मुख्यमंत्री-कोरिया
मुख्यमंत्री भूपेश बघेल ह आज अपन प्रवास के दउरान कोरिया जिला के आने-आने स्थान मन म करीबन दू सौ बारह करोड़ रूपिया के लागत ले दू सौ दस विकास कारज के लोकार्पण अउ भूमिपूजन करीन। ए मउका म मुख्यमंत्री ह बैकुंठपुर स्थित कृषि कालेज ल पूर्व वित्त मंत्री स्वर्गीय रामचंद्र सिंहदेव के नाम म करे जाय के घोसना करीन। उहें, नागपुर म महाविद्यालय अउ चिरमिरी म उद्यानिकी महाविद्यालय खोले के घलो घोसना करीन।
श्री बघेल ह जिला के घुघरा अउ पुसला म मल्टीयूटीलिटी सेंटर के लोकार्पण करीन। इहां संचालित आने-आने व्यावसायिक गतिविधि मनके माध्यम ले छियानवे परिवार मन ल आजीविका ले जोड़े गेहे। घुघरा म चालीस लाख अउ पुसला म बाईस लाख रूपिया ले जादा के लागत ले ए सेंटर बनाय गेहे। इहां पेवर ब्लाॅक, फ्लाईएश ईंट, पोल, चैनलिंक अउ चप्पल उद्योग के संग मिनी राईस मिल के घलो संचालन करे जात हे।
एखर अलावा श्री बघेल ह गेज बांध के तीर कृृषि महाविद्यालय के लोकार्पण करीन। ए मउका म आयोजित कारीकरम म मुख्यमंत्री ह आने-आने योजना मनके तहत चयनित हितग्राही मन ल तीन करोड़ रूपिया ले जादा के सहायता रासि अउ सामग्री घलो वितरित करीन।
मुख्यमंत्री-केन्द्रीय मंत्री पत्र
राज्य सरकार ह केन्द्र सरकार ले प्रदेस के माओवाद प्रभावित क्षेत्र मन म विकास कारज के लंबित प्रस्ताव ल स्वीकृति देके आग्रह करे गेहे। संगेसंग केन्द्र ल नवा प्रस्ताव घलो भेजे गेहे। ए संबंध म मुख्यमंत्री भूपेश बघेल ह केन्द्रीय गृह मंत्री अमित शाह ल एक ठिन चिट्ठी लिखे हे। चिट्ठी म मुख्यमंत्री ह लिखे हे कि पाछु दिन होय बइठका म माओवाद प्रभावित क्षेत्र मन म रोजगार देवाय बर कार्ययोजना उपर गोठबात होय रिहीस। श्री बघेल ह होय चरचा के आधार म राज्य सरकार डहार ले लंबित प्रस्ताव के संग नवा प्रस्ताव ल घलो जल्दी ले जल्दी मंजूरी देके आग्रह करे हे। उहें, स्टील संयंत्र के स्थापना समय-सीमा के भीतर भूमि डायवर्सन अउ लघु वनोपज के खरीदी बर प्रतिपूर्ति के आग्रह करे गेहे।
किसान मौत-जांच
राजनांदगांव जिला के घुमका धान खरीदी म दू दिन पहिली होय एक झिन किसान के मउत के मामला के प्रसासनिक जांच पूरा कर ले गेहे। एसडीएम मुकेश रावटे ह ए मामला के जांच करीन। प्रसासन ह दावा करे हे कि किसान के मउत के कारण खराब स्वास्थ्य हरय। एसडीएम ह जांच प्रतिवेदन म मृतक के बेटा अउ सहायक समिति प्रबंधक के हवाला ले बताय हे कि किसान के तबीयत ठीक नइ रिहीस, जेखर कारण ओ ह बेहोश होगे रिहीस अउ उंखर मउत होगे।
