कृषि कानून
कंेद्रीय कृषि मंत्री नरेंद्र सिंह तोमर ह कीहिन हे कि नवा कृषि कानून ले किसान मन ल फायदा पहुंचही अउ कृषि क्षेत्र मजबूत होही। ओमन कीहिन कि किसान हित म सुधार करे गेहे अउ ए भारतीय कृषि जगत म एक नवा अध्याय जोड़ही।
कृषि कानून ल कृषि क्षेत्र बर सबले बड़का सुधार बतावत कृषि मंत्री कीहिन कि एखर ले किसान मन ल अपन उपज बेचे के आजादी होही, उद्यमिता ल प्रोत्साहन मिलही अउ ओमन ल प्रौद्योगिकी के लाभ मिलही।
अंतर्राष्ट्रीय मीडिया के सदस्य मनके संग गोठबात म कृषि मंत्री ह कीहिन हे कि सरकार ह न्यूनतम समर्थन मूल्य बढ़ाय के घोषणा करे हे। जेमा किसान मन ल अपन उत्पादन के लागत के कम ले कम डेढ़ गुना जादा फायदा होही। ओमन आश्वासन दीन कि भविष्य म घलो न्यूनतम समर्थन मूल्य मिलत रीही।
इही बीच राष्ट्रव्यापी किसान आंदोलन के समर्थन म आज प्रदेश म किसान सभा के सदस्य मन उपवास रखीन। उंहें प्रदेश के पंचायत अउ ग्रामीण विकास मंत्री टी.एस. सिंहदेव घलो किसान अंादोलन के समर्थन म आज एक दिन के उपवास राखीन।
विस समाचार
विधानसभा म आज मुख्यमंत्री भूपेश बघेल ह पच्चीस सौ करोड़ रूपिया के अनुपूरक बजट पेश करीन। अनुपूरक बजट उपर चर्चा काली करे जाही। उंहें आज सदन म चार संशोधन विधेयक घलो पेश करे गीस। अनुपूरक बजट के पेश होय के बाद विधानसभा के कार्यवाही ल काली बीहनिया ग्यारा बजे तक स्थगित कर दे गीस।
एखर पहिली आज प्रश्नकाल म विपक्षी सदस्य मन डहार ले पूछे गे प्रश्न अउ पूरक प्रश्न के समय सत्तापक्ष के सदस्य मनले करे गे टोका टाकी के विरोध म विपक्ष ह बर्हिगमन कर दीस।
विधानसभा म शीतकालीन सत्र के तीसर दिन आज किसान के मौत के मामला म सत्तापक्ष अउ विपक्ष के बीच नोंक-झोक होइस। विपक्ष डहार ले ये मुद्दा उपर स्थगन प्रस्ताव के सूचना देगे रीहिस। ए प्रस्ताव ल स्वीकार करे बर चर्चा के दौरान सत्तापक्ष के सदस्य बृहस्पति सिंह ह आसंदी ले कीहिन कि स्थगन प्रस्ताव म टंागरमेहरी गांव के जउन किसान संजय सिंह ल मृत बताय गेहे, वोहा वास्तव म जिंदा हे। ए बात म विपक्ष ह हंगामा शुरू कर दीस। ए हंगामा के दौरान आसंदी ह पांच मिनट बर सदन के कार्यवाही स्थगित कर दीस।
आज सदन म भाजपा सदस्य बृजमोहन अग्रवाल ह गिरदावरी कम कराय अउ बाजार म नकली खाद-बीज उपलब्ध होय के मुद्दा घलो उठाइन। ओमन कीहिन कि एखर ले किसान मन निराश हे अउ ओमन आत्महत्या करे खातिर मजबूर हे।
उंहें सदन म एक सवाल के जवाब म गृहमंत्री ताम्रध्वज साहू ह बताइन कि छत्तीसगढ़ म पड़ोसी राज्य ओड़िशा अउ आंध्रप्रदेश ले गांजा के तस्करी होवत हे, जेला रोके बर छत्तीसगढ़ के सीमा उपर चेकपोस्ट बढ़ाय जाही।
धान खरीदी कार्रवाई
प्रदेश म ए दिन म समर्थन मूल्य म धान खरीदी चालू हे। ए दउरान सीमावर्ती राज्य मनले धान के अवैध परिवहन अउ भंडारण म रोक लगाए के घलो कदम उठाये जात हे। ए कड़ी म महासमुंद जिला म अवैध रूप ले धान के भंडारण करइया नौ मनखे उपर कार्रवाई करे गेहे अउ ओमन ले तीन सौ उनतीस बोरा धान अउ एक ट्रेक्टर जब्त करे गेहे।
बताइन कि जिला म अवैध भंडारण के मामला म अब तक दू हजार सात सौ कुंटल ले जादा धान अउ छै ठिन वाहन जब्ती करे गेहे। उंहें धान के अवैध परिवहन अउ भंडारण ल रोके खातिर उड़नदस्ता टीम के गठन करे गेहे। एखरे संग ओड़िशा सीमा उपर बसे गांव मन म जांच बर नाका घलो बनाय गेहे।
इही बीच भारतीय जनता पार्टी के प्रदेश अध्यक्ष विष्णुदेव साय ह प्रदेश सरकार ले प्रति एकड़ बीस कुंटल धान खरीदे के मांग करीन हे। ओमन कीहिन कि केंद्र सरकार ह ए साल केंद्रीय पूल म नब्बे लाख मीटरिक टन धान खरीदे के घोषणा करे हे। जेन हे पाछू साल के मुकाबला डेढ़ गुना जादा हे। ओमन कीहिन कि अइसन म राज्य सरकार ल घलो डेढ़ गुना जादा धान खरीदना चाही। श्री साय ह आरोप लगाइन कि जेन किसान मनके धान नइ खरीदे जात हे ओमन अपन बंाचे धान ल मंडी मन म कम दाम म बेचत हे।
