धान खरीदी-निर्देश
प्रदेस के राजस्व विभाग के सचिव ह जम्मों जिला कलेक्टर मन ल समर्थन मूल्य म धान खरीदी बर किसान मनके पंजीकृत धान के रकबा अउ गिरदावरी म गलती होय म तुरते कार्यवाही करे के निरदेस दीन हे। निरदेस म केहे गेहे कि गिरदावरी आधा या गलत हे त सुधार काम तुरते कराय जाय। संगेसंग पंजीयन के दउरान धान के गलती ले कम रकबा के दर्ज होगे हे त ओला सुधार के सही रकबा दर्ज करे जाय। निरदेस म केहे गेहे कि बेचे बर पंजीकृत धान के रकबा म संसोधन बर अरजी मिले म पूरा जांच करके तहसीलदार डहार ले भुईयां पोर्टल म अपन लाॅगिन आई.डी. ही अनुमोदन के बाद रकबा के संबंध म गिरदावरी ले जुड़े गलती ल प्राथमिकता के आधार म सुधारे जाय अउ एखर सूचना संबंधित ग्राम के प्राथमिक कृषि साख सहकारी समिति ल घलो दे जाय।
केन्द्र-किसान बातचीत
केन्द्र सरकार अउ किसान संगठन के प्रतिनिधि मनके बीच काली किसान मनके मुद्दा म नई दिल्ली के विज्ञान भवन म पांचवां दउर के गोठबात होईस। गोठबात के बाद श्री तोमर ह किहीन कि छठवां अउ अवइया दउर के गोठबात नौ दिसंबर के होही।
केन्द्रीय कृषि मंत्री नरेन्द्र सिंह तोमर ह गोठबात के बाद संवाददाता मन ले किहीन कि किसान संगठन मन ल फेर आश्वस्त करे गेहे कि न्यूनतम समर्थन मूल्य-एमएसपी प्रणाली जारी रइही।
किसान आत्महत्या-जांच दल
जनता कांग्रेस छत्तीसगढ़ के प्रदेस अध्यक्ष अमित जोगी ह कोंडागांव जिला म एक झिन किसान डहार ले करे गे आत्महत्या के मामला के जांच बर एक दल गठित करे हे। ए जांच दल तीन दिन म किसान के आत्महत्या के कारण के पता लगाके अपन रिपोर्ट पार्टी के राष्ट्रीय अध्यक्ष ल सौंपही।
सशस्त्र सेना झण्डा दिवस
काली सशस्त्र सेना झण्डा दिवस हरय। ए मउका म राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल सशस्त्र सेना झण्डा कोस म दान करे के अपील करीन हे। अपन संदेस म राज्यपाल ह किहीन कि ए दिन अपन कर्तव्य के पालन करत वीरगति ल पवइया जवान मनके बलिदान के सुरता करे अउ उंखर प्रति सम्मान प्रकट करे के अवसर देथे।
अंबेडकर-पुण्यतिथि
राष्ट्र आज भारतीय संविधान के जनक, भारत रत्न डाॅक्टर भीमराव अंबेडकर के चैंसठवां पुण्यतिथि म श्रद्धासुमन अर्पित करत हे। ए मउका म देसभर म कतकोन कारीकरम राखे गेहे। राष्ट्रपति रामनाथ कोविंद ह बाबा साहेब अंबेडकर ल उंखर पुण्यतिथि म श्रद्धांजलि अर्पित करीन। उपराष्ट्रपति एम. वेंकैया नायडू ह डाॅक्टर अंबेडकर के पुण्यतिथि म आज चेन्नई के राजभवन म राखे गे एक ठिन कारीकरम म ओमन ल श्रद्धांजलि अर्पित करीन। छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह घलो बाबा साहेब अंबेडकर के पुण्यतिथि म ओमन ल नमन करीन हे। ओमन किहीन कि