दूसर कोति, राजनांदगांव जिला किसान संघ ह किसान के मउत के मामला म जिला कलेक्टर के नाव एक ठिन ज्ञापन सौंपे के मृतक के परिवार ल आर्थिक सहायता देके मांग करे गेहे। संगेसंग किसान के मउत बर दोसी अधिकारी अउ कमरचारी मनके खिलाफ कार्रवाई करे के मांग घलो करे गेहे।
इही बीच, दुरूग के संभाग आयुक्त टी.सी. महावर ह आज राजनांदगांव जिला के अंजोरा धान खरीदी केन्द्र के निरीक्षण करीन। ओमन ह खरीदी केन्द्र म धान के तौलाई, कांटा-बाट अउ किसान मनके सुविधा बर उपलब्ध बेवस्था के जानकारी लीन।
न्यायाधीश पदस्थापना
छत्तीसगढ़ उच्च न्यायालय ह जिला अउ सत्र न्यायालय के न्यायाधीश मनके नवा पदस्थापना सूची जारी करे गेहे। एखर अनुसार राज्य सहकारी न्यायाधिकरण के अध्यक्ष न्यायमूर्ति जगदम्बा राय ल जांजगीर-चांपा के जिला अउ सत्र न्यायाधीश बनाय गेहे। उहें, उच्च न्यायालय के रजिस्टार अरविंद कुमार वर्मा ल बिलासपुर के जिला अउ सत्र न्यायाधीश नियुक्त करे गेहे। अइसने, न्यायमूर्ति राजेश कुमार श्रीवास्तव दुर्ग अउ अरविंद कुमार सिन्हा मुंगेली के नवा जिला अउ सत्र न्यायाधीश होही। उहें, न्यायमूर्ति नीता यादव ल कवर्धा के जिम्मेदारी दे गेहे।
राष्ट्रीय लोक अदालत
राष्ट्रीय लोक अदालत के आयोजन काली बारा दिसंबर के करे जाही। ये बखत पक्षकार वर्चुअल या भौतिक रूप म मौजूद होके राजीनामा ले मामला के निराकरण करा सकही। उच्च न्यायालय के मुख्य न्यायाधीश न्यायमूर्ति पी.आर. रामचंद्र मेनन अउ न्यायमूर्ति प्रशांत कुमार मिश्रा के अगवई म ये लोक अदालत के आयोजन करे जाही। ए अदालत म बैंक, विद्युत, श्रम, वैवाहिक अउ मोटर दुर्घटना दावा समेत समझौता योग्य मामला के निराकरण करे जाही। अब तक करीबन पन्द्रह सौ प्रकरण ल सुनवाई बर चयनित करे गेहे।
महिला आयोग सुनवाई
छत्तीसगढ़ राज्य महिला आयोग के अध्यक्ष डाॅक्टर किरणमयी नायक ह माईलोगिन न ल झूठा मामला दर्ज कराय ले बांचे के सलाह दीन। ओमन किहीन कि कानून के दुरूपयोग करे म उंखर लाभ नइ मिल पाय।
ए बात डाॅक्टर नायक ह बिलासपुर म महिला उत्पीड़न से संबंधित मामला के सुनवाई के दउरान किहीन। सुनवाई बर बीस प्रकरण राखे गे रिहीस, जेमा ले सात मामला के निराकरण मउका म ही करे गीस।
हज आवेदन-तिथि
हज यात्रा बर आवेदन जमा करे के तारीख दस जनवरी तक बढ़ा दे गेहे। अवइया बछर जून अउ जुलाई महीना के दउरान हज यात्रा होना हे।
