कोरोना-मरीज
प्रदेस म आज संझा तक कोरोना संक्रमित छब्बीस नवा मरीज के पुष्टि होय हे। एमा तेरह मरीज राजधानी रईपुर के हरय। उहें, जगदलपुर ले दस अउ दंतेवाड़ा ले तीन मरीज मिले हे। राजधानी रईपुर म मिले तेरह कोरोना मरीज मन म एम्स के मेडिकल स्टोर के कमरचारी अउ एक झिन सिविल इंजीनियर सामिल हे। एखरे संग विदेस ले आय एक झिन छात्र अउ दिल्ली ले आय एक झिन माईलोगिन घलो कोरोना संक्रमित पाय गेहे।
ओति, बस्तर जिला के दरभा विकासखंड मुख्यालय म स्थित क्वारेंटाइन सेंटर म आज दस प्रवासी मजदूर मनके रिपोर्ट कोरोना पाॅजिटिव आय हे। ए सबो मरीज मन ल इलाज बर मेडिकल कालेज डिमरापाल म भर्ती कराय गेहे।
इंडिगो विमान-यात्री अपील
स्वास्थ्य विभाग ह पाछु इक्कीस जून के इंडिगो विमान ले नई दिल्ली ले रईपुर अवइया यात्री मन ले क्वारेंटाइन म रेहे के अपील करे हे। ए विमान म यात्रा करइया एक झिन यात्री कोरोना पाॅजिटिव पाय गेहे। स्वास्थ्य विभाग ह ए विमान ले अवइया यात्री मन ले सुरक्षा ल देखत पेड क्वारेंटाइन के दिसा-निरदेस के कड़ाई ले पालन करे बर केहे हे।
गरीब कल्याण अन्न योजना
प्रधानमंत्री गरीब कल्याण अन्न योजना के दूसर चरण म पांच अउ महीना तक देस के अस्सी करोड़ लोगन के बीच परिवार के जम्मों सदस्य ल पांच किलो गेहूं या चाउर अउ हरेक लाभार्थी परिवार ल एक किलो चना मुफत म दे जाही।
केन्द्रीय खाद्य अउ सार्वजनिक वितरण मंत्री रामविलास पासवान ह ए योजना के दूसर चरण के जानकारी दीन अउ राज्य मन ल उपरहा खाद्यान्न उपलब्ध कराय बर सरकार डहार ले उठाय गे कदम के जानकारी घलो दीन। ओमन ह प्रधानमंत्री नरेन्द्र मोदी के प्रतिबद्धा ल बतावत किहीन कि देस म गरीब अउ जरूरतमंद मनखे भूखे झन राहय। कोरोना वायरस महामारी के बेरा बरसा अउ आगामी तिहार के मौसम के दउरान ओमन ल मुफ्त म रासन दे जाही। श्री पासवान ह किहीन कि तीस नवंबर तक राष्ट्रीय खाद्य सुरक्षा अधिनियम के लाभार्थी मन ल कुल दू सौ लाख मीटरिक टन अनाज अउ नौ लाख अठहत्तर हजार मीटरिक टन चना बांटे जाही। ओमन बतईन कि प्रधानमंत्री गरीब कल्याण अन्न योजना के दूनों चरण म कुल मिलाके एक लाख पचास हजार करोड़ रूपिया खरचा होही।
रेलवे-रिफंड
दक्षिण पूर्व मध्म रेलवे के आरक्षण केन्द्र मन म पाछु बाईस मई ले तीस जून तक आरक्षित टिकिट बुकिंग के दउरान तीन लाख तीन हजार ले जादा यात्री मन ह टिकिट रद्द कराय हे, जेखर अवेजी म यात्री मन ल उन्नीस करोड़ सड़सठ लाख रूपिया ले जादा के रिफंड दे गेहे। अइसने, आॅनलाईन अउ ई-टिकिट ले छब्बीस हजार ले जादा यात्री मन ह टिकिट रद्द कराय हे, जउन मन ल एक करोड़ अट्ठायासी लाख रूपिया ले जादा के रासि वापिस करे गेहे।
इही बीच, नई दिल्ली ले बिलासपुर तक चलइया राजधानी स्पेशल ट्रेन के बेरा म आंसिक परिवर्तन करे गेहे।
वित्त आयोग-राशि आवंटन
राज्य सरकार ह सबो ग्राम, जनपद अउ जिला पंचायत मन म पन्द्रहवां वित्त आयोग डहार ले जारी रासि आंवटित कर देहे। केन्द्र सरकार ह प्रदेस के पंचायती राज संस्था मन बर तीन सौ तिरसठ करोड़ पचास लाख रूपिया के रासि जारी करे रिहीन।
