आज दिनभर के खबर ल अपन गुरतुर छत्तीसगढ़ी भाखा म पढ़व

कोरोना-टीकाकरण
भारत म कोविड टीकाकरण के अभ्यास सुरू होगे हे। पहिली चरण म चार राज्य – आंध्रप्रदेश, गुजरात, पंजाब अउ असम म दू दिन के अभ्यास आज ले सुरू होईस। ए अभ्यास के उद्देश्य अवइया परेसानी के पहिचान करना अउ योजना म समस्या के अनुसार बदलाव करना हे, जेखर ले टीकाकरण के प्रक्रिया म कोन्हों प्रकार के बाधा झन आवय।विधानसभा-समाचार
छत्तीसगढ़ विधानसभा म आज गृहमंत्री ताम्रध्वज साहू ह बतईन कि राज्य म 650 ले ज्यादा आरक्षक मनके भर्ती के प्रक्रिया चलत हे। एमा उच्च न्यायालय के निर्देश के मुताबिक काम करे जात हे। आज सदन म एक सवाल के जवाब म गृहमंत्री ह बतईन कि 2018 म 650 ले जादा आरक्षक के भर्ती बर आवेदन मंगाय गे रिहीस। एमा सवा लाख ले जादा उम्मीदवार मन आवेदन करे रिहीस।
एखर पहिली, विपक्षी सदस्य मन डहार ले आने-आने विभाग म भर्ती प्रक्रिया लंबित होय अउ बेरोजगारी के मुद्दा ल लेके जमके हंगामा करे गीस। गृह मंत्री ह किहीन कि सरकार ह बेरोजगारी दूर करे बर हर किसम के प्रयास करत हे। विपक्षी सदस्य मन ह ए मुद्दा म स्थगन प्रस्ताव लाईस, जेला आसंदी ह अस्वीकार कर दीस। एखर बाद विपक्षी सदस्य सोरगुल करे लागीस, जेखर चलत सदन के कार्यवाही 5 मिनट बर स्थगित कर दे गीस।
भाजपा सदस्य शिवरतन शर्मा ह शून्यकाल के बेरा प्रदेश म बाढ़त             अपराध अउ बेरोजगारी के मुद्दा उठावत आसंदी ले ए मामला म स्थगन प्रस्ताव के माध्यम ले चर्चा करे के मांग करीस। ओमन किहीन कि प्रदेस म बेरोजगारी के सेती अपराध बाढ़त हे। कतको विभाग म पद खाली हे। पुलिस विभाग म ही 50 हजार पद खाली हे।
नेता प्रतिपक्ष धरमलाल कौशिक ह राज्य सरकार उपर युवा, महिला, कर्मचारी अउ किसान मन ले वादाखिलाफी के आरोप लगाईस। विपक्षी सदस्य मन ह आरोप लगाईस कि आने-आने विभाग मन म भर्ती प्रक्रिया लंबित होय के सेती प्रदेश म अपराध बाढ़त हे।
विधानसभा म आज खैरागढ़ विधायक देवव्रत सिंह ह खैरागढ़ अउ छुईखदान नगर पंचायत म अवैध प्लाटिंग के मुद्दा उठाईस। एखर उपर आवास मंत्री मोहम्मद अकबर ह जांच करा के उचित कार्रवाई के बात किहीन।मुख्यमंत्री-केन्द्रीय मंत्री पत्र
मुख्यमंत्री भूपेश बघेल ह केन्द्रीय खाद्य अउ सार्वजनिक वितरण मंत्री पीयूष गोयल ल चिट्ठी लिखके भारतीय खाद्य निगम म 26 लाख मीटरिक टन उसना अउ 14 लाख मीटरिक टन अरवा चाउर उपार्जन बर अनुमति जल्दी देके अनुरोध करे हे। श्री बघेल ह अपन चिट्ठी म लिखे हे कि चालू खरीफ विपणन बछर म उपार्जित होवइया धान के कस्टम मीलिंग के बाद 60 लाख मीटरिक टन चाउर केन्द्रीय पूल म जमा करे के सहमति केन्द्र सरकार ह दे रिहीस। फेर, अब तक आदेस जारी नइ होय के सेती एफ.सी.आई. म चाउर जमा नइ हो पात हे। ए संबंध म पहिली घलो केन्द्र सरकार ल चिट्ठी लिखके चाउर उपार्जन के अनुमति देके मांग करे गे रिहीस। मुख्यमंत्री ह किहीस कि केन्द्र सरकार ल साढ़े 3 लाख नवा बारदाना के बारे में जानकारी दे गे रिहीस, फेर अब तक सिर्फ 1 लाख 50 हजार बारदाना ही दे गेहे। श्री बघेल ह किहीन कि केन्द्र सरकार बांचे बारदाना ल जल्दी देवय।
दूसर डहार, भारतीय जनता पार्टी के प्रदेश अध्यक्ष विष्णुदेव साय ह किहीस कि केन्द्र सरकार ह एफ.सी.आई. के माध्यम ले 60 लाख मीटरिक टन धान बिसाय बर 9 हजार करोड़ रूपिया भेज देहे, जबकि राज्य सरकार 85 लाख मीटरिक टन धान लेवत हे। भाजपा ह राज्य सरकार ले मांग करे हे कि ओमन किसान ले 20 क्विंटल धान प्रति एकड़ बिसाय।

