मन की बात
प्रधानमंत्री नरेन्द्र मोदी ह किहीन हे कि हमर देस आत्मनिर्भर भारत अभियान के माध्यम ले नवा-नवा संभावना लेके आवत हे। आकाशवाणी ले आज ‘‘मन की बात‘‘ कारीकरम म श्री मोदी ह किहीन कि आम आदमी ह देस म जबरदस्त बदलाव ल महसूस करे हे अउ लोगन ल आसा के नवा किरण दिखाई दे हवय।
ओमन किहीन कि हमन नवा बछर म कतकोन संकल्प लेथन अउ ए बछर हमन ल देस बर संकल्प लेना चाही। ओमन किहीन कि आज समय आगे हवय जब हमन ल बने गुणवत्ता वाले सामान बनाना हे। प्रधानमंत्री ह स्टार्ट अप अउ उद्यमी मन ले घलो ए दिसा म काम करे के अपील करीन। प्रधानमंत्री ह किहीन कि हमर जीवन म जब तक जिज्ञासा के भावना होथे तक तक जीवन ऊर्जा ले भरे रहिथे। ओमन ह नवा बछर बर देसवासी मन ल अपन सुभकामना दीन।
मुख्यमंत्री-घासीदास जयंती
मुख्यमंत्री भूपेश बघेल ह किहीन हे कि राज्य सरकार ह सबके विकास बर योजना बनावत हे। ओमन किहीन कि बाबा गुरू घासीदास ह मनखे-मनखे एक समान के संदेस दे रिहीन, ओखरे अनुसार राज्य सरकार ह घलो काम करत हे। आज जांजगीर-चांपा जिला के पामगढ़ म राखे गे गुरू घासीदास जयंती कारीकरम म श्री बघेल ह किहीन कि बाबा घासीदास के आदर्स ल अपनाय बर राजधानी रईपुर म सोधपीठ अउ संग्रहालय बनाय जाही। संगेसंग पंथी नर्तक देवदास बंजारे के नाव म पुरस्कार घलो दे जाही। एखर अलावा मिनीमाता के नाव ले पीपीपी माॅडल म प्रदेसभर म डायग्नोस्टिक सेंटर खोले जाही। श्री बघेल ह किसान मन ल अवइया बछर के बोनस दे जाय के घोसना करीन।
ऐति, मुख्यमंत्री ह स्वाधीनता सेनानी, समाज सुधारक अउ साहित्यकार पंडित सुंदरलाल शर्मा के पुण्यतिथि अट्ठाईस दिसंबर के मउका म ओमन ल नमन करीन हे अउ किहीन कि पंडित शर्मा प्रदेस म जन-जागरण अउ सामाजिक क्रांति के अग्रदूत रिहीन।
सीबीएसई-परीक्षा तिथि
केन्द्रीय माध्यमिक शिक्षा बोर्ड के बछर दू हजार इक्कीस बर परीक्षा के तारीख ए महीना के इकतीस दिसंबर के घोसित कर दे जाही। केन्द्रीय शिक्षा मंत्री रमेश पोखरियाल निशंक ह एक ठिन ट्वीट म किहीन कि ओमन ह इकतीस दिसंबर के बोर्ड परीक्षा के तारीख घोषित करही।
सीबीएसई हर बछर फरवरी अउ मार्च के महीना म बोर्ड परीक्षा कराथे अउ नवंबर म परीक्षा के कारीकरम करथे। फेर ए बछर कोरोना महामारी के सेती बोर्ड परीक्षा के कारीकरम म देरी करे गेहे। श्री पोखरियाल ह थोरकुन दिन पहिली बताय रिहीन कि सीबीएसई बोर्ड के परीक्षा फरवरी के बाद आॅफलाइन तरीका ले कराय जाही।
किसान बातचीत-प्रस्ताव
किसान संगठन मन ह उतनीस दिसंबर के बिहनिया ग्यारह बजे केन्द्र सरकार के संग अगला दौर के बातचीत के प्रस्ताव दीन हे। स्वराज इंडिया के अध्यक्ष योगेन्द्र यादव ह बतईन कि कृषि कानून के विरोध म आंदोलन करइया सबो किसान संगठन के प्रतिनिधि मन ह सरकार के संग एक ठिन अउ बातचीत के फइसला ले हवय।
केन्द्र सरकार ह मंगलवार के आंदोलनकारी किसान संगठन मन ल चिट्ठी लिखके ओमन ल गोठबात बर बुलाय रिहीन।
लोकवाणी
