोषणा करीन।
उंहें मुख्यमंत्री ह कीहिन कि लेमरू अभ्यारण्य क्षेत्र म रहइया क्षेत्र म आदिवासी समुदाय के लोगन के विस्थापन नइ करे जाही अउ इंहा के लोगन ल वन अधिकार पत्र बांटे के संग पहिली असन जम्मों सुविधा मिलत रीही। मुख्यमंत्री ह ये क्षेत्र के लोगन ल भरोसा देवाइन कि ओमन ल लघु वनोपज सकेले म कोनो किसम के परेसानी नइ होही।
भाजपा बैठक
भारतीय जनता पार्टी के राष्ट्रीय महामंत्री अउ प्रदेश प्रभारी डी. पुरंदेश्वरी ह कीहिन हे कि मंडल ले लेके जिला स्तर तक पार्टी पदाधिकारी अउ निर्वाचित जनप्रतिनिधि मनले गोठबात करके संगठन के मजबूती म जोर दे जात हे ये बात ओमन आज महासमुंद म पत्रकार मनले गोठबात करत कीहिन।
प्रदेश प्रभारी ह राज्य सरकार उपर आरोप लगाइन कि केंद्र सरकार कोति ले जउन रकम दे गेहे, ओला राज्य सरकार किसान मन ल नइ देवत हे। संगेसंग राज्य सरकार धान बिसाय बर बारदाना के आपूर्ति घलो नइ कर पात हे। ओमन राज्य सरकार उपर वादाखिलाफी के आरोप लगाइन अउ कीहिन कि केंद्र सरकार के उपलब्धि ल जन-जन तक अमराय खातिर छत्तीसगढ़ के दउरा म पहुंचीन हे। पार्टी के राष्ट्रीय महामंत्री ह केंद्र सरकार कोति ले पारित कृषि कानून ल किसान मनके हित के बताइन ।
प्रदेश प्रभारी ह आज महासमुंद जिला अउ तुमगंाव मंडल के भाजपा पदाधिकारी मनके बइठका लीन। ये बेरा म भाजपा के प्रदेश अध्यक्ष विष्णुदेव साय, प्रदेश महामंत्री भूपेन्द्र सवन्नी अउ सांसद चुन्नीलाल साहू के संग आने पदाधिकारी मौजूद रीहिन। उंहें भाजपा के सहप्रभारी नीतिन नवीन घलो बेमेतरा पहुंचीन। बेमेतरा दउरा के बेरा श्री नवीन ह पार्टी पदाधिकारी मनले कीहिन कि संगठन के मजबूती बर काम करय अउ सामाजिक काम म जुर मिलके भागीदारी निभावय।
सीआरपीएफ डीजी दौरा माओवादी मुठभेड़
केंद्रीय रिजर्व पुलिस बल – सीआरपीएफ के डीजी डॅाक्टर ए.पी. माहेश्वरी बीजापुर जिला के दउरा म पहुंचे हे। एक दिवसीय दउरा के बेरा ओमन जिला म माओवादी मनके खिलाफ जारी अभियान के संबंध म जानकारी लीन। श्री माहेश्वरी सीआरपीएफ के अधिकारी मन संग बइठका करीन अउ जवान मन संग गोठबात करके उंखर हौसला बढ़ाइन।
उंहंे इही जिला म सुरक्षा बल अउ माओवादी मनके बीच मुठभेड़ होइस हे। जिला पुलिस बल कोबरा अउ सीआरपीएफ के जवान गश्त म निकले रीहिन इही बेरा गंगालूर थाना क्षेत्र के हिरमा गोंडा के जंगल म माओवादी मन ह सुरक्षा बल उपर फायरिंग शुरू कर दीन। जवान मन कोति ले करे गे कार्रवाई के बाद माओवादी मन जंगल कोति भाग गे । घटना के जगा ले एक बंदूक, तीर-कमान, अउ माओवादी मनके दिगर जीनिस बरामद करे गेहे।