केंद्र एसओपी
केंद्र सरकार ह ब्रिटेन म कोरोना वायरस के नवा रूप सामने आय के सेती मानक संचालन प्रक्रिया – एस.ओ.पी. जारी करे हे। एमा अइसे जम्मों अंतर्राष्ट्रीय यात्री मन बर निर्देश जारी करे गेहे, जेमन ह ए साल पच्चीस नवंबर ले तेईस दिसंबर तक ब्रिटेन गे होही या फेर ब्रिटेन ले गुजरे होही।
मानक प्रक्रिया के मुताबिक जम्मों अंतर्राष्ट्रीय यात्री मन पाछू चैदा दिन के यात्रा के बारे म जानकारी देबर पड़ही अउ अपन डहार ले घोषणा पत्र घलो भरके देबर पड़ही।
माओवादी समर्पण
बीजापुर म तीन झिन माओवादी मन पुलिस अधीक्षक के आगू आत्मसमर्पण करीन हे। ए मन राज्य सरकार डहार ले चलाए जात माओवादी उन्मूलन अभियान ले प्रभावित होके आत्मसमर्पण करीन हे। आत्मसमर्पण करइया मनखे म माड़वी आयता, कुहरामी हुंगा अउ वेट्टी हिड़मा हवय।
आमचो-पुलिस अभियान
घरेलु हिंसा अउ लैंगिक अपराध मन बर महिला मन ल जागरूक करे बर कोंडागंाव पुलिस ए दिन म आमचो पुलिस आमचो संगी अभियान चलावत हे। एखर शुरूआत जिला के माकड़ी थाना ले करे गेहे। ए दउरान एक शिविर के आयोजन करे गीस, जेमा महिला अउ नोनी मन अपन भागीदारी निभाइन।
पुलिस अधीक्षक सिद्धार्थ तिवारी ह बताइन कि ए अभियान म जिला के कतकोन थाना क्षेत्र म कई ठन कार्यक्रम आयोजित कर महिला मन ल ओखर अधिकार के प्रति जागरूक करे जाही। एखर अलावा महिला अपन संग होय अपराध के सूचना वाट्सएप या हेल्पलाइन नंबर म दे सकही।
ओमन बताइन कि ए अभियान के मुख्य उद्देश्य ओ महिला अउ बालिका मनके मदद करना हे जेमन असहज होय के कारण थाना म अपन बात नइ राख पाय। एस.पी. ह बताइन कि शिकायत उपर तुरंत कार्रवाई करे बर एक विशेष टीम घलो बनाय गेहे।
एति जांजगीर चंापा जिला के पुलिस डहार ले समर्पण अभियान के तहत वरिष्ठ नागरिक, सियान अउ असहाय नागरिक मनले संपर्क करके ओमन के समस्या के जानकारी ले जात हे। संगेसंग यदि ओमन के संग कोनो अपराध होय हे त ओखर निराकरण के दिशा म कदम उठाये जाथे। ए कड़ी म जिला के जांजगीर चंापा, सक्ती अ विउ बलौदा थाना म बुजुर्ग व्यक्ति ले भेंट करके ओमन ल सम्मानित करे गीस ।
फिट इंडिया
सीमा सुरक्षा बल डहार ले आज फिट इंडिया अभियान के तहत भिलाई म साइक्लोथाॅन दौड़ के आयोजन करे गीस। ए मउका म सीमा सुरक्षा बल के अधिकारी अउ जवान मन रैली घलो निकालिन।
लोकवाणी
मुख्यमंत्री भूपेश बघेल लोकवाणी म ए दारी युवा मनले बातचीत करही। ए संबंध म कोनो भी मनखे आकाशवाणी रायपुर के दूरभाष नंबर शून्य सात सात एक दू चार तीन शून्य पांच शून्य एक, पांच शून्य दू अउ पांच शून्य तीन म अठाईस, उन्तीस अउ तीस दिसंबर के मंझनियंा तीन ले चार बजे के बीच फोन करके अपन सवाल रिकार्ड करा सकत हे।
मुख्यमंत्री के मासिक रेडियो वार्ता लोकवाणी के चैदहवंा कड़ी के प्रसारण दस जनवरी दू हजार इक्कीस के होही। एखर प्रसारण छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारा बजे तक करे जाही।
विशेष कार्यक्रम
कर संबंधी विवादित मामला के समाधान करे बर आयकर विभाग डहार ले चलाये जात योजना विवाद से विश्वास के तहत आवेदन करे के अंतिम तिथि अवइया तीस दिसंबर तक बढ़ा दे गेहे।
ए योजना के उद्देश्य अउ एखर बारे म विस्तार से जानकारी हासिल करे बर आकाशवाणी समाचार ह छत्तीसगढ़ के प्रधान आयकर आयुक्त अमरेंद्र कुमार ले गोठबात करीन। ए विषेश भेंटवार्ता के पुनः प्रसारण आज रतिहा नौ बजे आकाशवाणी केंद्र रायपुर के एफ.एम. चैनल एक सौ एक दशमलव छै मेगाहर्ट्ज म करे