डाॅक्टर अंबेडकर ह भारतीय संविधान के प्रारूप समिति के अध्यक्ष के रूप म संविधान निर्माण म बिसेस भूमिका निभाईन। ऐति, प्रदेश भाजपा अनुसूचित जाति मोर्चा डहार ले रईपुर के एकात्म परिसर म डाॅक्टर अंबेडकर के पुण्यतिथि म आज एक ठिन कारीकरम के आयोजन करीन। ए मउका म भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह, भाजपा के प्रदेश अध्यक्ष विष्णुदेव साय, प्रदेश संगठन महामंत्री पवन साय, सांसद सुनील सोनी, भाजपा विधायक अउ पदाधिकारी समेत कतकोन कार्यकर्ता मौजूद रिहीन।
माओवादी
सुकमा जिला म सुरक्षा बल मन ह पांच झिन माओवादी मन ल गिरफ्तार करे हे। मिले जानकारी के मुताबिक जिला पुलिस बल अउ केन्द्रीय रिजर्व पुलिस बल-सीआरपीएफ के सामलात टीम तलासी अभियान म निकले रिहीन। इही दउरान गादीरास इलाका म घेराबंदी करके पांच झिन माओवादी मन ल गिरफ्तार करे गीस। ऐति, दंतेवाड़ा जिला के अरनपुर थाना क्षेत्र के हिरोली गांव के दू झिन माईलोगिन मन ह माओवादी मन डहार ले लगाए गे स्पाइक होल म फंस के घायल होगे। पुलिस के मदद ले ए दूनों झिन माईलोगिन मन ल अस्पताल म भर्ती कराय गेहे।
कोरोना /जागरूकता
देस म कोरोना संक्रमण ले मुक्त होय के दर बाढ़के चैरानवे दशमलव तीन-सात प्रतिसत होगे हे। ऐति, छत्तीसगढ़ के रायगढ़ जिला के पांच सौ चवालीस ग्राम पंचायत कोरोना संक्रमण ले बांचे हे। ए ग्राम पंचायत मन म कोरोना संक्रमण के एको मामला आगू नइ आय हे। बताय जात हे कि कोरोना संक्रमण ले मुक्त ए गांव के लोगन मन सामाजिक दूरी के पूरा पालन करत हे। संगेसंग खेती-बाड़ी अउ आने-आने काम के दउरान एमन मास्क लगाय बर नइ भुलावय। स्वास्थ्य विभाग अब ए गांव वाले मनके सफलता के कहानी के प्रचार-प्रसार करके आने गांव मन ल घलो कोरोना ले बचाव बर प्रेरित करत हे।
इही बीच, छत्तीसगढ़ के जाने-माने साहित्यकार – कथाकार डाॅक्टर परदेशी राम वर्मा ह लोगन मन ले कोरोना वायरस ले बचाव बर जरूरी सावधानी बरते के अपील करीन हे।
भाजपा पदाधिकारी-प्रवास
भारतीय जनता पार्टी के राष्ट्रीय महामंत्री अउ छत्तीसगढ़ प्रदेश प्रभारी डी.पुरन्देश्वरी अउ प्रदेस के सह प्रभारी नितिन नवीन काली सात दिसंबर ले छत्तीसगढ़ के दू दिवसीय दउरा म आही। ए दउरान दूनों पदाधिकारी भाजपा प्रदेस अध्यक्ष अउ संगठन महामंत्री के संग बइठका करही। एखर बाद प्रदेस प्रभारी अउ सह प्रभारी भाजपा के जम्मों मोर्चा पदाधिकारी, जिला अध्यक्ष, कोर ग्रुप, सांसद, विधायक अउ प्रमुख नेता मनके संग बइठका म सामिल होही।
वर्चुअल-मैराथन
