धान खरीदी
प्रदेस म अवइया एक दिसंबर ले समर्थन मूल्य म सुरू होवइया धान खरीदी बर किसान मन ल आज ले टोकन बांटे के काम सुरू होय हे। चालू विपणन बछर म करीबन ढाई लाख नवा किसान मन अपन पंजीयन कराय हे। कुल इक्कीस लाख अड़तालीस हजार किसान मनके पंजीयन होय हे। ए बछर धान बेचे खातिर पंजीकृत किसान मनके संख्या पाछु बछर के तुलना म दस प्रतिसत जादा हे।
इही बीच, महासमुंद जिला म साॅफ्टवेयर अपडेट नइ होय के कारण आॅनलाईन टोकन बांटे के काम प्रभावित होईस। उहें, इही जिला के सरायपाली तहसील म धान के अवैध परिवहन के मामला म ट्रक अउ टैªक्टर ल जब्त करे गेहे। ए टरक म पश्चिम बंगाल के मिदनापुर ले दू सौ छियानवे कुंटल धान अवैध रूप ले दुर्ग लाय जात रिहीस। एखर अलावा ट्रैक्टर म एक सौ तीस कट्टा धान रायगढ़ ले बसना कोति ले जाय जात रिहीस।
एखर पहिली, काली धान खरीदी के तैयारी बर रईपुर म एक उच्च स्तरीय बैठक राखे गे रिहीस। बइठका म अपर मुख्य सचिव अमिताभ जैन, सुब्रत साहू अउ खाद्य सचिव डाॅक्टर कमलप्रीत सिंह मन धान खरीदी बर बारदाना के पर्याप्त बेवस्था सुनिश्चित कराय के निरदेस अधिकारी मन ल दीन। ओमन अधिकतम एक सप्ताह के बेरा बर टोकन देय अउ धान नइ बेच पाय के स्थिति म नवा टोकन जारी करे बर किहीन। बइठका म निर्णय ले गीस कि प्लास्टिक के बारदाना के उपयोग केवल धान खरीदी बर मिलर मन करा भेजे खातिर करे जाही। अइसने, धान खरीदी केन्द्र मन म दू चरण म सात हजार दू सौ बीस चबूतरा मनके निर्माण करे जात हे, जेला तीस नवंबर तक पूरा करे के निरदेस दे गेहे। उहें, बिना अनुमति के दूसर राज्य मन ले धान के अवैध परिवहन करइया गाड़ी मनके खिलाफ कार्रवाई करे बर घलो केहे गेहे।
कोरोना समाचार/जागरूकता
स्वास्थ्य विभाग ह प्रदेस के एक ठिन अउ लैब ल कोरोना संक्रमण के पहचान खातिर आरटी-पीसीआर जांच के अनुमति दे देहे। एखरे संग अब आरटी-पीसीआर जांच करइया केन्द्र मनके संख्या ग्यारह होगे हे। एमा सात सासकीय अउ निजी क्षेत्र के लैब हवय। स्वास्थ्य मंत्री टी.एस. सिंहदेव ह कोरोना के जादा ले जादा सैंपल के जांच करे के निरदेस दीन हे। प्रदेस म अभी हरेक दिन बत्तीस हजार सैंपल के जांच करे जात हे।
उहें, प्रदेस म कोरोना संक्रमित मरीज म मनके संख्या दू लाख तीस हजार के पार होगे हे। प्रदेस म काली एक हजार सात सौ तिरपन नवा कोरोना संक्रमित मरीज मनके पहिचान करे गीस। उहें, काली सत्रह मरीज मनके मउत होगे। अभी तेईस हजार नौ सौ संतावन मरीज मनके इलाज कतकोन अस्पताल म चलत हे।
इही बीच, राष्ट्रीय शिक्षक पुरस्कार ले सम्मानित दुरूग जिला के निवासी व्याख्याता सपना सोनी ह लोगन मन ले कोरोना ले बचाव खातिर जरूरी सावधानी बरते के अपील करे हे।
मन की बात