माओवादी-आत्मसमर्पण
दंतेवाड़ा जिला म आज 3 इनामी सहित 8 माओवादी मन ह पुलिस के आगू आत्मसमर्पण करीन। जिला के पुलिस अधीक्षक डाॅक्टर अभिषेक पल्लव ह बतईस कि एमा ले कुछु माओवादी भाजपा विधायक भीमा मंडावी के हत्या म सामिल रिहीन। उहें, इंखर मन उपर अलग-अलग थाना क्षेत्र म घलो आने-आने माओवादी घटना म सामिल होय के आरोप हे।
बतादन कि राज्य सरकार डहार ले चलाय जात लोन वर्राटू अभियान के अंतर्गत अब तक 61 इनामी सहित 226 माओवादी मन ह पुलिस के आगू म आत्मसमर्पण करे हे।

नववर्ष-दिशा निर्देश
कोरोना संक्रमण ल देखत नवा बछर म होवइया कार्यक्रम के बारे म सरगुजा जिला प्रसासन ह दिसा-निर्देश जारी करे हे। एस.डी.एम. अजय त्रिपाठी ह बतईस कि 31 दिसंबर के रतिहा 12.30 बजे तक ही नवा बछर के जश्न मनाय जा सकही अउ ए जश्न म अधिकतम 200 लोगन ही सामिल हो सकथे। आयोजन स्थल म पुलिस अउ जिला प्रसासन के टीम घलो मौजूद रइही। आयोजन स्थल म सैनिटाईजर के व्यवस्था अउ सोसल डिस्टेंसिंग के पालन करना जरूरी होही। आयोजन म सामिल होवइया लोगन मन ल अपन नाव, पता रजिस्टर म दर्ज करना होही। एखर अलावा समारोह के निगरानी सी.सी.टी.वी. कैमरा ले करे के निर्देश घलो जारी करे गेहे।

भाजपा-प्रशिक्षण शिविर
भारतीय जनता पार्टी डहार ले प्रदेश के अलग-अलग जगह मन म कार्यकर्ता मन के मंडल स्तरीय प्रशिक्षण कार्यक्रम आयोजित करे जात हे। इही कड़ी म जांजगीर म दू दिन के प्रशिक्षण कार्यक्रम आयोजित करे गेहे। एमा भाजपा के प्रदेश अध्यक्ष विष्णुदेव साय सामिल होईन। ओमन किहीन कि प्रदेश स्तर म 1 हजार कार्यकर्ता मन ल प्रशिक्षित करे के बाद राज्यभर के मंडल स्तर के कार्यकर्ता मन ल प्रशिक्षण दे जात हे। एखर अंतर्गत 10 बिन्दु मन उपर जानकारी दे जात हे। नवा कार्यकर्ता मन ल पार्टी के रीति-नीति के बारे म बताय जात हे।