छत्तीसगढ़ म पहिली घांव तेरह दिसंबर के वर्चुअल मैराथन दउड़ के आयोजन करे जाही। ए दउड़ म सामिल होय बर पाछु चार दिसंबर ले पंजीयन के काम सुरू होगे हे। अब तक उन्नीस हजार ले जादा प्रतिभागी आॅनलाइन पंजीयन करा चुके हे। राज्य म हरेक जिला म पहिली तीन सौ ले पांच सौ तक पंजीयन करइया प्रतिभागी मन ल टी-सर्ट देके ओमन ल प्रोत्साहित करे जाही।
खबर के मुताबिक मैराथन के दउरान कोरोना संक्रमण के दिसा-निरदेस के पालन करत प्रतिभागी ल कोनों भी जगह म झूंड म सकलाना नइ हे। प्रतिभागी मन घर, गार्डन, मैदान, सड़क या फेर दूसर सुरक्षित जगह म सोसल डिस्टेंसिंग के पालन करत दउड़त अपन बीस ले तीस सेकेंड के वीडियो या फोटो हैशटैग करके फेसबुक, ट्वीटर अउ इंस्टाग्राम जइसे सोशल मीडिया म तेरह दिसंबर तक बिहनिया छह ले ग्यारह बजे तक अपलोड कर सकत हे। एखर बर आॅनलाईन पंजीयन दस दिसंबर तक खेल अउ युवा कल्याण विभाग के संगेसंग जनसंपर्क विभाग के वेबसाइट म करे जा सकत हे।
अंजोर/प्रचार-रथ
गांव-गंवई के क्षेत्र म बाढ़त अपराध के रोकथाम बर गरियाबंद जिला म अंजोर रथ अभियान के सुरूवात करे गेहे। एखर माध्यम ले पुलिस, ग्रामीण क्षेत्र के छोटे-बड़े गांव, हाट बाजार अउ गली-मोहल्ला तक पहुंच के स्थानीय निवासी मन ल जागरूक करही।
ऐति, राजनांदगांव जिला म प्रधानमंत्री फसल बीमा योजना के तहत फसल बीमा के प्रचार-प्रसार करे बर फसल बीमा रथ ल रवाना करे गेहे। ए रथ पन्द्रह दिसंबर तक जिला के जम्मों गांव मन म जाके योजना के प्रचार-प्रसार करही।
राउत नाच महोत्सव
मुख्यमंत्री भूपेश बघेल ह काली बिलासपुर म तिरालीसवां राउत नाचा महोत्सव के सुभारंभ करीन। ए मउका म मुख्यमंत्री ह किहीन कि प्रदेस म गाय अउ चरवाहा मनके दसा ल सुधारे बर राज्य सरकार डहार ले आने-आने उपाय करे जात हे। ओमन किहीन कि सरकार डहार लेे गौठान म चारा-पानी के बेवस्था करे के संगेसंग गोबर बिसाय के घलो सुरूवात करे गेहे। श्री बघेल ह किहीन कि एखर ले राज्य म जैविक खेती ल बढ़ावा दे जाही। ए दउरान मुख्यमंत्री ह महोत्सव म भाग लेवइया हरेक नर्तक दल मन ल पच-पच हजार रूपिया देके अउ पशु औषधालय बनाय के घोसना घलो करीन।
हाईकोर्ट-नोटिस
छत्तीसगढ़ उच्च न्यायालय ह प्रदेस के गृह सचिव, पुलिस महानिदेशक अउ बिलासपुर रेंज के पुलिस महानिरीक्षक ल नोटिस जारी करे हे। मिले जानकारी के मुताबिक जांजगीर-चांपा जिला म उप पुलिस अधीक्षक के पद म पदस्थ निकोलस खलखो डहार ले उच्च न्यायालय म अवमानना याचिका दाखिल करे गेहे, जेखर मुताबिक याचिकाकर्ता ह किहीन हे कि हाईकोर्ट के आदेस के एक बछर बीते के बाद घलो अवमाननाकर्ताओं मन ह हाईकोर्ट के आदेस के पालन नइ करे हे। याचिका के सुनवाई के बाद हाईकोर्ट ह गृह सचिव, पुलिस महानिदेशक अउ बिलासपुर रेंज के पुलिस महानिरीक्षक के खिलाफ अवमानना नोटिस जारी करके जवाब पेस करे के निरदेस दीन हे।