राज्य हज कमेटी के अध्यक्ष मोहम्मद असलम खान ह बतईन कि आॅनलाइन हज, आवेदन कमेटी के वेबसाइट म उपलब्ध हे। संगेसंग राज्य के अड़तीस च्वाइस सेंटर मन म घलो निःसुल्क आॅनलाइन आवेदन भरे के सुविधा दे गेहे।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के तेरहवां कड़ी के प्रसारण इतवार तेरह दिसंबर के होही। मुख्यमंत्री लोकवाणी म ए बखत ‘‘छत्तीसगढ़ सरकार दो वर्ष का कार्यकाल‘‘ – बिसय म प्रदेशवासी मन ले गोठबात करही। ए कार्यक्रम के प्रसारण आकाशवाणी के जम्मों केंद्र अउ एफ.एम. रेडियो के संगेसंग क्षेत्रीय समाचार चैनल ले बीहनिया साढ़े दस बजे ले ग्यारा बजे तक करे जाही।
वर्चुअल मैराथन
छत्तीसगढ़ म पहली बार तेरह दिसंबर के वर्चुअल मैराथन दउड़ के आयोजन करे जाही। प्रतिभागी मनके उत्साह ल देखत पंजीयन तारीख ल काली तक बढ़ा दे गेहे। एखर पहिली पंजीयन के आखिरी तारीख दस दिसंबर रिहीस। ए दउड़ म सामिल होय बर करीबन संतावन हजार प्रतिभागी मन ह आॅनलाइन पंजीयन कराय हे। राज्य म हरेक जिला म पहिली तीन सौ ले पांच तक पंजीयन करइया प्रतिभागी मन ल टी-सर्ट देके ओमन ल प्रोत्साहित करे जाही।
मैराथन के दउरान कोरोना संक्रमण के दिसा-निरदेस के पालन करत प्रतिभागी कोन्हों भी स्थान म समूह म एकत्रित नइ होही। प्रतिभागी, घर, पार्क, मैदान, सड़क या आने सुरक्षित जगह म सोसल डिस्टेंसिंग के पालन करत दउड़त अपन बीस ले तीस सेकेंड के वीडिया या फोटो हैशटैग करके फेसबुक, ट्वीटर अउ इंस्टाग्राम जइसन सोसल मीडिया म तेरह दिसंबर के बिहनिया छह ले ग्यारह बजे तक अपलोड कर सकत हे।
लखमा वीर मेला
वाणिज्य अउ उद्योग मंत्री कवासी लखमा ह कहिन कि समृद्धि आदिवासी, संस्कृति अउ पंरपरा ल सहेजे के जरूरत हे। एखर ले आगू के पीढ़ही मन घलो प्रेरणा ले सकही। ए बात श्री लखमा ह बालोद जिला के राजाराव पठार म सहीद वीरनारायण सिंह के सहादत दिवस के मउका म आयोजित ‘‘वीर मेला‘‘ के समापन समारोह ल संबोधित करत किहीन। ओमन कहिन कि सर्व आदिवासी समाज ल विकास के आने-आने क्षेत्र म आगू बाढ़े के जरूरत हे।
इंस्पायर अवाॅर्ड
इंस्पायर अवाॅर्ड पंजीयन म छत्तीसगढ़ तीसर स्थान म हे। कोरोना महामारी के परिस्थिति के बावजूद राज्य म ए अवाॅर्ड बर अब तक चवालीस हजार ले जादा विद्यार्थी अपन पंजीयन करा चुके हे। ए अवाॅर्ड कारीकरम म छठवीं ले दसवीं तक के विद्यार्थी भाग ले सकही। स्टार्ट इंडिया इनिसिएटिव प्रोग्राम के तहत केन्द्रीय विज्ञान अउ प्रौद्योगिकी मंत्रालय डहार ले हर बछर ए स्पर्धा के आयोजन करे जाथे। ए अवाॅर्ड बर जिला अउ राज्य स्तर म स्पर्धा होथे। प्रतियोगिता म भाग ले बर चयनित प्रतिभागी मन ल माॅडल बनाय बर दस हजार रूपिया के रासि दे जाथे। राष्ट्रीय प्रदर्सनी ले साठ माॅडल के चयन राष्ट्रीय पुरस्कार बर करे जाथे।