मुख्यमंत्री-बलरामपुर
मुख्यमंत्री भूपेश बघेल ह आज बलरामपुर-रामानुजगंज जिला के मुख्यालय बलरामपुर म आयोजित कारीकरम म करीबन 247 करोड़ रूपिया के आने-आने विकास कार्य मनके लोकार्पण अउ भूमिपूजन करीन। ए कार्य मन म सड़क, पुल-पुलिया निर्माण, सिंचाई, शासकीय भवन, पेयजल अउ बिजली के सुविधा म वृद्धि के काम सामिल हवय। ए मउका म मुख्यमंत्री ह बलरामपुर म उद्यानिकी महाविद्यालय खोले के संगेसंग चांदो अउ रघुनाथ नगर ल तहसील अउ डौरा, कोचली अउ बरियो ल उप तहसील बनाय के घोसना करीन।
एखर पहिली, मुख्यमंत्री ह काली बलरामपुर विकासखंड के ग्राम महाराजगंज स्थित धान खरीदी केन्द्र के निरीक्षण करीन। ए दउरान ओमन कृषक मन ले गोठबात कर धान खरीदी के संबंध म आवश्यक जानकारी लीन। मुख्यमंत्री ह धान खरीदी केन्द्र म मक्का के खरीदी खातिर अधिकारी मन ल घलो आवश्यक बेवस्था सुनिश्चित करे के निरदेस दीन हे। श्री बघेल ह ग्राम पंचायत जाबर स्थित आदर्श गौठान ल घलो देखीन। ए दउरान ओमन किसान मन डहार ले गौठान मन म निर्मित वर्मी कम्पोस्ट के जैविक खेती करे खातिर अउ एखर अधिक उपयोग करे जाय के गोठबात किहीन।
उहें, मुख्यमंत्री ह काली अउ परन दिन सरगुजा, सूरजपुर अउ बलौदाबाजार-भाटापारा जिला के प्रवास म रइही। ए दउरान ओमन आने-आने करीकरम म घलो सामिल होही।
लोकवाणी
मुख्यमंत्री भूपेश बघेल ह आज प्रसारित मासिक रेडियोवार्ता ‘‘लोकवाणी‘‘ के 13वां कड़ी म ए बार ‘‘छत्तीसगढ़ सरकार दो वर्ष का कार्यकाल‘‘ बिसय म प्रदेसवासी मन ले गोठबात करीन। मुख्यमंत्री ह लोकवाणी म किहीन कि आम जनता, किसान, आदिवासी अउ कमजोर वर्ग के ससक्तिकरण, छत्तीसगढ़ के विकास माॅडल के परमुख बिसेसता हरय। दू बछर म जनता के भावना, आकांक्षा अउ उम्मीद ल अपना के सासन-प्रसासन ल समाधान के बिसय म संवेदनसील बनाय के प्रयास राज्य सरकार करे हवय। संगेसंग नवा सरकार ह छत्तीसगढ़ी संस्कृति ल बढ़ावा देके लोगन मनके मन म अपन संस्कृति अउ अस्मिता ल लेके गौरव के भाव फेर जगाय हे। मुख्यमंत्री ह किहीन हे कि राज्य सरकार ह किसान मन खातिर करजा र्के माफी, धान खरीदी, सुराजी गांव, राजीव गांधी किसान न्याय योजना अउ गोधन न्याय योजना जइसन आने-आने योजना लागू करीन, जेखर ले गांव मन ल निरंतर नवा सक्ति मिलत हे। एखर संगेसंग राज्य सरकार के नीति मनके असर उद्योग अउ व्यापार जगत म घलो सकारात्मक दिखत हे।
मुख्यमंत्री ह लोकवाणी कारीकरम म किहीन कि जम्मों देस कोरोना संकट काल म मंदी ले प्रभावित रिहीस, जबकि छत्तीसगढ़ मंदी के प्रभाव ले अछूता रिहीस। मनरेगा, वनोपज खरीदी, जइसन योजना ले बेरोजगारी के दर घटके दू प्रतिसत तक लाय के उदाहरण छत्तीसगढ़ ह प्रस्तुत करे हे। औद्योगिक इकाई मन म घलो 15 हजार करोड़ रूपिया के पूंजी निवेस होय हे, जउन म बड़ संख्या म लोगन मन ल रोजगार मिलीस। ओमन किहीन कि कृषि अउ वानिकी उपज मन म वेल्यू-एडीसन खातिर राज्य सरकार डहार ले सुरूवात करे गे प्रयास ले, प्रदेस म समृद्धि होही।
वुर्चअल मैराथन
छत्तीसगढ़ म आज वर्चुअल मैराथन दउड़ के आयोजन करे गीस। ए दउड़ म मुख्यमंत्री भूपेश बघेल सहित जनप्रतिनिधि, अधिकारी-कर्मचारी अउ आम नागरिक मन ह बड़ संख्या म भाग लीन। मैराथन म भाग ले बर 70 हजार ले जादा प्रतिभागी मन ह आॅनलाइन पंजीयन कराय रिहीस। मैराथन दउड़ म प्रदेस के जम्मों जिला म आने-आने वर्ग अउ उमर के लोगन मन ह बड़ उछाह ले अपन भागीदारी दीन। खेल युवा कल्याण अउ जनसंपर्क विभाग डहार ले आयोजित वर्चुअल मैराथन म प्रतिभागी कोरोना संक्रमण के जारी दिसा-निरदेस के पालन करत सामिल होईन। प्रतिभागी मन ह अपन घर, उद्यान, मैदान, सड़क समेत आने-आने स्थान म सोसल डिस्टेंसिंग के पालन करत दउड़ लगाईन अउ दउड़त-दउड़त कुछ सेकेंड के अपन वीडियो या फोटो, हैशटैग ‘‘रन विथ छत्तीसगढ़‘‘ के संग सोसल मीडिया म अपलोड करीन। फेसबुक अउ ट्वीटर म ए हैशटैग दिनभर ट्रेंड करत रिहीस। वर्चुअल मैराथन खातिर बिहनिया छह ले ग्यारह बजे तक के समय निर्धारित करे गे रिहीस।
