प्रधानमंत्री नरेन्द्र मोदी ह किहीन हे कि भारतीय उद्योग के क्षमता ल दुनिया म दिखाय के ए बने मउका हे। ओमन ह उद्योग अउ व्यवसाय जगत ले आह्वान करीन कि ओमन ह अवइया बछर म आत्मनिर्भर भारत बर अपन पूरा सक्ती लगावय। वीडियो कान्फ्रेंसिंग के माध्यम ले आज एसोचैम फाउंडेशन सप्ताह कारीकरम म श्री मोदी ह किहीन कि दुनिया ह चैथा औद्योगिक क्रांति डहार बढ़त हे। ओमन किहीन कि देस ह उद्यमी मन संग हे, जउन मन युवा मन ल बहुत अकन मउका दे सकत हे।स्वास्थ्य मंत्रालय-कोरोना टीका
केन्द्रीय स्वास्थ्य मंत्रालय ह केहे हे कि कोविड-नाइंटीन के टीका लगाना स्वैच्छिक होही। फेर, मंत्रालय ह यहू स्पष्ट करे हे कि कोनों ल पहिली कोरोना संक्रमण होय हे या नहीं, एखर बावजूद कोरोना वैक्सीन ले जाना चाही, काबर कि एखर ले रोग-प्रतिरोधक क्षमता मजबूत होही। कोविड ले जुड़े प्रश्न के उत्तर म मंत्रालय ह केहे हे कि भारत म बनइया कोरोना वैक्सीन दूसर देस म बने वैक्सीन जइसने फायदा करही। मंत्रालय ह केहे हे कि पहिली चरण म कोरोना वैक्सीन कुछ खास प्राथमिकता वाले लोगन ल दे जाही। काबर कि ओमन ल कोविड के ज्यादा खतरा हे। वैक्सीन के आखिरी परीक्षण आने-आने चरण म हवय अउ सरकार ह जल्दी ले जल्दी ए वैक्सीन के खुराक लोगन ल दे जाय के तैयारी करत हे।कोरोना समाचार/जागरूकता
प्रदेस म कोरोना संक्रमित मरीज मनके संख्या दू लाख चैंसठ हजार ले जादा होगे हे। उहें, सत्रह हजार चार सौ ले जादा कोरोना पाॅजिटिव मरीज मनके इलाज आने-आने अस्पताल म चलत हे। इही बीच, प्रदेस म कोरोना ले अब तक तीन हजार एक सौ तिरसठ लोगन के मउत होगे हे।
ऐति, महासमुंद जिला के धान खरीदी केन्द्र मन म सहकारी समिति के करमचारी मनके कोरोना जांच करे जावत हे। पिथौरा विकासखंड के पेण्ड्रावन, जगदीशपुर, भस्करा पाली, घोंच, परसदा अउ भूरकोनी के धान खरीदी केन्द्र म काम करइया कमरचारी मनके कोरोना जांच करे गीस, जेमा सत्रह झिन करमचारी मनके रिपोर्ट पाॅजिटिव आय हे। जिला प्रसासन ह समिति के करमचारी मन ले सोसल डिस्टेंसिंग अउ सुरक्षा मानक के पालन करे के अपील करीन हे।
महासमुंद जिला कलेक्टर ह आज जिला स्तरीय टास्क फोर्स के बइठका लेके कोरोना टीकाकरण के तैयारी के बारे म समीक्षा करीन। ए दउरान ओमन ह अधिकारी मन ल कोरोना टीकाकरण बर कंट्रोल रूम बनाय के निरदेस दीन। जिला म तीन ठिन नवा कोल्ड चैन पाइंट बनाय जाय के संग टीकाकरण बर माइक्रो प्लान घलो तैयार करे जावत हे।
मुख्यमंत्री-प्रतिमा अनावरण
मुख्यमंत्री भूपेश बघेल ह आज रईपुर के निवास कार्यालय ले वीडियो कान्फ्रेंसिंग के माध्यम ले बेमेतरा जिला के ग्राम सिलघट म स्वतंत्रता संग्राम सेनानी स्वर्गीय नाथूराम टिकरिहा, स्वर्गीय सुखलाल टिकरिहा अउ समाजसेवी स्वर्गीय गोकुल प्रसाद टिकरिहा के प्रतिमा के अनावरण करीन।
ए मउका मुख्यमंत्री ह किहीन कि हमर सियान मन ह हमर धरोहर अउ रद्दा देखइया हवय। उंखर हमर समाज के संगेसंग देस के इतिहास म घलो बड़े योगदान हे।
धान खरीदी
प्रदेस म समर्थन मूल्य म धान खरीदी के काम तेजी ले चलत हे। सहकारी समिति मन म धान बेचे के दउरान किसान मन ल कतकोन परेसानी के सामना घलो करना पड़त हे। कतकोन उपार्जन केन्द्र म बारदाना के कमी अउ धान के उठाव नइ होय के सेती खरीदी के काम घलो प्रभावित होवत हे। राजनांदगांव जिला म बारदाना के कमी के सेती पुराना बारदाना म धान के खरीदी करे जावत हे।
इही बीच, खरीदी केन्द्र मन म बारदाना के कमी ल देखत राज्य सरकार ह पीडीएस अउ किसान मनके पुराना जूट के बारदाना के घलोक उपयोग धान खरीदी के काम म करे के फइसला लेहे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह काली रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेब नौ सौ इक्यासी किलोहटर््ज म सुने जा सकत हे। ए कारीकरम ल प्रदेस के आकाशवाणी के सबो केन्द्र मन ह एके संघरा रिले करही।
भाजपा-प्रशिक्षण शिविर