प्रदेस के पंचायत अउ ग्रामीण विकास ह सबो जिला पंचायत के मुख्य कार्यपालन अधिकारी मन ल परिपत्र जारी करके ग्राम अउ जनपद पंचायत मनके बैंक खाता म तुरते रासि अंतरित करे के निरदेस देहे। पन्द्रहवां वित्त आयोग ले मिले अनुदान ल राज्य वित्त आयोग के अनुसंसा म ग्राम पंचायत मन ल नब्बे, जनपद अउ जिला पंचायत मन ल पांच-पांच प्रतिसत रासि बांटे जाही।
राज्यपाल-मुलाकात
राज्यपाल अनुसुईया उइके ले आज राजभवन म केन्द्रीय खादी अउ ग्रामोउद्योग मंत्रालय के छत्तीसगढ़ राज्य कार्यालय के उप मुख्य कार्यकारी अधिकारी एस.एस. त्रिभुवन ह भेंट करीन। ए मउका म राज्यपाल ह किहीन कि प्रधानमंत्री ह आत्मनिर्भर अभियान के सुरूवात करे हे। ओमन किहीन कि एखर बर जरूरी हे कि युवा मन ह स्व-रोजगार ले जुड़य। ग्रामीण अउ आदिवासी क्षेत्र म माईलोगिन मन घलो स्व-सहायता समूह बनाके खुदे उद्यम सुरू कर सकथे। एखर ले माईलोगिन मन जागरूक अउ सशक्त होही।
आॅक्सीजोन-लोकार्पण
मुख्यमंत्री भूपेश बघेल ह आज राजधानी रईपुर म उन्नीस एकड़ बनाय गे आॅक्सीजोन के लोकार्पण करीन। करीबन ग्यारह करोड़ रूपिया के लागत ले बने ए आॅक्सीजन पर्यावरण संरक्षण म सुघ्घर भूमिका निभाही। ए मउका म मुख्यमंत्री ह चंदन के पौधा लगाईन।
कलेक्ट्रेट परिसर के तीर बनाय गे ए आॅक्सीजोन म अब तक चार करोड़ रूपिया के रासि ले पचहत्तर प्रजाति मनके चार हजार ले जादा पेड-पौधा लगाय गेहे।
टेली-मेडिसिन हब
प्रदेस के सबो विशेषकृत कोविड अउ आने अस्पताल मन म वीडियो कान्फ्रेंसिंग अउ टेली मेडिसिन के माध्मम ले उपचार संबंधी परामर्स दे बर रईपुर के मेकाहारा म ‘‘सेंटर आॅफ एक्सीलेंस टेली-मेडिसिन हब‘‘ स्थापित करे गेहे। स्वास्थ्य मंत्री टी.एस. सिंहदेव ह प्रदेस के पहिली ए टेली-मेडिसिन हब के उद्घाटन करीन।
ए मउका म स्वास्थ्य मंत्री ह किहीन कि ए टेली कसल्टेशन हब के माध्यम ले राज्य के सबो अस्पताल अउ हेल्थ एंड वेलनेंस सेंटर आपस म इंटरनेट के माध्यम ले जुड़ के चिकित्सा बिसेसज्ञ मन ले इलाज ले संबंधित आॅनलाईन परामर्स ले सकही।
प्रधानमंत्री फसल बीमा योजना
प्रधानमंत्री फसल बीमा योजना के तहत किसान खरीफ फसल मनके बीमा, लोक सेवा अउ सामान्य सेवा केन्द्र मन ले करा सकथे। एखर बर कोनों सुल्क नइ लगय। काली एक जुलाई ले फसल मनके बीमा कराय के कार्रवाई सुरू होगे हे। राजनांदगांव जिला म किसान मन बर ए सुविधा एक हजार ले जादा सेंटर मन म शुरू करे गेहे। जिला बर एग्रीकल्चर इंश्योरेंस कंपनी आॅफ इंडिया लिमिटेड ल अधिकृत करे गेहे। ए योजना के तहत ऋणी अउ अऋणी किसान अपन फसल मनके बीमा अवइया पन्द्रह जुलाई तक करा सकहीं।
भाजयुमो-आंदोलन