मुख्यमंत्री भूपेश बघेल ‘‘लोकवाणी‘‘ म ए बखत युवा मन ले गोठबात करही। ए संबंध म कोन्हों भी मनखे आकाशवाणी रईपुर के दूरभाष नंबर शून्य सात सात एक – दो चार तीन शून्य – पांच शून्य एक, पांच शून्य दो अउ पांच शून्य तीन म अट्ठाईस, उनतीस अउ तीस दिसंबर के मंझनिया तीन ले चार बजे के बीच फोन करके अपन सवाल रिकार्ड करा सकत हे। मुख्यमंत्री के मासिक रेडियोवार्ता लोकवाणी के चैदहवां कड़ी के प्रसारण अवइया दस जनवरी के करे जाही।
कोरोना समाचार
देस म पाछु चैबीस घंटा म इक्कीस हजार ले जादा कोरोना संक्रमित मरीज मन ह ठीक होगे हवय। उहें, देस म कोरोना मरीज मनके स्वस्थ होके दर करीब छियानवे प्रतिसत होगे हवय। अभी तक करीबन अंठानवे लाख लोगन ए महामारी ले ठीक होय हे। उहें, देस म काली अट्ठारह हजार ले जादा नवा कोरोना मरीज मिले हे। एला मिलाके कुल मरीज मनके संख्या करीबन एक करोड़ दो लाख होगे हवय। केन्द्रीय स्वास्थ्य मंत्रालय ह केहे हे कि ए समय भारत म सक्रिय मरीज मनके संख्या देस म संक्रमण के पुष्टि वाले मामला के कुल संख्या के मुकाबला म कमती होगे हवय।
ऐति, छत्तीसगढ़ म काली एक हजार पैंतालीस नवा कोरोना मरीज पाय गीन। एमा सबले जादा एक सौ तिहत्तर मरीज रईपुर जिला म हे। उहें, दुरूग म संतानवे, राजनांदगांव म इंक्यानवे, रायगढ़ अउ महासमुंद म अस्सी-अस्सी मिले हे। एला मिलाके प्रदेस म कोरोना मरीज के कुल संख्या दू लाख चैहत्तर हजार ल पार कर लेहे। वर्तमान म प्रदेस म कोरोना के सक्रिय मरीज के संख्या चैदह हजार ले जादा हे। फेर दू लाख संतावन हजार ले जादा मरीज मन इलाज के बाद ठीक होगे हवय।
इही बीच, रईपुर के पंडित जवाहर लाल नेहरू स्मृति चिकित्सा महाविद्यालय म कोरोना संक्रमण के पहिचान बर अभी तक दू लाख ले जादा सैंपल के आरटी-पीसीआर जांच करे गे हवय। स्वास्थ्य विभाग के आयुक्त अउ चिकित्सा सिक्षा विभाग के बिसेस सचिव डाॅक्टर सी.आर. प्रसन्ना ह बतईन कि बाईस सैंपल के जांच ले सुरू होय रईपुर मेडिकल काॅलेज के लैब म वर्तमान म पन्द्रह सौ सैंपल के जांच हर दिन करे जावत हे।
छत्तीसगढ़-पुरस्कार
केन्द्र सरकार ह प्रधानमंत्री आवास योजना-सहरी म छत्तीसगढ़ म चलत ‘‘मोर जमीन-मोर मकान‘‘ माॅडल ल पुरस्कार दे जाय के घोसना करे हे। संगेसंग डोंगरगढ़ ल सुघ्घर प्रदर्सन करइया नगर पालिका के श्रेणी म सम्मानित करे जाही। ए पुरस्कार अवइया एक जनवरी के प्रधानमंत्री नरेन्द्र मोदी डहार ले एक ठिन वर्चुअल समारोह म दे जाही।
खबर के मुताबिक पाछु दू बछर म प्रदेस ल चैबीस ले जादा राष्ट्रीय पुरस्कार मिले हे।
निधन-सीएम शोक
मुख्यमंत्री भूपेश बघेल ह पूर्व मुख्यमंत्री डाॅक्टर रमन सिंह के बड़े भाई अशोक सिंह के निधन म दुख जताईन हे। श्री बघेल ह अपन सोक संदेस म दिवंगत आत्मा के सांति बर अउ उंखर परिवार वाला मन ल हिम्मत दे बर भगवान ले प्रार्थन करीन हे।
उहें, मुख्यमंत्री ह अविभाजित मध्यप्रदेश म कैबिनेट मंत्री अउ वरिष्ठ कांग्रेस नेता झितरूराम बघेल के निधन म घलो सोक जताईन हे।