भारतीय जनता पार्टी के पदाधिकारी अउ कार्यकर्ता मन बर अखिल भारतीय मंडल प्रशिक्षण सिविर के आयोजन आज मुंगेली के पार्टी कार्यालय म करे गीस। सिविर म कार्यकर्ता मन ल भाजपा के नीति अउ सिद्धांत के बारे म बताय गीस।
ए मउका म पार्टी के प्रदेस अध्यक्ष विष्णुदेव साय ह आरोप लगाईन कि प्रदेस म धान खरीदी के काम म भारी अनियमितता बरते जावत हे। गिरदावरी म गलती होय के सेती कतकोन किसान मनके रकबा घट गे हवय। ओमन ह राज्य सरकार उपर वादाखिलाफी करे के घलो आरोप लगाईन अउ किहीन कि बेरोजगार मन ल भत्ता दे जाय के वादा करे गे रिहीस, जउन ह आज तक पूरा नइ होय हे।
अइसने, जरहागांव अउ लोरमी म घलो प्रशिक्षण सिविर कराय गीस। कारीकरम म श्री साय के अलावा सांसद अरूण साव अउ विधायक पुन्नूलाल मोहले घलोक सामिल होईन।
किसान महापंचायत/आंदोलन
भारतीय जनता पार्टी डहार ले पूरा प्रदेस म किसान मन के भलई बर अउ कृषि कानून के बारे म देसव्यापी जन-जागरण अभियान चलाय जावत हे। एमा कवर्धा के गांधी मैदान म घलो किसान महापंचायत के आयोजन करे गीस।
कारीकरम म पार्टी के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह आरोप लगाईन कि केन्द्र सरकार के कृषि कानून के बारे म भ्रम फैलाय के प्रयास करे जावत हे। डाॅक्टर सिंह ह छत्तीसगढ़ के कांग्रेस सरकार उपर निसाना साधन कहिन कि पाछू दू बछर म प्रदेस के किसान मनके सोसन होय हे। घोषणा पत्र म करे गे वादा ल पूरा करे म घलो प्रदेस के कांग्रेस सरकार ह असफल होेगे हे। किसान महापंचायत म नेता प्रतिपक्ष धरमलाल कौशिक अउ राजनांदगांव सांसद संतोष पांडेय ह घलो अपन बात राखीन।
दूसर कोति, केन्द्र सरकार डहार ले पारित कृषि कानून ल वापस ले जाय बर अउ समर्थन मूल्य गारंटी कानून लागू करे के मांग ल लेके प्रदेस के किसान मनके एक ठिन दल ह तीस दिसंबर के नई दिल्ली बर रवाना होही। राजनांदगांव के ग्राम पनेका म राखे गे किसान संघ के बइठका म ए फइसला करे गीस कि आंदोलन के समर्थन म किसान मन ह बारी-बारी दिल्ली जाही।
घासीदास जयंती
समाज ल एकता, भाईचारा अउ समरसता के संदेस देवइया बाबा गुरू घासीदास के जयंती के मउका म कांग्रेस के राष्ट्रीय अध्यक्ष सोनिया गांधी ह प्रदेसवासी अउ सतनामी समाज के लोगन ल बधाई अउ सुभकामना दीन हे। ओमन ह अपन संदेस म किहीन कि गुरू घासीदास ह अट्ठारहवां सदी म सामाजिक, आर्थिक सुधार जइसन कतकोन सुघ्घर काम करीन अउ कमजोर वर्ग के आत्मसम्मान ल जगाईन। गुरू घासीदास के संपूर्ण जीवन हमर मन बर प्रेरणा देवइया हे।
घनाराम साहू-निधन
गुंडरदेही विधानसभा क्षेत्र के पूर्व विधायक घनाराम साहू के आज रईपुर के एक ठिन निजी अस्पताल म निधन होगे। ओमन ह पचहत्तर बछर के रिहीन।
राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डाॅक्टर चरणदास महंत ह श्री साहू के निधन म सोक जताईन हे। उहें, विधायक देवेन्द्र यादव, विद्यारतन भसीन, अरूण वोरा अउ पूर्व विधायक बीडी कुरैशी ह घलो श्री साहू के निधन म सोक जतावत ओमन ल अपन श्रद्धांजलि दीन हे।
आईईडी-बरामद
बीजापुर जिला म सुरक्षा बल ह पांच किलो के विस्फोटक बरामद करे हे। मिले जानकारी के अनुसार गंगालूर थाना क्षेत्र के बीजापुर-पुसनार-बुरजी रद्दा म माओवादी मन ह सुरक्षा बल ल नकसान पहुंचाय के इरादा ले ए विस्फोटक ल लगा के राखे रिहीन। गश्त के दउरान जवान मन ह एला बरामद करीन अउ बाद म बम निरोधक दस्ता के टीम ह एला निष्क्रिय कर दीस।
संक्षिप्त समाचार
– महासमुंद जिला के पिथौरा क्षेत्र म दू झिन नोनी मनके अपहरण के मामला आगू आय हे। सांसद चुन्नी लाल साहू ह जिला के पुलिस अधीक्षक ले गोठबात करके नोनी मन ल जल्दी छोड़वाय के निरदेस दीन हे।
– दुरूग जिला म एक झिन मनखे ले लकी ड्रा के नाव म करीबन तिरपन हजार रूपिया के आॅनलाईन ठगी के मामला आगू आय हे। ए मामला म जामुल पुलिस ह अपराध दर्ज कर लेहे।
अउ
– बलरामपुर जिला म पुलिस ह करीबन सवा लाख रूपिया के कबाड़ के संग दू झिन आरोपी मन ल गिरफ्तार करे हे।