प्रधानमंत्री नरेन्द्र मोदी इतवार के बिहनिया ग्यारह बजे आकाशवाणी ले ‘‘मन की बात‘‘ कारीकरम म अपन बिचार साझा करही। ये मासिक रेडियो कारीकरम के इकहत्तवां कड़ी होही। एला आकाशवाणी अउ दूरदर्शन के जम्मों नेटवर्क म प्रसारित करे जाही। ए कारीकरम आकाशवाणी समाचार के वेबसाइट, अउ मोबाइल ऐप के संगेसंग आकाशवाणी, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय के यू-ट्यूब चैनल म देखे जा सकही। प्रधानमंत्री के संबोधन के तुरते बाद आकाशवाणी ले ए कारीकरम क्षेत्रीय भासा म प्रसारित करे जाही। क्षेत्रीय भासा म रतिहा आठ बजे एला फेर सुने जा सकही।
पीएससी-अधिसूचना
छत्तीसगढ़ लोक सेवा आयोग-पीएससी ह सिविल सर्विस परीक्षा बर अधिसूचना जारी कर देहे। ए दारी कुल एक सौ तिरालीस पद बर परीक्षा राखे गेहे। प्रारंभिक परीक्षा चैदह फरवरी के अउ मुख्य परीक्षा अट्ठारह ले इक्कीस जून के बीच राखे गेहे। ए परीक्षा म सामिल होय बर उम्मीदवार चैदह दिसंबर ले बारह जनवरी तक आॅनलाईन आवेदन कर सकत हे।
ए दारी पीएससी के परीक्षा म डिप्टी कलेक्टर के तीस, डीएसपी के बैकलाॅग समेत छह, वित्त सेवा के पन्द्रह, नायब तहसीलदार के बीस अउ आबकारी उप निरीक्षक के सत्रह पद सामिल हे।
बीएसएफ-पत्रकारवार्ता
छत्तीसगढ़ म माओवादी समस्या के निदान ओ क्षेत्र मनके विकास अउ संचार कनेक्टिविटी बढ़ा के करे जा सकथे। ए दिसा म राज्य सरकार अउ सीमा सुरक्षा बल-बीएसएफ ह तालमेल बनाके काम करत हे। ए बात बीएसएफ के अतिरिक्त महानिदेशक एस.एल. थोईसन ह आज नवा रईपुर म राखे गे पत्रकारवार्ता म कहिन। ओमन किहीन कि माओवाद इलाका म विकास के संगेसंग सुरक्षा बल डहार ले अभियान तेज कर दे गेहे। बीएसएफ, जिला पुलिस अउ दूसर बल मन संग लगातार संयुक्त अभियान चलावत हे। माओवादी मन ल मुख्यधारा म जोड़े बर अउ सरकार के योजना बताय बर जवान मन ल स्थानीय बोली अउ भासा के प्रसिक्षण घलो दे जात हे।
एडीजी ह बतईन कि बीएसएफ अपन छप्पनवां स्थापना दिवस एक दिसंबर के मनाही। ए मउका म अच्छा काम करइया जवान मन ल सम्मानित करे जाही।
छत्तीसगढ़ी राजभाषा दिवस
काली छत्तीसगढ़ी राजभाषा दिवय हरय। ए मउका म राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल बधाई अउ सुभकामना दीन। राज्यपाल ह किहीन कि छत्तीसगढ़ी अब्बड़ गुरतुर बोली-भासा हे, एला संरक्षित अउ संवर्धित करे खातिर हमन ल हरसंभव प्रयास करन चाही। ओमन किहीन कि ए भासा के उपयोग ल जादा ले जादा बढ़ावा देना चाही, ताकि अवइया पीढ़ी एखर ले परिचित होही, जेखर ले इहां के कला अउ संस्कृति सुरक्षित रइही।
उहें, मुख्यमंत्री ह किहीन कि ‘जतका मान हमन ल अपन छत्तीसगढ़ महतारी उपर हे ओतके हमर मातृभासा छत्तीसगढ़ी बर घलो होना चाही। छत्तीसगढ़ी भासा ल हमन आत्म गउरव संग जोड़के देखबो तभे ओ आघू बाढ़ही।‘
तबादला
