मन की बात
प्रधानमंत्री नरेन्द्र मोदी ह आज किहिन हे कि कृषि सुधार ह किसान मन बर नवा बिकास के रद्दा खोले हे। आज आकाशवाणी म मन की बात म ओमन किहिन कि किसान मन के जोन मांग रिहिस ओ मांग ल पुरा करे गे हे, संसद ह गजब सोंच-विचार के बाद कृषि सुधार ल कानूनी रूप दे हे।
प्रधानमंत्री ह युवा मन ले किहिन कि ओमन अपन तीर-तखार गांव के दउरा करके किसान मन ल खेती म नवाचार अउ अभि के कृषि सुधार के संबंध म जागरूक करय। प्रधानमंत्री ह किहिन कि राष्ट्र कालि गुरूनानक जयंती के पांच सौ इकानवा प्रकास पर्व मनाहि। गुरूनानक जी के उपदेस वैंकुअर ले वेलिंगटन अउ सिंगापुर ले दक्षिण अफ्रीका तक गुंजत हे।
श्री मोदी ह किहिन कि देस ह अब तालाबंदी ले बाहिर निकले के बाद कोरोना के टीका म गोठ-बात सुरू कर दे हे। तभो ले ओमन आगाह करिन कि कोरोना के संबंध म कोनो भी किसम के कोताहि घातक होही। ओमन किहिन कि सबो झन ल कोरोना के खिलाफ अपन लड़ई ल मजबुत करना हे।
आई.ई.डी. विस्फोट
सुकमा जिला म पाछु रतिहा माओवादी मन कोति ले करे गे बारूदी सुरंग विस्फोट म सी.आर.पी.एफ. के कोबरा बटालियन के एक झन जवान सहीद होगे। उहे सात झन आने जवान घायल हे जोन मन ल इलाज बर राजधानी रईपुर के एक ठन प्रायवेट अस्पताल म भर्ती कराय गे हे।
खबर के मुताबिक कालि चिन्तलनार, बुरकापाल अउ चिन्तागुफा बेस केम्प ले कोबरा एसटीएफ अउ डीआईजी के संयुक्त टीम तलासी अभियान म निकले रिहिस। इही बेरा अरबराज मेट्टा पहाड़ी तिर माओवादी मन ह बारूदी सुरंग विस्फोट करिन। ये हादसा म आठ झन जवान घायल हो गे हे। घायल जवान मन ल पहिली चिन्तलनार के अस्पताल लेगे गिस। फेर पाछु राजधानी रईपुर के अस्पताल में लाय गिस जिहां इलाज के बेरा कोबरा बटालियन के अस्सिटेंट कमांडेंट नितीन भालेराव के मउत होगे।
श्री भालेराव नासिक महाराष्ट्र के रहवइया रिहिस। उहें अस्पताल म भर्ती सात आने जवान मन के हालत खतरा ले बाहिर बताय जात हे। राज्यपाल अनुसुईया उइके अउ मुख्यमंत्री भुपेश बघेल ह माओवादी घटना के निंदा करत सहीद जवान बर सोक जतइन हे।
गृहमंत्री ताम्रध्वज साहू ह माना पहुंच के सहीद जवान ल श्रंद्धाजलि दिन। ऐ बेरा म संसदीय सचिव विकास उपाध्याय, पुलिस महानिदेशक डी.एम. अवस्थी समेत सीआरपीएफ के बड़का अधिकारी मन सहीद जवान ल श्रंद्धाजलि दिन।
कोरोना समाचार/जागरूकता
प्रदेस म कोरोना संक्रमित मरीज के संख्या दु लाख पैंतीस हजार करिबन पहुंच गे हे। अभी करिबन इक्कीस हजार मरीज मन के इलाज आने-आने अस्पताल म चलत हे। महासमुंद जिला म कोरोना माहामारी के रोकथाम अउ बचाव बर आयुर्वेद विभाग कोति ले आयुष काढ़ा बांटे जात हे।
इही बिच छत्तीसगढ़ के जाने-माने लोकगायिका कविता वासनिक ह लोगन ले कोरोना संक्रमण ले बाचे खातिर जरूरी सावधानी राखे के अपील करिन हे –
होल्ड बाईट – कविता वासनिक
(50 सेकेण्ड)
धान-खरीदी
प्रदेस म समर्थन मुल्य म धान खरीदी परंदिन एक दिसंबर ले सुरू होही। राज्य म ऐसो धान बेचे बर इक्कीस लाख उनतीस हजार ले जादा किसान मन पंजीयन कराय हें। उहें धान के रबका सत्ताईस लाख उनसठ हजार हेक्टेयर ले जादा हे।
ऐति राजनांदगांव के जिला म धान बिसाय के तइयारी पुरा कर ले गे हे। कलेक्टर टोपेश्वर वर्मा ह किहिन कि समिति प्रबंधक मन ल धान खरीदी केन्द्र म क्षमता के मुताबिक कुपन काटना चाहि।
