आज दिनभर के खबर ल अपन गुरतुर छत्तीसगढ़ी भाखा म पढ़व

वर्मी कम्पोस्ट-दर
प्रदेस के गौठान मन म उत्पादित वर्मी कम्पोस्ट के न्यूनतम विक्रय दर 08 रूपिया प्रति किलोग्राम ले बढ़ाके 10 रूपिया प्रति किलोग्राम कर दे गेहे। मुख्यमंत्री भूपेश बघेल के निरदेस म कृषि उत्पादन आयुक्त ह ए संबंध म आदेस जारी कर दे हवय।
प्रदेस म ए बछर हरेली तिहार ले गोधन न्याय योजना के तहत गोबर के खरीदी सुरू करे गे हवय। एखर तहत दू रूपिया प्रति किलो दर ले ग्रामीण, किसान अउ पशुपालक मन ले गोबर के खरीदी करे जावत हे। ए योजना म अब तक एक लाख छत्तीस हजार विक्रेता मन ल गोबर खरीदे गे हवय, जेखर बर ओमन ल 59 करोड़ रूपिया के आॅनलाईन भुगतान करे गे हवय।
अधिकारी मन बतईन कि अब तक प्रदेस म आठ हजार क्विंटल वर्मी कम्पोस्ट के उत्पादन गौठान म होगे हवय अउ एक हजार क्विंटल वर्मी कम्पोस्ट के बिक्री करे जा चुके हे।
प्रधानमंत्री-फिक्की
प्रधानमंत्री नरेन्द्र मोदी ह देस म कोरोना महामारी के सेती ऊंच-नीच के बावजूद आर्थिक सुधार होय म, खुसी जाहिर करे हे। आज नई दिल्ली म ‘‘भारतीय उद्योग अउ वाणिज्य मंडल परिसंघ-फिक्की‘‘ के वार्षिक आम बइठका म श्री मोदी ह किहीन कि आर्थिक संकेतक मन ले नवा आसा जागे हे अउ देस ल संकट के ए दउर म बहुत कुछ सीखे ल मिले हे। ओमन किहीन कि एखर जम्मों श्रेय कारोबारी, नौजवान, किसान अउ आम भारतीय मन ल दे जा सकत हे।
प्रधानमंत्री ह किहीन कि आर्थिक सुधार के तहत गैर-जरूरी बाधा मन ल दूर करे जावत हे, अउ कृषि क्षेत्र एखर एक उदाहरण हवय। ओमन किहीन कि आज किसान अपन उपज ल मंडी के संगेसंग ओखर ले बाहिर घलो बेच सकत हे अउ डिजिटल मंच के माध्यम ले कृषि पदार्थ मनके बिक्री करे जा सकत हे।
नीति आयोग-आकांक्षी जिला
नीति आयोग ह छत्तीसगढ़ के आकांक्षी जिला राजनांदगांव म नवाचार कारीकरम ‘‘हरीतिका‘‘ के तहत उद्यानिकी क्षेत्र म जम्मों विकास सुनिश्चित करे खाातिर काम अउ प्रयास के सराहना करीन। आत्मनिर्भर बनाय के दिसा म प्रसिक्षण, तैयारी अउ पौधारोपण के काम तेजी ले करे जावत हे, जेखर प्रसंसा आयोग ह करीन हे। राजनांदगांव जिला म ‘‘मल् िचंग विधि‘‘ ले किसान मन ल पपीता, केरा समेत आने-आने प्रकार के साग-भाजी के खेती करे खातिर प्रोत्साहित करे जावत हे।
वर्चुअल मैराथन
छत्तीसगढ़ म पहली बार काली 13 दिसंबर के वर्चुअल मैराथन दउड़ के आयोजन करे जाही। ए दउड़ म सामिल होय बर 62 हजार ले जादा प्रतिभागी मन ह आॅनलाइन पंजीयन कराय हे। आॅनलाइन पंजीयन के आज आखिरी तारीख रिहीस। खेल अउ युवा कल्याण के संगेसंग जनसंपर्क विभाग विभाग डहार ले आयोजित करे गे ए वर्चुअल मैराथन म लोगन मन ले कोरोना संक्रमण के दिसा-निरदेस के पालन करत भाग लेके अपील करे गेहे।
प्रतिभागी घर, पार्क, मैदान, सड़क या कोन्हों आने सुरक्षित जगह म दउड़त अउ सोसल डिस्टेंसिंग के पालन करत अपन 20 ले 30 सेकेंड के वीडिया या फोटो हैशटैग करके फेसबुक, ट्वीटर अउ इंस्टाग्राम जइसन सोसल मीडिया म 13 दिसंबर के बिहनिया 6 ले 11 बजे के बीच अपलोड कर सकत हवय।
मुख्यमंत्री-कोरिया
मुख्यमंत्री भूपेश बघेल ह आज कोरिया के जिला मुख्यालय बैकुंठपुर म स्थित विश्रामगृह म अधिकारी अउ कमरचारी मन ले मुलाकात करीन। ए दउरान अधिकारी मन ह मुख्यमंत्री ल अपन समस्या बतईन। ए मउका म श्री बघेल ह लोक स्वास्थ्य यांत्रिकी विभाग के कार्यपालन अभियंता ल जिला म भू-जल       संवर्धन खातिर वाटर रिचार्जिंग के योजना म बिसेस ध्यान देके बात किहीन। संगेसंग ओमन गुरू घासीदास राष्ट्रीय उद्यान के संचालक मन ल वन्यजीव संरक्षण खातिर कार्ययोजना बनाय के निरदेस घलो दीन।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के तेरहवां कड़ी के प्रसारण काली इतवार के होही। मुख्यमंत्री लोकवाणी म ए बखत ‘‘छत्तीसगढ़ सरकार दो वर्ष का कार्यकाल‘‘ – बिसय म प्रदेशवासी मन ले गोठबात करही। ए कार्यक्रम के प्रसारण आकाशवाणी के जम्मों केंद्र अउ एफ.एम. रेडियो के संगेसंग क्षेत्रीय समाचार चैनल ले बीहनिया साढ़े दस बजे ले ग्यारा बजे तक करे जाही।
