कोरोना टीका-निःशुल्क
देस म कोरोना के टीका मुफ्त मिलही। केन्द्रीय स्वास्थ्य अउ परिवार कल्याण मंत्री डाॅक्टर हर्षवर्धन ह आज नई दिल्ली म पत्रकार मन ल जानकारी देवत किहीन कि दिल्ली के संगेसंग जम्मों देस म कोरोना के टीका सबो मन ल निःशुल्क लगाय जाही।
आज स्वास्थ्य मंत्री – कोविड टीकाकरण पूर्वाभ्यास के जायजा ले खातिर दिल्ली के आने-आने अस्पताल मन म दउरा करत रिहीन। डाॅक्टर हर्षवर्धन ह लोगन मन ले अपन अपील म केहे हे कि टीका के सुरक्षा अउ ओखर प्रभाव के बारे म फैलाय जावत अफवाह ले ओमन गुमराह ना होवय।
डाॅक्टर हर्षवर्धन ह किहीन हे कि सरकार के टीकाकरण बर तय दिसा-निरदेस के संग सरकार कोन्हों प्रकार के समझौता नइ करहीं। ओमन किहीन कि आम लोगन मन म पोलियो टीकाकरण के दउरान घलो झिझक देखे गे रिहीस, फेर बाद म ए अभियान बहुतेच सफल रिहीस। डाॅक्टर हर्षवर्धन ह किहीन कि आज ‘‘राष्ट्रव्यापी टीकाकरण पूर्वाभ्यास‘‘ 4 राज्य मन म करे गे पूर्वाभ्यास ले मिले फीडबैक के आधार म चलाय जावत हे। ए अभ्यास के दउरान वास्तविक टीका लगाय जाय ल छोड़कर टीकाकरण के जम्मों प्रक्रिया मनके पालन करे जावत हे।
कोविड वैक्सीन-पूर्वाभ्यास
जम्मों देशभर म आज कोविड-19 के टीकाकरण के पूर्वाभ्यास करे गीस। एखर उद्देश्य टीकाकरण के तियारी ल परखना रिहीस। एखर अलावा ‘‘कोविड वैक्सीन इंटेलिजेंस नेटवर्क‘‘-कोविन एप्लीकेशन्स के भी जांच करे गीस। पूर्वाभ्यास म नियोजन अउ क्रियान्वन के बीच संबंध अउ आगे के चुनौती मन ल घलो देखे गीस। वास्तविक टीकाकरण अभियान ले पहिली केन्द्रीय स्वास्थ्य अउ परिवार कल्याण मंत्रालय ह देसभर म 285 स्थल मन म परीक्षण अउ अभियान के अभ्यास करीन। ए अभ्यास जम्मों राज्य अउ केन्द्रसासित प्रदेस मन म 125 जिला मन म करे गीस। एमा सहरी अउ ग्रामीण जिला के संगेसंग दुर्गम क्षेत्र ल भी सामिल करे गीस। हरेक राज्य अउ केन्द्रसासित प्रदेस मन ल कम से कम 3 घांव परीक्षण करे बर केहे गे हवय।
ऐति, छत्तीसगढ़ के सात जिला – रईपुर, सरगुजा, दुरूग, बिलासपुर, राजनांदगंाव, बस्तर अउ गौरेला-पेण्ड्रा-मरवाही म घलो आज टीकाकरण खातिर माॅकड्रिल करे गीस। ए जिला मन म जिला अस्पताल अउ सामुदायिक स्वास्थ्य केन्द्र के संगेसंग प्राथमिक स्वास्थ्य केन्द्र मन म बिहनिया 10 बजे ले दोपहर 2 बजे तक ए माॅकड्रिल संपन्न होईस। रायपुर स्थित सरस्वती प्राथमिक शाला, पुरानी बस्ती म ड्राय रन के आयोजन करे गीस। स्वास्थ्य मंत्री टी.एस. सिंहदेव ह टीकाकरण के तियारी के निरीक्षण करीन अउ ए दउरान अवइया समस्या मनके बारे म जानकारी लीन। स्वास्थ्य अधिकारी मन ह बतईन कि सबले पहिली जउन मन ल टीका लगना हे, उंखर पहिचान पत्र देख के पंजीयन करे गे हवय। टीकाकरण कक्ष म ले जा के टीका लगाय के बाद आने कमरा म आधा घंटा तक निगरानी म राखे के बाद ओमन ल कमरा ले जाय बर दे गीस। स्वास्थ्य मंत्री ह ‘‘ड्राय रन‘‘ म सामिल मितानिन ले भी गोठबात करीन अउ अधिकारी मन ल टीकाकरण के जम्मों प्रक्रिया सही तरीका ले पूरा करे के निरदेस दीन।