कांग्रेस स्थापना दिवस
भारतीय राष्ट्रीय कांग्रेस के स्थापना दिवस म आज रायपुर स्थित कांग्रेस भवन म प्रदेश अध्यक्ष मोहन मरकाम ह ध्वजारोहण करीन। ए बेरा मुख्यमंत्री भूपेश बघेल अउ वरिष्ठ कांग्रेस नेता मन ह उपस्थित रिहीस। राजधानी के संगेसंग सबो जिला, सहर अउ ब्लाॅक मुख्यालय मन म कांग्रेस के स्थापना दिवस के मउका  म कार्यक्रम के आयोजन करे गीस।

रबी फसल
प्रदेस म आजकल रबी फसल ल लेके तैयारी सुरू कर दे गेहे। इही कड़ी म जांजगीर-चांपा जिला म कृषि विभाग ह 9 विकासखंड मन म रबी फसल बर किसान मन ल दलहन-तिलहन के बीजा उपलब्ध कराना सुरू कर देहे। जिला म 01 जनवरी ले नहर मन ले पानी छोड़े जाही। कृषि विभाग के उप संचालक एम.आर. तिग्गा ह बतईस कि ए साल जिला म 1 लाख 20 हजार हेक्टेयर क्षेत्र म रबी के फसल लेके लक्ष्य राखे गेहे।

पोरा बाई-मामला
जांजगीर-चांपा जिला के अदालत ह बछर 2008 के 12वीं बोर्ड परीक्षा म उत्तर पुस्तिका के फर्जी तरीका ले बदले के मामला ले जुड़े 9 आरोपी मन ल रिहा कर दीस। जिला के प्रथम श्रेणी न्यायिक मजिस्ट्रेट के अदालत म होय सुनवाई के बाद ए आदेश दे गीस। बतादन कि 26 मई 2008 के छत्तीसगढ़ माध्यमिक शिक्षा मंडल डहार ले 12वीं बोर्ड परीक्षा के नतीजा घोषित करे गे रिहीस, जेमा जांजगीर-चांपा जिला के बिर्रा स्कूल के पढ़ईया पोरा बाई ह प्रदेश के प्रावीण्य सूची म पहिली स्थान पाय रिहीस। ए मामला म शिक्षा मंडल डहार ले करे गे जांच के बाद पोरा बाई सहित 9 लोगन मनके खिलाफ एफ.आई.आर. दर्ज कराय के रिहीस।

खेल मंत्रालय-एसओपी
केन्द्रीय खेल मंत्रालय ह देस म खेल कार्यक्रम मन बर मानक संचालन प्रक्रिया-एसओपी जारी करे हे। एमा केहे गेहे कि सबो एथलेटिक अउ सहायक कर्मी मन के मार्गदर्शन अउ निगरानी करे बर आयोजित समिति हर खेल प्रतियोगिता बर कोविड कार्य बल के गठन करे हे। ए कार्यबल समय-समय म गृह मंत्रालय अउ स्वास्थ्य अउ परिवार कल्याण मंत्रालय ले जारी आने दिसा-निरदेस के प्रोटोकाॅल के क्रियान्वयन बर जिम्मेदार होही। खेल मंत्रालय ह अपन परिपत्र म किहीस कि दिसा-निरदेस सबो हितधारक मनके सुझाव ले तैयार करे गेहे अउ प्रतियोगिता मनके संचालन गृह मंत्रालय के दिसा-निरदेस के अनुसार करे जाना चाही। आउटडोर खेल मन बर स्टेडियम के कुल क्षमता के अधिकतम पचास प्रतिसत दर्सक मन ल ही अनुमति होही।

संक्षिप्त समाचार
अउ अब थोरकुन समाचार सार म-
– मुख्यमंत्री भूपेश बघेल अउ विधानसभा उपाध्यक्ष मनोज सिंह मंडावी ह छत्तीसगढ़ शासन के बछर 2021 के कैलेंडर के विमोचन आज विधानसभा के समिति कक्ष म करीन।

– राज्य सरकार के दू बछर पूरा होय के मउका म आज अभनपुर स्थित जनपद कार्यालय म ‘‘गढ़बो नवा छत्तीसगढ़ – बात हे अभिमान हे, छत्तीसगढ़िया स्वाभिमान के‘‘ के थीम म फोटो प्रदर्सित आयोजन करे गीस।

– राजनांदगांव जिला म मुरूम के चोरी करइया तीन हाईवा अउ एक जेसीबी ल पुलिस ह जब्त करे हे।