हमर ग्राम सभा
पंचायत अउ ग्रामीण विकास मंत्री टी.एस. सिंदहेव ह काली रतिहा साढ़े सात बजे आकाशवाणी रईपुर के प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम के बारे म जानकारी दीहीं। ए कारीकरम ल मीडियम वेब 981 किलोहटर््ज म सुने जा सकत हे। ए कारीकरम ल प्रदेस स्थित आकाशवाणी के जम्मों केन्द्र एके संघरा रिले करही।
माओवादी-मुठभेड़
राजनांदगांव जिला के सीमा ले लगे मध्यप्रदेश के बालाघाट जिला म सुरक्षा बल के संग होय मुठभेड़ म दू महिला माओवादी मारे गीस। ए दूनों माओवादी मन उपर आठ-आठ लाख रूपिया के इनाम घोसित रिहीस।
जानबा के मुताबिक पाछु रतिहा लांजी पुलिस डिवीजन के किरनापुर के जंगल म गश्त म निकले सुरक्षा बल मन उपर माओवादी मन ह गोलीबारी सुरू कर दीन। जवान मन डहार ले करे गे जवाबी कार्रवाई के बाद माओवादी मन ह जंगल के फायदा उठाके उहां ले भाग गीन। मुठभेड़ के बाद घटनास्थल के तलाशी के दउरान सुरक्षा बल मन ह दू महिला माओवादी मनके सव बरामद करीन। मउका ले बारह बोर के एक बंदूक घलो बरामद करे गेहे। मारे गे माओवादी म एक झिन, छत्तीसगढ़ के बीजापुर अउ दूसर महाराष्ट्र के गढ़चिरौली के रहइया रिहीस। मुठभेड़ के बाद राजनांदगांव के सीमावर्ती इलाका म सर्चिंग अभियान तेज कर दे गे हवय।
धान खरीदी
प्रदेस म चालू खरीफ विपणन बछर म समर्थन मूल्य म अब तक 17 लाख 62 हजार मीटरिक टन धान के खरीदी करे गे हवय। ए दउरान प्रदेस के 4 लाख 90 हजार किसान मन ह समर्थन मूल्य म धान बेचीन। उहें, राईस मिलर मन ल करीबन 2 लाख 70 हजार मीटरिक टन धान के डी.ओ. जारी करे गेहे, जेखर बर अब तक 27 हजार मीटरिक टन ले जादा के धान के उठाव कर ले गे हवय।
मौसम
प्रदेस म अवइया चैबीस घंटा के दउरान आने-आने जगह म हल्का ले  मध्यम बरसात होय के संभावना हे। उहें, मौसम के मिजाज बदले ले न्यूनतम तापमान म घलो गिरावट दर्ज करे जा सकत हे।
मौसम वैज्ञानिक एच.पी. चन्द्रा ह बतईन कि उत्तर मध्य महाराष्ट्र के उपरी क्षेत्र म चक्रवाती घेरा बने हुए हे। एखर परभाव ले छत्तीसगढ़ म घलो दू विपरीत तरह के हवा मनके भेंट होय ले अवइया 2-3 दिन म प्रदेस के कुछु इलाका मन म हल्का ले मध्यम बरसा होय के आसार हे।
संक्षिप्त समाचार
अउ अब थोरकुन समाचार सार म-– त्रिपुरा के राज्यपाल रमेश बैस ह छत्तीसगढ़ के राज्यपाल अनुसुईया उइके ले आज राजभवन म भेंट करीन। ए दउरान सुश्री उइके ह श्री बैस ल साल अउ नरियर देके समानित करीन।- छत्तीसगढ़ कर्मचारी-अधिकारी फेडरेशन के बैनर म करे जावत आंदोलन  म आज बालोद जिला के कमरचारी मन ह धरना-प्रदर्शन करीन। उहें, राजनांदगांव म करमचारी मन ह मसाल रैली निकाल के राज्यपाल अउ मुख्यमंत्री के नाव कलेक्टर ल ज्ञापन सौंपीन।

– राजनांदगांव म जनता कांग्रेस छत्तीसगढ़ के कार्यकर्ता मन ह किसान मनके आने-आने मांग ल लेके राज्यपाल के नाव जिला प्रसासन ल ज्ञापन सौंपीन।

– महासमुंद जिला के सांकरा थाना क्षेत्र म पुलिस ह दू झिन आरोपी मन के तीर ले तेंदुआ अउ हिरण के खाल बरामद करे हे, जेखर कीमत करीबन 25 लाख रूपिया बताय जावत हे।
अउ
– बिलासपुर जिला के गवरी के तीर ट्रेलर अउ बस के बीच टक्कर होय ले बस म सवार 10 यात्री घायल होगे।