धान खरीदी
प्रदेस म अवइया एक दिसंबर ले समर्थन कीमत म सुरू होवइया धान खरीदी बर किसान मन ल सत्ताईस नवंबर ले टोकन बांटे जाही। चालू विपणन बछर म करीबन ढाई लाख नवा किसान मन अपन पंजीयन कराय हे। कुल मिलाके इक्कीस लाख अड़तालीस हजार किसान मनके पंजीयन करे गेहे। मुख्यमंत्री भूपेश बघेल ह विभागीय अधिकारी मन ल धान बिसाय बर जम्मों तियारी जल्दी पूरा करे के निरदेस दीन।
अधिकारी मन बतईन कि धान खरीदी बर साॅफ्टवेयर म उपार्जन केन्द्र के मैपिंग के काम चलत हे।
इही बीच, खाद्य सचिव डाॅक्टर कमलप्रीत सिंह ह धान बिसाय के तियारी ल देखे बर महासमुंद जिला के आने-आने धान उपार्जन केन्द्र के निरीक्षण करीन। ओमन अधिकारी मन ल जम्मों तियारी तीस नवंबर तक पूरा करे बर किहीन।
ओति, बलरामपुर के जिला कलेक्टर श्याम धावड़े ह घलो जिला म धान खरीदी के तियारी के समीक्षा करीन। ओमन जम्मों ग्राम पंचायत के नोडल अधिकारी मन ल उपार्जन केन्द्र के निरीक्षण करे बर किहीन।
साइबर संगवारी सेवा
राज्य सरकार कोति ले आम लोगन ल आॅनलाईन ठगी ले बचाय खातिर ‘‘साइबर संगवारी सेवा‘‘ सुरू करे गेहे। मुख्यमंत्री भूपेश बघेल ह काली ए अभियान बर साइबर संगवारी गाड़ी ल राजधानी रईपुर ले हरियर झंडी देखाके रवाना करीन। कारीकरम म गृहमंत्री ताम्रध्वज साहू मौजूद रिहीन। पुलिस विभाग कोति ले सुरू करे गे ए अभियान गांव-गंवाई म सरपंच, पंच, सिक्षाकर्मी आंगनबाड़ी कार्यकर्ता, मितानिन, सहायिका अउ बीट आरक्षक के मदद ले गांव के लोगन ल जागरूक करे जाही।
मुख्यमंत्री-लोकार्पण
मुख्यमंत्री भूपेश बघेल ह नागरिक मनके सुभीता म बड़वार बर रईपुर सहर म नवा बने छह ठिन विकास काम के लोकार्पण करीन। एमा स्मार्ट रोड, सिटी कोतवाली, देवेन्द्र नगर सौंदर्यीकरण, जवाहर बाजार, बूढ़ातालाब म म्यूजिकल फाउंटेन अउ कलेक्ट्रेट उद्यान के विकास काम सामिल हे। ए जम्मों काम ल रईपुर स्मार्ट सिटी लिमिटेड कोति ले पूरा करे गेहे। ए मउका म मुख्यमंत्री ह जनसुभीता अउ सेवा के बढ़वार बर करे गे विकास काम के उपलब्धि बतईन।
कारीकरम म जिला के प्रभारी मंत्री रविन्द्र चैबे, गृह मंत्री ताम्रध्वज साहू, नगरीय प्रसासन मंत्री डाॅक्टर शिवकुमार डहरिया, वन मंत्री मोम्मद अकबर के संग कतकोन बड़का अधिकारी अउ जनप्रतिनिधि मौजूद रिहीन।
मन की बात