राज्य सरकार ह चार उप पुलिस अधीक्षक मनके तबादला आदेस जारी करे हे। सचिन्द्र चैबे ल सुकमा के अतिरिक्त पुलिस अधीक्षक बनाय गेहे। उहें, कमलेश्वर प्रसाद चंदेल ह अतिरिक्त पुलिस अधीक्षक रेडियो भिलाई होही। नीरज कुमार चंद्राकर ल नारायणपुर, जयंत वैष्णव ल पुलिस मुख्यालय रईपुर म अउ ऋचा मिश्रा ल बीजापुर म पदस्थ करे गेहे।
मानव तस्करी-महिला गिरफ्तार
राजनांदगांव जिला के डोंगरगढ़ पुलिस ह मानव तस्करी के आरोप म एक झिन माईलोगिन ल रईपुर ले गिरफ्तार करे हे। कथित रूप ले ए माईलोगिन भारतीय जनता पार्टी ले जुड़े रिहीस। जानकारी मिले के बाद भाजपा के प्रदेस अध्यक्ष विष्णुदेव साय ह गंगा पांडेय नाव के ए महिला ल पार्टी के प्राथमिक सदस्यता ले निलंबित कर देहे।
आरोप हे कि ए महिला मानव तस्करी करइया मनखे मन बर हवाई टिकिट बनवाय के काम करत रिहीस अउ ओमन ल छत्तीसगढ़ ले दूसर राज्य मन म ले जाय बर घलो मदद करत रिहीस।
ट्रेन परिचालन
तिहार के बेरा म यात्री मनके सुविधा ल ध्यान म राखत रेलवे प्रसासन डहार ले तीस नवंबर तक चलाय जाने वाला पूजा स्पेशल गाड़ी मनके परिचालन बढ़ा दे गेहे। इही म कोरबा-यशवंतपुर पूजा स्पेशल ट्रेन अब पच्चीस दिसंबर तक चलही। उहें, भुवनेश्वर कोति जवइया गाड़ी मन ल दू जनवरी तक चलाय जाही। एखरे संग पुरी-एलटीटी-पुरी स्पेशल ट्रेन के परिचालन इकतीस दिसंबर तक करे जाही। हफ्ता म पांच दिन चलने वाला विशाखापट्टनम-निजामुद्दीन एक्सप्रेस के परिचालन अब तीन दिसंबर तक करे जाही। एखर अलावा विशाखापट्टनम-एलटीटी साप्ताहिक पूजा स्पेशल ट्रेन अउ पुरी-सूरत स्पेशल ट्रेन के परिचालन उनतीस दिसंबर तक करे जाही।
संक्षिप्त समाचार
– प्रदेस के चिकित्सा सिक्षा विभाग ह सासकीय चिकित्सा महाविद्यालय म काम करइया चार संचालक सह प्राध्यापक मन ल अधिष्ठाता के पद म पदोन्नत करे हे।
– कोंडागांव जिला म आज दू इनामी महिला माओवादी मन पुलिस के सामने आत्मसमर्पण कर दीन। पर्दापाला थाना क्षेत्र म सक्रिय ए माओवादी ल जनमिलिसिया सदस्य के रूप म माओवादी गतिविधि म सामिल रिहीन।
– जांजगीर-चांपा जिला के अकलतरा ब्लाॅक म प्रधानमंत्री आवास योजना के तहत मकान बनाय खातिर गांव वाले मन ले पइसा मांगे के आरोप म रोजगार सहायक ल बर्खास्त कर दे गेहे।
– कोंडागांव जिला म मक्का खरीदी बर किसान मनके पंजीयन करे जात हे। मक्का खरीदी एक दिसंबर ले इकतीस मार्च तक करे जाही।
– इही जिला म बारदाना जमा नइ करे के सेती डोंगरीगुड़ा, जोबा अउ सुकुरपाल के तीन पीडीएस दुकान मनके खिलाफ निलंबन के कार्रवाई करे गेहे।
– जांजगीर-चांपा जिला के अफरीद गांव म तेज रफ्तार मोटर सायकल सड़क तीर खड़े चारपहिया गाड़ी ले टकरा गे। ए हादसा म मोटर साइकिल सवार दू मनखे के मउत होगे। उहें, बलौदा के चारपरा गांव म घलो अज्ञात वाहन के टक्कर ले मोटर साइकिल सवार दू मनखे के मउत होगे।
अउ
– महासमुंद जिला कलेक्टर ह खेत मन म पराली जलइया किसान मन ले पन्द्रह हजार रूपिया जुर्माना वसूल करे के आदेस देहे।