कोरोना-समाचार
कोरोना वायरस के नवा स्वरूप के संक्रमण ले बचाव बर पिछलइया चार हफ्ता म यूनाइटेड किंगडम के यात्रा करके छत्तीसगढ़ लहुटे सबो लोगन के जानकारी जुटाय जावत हे। ए संबंध म स्वास्थ्य विभाग ह दिसा-निरदेस जारी करे हे।
विश्व स्वास्थ्य संगठन डहार ले यूके म कोरोना वायरस के नवा स्वरूप के पुष्टि करे गेहे। यूरोपियन सेंटर फाॅर डिजीज कंट्रोल डहार ले ए कोरोना वायरस के नवा स्वरूप ले जादा संक्रामक, तेजी से फैलने वाला अउ छोटे उम्र समूह मन ल संक्रमित करने वाला बताय गेहे। ए वायरस के संक्रमण ले बचाव बर केन्द्र सरकार डहार ले जारी एसओपी के मुताबिक छत्तीसगढ़ अवइया अइसन सबो यात्री, जेमन पिछलइया चार सप्ताह के अंदर यूके के यात्रा करीन हो, उंखर बर ए दिसा-निरदेस जारी करे गेहे।
जानबा के मुताबिक पिछलइया चार हफ्ता म सौ ले जादा लोगन यूके ले छत्तीसगढ़ लहुटे हे। एमा ले कुछ लोगन के कोरोना जांच रिपोर्ट पाॅजीटिव आय हे। अइसन व्यक्ति जिखर सैंपल के जांच म नवा स्वरूप वाला वायरस के पुष्टि होही, त ओमन ल अलग आइसोलेशन इकाई म चैदह दिन बर राखे जाही अउ चैदहवां दिन म पुनः जांच करे जाही। एसओपी के मुताबिक पिछलइया चार दिन के अंदर यूके के यात्रा करके छत्तीसगढ़ अवइया सबो यात्री मन ल अपन यात्रा के संबंध म जानकारी अउ सपथ पत्र देना जरूरी हे।
इही बीच, छत्तीसगढ़ म कोरोना टीकाकरण ल लेके तैयारी घलो सुरू होगे हे। बिलासपुर जिला म कोरोना टीका के संबंध म संबंधित अधिकारी अउ कमरचारी मन ल प्रसिक्षण दे जावत हे। जिला म कोरोना वैक्सीन राखे बर चैदह सेंटर बनाय गेहे।
पीआईबी-पत्रकार जानकारी
पत्र सूचना कार्यालय अइसन पत्रकार मनके जानकारी जुटावत हे, जेखर मउत कोविड के कारण होय हे। एखर उद्देश्य अइसन पत्रकार मनके परिजन मन ल मदद पहुंचाना हे, जेखर परिजन मन ल एक निर्धारित प्रारूप म विवरण प्रस्तुत करे बर केहे हे, जउन एखर वेबसाइट म उपलब्ध हे।
भाजपा-प्रशिक्षण शिविर
भारतीय जनता पार्टी डहार ले प्रदेस के आने-आने जगह मन म कार्यकर्ता मनके मंडल स्तरीय प्रसिक्षण कारीकरम आयोजित करे जावत हे।
इही कड़ी म रईपुर पश्चिम विधानसभा क्षेत्र म मंडल स्तरीय कार्यकर्ता मनके दू दिवसीय प्रसिक्षण आज ले सुरू होईस। कारीकरम ल संबोधित करत भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह राज्य सरकार उपर पिछलइया दो बछर म प्रदेस के हित म कोन्हों भी विकास के काम नइ करे के आरोप लगाईन। कारीकरम म सांसद सुनील सोनी, पूर्व मंत्री राजेश मूणत अउ जिला अध्यक्ष श्रीचंद सुंदरानी घलो मौजूद रिहीन।
उहें, जांजगीर-चांपा जिला म घलो मंडल स्तरीय दो दिवसीय प्रसिक्षण कारीकरम के आयोजन करे जावत हे। बिलासपुर सांसद अरूण साव ह प्रसिक्षण कारीकरम के सुभारंभ करीन। प्रसिक्षण कारीकरम म विधायक नारायण चंदेल सहित पार्टी के कतकोन कार्यकर्ता मन मौजूद रिहीन।
भाजपा-सुशासन दिवस
भारतीय जनता पार्टी डहार ले राजनांदगांव स्थित पार्टी कार्यालय म काली पूर्व प्रधानमंत्री स्वर्गीय अटल बिहारी वाजपेयी के जम्मदिन ल सुसासन दिवस के रूप म मनाय गीस। ए मउका म पार्टी के वरिष्ठ नेता खूबचंद पारख ह किहीन कि भाजपा ह हमेसा ही अंत्योदय अउ सबो वर्ग के चिंता करके योजना मन ल अमल म लाय के कारीकरम बनाय हे। ओमन ह किहीन कि केन्द्र सरकार डहार ले पारित नवा कृषि कानून किसान मनके दिसा अउ उंखर आर्थिक स्थिति ल मजबूत करे म मददगार साबित होही।