प्रधानमंत्री नरेन्द्र मोदी इतवार के आकाशवाणी ले ‘‘मन की बात‘‘ कारीकरम म अपन बिचार साझा करही। ये मासिक रेडियो कारीकरम के इकहत्तवां कड़ी होही। एला आकाशवाणी अउ दूरदर्शन के जम्मों केन्द्र प्रसारित करही अउ आकाशवाणी समाचार के वेबसाइट मोबाइल ऐप के संगेसंग आकाशवाणी, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय के यू-ट्यूब चैनल म देखे जा सकही। प्रधानमंत्री के संबोधन के तुरते पाछु आकाशवाणी ले ए कारीकरम क्षेत्रीय भासा म प्रसारित करे जाही। क्षेत्रीय भासा म रतिहा आठ बजे एला फेर ले सुने जा सकही। प्रधानमंत्री के कारीकरम बर लोगन अपन सुझाव नमो ऐप माईजीओवी फोरम या टोल फ्री नंबर एक-आठ शून्य शून्य एक-एक सात आठ शून्य शून्य म भेज सकत हे।
लोकवाणी
मुख्यमंत्री भूपेश बघेल लोकवाणी म ए बखत ‘‘छत्तीसगढ़ सरकार-दो वर्ष का कार्यकाल‘‘ बिसय म प्रदेस के लोगन संग गोठबात करही। ए संबंध म कोन्हों भी श्रोता आकाशवाणी रईपुर के टेलीफोन नंबर – शून्य सात-सात एक -दू चार तीन शून्य पांच शून्य एक अउ दू चार तीन शून्य पांच शून्य दू म काली अउ परन दिन अपन सवाल मंझनिया तीन बजे ले चार बजे के बीच फोन करके रिकार्ड करा सकत हे।
बीएड-प्रवेश परीक्षा
कोरोना महामारी के सेती एसो सरकारी अउ प्राईवेट कालेज मन म बीएड बर प्रवेस परीक्षा नइ ले जाही। विद्यार्थी मनके मेरिट सूची के आधार म काॅलेज म भर्ती दे जाही। एखर बर एस.सी.ई.आर.टी. ह तीन चरण के कारीकरम जारी करे हे। एमा आॅनलाईन अरजी जमा करे के काम काली ले सुरू होही। बीएड के काउंसलिंग अउ प्रवेस के आने काम तीस जनवरी तक पूरा करना हे।
माओवादी-समाचार
दंतेवाड़ा जिला म सुरक्षा बल ह मााओवादी मन कोति ले लुका के राखे दू लाख रूपिया के नगद रकम अउ माओवादी वर्दी बरामद करे हे। ए जिनीस आत्मसमर्पित माओवादी सोमडू के निशानदेही म बड़ेंडोंगर क्षेत्र म मिले हे।
ऐति राजनांदगांव जिला म सुरक्षा बल ह माओवादी मन कोति ले राखे गे विस्फोटक जिनीस के संग आने अउ जिनीस बरामद करे हे। सुरक्षा बल के गश्ती दल ह औंधी के मेटातोड़ के पहाड़ी के जंगल ले आज भिनसरहा सर्चिंग के बेरा माओवादी मन कोति ले रखे करीबन पचास किलो अमोनियम नाइट्रेट बरामद करीन।
उहें, जिला के ही गातापार-मलैदा के कउहाबाहरा के जंगल म बड़ मात्रा म माओवादी जिनीस बरामद करे गेहे।
डीजीपी-बैठक
राज्य के पुलिस महानिदेसक डी.एम. अवस्थी काली ले प्रदेस के जम्मों जिला म होवत आपराधिक घटना के समीक्षा बइठका लीहीं। एखर सुरूवात रईपुर जिला ले करे जाही। ए बइठका म पाछु एक जनवरी ले पच्चीस नवंबर तक के बेरा म होय आपराधिक मामला के स्थिति, कार्रवाई अउ संवेदनसील मामला के समीक्षा करे जाही।
अहमद पटेल-निधन
कांग्रेस नेता अउ राज्यसभा सदस्य अहमद पटेल के आज बिहनिया गुरूग्राम के एक अस्पताल म निधन होगे। ओमन इकहत्तर बछर के रिहीन। कोरोना संक्रमण होय के बाद ओमन ल भर्ती कराय गे रिहीस।
उप राष्ट्रपति एम. वेकैंय नायडू अउ प्रधानमंत्री नरेन्द्र मोदी ह अहमद पटेल के निधन म दुख जताईन हे।