भारतीय जनता युवा मोर्चा ह काली तीन जुलाई के प्रदेस सरकार के कथित वादाखिलाफ के विरोध म आंदोलन करे के निर्णय लेहे। भारतीय जनता युवा मोर्चा के प्रदेस अध्यक्ष विजय शर्मा ह बतईन कि काली तीन जुलाई के मंझनिया तीन बजे सोसल डिस्टेंसिंग के पालन करत तीन के संख्या म कार्यकर्ता अउ युवा जनप्रतिनिधि अपन-अपन घर म सरकार के पुतला जलाही अउ एखर सोसल मीडिया म सीधा प्रसारण करही।
माओवादी-हत्या
बीजापुर जिला के जांगला थाना क्षेत्र म माओवादी मन ह पाछु रतिहा एक झिन सहायक आरक्षक के धारदार हथियार ले हत्या कर दीन।
पुलिस अधीक्षक कमलोचन कश्यप ह घटना के पुष्टि करत बतईन कि फरसेगढ़ म पदस्थ सहायक आरक्षक सोमारू पोयाम छुट्टी म अपन घर ग्राम माटवाड़ा गे रिहीन, जिहां पाछु रतिहा माओवादी मन गांव म ही तीर अउ टंगिया ले हमला कर ओखर हत्या कर दीन। ए घटना म आरक्षक के मां अउ पिता घायल होगे।
हादसा
बलरामपुर जिला म आज होय सड़क हादसा म एक झिन दंपत्ति के मउत होगे। खबर के मुताबिक जिला के रामानुजगंज थाना के तहत एक झिन दंपत्ति मोटर साइकिल ले महाराजगंज जावत रिहीन। इही दउरान आरागाही के तीर हाईवा ह मोटर साइकिल ल टक्कर मार दीस। ए हादसा म मउका म ही दंपत्ति के मउत होगे। पुलिस ह हाईवा ल जब्त कर लीन।
अवैध रेत परिवहन
जांजगीर-चांपा जिला के अमोदा रेत घाट के तीर काली रतिहा रेती ले भरे हाईवा ह जांजगीर एसडीएम के गाड़ी ल ठोकर मार दीन। ए हादसा म कोनों जनहानि नइ होय हे। उहें, ए दउरान रेती घाट म अवैध उत्खनन अउ परिवहन म लगे नौ ट्रैक्टर, चार हाईवा अउ एक जेसीबी ल जब्त करे गेहे।
ऐति, बलौदा क्षेत्र म घलो तहसीलदार अउ नायब तहसीलदार के टीम डहार ले अवैध रेत परिवहन करत छह ठिन गाड़ी ल जब्त करे गीस।
वनोपज संग्रहण
लघु वनोपज संग्रहण के मामला म छत्तीसगढ़ देस म पहिली स्थान म हवय। राज्य म पाछु छह साल म एक सौ चार करोड़ रूपिया के रासि के करीबन डेढ़ लाख क्विंटल लघु वनोपज मनके संग्रहण हो चुके हे, जउन ह ए सीजन के दउरान देस म अब तक संग्रहित कुल लघु वनोपज मनके तिहत्तर प्रतिसत ले उपरहा हे। अइसने, छत्तीसगढ़ ह सौ करोड़ रूपिया ले जादा रासि के लघु वनोपज मनके वार्षिक संग्रहण लक्ष्य ल छह महीना ले पहिली हासिल कर लेहे।
वन मंत्री मोहम्मद अकबर ह बतईन कि हाले म राज्य सरकार डहार ले लघु वनोपज के संख्या बढ़ाके इकतीस कर दे गेहे।
अनलाॅक-अर्थव्यवस्था
कोरोना वायरस संक्रमण के सेती जिहां पूरा देस म मंदी के माहौल हे। उहें, अनलाॅक के बाद छत्तीसगढ़ के अर्थव्यवस्था खासकर जीएसटी, आॅटोमोबाइल, कृषि समेत आने-आने क्षेत्र मन म तेजी देखे जात हे। राज्य म जीएसटी संग्रहण पाछु बछर के तुलना म जिहां बाईस प्रतिसत अधिक बाढ़े हे। उहें, गाड़ी मनके रजिस्ट्रेसन म मई महीना के तुलना म जून म साढ़े तीन गुना बढ़ोतरी दर्ज करे गेहे।
कोरोना संक्रमण के बावजूद प्रदेस म बेरोजगारी दर म घलो उल्लेखनीय कमी दर्ज करे गेहे। सी.एम.आई.ई. के सर्वेक्षण म प्रदेस म बेरोजगारी दर अप्रैल म तीन दशमलव चार प्रसितत रिहीस, जउन बारह महीना के सबले नीचे स्तर म रिहीस। ए ह उही बेरा म राष्ट्रीय बेरोजगारी दर ले बहुत कम रिहीस।