ओति कोण्डागांव जिला म पुलिस अउ राजस्व विभाग के संयुक्त टीम ह माकड़ी थाना के गांव छिनारी म ओडिसा ले लाय जात बारा बोरी अवैध धान जब्त करे हे।
माशिमं-असाइनमेंट
छत्तीसगढ़ माध्यमिक सिक्षा मंडल ह सैक्षणिक सत्र दु हजार बीस-ईक्कीस बर छह महीना म छह ठिन असाइनमेंट जारी करे के फइसला ले हे।
ये असाइनमेंट पढ़इया लइका मन घर ले लिख के स्कूल म आके जमा करही। ऐखर मुल्यांकन स्कुल म कर के नंबर ल सिक्षा मंडल के पोर्टल म अपलोड करे जाही। ऐ संबंध म जम्मो मान्यता मिले स्कूल के प्राचार्य मन बर निर्देस जारी कर दे गे हे।
निर्देस म केहे गे हे कि लइका मन कोति ले जमा करे गे असाइनमेंट ल परीक्षा परिणाम निकले के बाद एक सौ बीस दिन तक सुरक्षित रखना हे। असाइनमेंट सुरक्षित नहीं रहे म कार्रवाई करे जाही।
लोकार्पण-भुमिपूजन
श्रममंत्री डाॅक्टर शिवकुमार डहरिया ह आरंग विधानसभा के गंाव सेमरिया, नरदहा अउ पचेड़ा म आने-आने विकास काम के लोकार्पण अउ भुमिपूजन करिन। ऐ बेरा म डाॅक्टर डहरिया ह कहिन कि छत्तीसगढ़ किसान के प्रदेस हवय ऐखर सेती राज्य सरकार जम्मो किसान मन के कर्जा माफी करके पच्चीस सौ रूपया कुंटल के दर ले धान बिसावत हे।
वन अधिकार पट्टा वितरण
वन आवास अउ पर्यावरण मंत्री मोहम्मद अकबर ह कवर्धा विधानसभा के वनांचल गांव के दउरा करिन। ऐ बेरा म श्री अकबर ह गांव तेलिटोटा म गांव के लोगन ल सामुदायिक वन अधिकार के पट्टा सौपिन। उहें गांव लाटा म सामुदायिक भवन अउ खाद्यान्न गोदाम के लोकार्पण करिन। ऐ बेरा म वनमंत्री किहिन कि राज्य सरकार किसान, वनवासी अउ प्रदेस के नागरिक मन के आर्थिक बढ़वार अउ उखर विकास खातिर प्रतिबद्ध हवय।
हमर-ग्रामसभा
पंचायत अउ ग्रामीण विकास मंत्री टी.एस. सिंहदेव आज रतिहा साढ़े सात बजे आकाशवाणी रइपुर ले परसारित बिसेस कार्यक्रम ‘‘हमर ग्रामसभा‘‘ म राज्य
सासन के नीति, योजना अउ कार्यक्रम के संबंध म जानकारी दिही। ऐ कार्यक्रम ल मीडियावेब नौ सौ इक्यासी किलोहट्र्ज म सुने जा सकत हे। ऐला प्रदेस स्थित आकाशवाणी के जम्मो केन्द्र एक संघरा रिले करहि।
जवान-आत्महत्या
सुकमा अउ बीजापुर जिला म दु झिन जवान म अपन सर्विस रायफल ले गोली मार के आत्महत्या कर लिन।
खबर के मुताबिक सुकमा जिला के पुरसपाल के सीएएफ केम्प म जवान दिनेस वर्मा ह आज भिनसरहा अपन रायफल ले खुद उपर छह राउंड फायरिंग करिस जेकर ले ओकर मउकच म मउत होगे। पुसपाल थाना प्रभारी अउ एसडीओपी घटना म पहुंच के आत्महत्या के कारण पता लगाय म जुटे हे। ये जवान भिलाई के रहवइया रिहिस।
उहें बीजापुर जिला के पामेड़ थाना परिसर म कालि मंझनिया एक पुलिस कांस्टेबल विनोद पोरते ह सर्विस रायफल ले खुद ल गोली मार के आत्महत्या कर लिस, ऐ बिलासपुर जिला के पालीगांव म सिरसा गांव के रहवइया रिहिस। ऐखर ड्यूटी माओवाद परभावित पामेड़ थाना म रिहिस।
पेंशनधारी-जीवन प्रमाण-पत्र
कर्मचारी भविष्य निधि संगठन – ईपीएफओ ह पेंसन पवइया मन बर जीवन प्रमाण-पत्र जमा करे के बेरा ल अवइया बछर अट्ठाईस फरवरी तक बढ़ा देहे। ऐखर ले करिबन पैंतीस लाख पेंसन पवइया मन ल फायदा मिलहि। ऐ फइसला कोरोना माहामारी ल देखत करे गे हे।
अभी पेंसनधारक मन तीस नवंबर तक कभु-भी जीवन प्रमाण-पत्र जमा करा सकत हे जउन जारी होय के तारिख ले एक बझर तक मान्य रहि। जीवन प्रमाण-पत्र तीन लाख पैंसठ हजार सामान्य सेवा केन्द्र एक लाख छत्तीस हजार बैंक साखा, डाकघर अउ एक लाख नब्बे हजार डाकिया अउ ग्रामीण डाकसेवक मन ले जमा कराय जा सकत हे।