राष्ट्रीय स्वास्थ्य मिशन के संचालक डाॅक्टर प्रियंका शुक्ला ह घलो टीकाकरण केन्द्र म पहुंच के ड्राय रन के निरीक्षण करीन। ए माॅकड्रिल के उद्देश्य ‘‘कोल्ड चैन प्रबंधन‘‘, टीका के आपूर्ति अउ भंडारण के संगेसंग टीका लगाय खातिर आय लोगन मन ल टीकाकरण स्थल म पहुंचे, उंखर प्रवेस पंजीयन, टीकाकरण अउ निगरानी म राखे के तैयारी ल परखना रिहीस। प्रदेस म पहिली चरण म चिकित्सा कार्य म लगे 2 लाख 34 हजार लोगन मन ल टीका लगाय जाही।
सेवारत् कर्मचारी-दिव्यांगता क्षतिपूर्ति
केन्द्र सरकार ह जम्मों सेवारत् कर्मचारी मन ल ‘‘दिव्यांगता क्षतिपूर्ति‘‘ देके निर्णय ले हवय। कोन्हों करमचारी अपन सेवा के दउरान दिव्यांगता के सिकार होथे अउ ओखर सेवा दिव्यांग होय के बाद भी चालू रखे जाथे त ओमन ल ‘‘दिव्यांगता क्षतिपूर्ति‘‘ के लाभ दे जाही। केन्द्रीय कार्मिक, लोक शिकायत अउ पेंशन राज्यमंत्री जितेन्द्र सिंह ह काली ए घोसना करीन। श्री सिंह ह किहीन कि एखर ले केन्द्रीय सशस्त्र पुलिस बल सी.आर.पी.एफ. बी.एस.एफ., अउ सी.आई.एस.एफ. के युवा जवान मन ल बड़ राहत मिलही। डाॅक्टर सिंह ह किहीन हे कि केन्द्र सरकार, सेवा नियम मन ल सरल बनाय अउ भेदभाव वाला नियम मन ल समाप्त करे खातिर जरूरी उपाय करत हवय।
मुख्यमंत्री-प्रवास
मुख्यमंत्री भूपेश बघेल ह आज रायगढ़ जिला म लगभग 400 करोड़ रूपिया के आने-आने विकास कार्य के लोकार्पण अउ भूमिपूजन करीन। ए मउका म आने-आने योजना मनके तहत हितग्राही मन ल करीब 6 करोड़ रूपिया के रासि के सामग्री घलो बांटे गीस। कारीकरम ल संबोधित करत मुख्यमंत्री ह छाल अउ सरिया ल तहसील बनाय समेत कई ठिन घोषणा करीन।
धान खरीदी
प्रदेस म चालू खरीफ विपणन वर्ष म समर्थन मूल्य म धान खरीदी के कार्य चालू हवय। अब तक 52 लाख मीटरिक टन ले अधिक धान खरीदी कर ले गे हवय। ए दउरान प्रदेस के लगभग 13 लाख 37 हजार किसान मन ह समर्थन मूल्य म धान बेचीन हे। राईस मिलर मन डहार ले 12 लाख 39 हजार मीटरिक टन धान के उठाव कर ले गे हवय। धान खरीदी के बूता 31 जनवरी तक चलही। उहें, प्रदेश के बहुत अकन खरीदी केन्द्र मन म बोरा के कमी होय ले धान खरीदी के कार्य प्रभावित होय हे। बेमेतरा जिला म बोरा के कमी होय ले नाराज किसान मन ह आज कलेक्ट्रेट के सामने प्रदर्सन करीन। इही बीच, मुख्यमंत्री भूपेश बघेल ह किहीन हे कि केन्द्र सरकार डहार ले घोषित समर्थन मूल्य म किसान मन ले धान के खरीदी करे जावत हे। न्याय योजना के तहत किसान मन ल अंतर के रासि के भुगतान करे जाही।
दुर्घटना
बिलासपुर जिला म आज होय एक ठिन भीषण सड़क दुर्घटना म तीन लोगन मनके मउत होगीस। जानबा के मुताबिक ए तीन युवा मइनखा मन मोटर साइकिल म सवार होके कोटा ले बिलासपुर जावत रिहीन। ए दउरान कोटा थाना क्षेत्र के मोहन भाटागांव के पास तेज रफ्तार ले आवत एक कार ह मोटर सायकल ल टक्कर मार दीस। ए हादसा म तीनों युवा मनके मउकाच म मउत होगीस।
उहें, महासमुंद जिला म घलो राष्ट्रीय राजमार्ग म टप्पा के पास कार के जोरदार टक्कर होय ले मोटर सायकल म सवार दू झिन युवा मन गंभीर रूप ले घायल होगीन, जेमन ल इलाज खातिर पिथौरा अस्पताल म भर्ती गराय गे हवय।