संसद भवन-शहीद श्रद्धांजलि
संसद भवन म बछर 2001 म कायरतापूर्वक आतंकी हमला ल विफल करे म सर्वोच्च बलिदान देवइया सहीद मन ल राष्ट्र आज अपन श्रद्धांजलि अर्पित करत हवय। राष्ट्रपति रामनाथ कोविंद, उपराष्ट्रपति एम. वेंकैया नायडू, प्रधानमंत्री नरेन्द्र मोदी अउ लोकसभा अध्यक्ष ओम बिड़ला ह सांसद भवन के रक्षा करइया सहीद मन ल अपन श्रद्धांजलि अर्पित करीन।
कृषि कानून-सरोज पांडेय
राज्यसभा सांसद सरोज पांडेय ह किहीन हे कि किसान आंदोलन ल लेके केन्द्र सरकार के रूख सकारात्मक हवय। केन्द्र सरकार अउ प्रधानमंत्री नरेन्द्र मोदी पूरा मजबूती ले मानवीय दृष्टिकोण खातिर किसान मन ले चर्चा करे बर तैयार हे। सुश्री पांडेय ह किहीन कि किसान मन ल समृद्ध बनाय के उद्देश्य ले पूरा अध्ययन करे के बाद ए कृषि कानून ल बनाय गे हवय अउ केन्द्र सरकार कृषि कानून ल लेकर प्रतिबद्ध हवय।
धान खरीदी
प्रदेस म ए बेरा समर्थन मूल्य म किसान मन ले धान खरीदी करे जावत हे। चालू खरीफ विपणन बछर म अब तक 17 लाख मीटरिक टन ले अधिक धान खरीदी करे जा चुके हे। ए दउरान प्रदेस के 4 लाख 90 हजार किसान मन समर्थन मूल्य म धान बेचीन। उहें, राईस मिलर मन डहार ले खरीदी केन्द्र मन ले लगभग 27 हजार मीटरिक टन धान के उठाव कर ले गे हवय।
इही बीच, दुर्ग संभाग के आयुक्त टी.सी. महावर ह डोंगरगढ़ विकासखंड अछोली स्थित धान खरीदी केन्द्र के निरीक्षण करीन। ए दउरान ओमन किसान मन ले गोठबात करके उंखर समस्या के संबंध म जानकारी लीन। आयुक्त ह किहीन हे कि धान खरीदी म कोन्हों प्रकार के लापरवाही बर्दास्त नइ करे जाही। उहें, राजनांदगांव जिला के घुमका अउ पटेवा धान खरीदी केन्द्र के दू प्रभारी अउ दू कम्प्यूटर आॅपरेटर मनके कार्य म अनियमितता बरते के आरोप म ओमन ल निलंबित कर दे गे हवय। ओति, मुंगेली जिला कलेक्टर ह बेमौसम बारिश ले धान ल सुरक्षित राखे खातिर संबंधित अधिकारी मन ल धान खरीदी केन्द्र मन म कैप कवर के पर्याप्त बेवस्था करे जाय के निरदेस दीन हे।
आईईडी-विस्फोट
सुकमा जिला म माओवादी मन डहार ले करे गे आई.ई.डी. विस्फोट म कोबरा बटालियन के एक डिप्टी कमांडर घायल होगीस।
पुलिस अधीक्षक कन्हैया लाल धु्रव ह घटना के पुष्टि करत बतईन कि कोबरा दू सौ आठ बटालियन के जवान मन ह किस्टाराम इलाका म गश्त करे बर निकले रिहीन, इही दउरान माओवादी मन ह जवान मन ल निसाना बनावत आई.ई.डी. विस्फोट कर दीन, जेखर चपेट म आय ले एक झिन डिप्टी कमांडर घायल होगीस।
बस्तर आईजी-निरीक्षण
दंतेवाड़ा जिला के माओवाद प्रभावित क्षेत्र अरनपुर-जगरगुंडा म चलत सड़क निर्माण कार्य के निरीक्षण आई.जी., सुुंदरराज पी., दंतेवाड़ा अउ सुकमा जिला के कलेक्टर अउ पुलिस अधीक्षक मन ह करीन। पुलिस अधिकारी मन मोटर साइकिल म सवार होके अरनपुर होवत कमारगुड़ा पहुंचीन। ए मउका म बस्तर आईजी ह ‘‘सिविक एक्सन‘‘ कारीकरम म सामिल होय बर आय ग्रामीण मन ले चर्चा करके उंखर मनके समस्या सुनीन अउ उंखर मांग ल जल्दी पूरा करे के वादा करीन। कारीकरम म ग्रामीण मन ल आवश्यक जिनीस घलो वितरित करे गीस।