इही बीच, मुख्यमंत्री ह रईपुर के आकाशवाणी केन्द्र के सेवानिवृत्त वरिष्ठ उद्घोषण लाल रामकुमार सिंह के निधन म दुख जताईन हे। मुख्यमंत्री ह अपन सोक संदेश म किहीन हे कि छत्तीसगढ़ म आकाशवाणी के पर्याय रेहे लाल रामकुमार सिंह सिरिफ रेडियो के उद्घोषक नइ रिहीन। फेर ओमन ह छत्तीसगढ़ी संस्कृति अउ गीत-संगीत के ज्ञाता घलो रिहीन।
दिग्विजय सिंह-प्रवास
अविभाजित मध्यप्रदेश के पूर्व मुख्यमंत्री अउ राज्यसभा सांसद दिग्विजय सिंह अपन एक दिन के दउरा म आज दुरूग पहुंचीन। ए दउरान श्री सिंह ह कांग्रेस के दिवंगत नेता मोतीलाल वोरा के आवास म ओमन ल अपन श्रद्धांजलि दीन अउ उंखर परिवार वाले मन ले भेंट करके दिवंगत नेता बर अपन सहानुभूति दिखाईन। ए मउका म विधायक अरूण वोरा संघरा कांग्रेस के कतकोन कार्यकर्ता मन ह घलो मौजूद रिहीन।
एखर बाद श्री सिंह भिलाई क खुर्सीपार म कांग्रेस सेवादल के कारीकरम म सामिल होईन अउ ओमन ह राष्ट्रीय ध्वज फहराईन। कारीकरम म स्वास्थ्य मंत्री टी.एस. सिंहदेव घलो मौजूद रिहीन।
माओवादी-गिरफ्तार
बीजापुर जिला म सुरक्षा बल ह तीन झिन माओवादी मन ल गिरफ्तार करे हे। मिले जानकारी के अनुसार केन्द्रीय रिजर्व पुलिस बल-सीआरपीएफ, डिस्ट्रिक्ट रिजर्व गार्ड-डीआरजी अउ जिला पुलिस बल के संयुक्त दल तलासी अभियान म निकले रिहीस। ए दउरान बासागुड़ा थाना क्षेत्र म घेराबंदी करके तीन झिन माओवादी मन ल गिरफ्तार करे गीस। इंखर मन तीर ले आईईडी, बैटरी, बैनर, वर्दी अउ माओवादी साहित्य बरामद करे गेहे।
उड़ान-सब उड़े, सब जुड़े
बिलासपुर सांसद अरूण साव ह केन्द्रीय नागर विमानन मंत्री हरदीप सिंह पुरी ल चिट्ठी लिखके बिलासपुर-भोपाल बर नियमित विमान सेवा सुरू करे के मांग करीन हे। ओमन ह केन्द्र सरकार के ‘‘उड़ान- सब उड़े, सब जुड़े‘‘ योजना म बिलासपुर-प्रयागराज-बनारस ल घलो एमा सामिल करे के आग्रह करीन हे। संगेसंग बिलासपुर के सकरभाटा विमानतल ल फोर-सी लाइसेंस के अनुसार तैयार करे बर राज्य सरकार ल निरदेसित करे के घलो आग्रह करीन हे।
हमर ग्राम सभा
प्रदेस के पंचायत अउ ग्रामीण विकास मंत्री टी.एस. सिंहदेव आज रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेव नौ सौ इक्यासी किलोहटर््ज म सुने जा सकत हे। ए कारीकरम ल प्रदेस स्थित आकाशवाणी के सबो केन्द्र एके संघरा रिले करही।
संक्षिप्त समाचार
– छत्तीसगढ़ ग्रामीण सड़क विकास अभिकरण ह प्रधानमंत्री ग्राम सड़क योजना म राज्य के सड़क गुणवत्ता जांचने वाले मनके सूची बनइया हे। एखर बर इकतीस दिसंबर तक आवेदन मंगाय गेहे।
– महासमुंद जिला के पिथौरा थाना पुलिस ह नकली नोट छापे अउ चलाय के आरोप म तीन झिन लोगन ल गिरफ्तार करके इंखर मन तीर ले चार लाख बत्तीस हजार रूपिया ले जादा के नकली नोट बरामद करे हे।
– बिलासपुर पुलिस ह पाछु पन्द्रह दिसंबर के ग्रीन पार्क इलाका म घर म घुसके एक झिन माईलोगिन ले लूटपाट करइया दू झिन माईलोगिन मन ल गिरफ्तार करे हे।
– राजनांदगांव जिला म दुपहिया वाहन के चोरी करे अउ बेचे के आरोप म चार झिन आरोपी मन ल गिरफ्तार करके उंखर मन तीर ले तीन ठिन मोटर साइकिल बरामद करे हे।
अउ
– कोरिया जिला के जनकपुर थाना क्षेत्र के खितौली गांव म पुलिस ह फांसी म लटके एक झिन नोनी के सव ल बरामद करे हे।