मुख्यमंत्री-प्रवास
मुख्यमंत्री भूपेश बघेल काली जांजगीर-चांपा जिला के पामगढ़ अउ बलौदाबाजार-भाटापारा जिला के सिमगा म आयोजित गुरू घासीदास जयंती कारीकरम म सामिल होही। एखर बाद श्री बघेल रईपुर जिला के बिरगांव म आयोजित छत्तीसगढ़ मनवा कुर्मी क्षत्रीय समाज के राज अधिवेशन समारोह म घलो सिरकत करही।
माओवादी-गिरफ्तार
सुकमा जिला म सुरक्षा बल मन ह पांच माओवादी मन ल गिरफ्तार करे म सफलता हासिल करे हे। पुलिस अधीक्षक कन्हैया लाल धु्रव ह बतईन कि सीआरपीएफ, कोबरा बटालियन, डीआरजी अउ एसटीएफ के संयुक्त टीम ह ए माओवादी मन ल किस्टाराम इलाका ले गिरफ्तार करीन। इंखर मन तीर ले आईईडी बनाय के सामान घलो बरामद करे गेहे। ए माओवादी मनके खिलाफ आने-आने हिंसक वारदात म सामिल रेहे के आरोप हे।
उहें, दंतेवाड़ा जिला म घलो सुरक्षा बल मन ह एक इनामी माओवादी ल गिरफ्तार करे हे। अरनपुर थाना क्षेत्र के नहाड़ी के जंगल म गश्त के दउरान सीआरपीएफ अउ डिस्ट्रिक्ट रिजर्व गार्ड-डीआरजी के संयुक्त टीम ह ए माओवादी ल पकड़ीन। एखर उपर एक लाख रूपिया के इनाम घोसित रिहीस।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी म ‘‘मन की बात‘‘ कारीकरम म देस अउ बिदेस के लोगन मनके संग अपन विचार साझा करही। मासिक रेडियो कारीकरम के ए बहत्तरवां संस्करण होही। ए कारीकरम आकाशवाणी अउ दूरदर्शन के सबो नेटवर्क अउ आकाशवाणी समाचार के वेबसाइट म घलो प्रसारित करे जाही। आकाशवाणी, दूरदर्शन समाचार, प्रधानमंत्री कार्यालय, सूचना अउ प्रसारण मंत्रालय के यू-ट्यूब चैनल मन म घलो एखर लाइव स्ट्रीम करे जाही।
आकाशवाणी ले हिन्दी प्रसारण के तुरते बाद ए कार्यक्रम के क्षेत्रीय भासा म प्रसारण होही। क्षेत्रीय भासा म ए कारीकरम रात आठ बजे दुबारा प्रसारित करे जाही।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव काली संझा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेव नौ सौ इक्यासी किलोहटर््ज म सुने जा सकत हे। ए कारीकरम ल प्रदेस स्थित आकाशवाणी के सबो केन्द्र एके संघरा रिले करही।
जानवर शिकार-आरोपी गिरफ्तार
महासमुंद जिला के बारनवापारा अभ्यारण्य क्षेत्र म वन विभाग के टीम ह जंगली जानवर के सिकार करे के आरोप म सात लोगन मन ल गिरफ्तार करे हे। आरोपी मन तीर ले सांभर के सींग, खाल, पांव के संगेसंग सिकाय म प्रयोग होने वाला तार अउ कुल्हाड़ी जब्त करे गेहे। आरोपी मनके खिलाफ वन अपराध के तहत ए कार्रवाई करे गेहे।
संक्षिप्त समाचार
अउ अब थोरकुन समाचार सार म-
– राजनांदगांव निवासी वरिष्ठ साहित्यकार अउ हिन्दी के प्रोफेसर डाॅक्टर गणेश खरे के आज रईपुर के एक निजी अस्पताल म निधन होगे। ओमन पच्यासी बछर के रिहीन।
– राजनांदगांव जिला म पाताल भैरवी मंदिर अउ बर्फानी धाम के स्थापना करने वाला बर्फानी दादा के आज राजस्थान के मेहंदीपुर बालाजी म अंतिम संस्कार करे गीस। एमा मंदिर समिति के सदस्य मन संग दूसर भक्त मन घलो सामिल होईन।
– छत्तीसगढ़ ग्रामीण सड़क विकास अभिकरण ह प्रधानमंत्री ग्राम सड़क योजना के अंतर्गत स्टेट क्वालिटी माॅनिटर्स के इम्पैनलमेंट बर इकतीस दिसंबर तक आवेदन मंगाय हे।
– महासमुंद जिला म बसना पुलिस ह एक युवक ल गिरफ्तार करके उंखर तीर ले छह किलो गांजा बरामद करे हे।