ऐति, छत्तीसगढ़ के मुख्यमंत्री भूपेश बघेल ह घलो श्री पटेल के निधन म श्री पटेल के निधन म दुख जतावत किहीन कि देस बर ए अपूरणीय क्षति हवय। गृहमंत्री ताम्रध्वज साहू घलो श्री पटेल के निधन म सोक जताईन। श्री पटेल ल आज रईपुर के प्रदेस कांग्रेस मुख्यालय राजीव भवन म श्रद्धांजलि दे गीस। पार्टी के प्रदेस अध्यक्ष मोहन मरकाम अउ आने बड़का नेता पदाधिकारी मन ह श्री पटेल ल श्रद्धांजलि दीन।
भाजपा-आरोप
भारतीय जनता पार्टी के प्रदेस अध्यक्ष विष्णुदेव साय ह राज्य सरकार उपर आदिवासी के नाव म राजनीति करे के आरोप लगाईन हे। ओमन कथित रूप ले पुलिस हिरासत म एक आदिवासी सब इंजीनियर के मउत बर सरकार अउ पुलिस के कामकाज के सवाल उठाईन हे। प्रदेस अध्यक्ष ह ए मामला के न्यायिक जांच करके दोसी मनके खिलाफ कड़ा कार्रवाई करे बर किहीन। श्री साय ह विशेषज्ञ चिकित्सक मनके निगरानी अउ परिवार वाले मनके मौजूदगी म मृतक के पोस्टमार्टम के मांग करीन हे। संगेसंग पीड़ित परिवार ल मुआवजा, सरकारी नौकरी अउ न्याय देके मांग करीन हे।
ट्रेन-रद्द
काली छब्बीस नवंबर के अमृतसर ले छूटइया पूजा स्पेशल ट्रेन किसान आंदोलन के सेती अंम्बाला अउ अमृतसर के बीच रद्द रइही। उहें, आज दुरूग ले चलइया जम्मूतवी पूजा स्पेशल ट्रेन परिवर्तित मार्ग लूधियान जलांधर के पठान कोट होके चलही। परन दिन सत्ताईस नवंबर के लहुटे के बेरा ए ट्रेन बदले गे रद्दा ले ही लहुटही।
देवउठनी-एकादशी
देवउठनी एकादसी के परब आज राजधानी रईपुर समेत प्रदेसभर म उछाह के संग मनाय जात हे। ए बेरा म घर म तुलसी अउ भगवान सालीग्राम के बिहाव कराय जाथे। एखर बर गन्ना के मंडप तियार होथे अउ फल-फूल, धूप, दीया ले पूजापाठ करे जाथे। अइसन मानता हे कि आजे के दिन भगवान विष्णु नींद ले जागथे अउ एखरे संग बर-बिहाव सुरू हो जथे।
कोरोना महामारी ल देखत एसो कार्तिक पुन्नी के मउका म राजनांदगांव जिला प्रसासन ह सिवनाथ नंदियां तीर लगइया मोहारा मेला म प्रतिबंध लगा देहे। जिला कलेक्टर टी.के. वर्मा ह बतईन कि एसो कार्तिक पुन्नी म गांव म होवइया मड़ई मेला अउ आने सांस्कृति कारीकरम म रोक रइही। फेर, श्रद्धालु मन कार्तिक पुन्नी के दिन कोरोना गाइड लाइन के पालन करत नंदियां स्नान अउ पूजापाठ कर सकही।
मौसम
चक्रवाती तूफान ‘‘निवार‘‘ के सेती छत्तीसगढ़ के मौसम म सीधा असर नइ होही। फेर, एखर सेती राज्य म बंगाल के खाड़ी ले आवत नमी ले मौसम बदल सकत हे।
रईपुर स्थित मौसम विज्ञानी के मुताबिक प्रदेस के कई ठन क्षेत्र म आज अउ काली अउ परन दिन बरसा होय के संभावना हवय। उहें, बस्तर, रईपुर अउ दुरूग म काली बादर छाय रइही अउ बरसा हो सकत हे। बिलासपुर संभाग के एक-दू जघा म बरसा होय के संभावना हे।